Yesuusa Timirttee Neeni Woosan Laamiyaa Oottanaadan Maaddii?

“Yesuusi ba haasayiyoogaa wurssido wode, asai i tamaarissiyoogan garamettiis.”—MAATIYOOSA 7:28.

1, 2. Yesuusi tamaarissido ogiyan asay garamettidoy aybissee?

XOOSSAU mexi issi Naˈaa Yesuus Kiristtoosi tamaarissidobaa nuuni siyanaunne nu deˈuwan oosuwan peeshshanau koshshees. Aagaadan tamaarissida asi baynnaagee tuma. I Deriyaa Bollan Tamaarissido Timirttiyan asay garamettidoy hegaassa!—Maatiyoosa 7:28, 29 nabbaba.

² Yihoowa Naˈay, bantta shoociina haasayau polo gidenna asaa naatu qofaa baaso oottida higgiyaa tamaarissiyaageetuugaadan tamaarissibeenna. Kiristtoosa timirttiyau pulttoy Xoossaa gidiyo gishshau, i “alaafetettai de7⁠iyo asadan” tamaarissiis. (Yohaannisa 12:50) Yesuusi Deriyaa Bollan Tamaarissido Timirttiyaappe attidaagee nuuni woosan laamiyaa oottana danddayiyoogaanne oottana koshshiyoogaa xeelliyaagan waatidi maaddiyaakko ane beˈoos.

Loˈˈo Milatiya Iitatuugaadan Mule Woossoppa

3. Yesuusi Maatiyoosa 6:5n yootidobaa qanttan qonccissa.

³ Woosay tumu goynuwan keehi koshshiyaabatuppe issuwaa; qassi nuuni ubbatoo Yihoowakko woossana koshshees. Gidikkokka, Yesuusi Deriyaa Bollan Tamaarissidobay nuuni woosan laamiyaa oottanaadan maaddana koshshees. I: “Xoossaa woossiiddi, lo77⁠o milatiya iitatudan hanoppite; aissi giikko, banttana asi be7ana mala; Aihuda woosa keettatuuninne ogetu doonan eqqidi, Xoossaa woossiyoogaa dosoosona; taani intteyyo tumaa odais; eti bantta woituwaa muleera ekkiichchidosona” yaagiis.—Maatiyoosa 6:5.

4-6. (a) Parisaaweti “Aihuda woosa keettatuuninne ogetu doonan eqqidi” woossiyoogaa dosiyoy aybissee? (b) Hegaa mala loˈˈo milatiya iitati ‘bantta woytuwaa muleera ekkiichidoy’ ayba ogiyaanee?

⁴ Yesuusi erissiyo ashkkarati woossiyo wode, xillo milatidi asaa cimmiya, banttana banttarkka xillo oottiya Parisaawetu mala ‘loˈˈo milatiya iitata’ milatanau bessenna. (Maatiyoosa 23:13-32) He loˈˈo milatiya  iitati “Aihuda woosa keettatuuninne ogetu doonan eqqidi” woossiyoogaa dosoosona. Aybissi? “Asi be7ana mala” hegaadan oottoosona. Koyro xeetu layttan Ayhudati beeta maqidasiyan xuuggiyo yarshshuwaa shiishshiyo wode (maallado heezzu saate heeraaninne gallassi uddufun saate heeran) woossiyo meezee deˈees. Yerusalaamen deˈiya daroti goynuwau beeta maqidasiyan shiiqida asaara issippe woossoosona. Katamaappe gaxan deˈiya wogaa mintti naagiya Ayhudati darotoo ‘Ayhuda woosa keettatun eqqidi’ issi gallassan naaˈˈutoo woossoosona.—Luqaasa 18:11, 13⁠ra gatta xeella.

⁵ Qommoora qonccida woosa saatiyan daro asay beeta maqidasiyaa woykko Ayhuda woosa keettaa matan deˈenna gishshau, ba deˈiyoosan woossana danddayees. Issoti issoti he woosaa saatiyan “ogetu doonan” eqqana koyoosona. Eti he ogiyaara aadhiya “asi be7ana mala” koyoosona. Beˈiyaageeti nashshanaadan loˈˈo milatiya iitati “banttau lo77⁠o milatanau Xoossaa woosaa adussoosona.” (Luqaasa 20:47) Nuuyyo deˈana koshshiya xeelay hegaa gidenna.

⁶ Hegaa mala loˈˈo milatiya iitati “bantta woituwaa muleera” ekkiichidoogaa Yesuusi qonccissiis. Eti keehippe koyidoy asan erettiyoogaanne asaappe galataa demmiyoogaa; qassi eti demmanabay hegaa xalla. Eti milatissanau woossiyo woosau Yihooway zaaro immenna gishshau, hegee eti demmana kumetta woyto. Hara baggaara, Yesuusi ha timirttiyan gujjidi yootidoogaadan, tumuppe Kiristtoosa kaalliyaageeti woossiyo woosau Xoossay zaaruwaa immees.

7. Nu ‘soo gelidi’ woossanaadan imettida zoriyaa birshshettay aybee?

⁷“SHin intte Xoossaa woossiyo wode, intte soo gelite; kariyaa gorddidi, geeman de7⁠iya intte Aawaa woossite; geeman be7⁠iya intte Aawai intteyyo qoncciyan immana.” (Maatiyoosa 6:6) Yesuusi soo gelidi kariyaa gorddidi woossanaadan yootidoogee, issi uri gubaaˈiyaa kalˈˈatidi woossana danddayenna giyoogaa gidenna. Ha zoree issi asi woossiyo wode hara asay beˈanaadaaninne nashshanaadan giidi qoncciyan woossana bessenna giyoogaa. Xoossaa asaa kalˈˈatidi woossiyo maatay nuuyyo imettiyo wode hagaa akeekana koshshees. Qassi woosaa xeelliyaagan Yesuusi yootido kaallidi deˈiya zoriyaa oosuwan peeshshoos.

8 Maatiyoosa 6:7n deˈiyaagaadan nuuni haakkana koshshiya woossiyo ogee awugee?

⁸“Xoossaa intte woossiyo wode, Xoossaa ammanenna asaagaadan, mela [zaaretti zaaretti issibaa] biddoppite; aissi giikko, Xoossaa ammanenna asai adussidi Xoossaa woossin siyees giidi qoppees.” (Maatiyoosa 6:7) Yaatiyo gishshau, Yesuusi hara likke gidenna woossiyo ogiyaa qonccissiis; hegeekka zaaretti zaaretti issibaa biddiyoogaa. Nuuni wozanappe koyiyoobaanne galataa woosan qonccissiyo wode mule zaarettana koshshenna gibeenna. Yesuusi hayqqanaappe kase qammi Geetesemaane giyo sohuwan ‘zaaretti zaarettidi issibaa’ woosan oychiis.—Marqqoosa 14:32-39.

9, 10. Nuuni zaaretti zaarettidi woossana koshshennay ayba ogiyaanee?

⁹ “Xoossaa ammanenna” asaagaadan nuuni issibaa zaaretti zaaretti woossiyoogee bala. Eti koshshenna darobaa gujjiya bantta wozanan oyqqido qaalata ‘zaaretti zaarettidi’ goosona. Worddo xoossaa Baˈaalayyo goynniyaageeti “maalladoppe seeta gallassi gakkanaashin,” “Hai Ba7aalaa, nu woosaa siya” yaagidi woossidoogee eta aybanne goˈˈibeenna. (1 Kawotu 18:26) Ha wodiyan miilooniyan qoodettiya asay Xoossay “siyees giidi” mela zaaretti zaaretti woossees. Gidikkokka, zaaretti zaarettidi “adussidi” woossiyoogau Yihoowa xeelan waagi baynnaagaa nuuni akeekanau maaddiyaaba Yesuusi yootiis. Yesuusi gujjidikka hagaadan giis:

¹⁰“Hegaa gishshau, he asaagaadan hanoppite;  aissi giikko, intte Aawai inttena koshshiyaagaa intte woossanaappe kasetidi erees.” (Maatiyoosa 6:8) Ayhuda haymaanootiyaa kaalettiya daroti woossiyo wode Ayhuda gidenna asatuugaadan daro qaalaa goˈettoosona. Sabaa, galataanne koshshiyaabaa minttidi oychiyoogaa gujjiya wozanappe woossiyo woosay tumu goynuwan keehi koshshiyaaba. (Piliphphisiyuusa 4:6) Gidoppe attin, Xoossay dogiyoobadan nuuni issibaa zaaretti zaarettidi oychiyoogee bala. Nuuni woossiyo wode, nuussi ‘koshshiyaagaa nu woossanaappe kasetidi eriyaagaakko’ woossiyoogaa akeekana koshshees.

11. Nuuni cora asaa kalˈˈatidi woossiyo maataa demmiyo wode ay akeekana koshshii?

¹¹ Bessenna woosaa xeelliyaagan Yesuusi tamaarissidobay adussidinne malˈˈettidi woossiyoogan Xoossay ufayttennaagaa nuna akeekissana koshshees. Cora asaa kalˈˈatidi woossiyo woosay ezggiyaageeti maalaalettanaadan woykko awude wurssanddee gaanaadan oottana koshshennaagaakka akeekana bessees. Ezggiyaageetuyyo woosan erissuwaa woykko zoriyaa yootiyoogeekka, Yesuusi Deriyaa Bollan Tamaarissidoogaara moggottenna.

Nuuni Woygi Woossanaakko Yesuusi Tamaarissiis

12. “Ne geeshsha sunttai anjjetto” giyoogee koshshido gaasuwaa waatada qonccissuutii?

¹² Woosaa shiishshiyo gita maataa bessenna ogiyan goˈettennaadan Yesuusi akeekissidaba gidikkokka, ba erissiyo ashkkarati woygi woossanaakko tamaarissiis. (Maatiyoosa 6:9-13 nabbaba.) I eta tamaarissanau goˈettido woosay wozanan oyqqidi zaaretti zaarettidi gaana koshshiyaaba gidenna. Hegaappe, nuuni shiishshiyo woosau hegee leemiso. Leemisuwau, Yesuusi “Saluwan de7⁠iya nu Aawau, ne geeshsha sunttai anjjetto” yaagidi doommiyoogan Xoossau koyro sohuwaa immiis. (Maatiyoosa 6:9) Yihooway saˈaappe haakkidi “saluwan” deˈiyaagaa, nuna Medhidaagaa gidiyo gishshau, nuuni a “nu Aawau” giyoogee bessiyaaba. (Zaarettido Wogaa 32:6; 2 Odiya 6:21; Oosuwaa 17:24, 28) Cora qoodaa malaatiya “nu” giya qaalaa goˈettiyoogee, nu mala Kiristtaanetussikka Xoossaara mata dabbotay deˈiyoogaa nuna akeekissana koshshees. “Ne geeshsha sunttai anjjetto” giyaagee, Edenen makkalay denddoosappe doommidi kuurettida cashshaappe ba sunttaa geeshshanau Yihooway tangguwaa ekkanaadan shiishshiyo woosaa. Yihooway iitatettaa saˈaappe xayssidi, ba sunttaa geeshshidi he woosau zaaruwaa immana.—Hizqqeela 36:23.

13. (a) “Ne kawotettai yo” yaagiya woosay waani polettanee? (b) Xoossaa shenee saˈan haniyoogee ay gujjii?

 ¹³“Ne kawotettai yo; ne shenee saluwan hanidoogaadan, sa7ankka hano.” (Maatiyoosa 6:10) Yesuusi tamaarissido leemiso woosan deˈiya ha oyshaara gayttidaagan, “kawotettai” Kiristtoosinne hayquwaappe denddida “geeshshati” issippe ayssiyo saluwan deˈiya Masiyaa Kawotettaa gidiyoogaa nuuni akeekana koshshees. (Daaneela 7:13, 14, 18; Isiyaasa 9:6, 7) I “yo” giyoogee Xoossaa Kawotettay yiidi Xoossaa haaruwaara eqettiya saˈan deˈiya ubbaa xayssanaadan oychiyo woosa. Hegee mata wode saˈay geeshshatettay, sarotettaynne ubbabay kumido gannate gidanaadan ogiyaa dooyees. (Mazamure 72:1-15; Daaneela 2:44; 2 PHeexiroosa 3:13) Yihoowa shenee saluwan haniiddi deˈees; qassi saˈan hananaadan oychiyoogee Xoossay beni wode oottidoogaadan ha wodiyankka banaara eqettiya asata xayssiyoogaa gujjin ba sheniyaa saˈan polanaadan woossiyoogaa.—Mazamure 83:1, 2, 13-18 nabbaba.

14. “Hachchi hachchi koshshiya” qumau woossiyoogee bessiyaaba gididoy aybissee?

¹⁴“Hachchi hachchi koshshiya qumaa nuuyyo hachchi imma.” (Maatiyoosa 6:11; Luqaasa 11:3) Nuuni woosan ha oyshaa oychiyo wode, Xoossay ‘hachiyyo’ nuussi koshshiya qumaa immanaadan oychoos. Hegee, Yihooway nuuyyo koshshiyaabaa galla galla kunttana danddayiyoogaa ammanettiyoogaa bessees. Hegee koshshiyaabaappe darobau woossiyo woosa gidenna. Hachissi nuuyyo koshshiyaabau woossiyo ha woosay Xoossay Isiraaˈeeleti ubbay mannaa “hachchi hachchissi gidiyaagaa xalaalaa” maxanaadan azazidoogaa hassayissees.—Kessaabaa 16:4.

15. “Nuuni nuna naaqqidaageetuyyo atto giyoogaadan, neenikka nu naaquwaa atto ga” yaagiyo woosay woygiyoogaakko qonccissa.

¹⁵ Yesuusi tamaarissido woosan kaalliya oyshay nuuni oottanau koshshiya issibaa nuna akeekissees. Yesuusi: “Nuuni nuna naaqqidaageetuyyo atto giyoogaadan, neenikka nu naaquwaa atto ga” yaagiis. (Maatiyoosa 6:12) Yihooway nuussi atto gaanaadan naagana danddayiyoy nuna ‘naaqqidaageetuyyo atto giyoogaa’ xalaalaana. (Maatiyoosa 6:14, 15 nabbaba.) Nuuni haratuyyo coo atto gaana koshshees.—Efisoona 4:32; Qolasiyaasa 3:13.

16. Paaciyaappenne iitaappe ashshanaadan woossiyo woosaa nuuni waatidi akeekana koshshii?

¹⁶“Nuna iitabaappe [“iitaappe,” NW] ashshanaappe attin, paacen gelissoppa.” (Maatiyoosa 6:13) Yesuusi tamaarissido woosan issi mala milatiya ha naaˈˈubata nuuni waatidi akeekana koshshii? Nagaraa oottanaadan Yihooway nuna paaccennaagee erettidaagaa. (Yaaqooba 1:13 nabbaba.) Paacciyaagee ‘iitaa,’ Seexaanaa. (Maatiyoosa 4:3) Gidikkokka, Geeshsha Maxaafay Xoossay hananaadan paqqadiyoobaa i oottiyoobadan yootees. (Uruto 1:20, 21; Eranchchaa 11:5) Yaatiyo gishshau, “paacen gelissoppa” giyoogee nuuni Yihoowayyo azazettennaadan paacettiyo wode kunddanaadan i paqqadenna mala woossiyoogaa giyoogaa. Wurssettan, ‘iitaappe ashsha’ giyo woosay Seexaanay nuna xoonanaadan Yihooway paqqadenna mala oychiyoogaa. Qassi Xoossay nu “wolqqai danddayiyoogaappe aadhdhiya paaciyan “ nuuni  paacettanaadan koyennaagaa ammanettana danddayoos.—1 Qoronttoosa 10:13 nabbaba.

Aggennan ‘Woossite, Koyitenne Kariyaa Qoxxite’

17, 18. Aggennan ‘woossiyoogee, koyiyoogeenne kariyaa qoxxiyoogee’ woygiyoogee?

¹⁷ Kiitettida PHauloosi ba mala Kiristtaaneti ‘ubba wode Xoossaa woossanaadan’ zoriis. (Roome 12:12) Yesuusi:“Woossite; intte ekkana. Koyite; intte demmana. Kare yiidi xeesite; intteyyo karee dooyettana. Aissi giikko, woossiya ubbai ekkana; koyiya urai demmana; qassi kare yiidi xeesiya urau karee dooyettana” yaagido wode hegaara issi mala azazuwaa azaziis. (Maatiyoosa 7:7, 8) Xoossaa sheniyaara moggottiya aybaunne aggennan ‘woossiyoogee’ bessiyaaba. Yesuusi yootidoogaara moggottiya ogiyan kiitettida Yohaannisi: “Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko” yaagidi xaafiis.—1 Yohaannisa 5:14.

¹⁸ Aggennan ‘woossanaadaaninne koyanaadan’ Yesuusi zoridoogee nuuni salettennan wozanappe woossana koshshiyoogaa bessees. Qassi nuuni Kawotettaa laattanaunne a anjjuwaa, a goˈˈaanne a woytuwaa demmanau aggennan ‘kariyaa qoxxana’ koshshees. SHin Xoossay nu woosaa zaariyoogaa ammanettana danddayiyoo? Kiristtoosi: “woossiya ubbai ekkana; koyiya urai demmana; qassi kare yiidi xeesiya urau karee dooyettana” yaagido gishshau, nuuni Yihoowayyo ammanettidaageeta gidikko, ee danddayoos. Yihoowa ashkkarati bantta deˈuwan beˈido darobay Xoossay tumuppe ‘woosaa siyiyaagaa’ gidiyoogaa bessees.—Mazamure 65:2.

19, 20. Maatiyoosa 7:9-11n Yesuusi giidoogaadan Yihooway siiqiya aawa mala gidiyoy ayba ogiyaanee?

¹⁹ Yesuusi Xoossaa ba naatussi loˈˈobaa immiya aawan leemisiis. Yesuusi Deriyaa Bolla Timirttiyaa tamaarissiyo wode neeni he sohuwan deˈiyaabadaaninne Yesuusi hagaadan giishin siyidabadan qoppa: “Woi intte giddon ba na7⁠i, ‘Oitta imma’ giikko, shuchcha immiya aawu de7⁠ii? Qassi, ‘Mole imma’ giikko, ayyo shooshsha immanee? Intte iita gidiiddi, intte naatussi lo77⁠obaa immiyoogaa erikko, yaatin, saluwan de7⁠iya intte Aawai bana woossiyaageetussi lo77⁠obaa waati darissidi immanddeeshsha!”—Maatiyoosa 7:9-11.

²⁰ Issi aawi laattido nagaraappe denddidaagan “iita” gidikkokka, ba naˈaassi qarettees. I ba naˈaassi ‘loˈˈobaa immeesippe’ attin a cimmenna. Saluwan deˈiya nu siiqo Aaway nuna ba naatudan xeelliyoogan ba geeshsha ayyaanaanne hegaa mala hara “lo77⁠obaa” immees. (Luqaasa 11:13) “Lo77⁠o imo ubbainne kumetta woito ubbai” appe yiyo Yihoowayyo i koyiyo ogiyan oottanaadan hegee nuna minttettana danddayees.—Yaaqooba 1:17.

Yesuusa Timirttiyaappe Ubbatoo Goˈetta

21, 22. Deriyaa Bolla Timirttee garamissiyaaba gididoy aybissee? Yesuusi tamaarissido ha timirttiyan neeyyo aybi siyettii?

²¹ Deriyaa Bolla Timirttee hanno gakkanaashin ha saˈan tamaarissido ayba timirtteppenne aadhiyoogee tuma. Ayyaanaaban oyqqido timirttiyaaninne qoncce gidiyoogan a mali baawa. Aadhida huuphe yohotun beˈidoogaadan ha timirttee oyqqido zoriyaa nuuni oosuwan peeshshiyaaba gidikko, keehippe goˈettana danddayoos. Yesuusi tamaarissido ha timirtteti ha wodiyan nu deˈuwaa loyttanaunne sinttappe nuussi ufayssiya hidootay deˈanaadan oottana danddayoosona.

²² Yesuusi Deriyaa Bollan Tamaarissido ayyaanaaban alˈˈo gididabatuppe ha huuphe yohotun nuuni beˈidoy keehi guutta. A timirttiyaa ezggidaageeti i ‘tamaarissiyoogan garamettidoogee’ bessiyaaba. (Maatiyoosa 7:28) Gita Asttamaaree Yesuus Kiristtoosi tamaarissido hageetinne hara alˈˈobati nu wozanaaninne nu qofan kumiyo wode nuunikka hegaadan garamettanaagee sirissenna.

Ne Zaaroy Aybee?

• Milatissanau woossiyoogaa xeelliyaagan Yesuusi woygidee?

• Nuuni giidobaa zaari zaari woossana koshshennay aybissee?

• Yesuusi tamaarissido leemiso woosay ay ay oyqqidee?

• Nuuni aggennan ‘woossanau, koyanaunne kariyaa qoxxanau’ danddayiyoy ayba ogiyaanee?

[Oyshata]

[Sinttaa 19n deʼiya misiliyaa]

Asa bessanaunne sissanau woossiya loˈˈo milatiya iitata Yesuusi pirddiis

[Sinttaa 21n deʼiya misiliyaa]

Hachi hachi koshshiya qumau woossiyoogee bessiyaaba gididoy aybissakko eray?