Yesuusi Tamaarissidobay Ufayssaa Demissiyo Ogiyaa

‘Yesuusi deriyaa huuphiyaa kiyidi . . . bana kaalliyaageeti baakko shiiqin, tamaarissuwaa doommiis.’—MAATIYOOSA 5:1, 2.

1, 2. (a) Yesuusi Deriyaa Bolla Timirttiyaa tamaarissidoy ayba hanotaanee? (b) Yesuusi ba haasayaa doommidoy aybiinee?

YESUUSI 31 K.S., Galiilan sabbakiyoogaa guutta wodiyau essidi, Paasikaa baalaa bonchanau Yerusalaame biis. (Yohaannisa 5:1) Galiila simmidi, 12⁠u kiitettidaageeta dooriyoogan Xoossaa kaaletuwaa demmanau kumetta qammaa woossiis. Wonttetta gallassi Yesuusi harggidaageeta pattiyo wode daro asay akko shiiqiis. Ba erissiyo ashkkaratuuranne haratuura deriyaa lanqqiyan uttidi tamaarissiyoogaa doommiis.—Maatiyoosa 4:23–5:2; Luqaasa 6:12-19.

² Yesuusi Deriyaa Bollan Tamaarissido Timirttiyaa doommidoy, Xoossaara loˈˈo dabbotaa medhiyoogan ufayssay beettiyoogaa qonccissiyoogaana. (Maatiyoosa 5:1-12) * Ufayttiyoogaa giya qaalaa birshshettay ‘pashkkiyoogaa,’ ‘hombbociyoogaa’ yaagiyaagaa. Yesuusi yootido uddufun ufayssati Kiristtaaneti ufayttiyoy aybissakko qonccissoosona; qassi 2,000 gidiya layttappe kase goˈˈidoogaadan ha wodiyankka goˈˈoosona. Yesuusi yootido ha yohota ubbaa ane beˈoos.

‘Ayyaanaaban Hiyyeesa Gidiyoogaa Eriyaageeta’

3. Ayyaanaaban hiyyeesa gidiyoogaa eriyoogee woygiyoogee?

³‘Ayyaanaaban hiyyeesa gididoogaa eriyaageeti ufayttiyaageeta; ayssi giikko, saluwaa kawotettay etassa.’ (Maatiyoosa 5:3) ‘Ayyaanaaban hiyyeesa gidiyoogaa eriyaageeti,’ banttau Xoossaa kaaletoynne maarotay koshshiyoogaa akeekoosona.

4, 5. (a) Ayyaanaaban hiyyeesa gidiyoogaa eriyaageeti ufayttiyoy aybissee? (b) Ayyaanaaban nuussi koshshiyaabay kumanaadan ay oottana danddayiyoo?

⁴ Ayyaanaaban hiyyeesa gidiyoogaa eriyaageeti “saluwaa kawotettai etassa” gidiyo gishshau ufayttoosona. Koyro xeetu layttan Yesuusi erissiyo ashkkara gididaageeti a Mase oottidi ekkidoogee, saluwan deˈiya Xoossaa Kawotettan aara haariyo injjiyaa demmanaadan oottiis. (Luqaasa 22:28-30) Nuuni saluwan Kiristtoosaara laattiyo hidootay deˈiyoogeeta gidin, woykko Xoossaa Kawotettan gannate saˈan merinaa deˈuwaa demmanau naagiyaageeta gidin, tumuppe nuuni ayyaanaaban hiyyeesa gidiyoogaa eriyaaba gidikko, ufayttana danddayoos.

⁵ Daroti ammanoy baynnaageetanne geeshshabaa nashshennaageeta gidiyo gishshau, ayyaanaaban hiyyeesa gidiyoogaa eriyay ubba asaa gidenna. (2 Tasalonqqe 3:1, 2; Ibraawe 12:16) Ayyaanaaban nuuyyo koshshiyaabaa kunttiyo ogee Geeshsha Maxaafaa mintti xannaˈiyoogaa, erissiyo ashkkara oottiyo oosuwaa mishettidi oottiyoogaanne Kiristtaane shiiqotun ubbatoo beettiyoogaa gujjees.—Maatiyoosa 28:19, 20; Ibraawe 10:23-25.

Kayyottiyaageeta Gidiiddi “Ufayttiyaageeta”

6. “Kayyottiyaageeti” oonee? Eti ‘ufayttiyoy’ aybissee?

⁶“Kayyottiyaageeti [ufayttiyaageeta]; aissi giikko, Xoossai eta minttettana.” (Maatiyoosa 5:4) “Kayyottiyaageeti” ‘ayyaanaaban hiyyeesa gidiyoogaa eriyaageetuura’ issi mala. Eti kayyottiyoy bantta deˈuwaabaana gidenna. Eti kayyottiyoy nagarancha gidiyoogaananne polotetta pacay kaalettidobaana. Hegaadan kayyottiyaageeti ‘ufayttiyoy’ aybissee? Eti Xoossaaninne Kiristtoosan ammaniyo gishshassanne Yihoowaara  loˈˈo dabbotay deˈiyoogan minttettuwaa demmiyo gishshataassa.—Yohaannisa 3:36.

7. Seexaanaa alamiyaa xeelliyaagan nuuyyo aybi siyettana koshshii?

⁷ Seexaanaa alamiyan kumida iitatettaa gishshau nuuni kayyottiyoo? Ha alamee shiishshiyooban nuuyyo tumuppe aybi siyettii? Kiitettida Yohaannisi: “Ha sa7an de7⁠iya ubbabai, hegeekka: asatettaa amoi, aifen xeellidi qaaqqatiyoogeenne miishshan ceeqettiyoogee . . . Xoossaappe yibeenna” yaagidi xaafiis. (1 Yohaannisa 2:16) SHin Xoossaappe haakkida asaa naata sugiya wolqqay, giishin ‘saˈaa ayyaanay,’ ayyaanaaban nu hanotaa mooriiddi deˈiyoogaa akeekikko ay oottana koshshii? Hegaadaana gidikko, minttidi woossanau, Xoossaa Qaalaa xannaˈanaunne maaduwau cimata oychanau koshshees. Nuna unˈˈissidabay ayba gidikkonne, nuuni Yihoowakko shiiqiiddi biyo wode, ‘minttettuwaa’ demmoos.—1 Qoronttoosa 2:12; Mazamure 119:52; Yaaqooba 5:14, 15.

“Ashkketi” Ay Keena Ufayttanee!

8, 9. Ashkke gidiyoogee woygiyoogee? Ashkketi ufayttiyoy aybissee?

⁸“Ashkketi [ufayttiyaageeta]; aissi giikko, eti sa7aa laattana.” (Maatiyoosa 5:5) ‘Ashkketettay’ shugo gidiyoogaa woykko coo keha milatiyoogaa bessenna. (1 Ximootiyoosa 6:11) Yihoowa sheniyaa poliyoogaaninne a kaaletuwaa kaalliyoogan ashkke gidiyoogaa bessoos. Nuuni ashkke gidiyoogee nu mala Kiristtaanetuuranne haratuura deˈiya gaytotettankka qonccees. Hegaa mala ashkketettay kiitettida PHauloosa zoriyaara moggottees.—Roome 12:17-19 nabbaba.

⁹ Ashkketi ufayttiyaageeta gididoy aybissee? Ashkke gidida Yesuusi, “eti sa7aa laattana” giido gishshataassa. Saˈaa laattiya waannay Yesuusa. (Mazamure 2:8; Maatiyoosa 11:29; Ibraawe 2:8, 9) Gidoppe attin, ‘Kiristtoosaara laattiya’ ashkketikka aara issippe saˈaa laattana. (Roome 8:16, 17) Ashkke gidida hara daroti, Yesuusa Kawotettay ayssiyo saˈan merinaa deˈuwaa demmana.—Mazamure 37:10, 11.

10. Ashkketettaa bessennaagee nu haggaazuwaa maataanne haratuura deˈiya gaytotettaa waatidi bochii?

¹⁰ Yesuusaagaadan nuuni ashkke gidana koshshees. Nuuni palamettiyoogan erettiyaageeta gidikko shin? Hegaa mala eeshshay asay nuukko shiiqennaadan oottana danddayees. Nuuni gubaaˈiyan oottiyo maataa demmanau koyiya ishata gidikko, he eeshshay he maataa demmennaadan diggees. (1 Ximootiyoosa 3:1, 3) Qarxxeesen deˈiya Kiristtaaneti “palamettenna mala, asa ubbaa ashkketettaanne doshotettaa bessiyaageeta gidanaadan” Tiitu aggennan zorana mala PHauloosi yootiis. (Tiitu 3:1, 2) Hegaa mala ashkketettay haratussi ay keena anjjoo!

Eti “Xillobaa” Namisettoosona

11-13. (a) Xillobaa namisettiyoogeenne saamettiyoogee woygiyoogee? (b) Xillobaa namisettiyaageetinne saamettiyaageeti ‘kallanay’ ayba ogiyaanee?

¹¹“Namisettiyaageetinne saamettiyaageeti kattaa haattaa koyiyoogaadan, xillobaa oottanau laamotiyaageeti [ufayttiyaageeta]; aissi giikko, Xoossai eta kalissana.” (Maatiyoosa 5:6) Yesuusi ba qofan oyqqido ‘xillobay’ Xoossaa sheniyaaranne azazuwaara moggottidi suurebaa oottiyo eeshshaa. Yettanchay, Xoossaa geeshshatettaa pirddaa ‘laamotiiddi hayqqiyoogaa’ yootiis. (Mazamure 119:20) Nuuni xillobaa  namisettiyoogaaninne saamettiyoogan hegau xoqqa sohuwaa immiyoogaa bessiyoo?

¹² Xillobaa namisettiyaageetinne saamettiyaageeti ‘kalliyo’ gishshau, eti ufayttanaagaa Yesuusi yootiis. PHenxxaqosxxe gallassan 33 K.S., Yihoowa geeshsha ayyaanay ‘xillotettaabaa ha saˈaa asaa erissiyoogaa’ doommido gishshau, he wodeppe doommidi hegee polettiis. (Yohaannisa 16:8) Xoossay ba geeshsha ayyaanan denttettidi asati “Xillotetta de7⁠uwau zoriyaa immanau” keehippe maaddiya Kiristtaane Giriike Geeshsha Maxaafaa xuufeta xaafanaadan oottiis. (2 Ximootiyoosa 3:16) Xoossaa ayyaanay nuuni “tumu xillotettaaninne geeshshatettan Xoossaa leemisuwan merettida ooratta asatettaa” maayanaadankka maaddees. (Efisoona 4:24) Yesuusa wozuwaa yarshshuwaa baggaara bantta nagaraappe maarotaa demmanau koyiyaageeti Xoossaa xeelan xillo gidana danddayiyoogaa eriyoogee minttettiyaaba gidennee?—Roome 3:23, 24 nabbaba.

¹³ Nuuni saˈan deˈiyo hidootay deˈiyoogeeta gidikko, xillobau namisettiyoogaanne saamettiyoogaa alanay geeshshatettay kumido saˈan merinaa deˈuwaa demmiyo wodiyaana. Hegee gakkanaashin, Yihoowa maaraadan deˈanau murttoos. Yesuusi: “Kasetidi, Xoossaa kawotettaanne a xillotettaa koyite” yaagiis. (Maatiyoosa 6:33) Hegaadan oottiyoogee nuussi Xoossaa oosoy daranaadaaninne nuuni ufayttanaadan oottees.—1 Qoronttoosa 15:58.

“Maariyaageeti” Ufayttiyo Gaasuwaa

14, 15. Nuuni maariyoogaa waatidi bessana danddayiyoo? “Maariyaageeti” ufayttiyoy aybissee?

¹⁴“Maariyaageeti [ufayttiyaageeta]; aissi giikko, Xoossai eta maarana.” (Maatiyoosa 5:7) ‘Maariyaageeta’ denttettiyay haratussi qarettiyoogaa. Yesuusi darotussi qarettido gishshau, maalaalissiya ogiyan eta waayiyaappe woppissiis. (Maatiyoosa 14:14) Nagaraappe simmiyaageeta Yihooway maarotan atto giyoogaadan, pirddaara gayttidaagan asay bana naaqqida uraa atto giyo wode maarotay qonccees. (Kessaabaa 34:6, 7; Mazamure 103:10) Nuuni hegaa mala ogiyan, qassi qohettidaageeta woppissiya kehatetta haasayaaninne oosuwan maarotaa bessana danddayoos. Maarotaa bessiyo loˈˈo ogee Geeshsha Maxaafaa tumaa haratussi yootiyoogaa. Qaretay denttettin Yesuusi shiiqida daro asaa “darobaa tamaarissuwaa doommiis.”—Marqqoosa 6:34.

¹⁵ Yesuusi: “Maariyaageeti [ufayttiyaageeta]; aissi giikko, Xoossai eta maarana” giidoogaa nuuni maayiyo gaasoy deˈees. Nuuni harata maariyaageeta gidikko, etikka nuuyyo qarettana danddayoosona. Nuuni harata maariyaageeta gidikko, pirddau a sintta shiiqiyo wode Xoossay nu bolli pirddennan agganau doorana danddayees. (Yaaqooba 2:13) Nagaray atto geetettiyoogeetinne merinaa deˈuwaa demmiyaageeti maariyaageetu xalla.—Maatiyoosa 6:15.

 “Wozanaa Geeshshati” Ufayttiyo Gaasuwaa

16. ‘Wozanan geeshsha’ gidiyoogee woygiyoogee? He eeshshay deˈiyoogeeti ‘Xoossaa beˈiyoy’ ayba ogiyaanee?

¹⁶“Wozanaa geeshshati [ufayttiyaageeta]; aissi giikko, eti Xoossaa be7ana.” (Maatiyoosa 5:8) Nuuni ‘wozanan geeshsha’ gidikko, nu dosiyooban, amottiyoobaaninne koyiyooban geeshshatettay qonccees. Hegaadan gidikko, ‘geeshsha wozanaappe siiquwaa’ bessoos. (1 Ximootiyoosa 1:5) Nuuni wozanaa geeshsha gidiyoogan “Xoossaa be7ana.” “Ooninne [Xoossaa] be7⁠idi paxa de7⁠enna” gishshau, hegee Yihoowa ayfiyan beˈiyoogaa xallaa malaatenna. (Kessaabaa 33:20) Gidikkonne, Yesuusi polo ogiyan Xoossaa eeshshaa qonccissido gishshau: “Tana be7⁠ida urai Aawaakka be7⁠iis” yaagiis. (Yohaannisa 14:7-9) Nuuni Yihoowassi goynniya saˈan deˈiyaageeta gidiyoogaadan, i nuussi oottiyoobaa akeekiyoogan “Xoossaa be7ana” danddayoos. (Iyyooba 42:5) Ayyaanan tiyettida Kiristtaaneti ayyaana deˈuwau denddiyo wode, saluwan deˈiya bantta Aawaa ayfiyan beˈana.—1 Yohaannisa 3:2.

17. Wozanan geeshsha gidiyoogee waatanaadan nuna maaddii?

¹⁷ Wozanan geeshsha uri kandduwaaninne ayyaanaaban geeshsha gidiyo gishshau, Yihoowa xeelan tuna gididabaa qoppenna. (1 Odiya 28:9; Isiyaasa 52:11) Nuuni wozanan geeshsha gidikko, haasayiyoobaaninne oottiyooban geeshsha gidana; qassi Yihoowa oosuwaa loytti oottiyaaba milatanau giidi oottokko.

“Sarotettaa Medhiyaageeti” Xoossaa Naata Gidana

18, 19. “Sarotettaa medhiyaageeti” ay oottiyoonaa?

¹⁸“Sarotettaa medhiyaageeti ufayttiyaageeta; eti Xoossaa naata geetettana.” (Maatiyoosa 5:9, NW) “Sarotettaa medhiyaageeti” bantta oottiyoobaaninne oottennaban erettoosona. Nuuni Yesuusi yootido asatu mala gidikko, sarotettaa medhiyaageeta gidoos, qassi ‘iitaa gishshaa iitaa zaarokko.’ Hegaappe, ubbatoo haratussi ‘loˈˈobaa oottanau’ baaxetoos.—1 Tasalonqqe 5:15.

¹⁹ Sarotettaa medhiyaageetun qoodettanau, nuuni sarotettay deˈanaadan baaxetana bessees. Sarotettaa medhiyaageeti ‘ammanettiya laggeta shaakkiyaabaa’ aybanne oottokkona. (Leemiso 16:28) Sarotettaa medhiyaageeta gidiyoogaadan, nuuni “asa ubbaara saro de7anau” baaxetoos.—Ibraawe 12:14.

20. Ha wodiyan ‘Xoossaa naati’ oonee? Takkidi Xoossaa naata gidanaageeti oonee?

²⁰ Sarotettaa medhiyaageeti ufayttiyaageeta; ayssi giikko, eti “Xoossaa naata geetettana.” Ayyaanan tiyettida ammanettida Kiristtaaneta Yihooway ba naata oottidi ekkido gishshau, eti “Xoossaa naata.” Eti Kiristtoosan ammaniyoonne ‘siiquwaanne sarotettaa Xoossau’ wozanappe goynniyo gishshau, Yihoowaara aawaagaanne naˈaagaa mala mino dabbotaa medhidosona. (2 Qoronttoosa. 13:11; Yohaannisa 1:12) Sarotettaa medhiyaageeta gidida Yesuusa ‘hara dorssati’ shin? Ba SHaˈu Layttaa Haaruwaa wode, Yesuusi etau “Merinaa Aawaa” gidana; gidikkokka, wurssettan Yesuusi ba huuphen Yihoowau haarettana; qassi eti polo ogiyan Xoossaa naata gidana.—Yohaannisa 10:16; Isiyaasa 9:6; Roome 8:21; 1 Qoronttoosa 15:27, 28.

21. Nuuni “Geeshsha Ayyaanan de7⁠ikko” ay oottiyoo?

²¹ Nuuni “Geeshsha Ayyaanan de7⁠ikko” sarotettaa medhiyoogee haratussi qoncciyan beettiya nu eeshshatuppe issuwaa gidana. ‘Issoy issuwaa yiilloyokko’ woykko ‘issoy issuwaa keesiyau denttettokko.’ (Galaatiyaa 5:22-26, NW) Hegaappe, “Asa ubbaara sarotettan de7anau” baaxetoos.—Roome 12:18.

 Yedetettikkokka Ufayttoosona!

22-24. (a) Xillotettaa gishshau yedetettiyaageeti ufayttiyoy aybissee? (b) Kaallidi xannaˈana naaˈˈu huuphe yohotun ay beˈanee?

²²“Xillotettaa gishshau Yedetettiyaageeti [ufayttiyaageeta]; aissi giikko, saluwaa kawotettai etassa.” (Maatiyoosa 5:10) Yesuusi ha qofaa gujji qonccissiiddi hagaadan giis: “Intte tana kaalliyo gishshau, asai intttena boriyo wodenne waissiyo wode, qassi intte bolli iitabaa ubbaa wordduwan haasayiyo wode, intte [ufayttiyaageeta]. Intteyyo saluwan gita woitoi de7⁠iyo gishshau, ufaittite; hashshu giite; aissi giikko, asai intteppe kase de7⁠ida hananabaa yootiyaageetakka hegaadan waissiis.”—Maatiyoosa 5:11, 12.

²³ Beni wode Xoossay kiittin hananabaa yootidaageetudan, Kiristtaaneti xillotettaa gishshau asay eta boranaagaa, wayssanaagaanne eta bolli iitabaa ubbaa wordduwan haasayanaagaa eroosona. Gidikkokka, nuuni hagaa mala paaciyan ammanettidi gencciyoogan, Yihoowa ufayssiyoogaaninne a bonchissiyoogan ufayttoos. (1 PHeexiroosa 2:19-21) Nuna gakkiya tuggay haˈˈi gidin sinttappe gidin, nuuni Yihoowayyo haggaaziyoogan demmiyo ufayssaa xayssana danddayenna. Woykko he tuggay, Kiristtoosaara saluwaa Kawotettan haariyoogan woy he Kawotettaa haaruwan saˈan merinaa deˈuwaa laattiyoogan demmiyo ufayssaa xayssana danddayenna. Hegaa mala anjjoy, Xoossay nashshiyaagaa, kehanne palahissidi immiyaagaa gidiyoogaa qonccissees.

²⁴ Deriyaa Bolla Timirttiyaappe tamaariyo hara darobay deˈees. Hagaappe kaallidi xannaˈana naaˈˈu huuphe yohoti he timirttiyaappe daruwaa qonccissoosona. Yesuus Kiristtoosi tamaarissido he yohota waatidi oosuwan peeshshana danddayiyaakko ane beˈoos.

[Footnotes]

Woygada Zaaruutii?

• “Ayyaanaaban hiyyeesa gididoogaa eriyaageeti” ufayttiyoy aybissee?

• “Ashkketi” ufayttanaadan oottiyaabi aybee?

• Kiristtaaneti yedetettiyaaba gidikkokka ufayttiyoy aybissee?

• Yesuusi tamaarissido ufayssaappe neeni keehi dosiyoy awugee?

[Oyshata]

[Sinttaa 11n deʼiya misiliyaa]

Yesuusi qonccissido uddufun ufayssati he wodeegaadan haˈˈikka goˈˈiyaageeta

[Sinttaa 12n deʼiya misiliyaa]

Geeshsha Maxaafaa tumaa haratussi yootiyoogee maarotaa bessiyo loˈˈo oge