Amaridaageeti Haaroosona; Daroti Goˈettoosona

KIITETTIDAAGEETU wodiyaappe doommidi, Xoossay asaa naatuppe ammanettida amarida Kiristtaaneta, ba naata oottidi dooriiddi takkiis. Xoossaa naata gididaageetu deˈuwan gita laamee merettido gishshau, Xoossaa Qaalay hegaa naaˈˈantto yelettiyoogaa yaagees. Naaˈˈantto yelettiyoogaa halchoy Xoossau oottiya hegeeta saluwan haaranaadan giigissanaassa. (2 Ximootiyoosa 2:12) Haariyaageeta gidanau, saluwan deˈanau eti hayquwaappe denddoosona. (Roome 6:3-5) Eti Kiristtoosaara saluwan uttidi, “sa7an haarana.”—Ajjuutaa 5:10; 11:15.

Gidikkokka, naaˈˈantto yelettidaageetuppe haratikka merinaa atotettaa demmanaagaa Xoossaa Qaalay yootees. Geeshsha Maxaafay (Ibraysxxenne Giriike Geeshsha Maxaafaa xuufeti) Xoossay naaˈˈu cita asaa ashshanau halchidoogaa yootees; keehi guutta qooday deˈiyo haariyaageetu citay, saluwan deˈanaagaanne daro qooday deˈiyo haarettiyaageetu citay, saˈan deˈanaagaa yootees. Leemisuwau, kiitettida Yohaannisi naaˈˈantto yelettida ba mala Kiristtaanetuyyo ay xaafidaakko akeeka. Yesuusa xeelliyaagan i: “nuuni nu nagaraa atto geetettaa Kiristtoosa baggaara demmeettees; Kiristtoosi yarshshettidoogee asa ubbaa [daro qooday deˈiyo citaa] nagaraassappe attin, nu [guutta qooday deˈiyo citaa] nagaraa xalaalaassa gidenna” yaagiis.—1 Yohaannisa 2:2.

Hegaadankka, kiitettida PHauloosi: “Xoossai medhdhido mereta ubbai [daro qooday deˈiyo citay] Xoossaa naati [guutta qooday deˈiyo citay] qonccanaagaa daro laamoti uttiis” giidi xaafiis. (Roome 8:19-21) Kiitettida Yohaannisanne PHauloosa qaalata waati akeekana koshshii? Hagaadaana: Naaˈˈantto yelettidaageeti saluwan haariyaageetu yame gidoosona. Ayba halchuwaassi? Xoossaa aysuwau haarettiya, saˈan deˈana miilooniyan qoodettiya asau merinaa goˈˈaa demissanaassa. Hegaa gishshau, Yesuusi ba erissiyo ashkkarata: “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan tamaarissiis.—Maatiyoosa 6:10.

Atotettay naˈˈu citau imettaanaagaa xeelliya ha qofay Ibraysxxe Geeshsha Maxaafaanikka deˈees. Leemisuwau, Yihooway Yesuusayyo mayzza aawa gidida Abrahaamassi yootidobaa akeeka: “Ha sa7aa kawotettati ubbai [daro qooday deˈiyo citay] ne zerettaa [guutta qooday deˈiyo citaa] baggaara anjjettana.” (Doomettaabaa 22:18) Ee, kawotettati  ubbay Abrahaama “zerettaa” baggaara anjjuwaa demmana.

He ‘zerettay’ oonee? Yesuus Kiristtoosanne Xoossaa naata gididi naaˈˈantto yelettidaageeta. Kiitettida PHauloosi: “Intte Kiristtoosabaa gidikko, simmi intte Abrahaama zare” yaagidi qonccissiis. (Galaatiyaa 3:16, 29) Yaatin, kawotetta ubbau he “zerettaa” baggaara yaana anjjoy aybee? Xoossaa ufayssiyaageeta gididi an bonchettiyoogaanne gannate gidiya saˈan merinaa deˈuwaa demmiyoogaa. Mazamuraawee Daawiti: “Xilloti biittaa laattananne yan merinau de7ana” yaagidi hananabaa yootiis.—Mazamure 37:29; Isiyaasa 45:18; Ajjuutaa 21:1-5.

Saluwan haariyo maatay amaridaageetussi giigiis; shin saluwaa haaruwaa goˈˈay, giishin saˈan demmana merinaa deˈoynne hegaara gayttida hara anjjo ubbay darotussi giigiis. Neeninne ne soo asay Xoossaa Kawotettay ehiyo merinaa anjjuwaa demmiyaageeta gidanaadan amottoos.

[Sinttaa 10n deʼiya misiliyaa]

Miilooniyan qoodettiya asay saˈan merinaa deˈuwaa demmiyoogan anjjettana. Neeni hegeetu giddon deˈanee?