Yesuusa Kaalliyaageeta Oottiyo Oosuwan Ufaytta

“Hegaa gishshau, intte biidi, . . . tana kaalliyaageeta oottite.”—MAATIYOOSA 28:19.

1-3. (a) Geeshsha Maxaafaa xannaˈiya asa demmiyo wode darotuyyo aybi siyettii? (b) Woygiya oyshata beˈanee?

AMARKKAA biittan Hinddi giyo qaalaa haasayiya citan haggaaziya issi michiyaa, “aadhida 11 saaminttau Pakisttaaneppe yiida issi keettaa asaa Geeshsha Maxaafaa xannaˈissaydda takkaas” yaagada xaafaasu. Gujjadakka, “nuuni laggetettaa medhidoogee qoncce. Ha keettaa asay mata wode simmidi Pakisttaane biyoogaa qoppiyo wode tau ayfiyan afuttay yooliyoolees. Tau hegaadan siyettiyoy eta laggetettay attiyoogan azzaniyo gishsha xallaassa gidennan, eta Yihoowabaa tamaarissiyoogan demmido ufayssaakka qoppiyo gishshassa” yaagaasu.

² Ha micheegaadan neenikka issi ura Geeshsha Maxaafaa xannaˈissiyoogan beettiya ufayssaa demma eray? Yesuusinne koyro xeetu layttan a kaallidaageeti, erissiyo ashkkara oottiyo oosuwan keehippe ufayttidosona. Yesuusi loohissido 70⁠u erissiyo ashkkarati haggaazuwan demmidoban ufayttidoogaa yootido wode, Yesuusikka ‘geeshsha ayyaanan ufayttiis.’ (Luqaasa 10:17-21) Hegaadankka, ha wodiyan daroti erissiyo ashkkara oottiyoogan keehi ufayttoosona. Ufayssan minnidi oottiya aassiyaageeti, 2007n aginan aginan amakaayiyan 6 miiloonenne 5 xeetu shaˈu asaa Geeshsha Maxaafaa xannaˈissidosona!

³ Gidikkokka, aassiyaageetuppe issoti issoti hanno gakkanau Geeshsha Maxaafaa xinaate demmibookkona. Harati mata wodeppe doommidi  xinaate demmennan aggana danddayoosona. Nuuni Geeshsha Maxaafaa xinaatiyaa demmanau baaxetiyo wode ayba paaceti gakkana danddayiyoonaa? He paaceta waatidi xoonana danddayiyoo? “Biidi, . . . tana kaalliyaageeta oottite” yaagiya Yesuusa azazuwaa azazettanau nuuyyo danddayettiyaabaa ubbaa oottiyo wode ay anjjo demmiyoo?—Maatiyoosa 28:19.

Nuuni Ufayttennaadan Oottana Danddayiya Paaceta

4, 5. (a) Alamiyan issi issi heeran daro asay ayba zaaruwaa immii? (b) Hara heeran aassiyaageeta ayba paacee gakkii?

⁴ Alamiyan issi issi heeran, asay nu xuufiyaa wudidi ekkeesinne nunaara Geeshsha Maxaafaa xannaˈanau ufayttees. Awusttiraaliyaappe Zambbiyaa biidi guutta wodiyau haggaazida issi azinaynne machiyaa: “Nuuni siyidobay tuma. Zambbiyaa biittay sibikatiyan daro ayfee beettiyo soho. Ogiyan sabbakiyoogee keehippe ufayssiyaaba! Asay nuukko yiidi haasayissees; ubba issoti issoti koyiyo maxeetee awugaakko oychoosona” yaagidi xaafidosona. Mata wode issi laytti, Zambbiyan deˈiya ishatinne michoti 200,000⁠ppe dariya asaa Geeshsha Maxaafaa xannaˈissidosona—hegee issi aassiyaagaassi amakaayiyan issuwaappe dariya xinaatee deˈees giyoogaa.

⁵ Gidikkokka, hara heeran aassiyaageeti xuufiyaa asau immanaunne Geeshsha Maxaafaa xannaˈissiyo asa demmanau metootana danddayoosona. Aybissi? Aassiyaageeti sooppe soo biyo wode asay darotoo son deˈenna; son deˈiyaageetikka haymaanootebaa siyanau koyennaageeta gidana danddayoosona. Eti diccidoy haymaanoote kaallenna keettaana gidana danddayees; woykko worddo haymaanootiyaa kaalliyaageetu hanotaa, giishin eti loˈˈo milatiya iitata gidiyoogaa ixxiyaageeta gidana danddayoosona. Daro asati worddo henttanchati qohidoogeeta gidana danddayoosona. (Maatiyoosa 9:36) Hegaa mala asati Geeshsha Maxaafaabaa tobbanau siranaagee qoncce.

6. Issi issi aassiyaageetuyyo deˈiya pacay ayba gidana danddayii?

 ⁶ Issi issi ammanettida aassiyaageeta ufayttennaadan oottana danddayiya hara paacee gakkees. Eti issi wode erissiyo ashkkara oottiyoogan keehi mino gidikkokka, haˈˈi payyatettaa pacaappe woykko ceegatettaappe denddidaagan wolqqaa xayidosona. Nuuni nu bolli ehaana danddayiyo abbe xayssiya issi issibatakka qoppa. Leemisuwau, Geeshsha Maxaafaa xinaatiyaa xannaˈissanau giday baynnabadan neeyyo siyettii? Paaroona haasayissanaadan Yihooway kiittido wode Muusessi siyettidaagaadan neessi siyettana danddayees. Muusee: “Abeet Godau, taani hagaappe kasekka, woikko neeni ne ashkkaraayyo haasayidoosappe simminkka taani biddaa danddayikke” yaagiis. (Kessaabaa 4:10) Tau gidi baawa giyoogaara gayttida harabay, erissiyo ashkkara oottiyoogan murutikke yaagiyoogaa. Nuuni loˈˈo asttamaare gidenna gishshau, issi ura erissiyo ashkkara oottana danddayokko giidi hirggana danddayoos. He hirggaappe denddidaagan Geeshsha Maxaafaa xannaˈissokko gaana danddayoos. Ha paaceta waatidi xoonana danddayiyoo?

Ne Wozanaa Giigissa

7. Yesuusa a oosuwau denttettiday aybee?

⁷ Koyro tanggoy nu wozanaa giigissiyoogaa. Yesuusi: “Asa dooni a wozanan kumidabaappe haasayees” yaagiis. (Luqaasa 6:45) Yesuusa a oosuwau denttettiday haratu goˈˈau wozanappe qoppiyoogaa. Leemisuwau, i Ayhudati ayyaanaaban qohettidaageeta beˈido wode etau “qarettiis.” Ba erissiyo ashkkaratuyyo: “Kattai daro; . . . simmi kattaa Godai kattaa cakkanau oosanchcha yeddana mala, a woossite” yaagiis.—Maatiyoosa 9:36-38.

8. (a) Nuuni aybaa qoppiyoogee loˈˈoo? (b) Geeshsha Maxaafaa xannaˈiya issinna giidobaappe ay tamaarana danddayiyoo?

⁸ Erissiyo ashkkara oottiyo wode, issi uri wodiyaa immidi nuna Geeshsha Maxaafaa xannaˈissidoogan ay keena goˈettidaakko wozanappe qoppiyoogee loˈˈo. Nuuni haggaazuwan demmiyo asatubaa, qassi nuuni yootiyo kiitaa ezggidi eti ay keena goˈˈettanaakkokka qoppa. Issi maccaasiyaa ba deˈiyo biittan deˈiya Yihoowa Markkatu macara biiruwau kaallidi deˈiyaagaadan xaafaasu: “Ta soo yiidi tana xannaˈissiya Yihoowa Markkata keehippe galatiyoogaa yootana koyays. Taani daro oyshaa oychiyoogan eta ubbatoo gamˈˈettiyo gishshau, taban eti issi issitoo salettanaagaa erays. SHin eti danddayancha; qassi wozanappe koyidi bantta tamaaridobaa tana tamaarissoosona. Taani ha asatuura gayttidoogan Yihoowanne Yesuusa galatays.”

9. Yesuusi aybi bolli xeelaa wottidee? Nuuni waatidi a leemisuwaa kaallana danddayiyoo?

⁹ Yesuusi tamaarissidobaa ekkiday ubba asaa gidennaagee qoncce. (Maatiyoosa 23:37) Issi issi asati guutta wodiyau a kaallidosona shin, a timirttiyaa dosibeenna gishshau, “naa77antto a kaallibookkona.” (Yohaannisa 6:66) Gidikkokka, issoti issoti koshshaa bessibeenna gishshau, Yesuusi ba kiitau goˈˈi baynnabadan qoppibeenna. I zerido zerettaappe daro baggay ayfibeennaba gidikkonne, Yesuusi ba oosuwaa goˈˈaa bolli ba xeelaa wottiis. I kattay cahaa bessidoogaa akeekiis; qassi he cahan maaddiyoogan keehippe ufayttiis. (Yohaannisa 4:35, 36 nabbaba.) Kattaa giddon deˈiya mela sohuwaa xallaa xeelliyoogaappe, Yesuusaagaadan nu moottan demmana cahaa bolli xeelaa wottiyoo? Waanidi hegaa mala loˈˈo xeelaa oyqqidi deˈana danddayiyaakko ane pilggoos.

Cakkanau Halchada Zera

10, 11. Ne ufayssaa naagada deˈanau ay oottana danddayay?

¹⁰ Goshshanchay cakkanau halchidi kattaa zerees. Hegaadan, nuunikka Geeshsha Maxaafaa xinaatiyaa doomissanau halchidi sabbakana koshshees. Gidikkokka, neeni haggaazuwan ubbatoo shaahettaydda daro asaa son demmennaba woykko zaarettada oychiyoogeeta demmana danddayennaba milatikko shin? Hegee hidootaa qanxxissana danddayees. Yaatin haggaazuwau sooppe soo biyoogaa aggaaguutee? Aggennaagee qoncce! Daro wodiyau goˈettido ha muruta hiillan haˈˈikka daro asau sabbakiiddi deˈoos.

¹¹ Gidikkokka, ne ufayssaa naagada deˈanau asaa demmana danddayiyo hara ogeta gujjada sabbakiyo hiillaa aassana danddayay? Leemisuwau, ogiyan woykko eta ooso sohuwan asaayyo markkattanau mala eray? Silkkiyan asau  sabbakana danddayay; woykko neeni Kawotettaa kiitaa yootido asaa haasayissanau eta silkke quxuriyaa ekkana danddayay? Aggennaaninne hanotaadan laammada sabbakiyoogan, Kawotettaa kiitau loˈˈo zaaruwaa immiya asaa demmada ufayttana danddayaasa.

Asay SHeneho Giyo Hanotaa Danddayiyoogaa

12. Nu moottan deˈiya daro asay sheneho giyaaba milatikko waatana danddayiyoo?

¹² Ne moottan deˈiya daro asay haymaanootiyaabaa sheneho giyaagaa gidikko shin? Eta koshshaa denttettiya ogiyan eta haasayissana danddayay? PHauloosi Qoronttoosan deˈiya ammaniyaageetussi: ‘Taani Ayhudatussi etaara eta gidada deˈaas. Ta huuphen higgiyaappe garssaara deˈikke. SHin higgiyaappe garssaara deˈiyaageetussi higgiyaappe garssaara deˈiya asa mala gidaas’ yaagidi xaafiis. PHauloosa denttettidabay aybee? I: “Taani ai ogiyaaninne amarida asata ashshanau, ubba asatuura ubbaban eta mala gidaas” yaagiis. (1 Qoronttoosa 9:20-22) Nuunikka hegaadan, nu moottan deˈiya asaa koshshaa denttettiya qofaa demmana danddayiyoo? Haymaanoote kaallennaba gidikkokka, daro asati bantta soo asaa gaytotettaa minttanau koyoosona. Qassi eti deˈuwaa halchuwaa eranau koyana danddayoosona. Hegaa mala asatussi eta ufayssiya ogiyan Kawotettaa kiitaa yootana danddayiyoo?

13, 14. Erissiyo ashkkara oottiyo oosuwan demmiyo ufayssaa gujjanau ay oottana danddayiyoo?

¹³ Daro asay sheneho giyaaba milatiyo heerankka, aassiyaageetuppe daroti erissiyo ashkkara oottiyo oosuwan demmiyo ufayssay gujjiiddi deˈees. Waanidi? Hara biittaa qaalaa tamaariyoogaana. Layttay 60⁠ppe bolla gidido issi azinaynne machiyaa, CHaynaappe yiida, shaˈan qoodettiya tamaaretinne eta soo asay bantta gubaaˈiyaa moottan deˈiyoogaa akeekidosona. Azinay, “hegee nuuni CHayna qaalaa tamaaranaadan denttettiis” yaagiis. Gujjidikka, “gallassi gallassi he qaalaa xannaˈanau wodiyaa koshshikkokka, hegee nu heeran deˈiya CHayna biittaa asatuppe darota Geeshsha Maxaafaa xannaˈissanaadan maaddiis” yaagiis.

¹⁴ Neeni hara biittaa qaalaa tamaaranau danddayennaba gidikkokka, hara qaalaa haasayiya asaa demmiyo wode, Ubba Deriyaa Asau Yootiyo Mishraachuwaa yaagiya bukleetiyaa loytta goˈettana danddayaasa. Neeni demmiyo asay haasayiyo qaalan giigida xuufiyaakka ubbatoo demmana danddayaasa. Neegaappe dumma qaalaynne wogay deˈiyo asaa haasayissanau baaxiyaanne wodiyaa koshshiyoogee tuma. Gidikkokka, “Daro zerettaa zeriya urai qassi daro kattaa cakkana” yaagiya, Xoossaa Qaalan deˈiya baaso siraataa akeeka.—2 Qoronttoosa 9:6.

Gubaaˈiyan Deˈiya Ubbaa Gujjees

15, 16. (a) Erissiyo ashkkara oottiyoogee gubaaˈiyan deˈiya ubbaa ooso gididoy aybissee? (b) Cimidaageetuyyo he oosuwan ayba sohoy deˈii?

¹⁵ Gidikkokka, erissiyo ashkkara oottiyoogee issi ura xallay oottiyooba gidenna. Hegaappe, gubaaˈiyan deˈiya ubbay oottiyooba. Aybissi? Yesuusi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Qassi Geeshsha Maxaafaa xannaˈiyaageeti shiiquwan beettiyo wode, eti yan beˈiyo siiquwan darotoo omoodettiyoogee tuma. Geeshsha Maxaafaa xannaˈiya issinna: “SHiiquwan beettiyoogee tana keehippe ufayssees. Asay tana ufayssan mokki ekkees!” yaagada xaafaasu. Yesuusi bana kaalliyaageeta eta soo asay ixxana danddayiyoogaa yootiis. (Maatiyoosa 10:35-37 nabbaba.) Gidikkokka, eti gubaaˈiyan ayyaanaaban daro “ishantta, michchentta, aayeta, naata” demmanaagaa qaalaa geliis.—Marqqoosa 10:30.

¹⁶ Cima ishatinne michoti, Geeshsha Maxaafaa xannaˈiyaageeti dichaa bessanaadan keehippe maaddoosona. Ayba ogiyan? Issi issi  cimidaageeti Geeshsha Maxaafaa xinaatiyaa xannaˈissana danddayennaba gidikkokka, gubaaˈiyaa shiiqotun eti immiyo minttettiya qofay siyiya ubbaa ammanuwaa minttees. Eti “xillo de7⁠uwaa” ogiyan simerettido hanotay, gubaaˈiyau puulaa gujjees; qassi suure wozanay deˈiyoogeeti Xoossaa dirijjitiyaakko yaanaadan oottees.—Leemiso 16:31.

Yashshaa Xooniyoogaa

17. Giday baynnabadan siyettiya qofaa waatidi xoonana danddayiyoo?

¹⁷ Geeshsha Maxaafaa xannaˈissanau neeyyo giday baynnabadan siyettikko ay oottana danddayay? Yihooway Muusessi geeshsha ayyaanaanne aara oottanaadan a ishaa Aaroona immidi, a maaddidoogaa hassaya. (Kessaabaa 4:10-17) Mishiraachuwaa sabbakiyo oosuwan geeshsha ayyaanay nuna maaddanaagaa Yesuusi qaalaa geliis. (Oosuwaa 1:8) Hegaa bollikka, Yesuusi naaˈˈa naaˈˈa oottidi sabbakanaadan kiittiis. (Luqaasa 10:1) Yaatiyo gishshau, Geeshsha Maxaafaa xannaˈissiyoogee neeyyo deexxiyaaba gidikko, Xoossay ba ayyaanan aadhida eratettaa immanaadan woossa; yaatada nena minttettanaadaaninne maaddanaadan temokroy deˈiyo uraara sabbaka. Yihooway ha wolqqaama oosuwaa ootissanau, coo asata giishin, “sa7an de7⁠iya laafata” goˈettanau dooridoogaa akeekiyoogee ammanuwaa minttiyaaba.—1 Qoronttoosa 1:26-29.

18. Issi ura Geeshsha Maxaafaa xannaˈissada maaddana danddayikke giyo yashshaa waati xoonana danddayiyoo?

¹⁸ Issi ura Geeshsha Maxaafaa xannaˈissada maaddana danddayikke yaagiyo yashshaa waatidi xoonana danddayiyoo? Erissiyo ashkkara oottiyo oosoy quma kato mala gidennaagaa akeekiyoogee loˈˈo; qumi maliˈˈiyoy woy aggiyoy he kattiya ura hanotaana. Hegaappe dumma hanotan, erissiyo ashkkara oottiyoogee nu baaxiyaappe aadhiyaabaa gujjees. Issi uri baakko yaanaadan oottiyoogan he oosuwan gita sohoy deˈiyoy Yihoowa. (Yohaannisa 6:44) Nuuninne gubaaˈiyan deˈiya harati he tamaaree dichaa bessanaadan maaddanau nuuyyo danddayettida ubban tamaarissiyo hiillaa goˈettoos. (2 Ximootiyoosa 2:15 nabbaba.) Tamaareekka ba tamaariyoobaa oosuwan peeshshana koshshees. (Maatiyoosa 7:24-27) Issi uri Geeshsha Maxaafaa xinaatiyaa aggiyo wode, nuuni azzanana danddayoos. Geeshsha Maxaafaa xinaateti loˈˈo dooruwaa dooranaagaa hidootoos; shin issi uri ba huuphe babaa “Xoossau yootana.”—Roome 14:12.

Demmiyo Woytoy Aybee?

19-21. (a) Geeshsha Maxaafaa xannaˈissiyoogan ayba goˈˈaa demmiyoo? (b) Sabbakiyo oosuwaa oottiya ubbata Yihooway waati xeellii?

¹⁹ Geeshsha Maxaafaa xannaˈissiyoogee Kawotettaa kaseyiyoogan nu xeelaa wottanaadan oottees. Hegee Xoossaa Qaalaa tumaa ciimma qofay nu wozanaaninne nu guuggiyan deˈanaadankka oottees. Hegaadan haniyoy aybissee? Baaraaka giyo issi aqinyee: “Geeshsha Maxaafaa xannaˈissiyoogee issi uri Xoossaa Qaalaa loytti tamaaranaadan oottees. Hara ura loytta tamaarissanaayyo kasetada ta ammanuwaa minttana koshshiyoogaa eraas” yaagidi qonccissiis.

²⁰ Neeni Geeshsha Maxaafaa xannaˈissaydda deˈennaba gidikko, Xoossaa sinttan ne haggaazuwau waagi baawa giyoogee? Gidennaagee qoncce! Yihooway nuuni a sabbanau oottiyo baaxiyaa keehippe nashshees. Sabbakiyo oosuwaa oottiya ubbati Xoossaara “issippe oottiya a oosanchchata.” Hara baggaara, Xoossay nuuni zerido zerettay diccanaadan oottiyoogaa beˈiyoogee, Geeshsha Maxaafaa xannaˈissiyoogan demmiyo ufayssay gujjanaadan oottees. (1 Qoronttoosa 3:6, 9) Eemii giyo issi aqinyiyaa, “Issi Geeshsha Maxaafaa xinaatee dichaa bessiyoogaa neeni beˈiyo wode, he urau maalaalissiya imotaa, giishin Yihoowa eriyoonne merinaa deˈuwaa demmiyo injjiyaa medhanau nena goˈettido gishshau Yihoowa keehippe galataasa” yaagaasu.

²¹ Geeshsha Maxaafaa xinaatiyaa doomissanaunne xannaˈissanau nuuyyo danddayettida ubbaa oottiyoogee, ha wodiyan Xoossau haggaaziyoogan nu xeelaa wottanaadaan ootteesinne sinttappe ooratta alamiyan demmiyo deˈuwau nu hidootaa minttees. Yihoowa maaduwan, nuuni yootiyoobaa ezggiyaageeti atotettaa demmanaadan maaddanaukka danddayoos. (1 Ximootiyoosa 4:16 nabbaba.) Hegee ayba ufayssiyaaba gidanee!

Hassayay?

• Issoti issoti Geeshsha Maxaafaa xannaˈissennaadan diggana danddayiya paaceti awugeetee?

• Nu moottan deˈiya daroti sheneho giyaageeta gidikko ay oottana danddayiyoo?

• Geeshsha Maxaafaa xannaˈissiyoogan ayba woytuwaa demmiyoo?

[Oyshata]

[Sinttaa 15n deʼiya misiliyaa]

Loˈˈo wozana koshshay deˈiyoogeeta demmanau ne haggaazuwaa hiillaa aassay?