Naaˈˈantto Yelettiyoogaa—Hegee Waanidi Polettii?

YESUUSI naaˈˈantto yelettiyoogee keehippe koshshiyoogaa, hegaa oottiyay oonakkonne hegaa halchoy aybakko xalla gidennan, issi uri waanidi naaˈˈantto yelettanau danddayiyaakkokka Niqoodimoosayyo yootiis. Yesuusi: “Ooninne haattaappenne Geeshsha Ayyaanaappe yelettana xayikko, Xoossaa kawotettaa gelanau danddayenna” yaagiis. (Yohaannisa 3:5) Yaatiyo gishshau, issi uri naaˈˈantto yelettiyoy haattaappenne geeshsha ayyaanaappe. SHin ‘haattaanne geeshsha ayyaanaa’ giya qofay ay malaatii?

‘Haattaanne Geeshsha Ayyaanaa’ —Eti Aybee?

Niqoodimoosi Ayhuda haymaanootiyaa erancha gidiyoogaadan, asay issi gitabaa polanaadan oottiya ‘Xoossaa ayyaanaa’—Xoossaa wolqqaa, Ibraysxxe Geeshsha Maxaafaa xuufeti ayba ogiyan goˈettiyaakko i eriyoogee sirissenna. (Doomettaabaa 41:38; Kessaabaa 31:3; 1 Sameela 10:6) Yaatiyo gishshau, Yesuusi ‘geeshsha ayyaanaa’ yaagiya qaalaa goˈettido wode, Niqoodimoosi hegee Xoossaa ayyaanaa, Xoossaa wolqqaa gidiyoogaa akeekana danddayees.

Yesuusi yootido haattay shin? Yesuusi Niqoodimoosaara haasayido haasayaappe kasenne hegaappe simmin xaafettidabaa qoppa. Hegee Xammaqiya Yohaannisinne Yesuusi erissiyo ashkkarati asaa haattan xammaqiyoogaa bessees. (Yohaannisa 1:19, 31; 3:22; 4:1-3) Ha hanotay Yerusalaamen keehippe erettiyaaba. Hegaa gishshau, Yesuusi haattaabaa yootido wode, Yesuusi coo haattaabaa gidennan, xammaqiyo haattaabaa yootiiddi deˈiyoogaa Niqoodimoosi akeekana danddayees. *

“Geeshsha Ayyaanan” Xammaqettiyoogaa

‘Haattaappe yelettiyoogee’ haattan xammaqettiyoogaa malaatikko, ‘geeshsha ayyaanaappe yelettiyoogee’ woygiyoogee? Niqoodimoosi Yesuusaara haasayanaappe kase, Xammaqiya Yohaannisi haattaa xalla gidennan, ayyaanaykka xammaqanau goˈˈiyaaba gidiyoogaa yootiis. I: “Taani inttena haattan xammaqais; shin i [Yesuusi] inttena Geeshsha Ayyaanan xammaqana” yaagiis. (Marqqoosa 1:7, 8) Wonggeliyaa xaafida Marqqoosi hegaa mala xinqqatee polettido koyro wodiyaa yootiis. I kaallidi deˈiyaagaadan xaafiis: “Yesuusi he wode Galiila biittan de7iya Naazireete katamaappe yin, Yohaannisi Yorddaanoosa SHaafan a xammaqiis. Yesuusi haattaappe  kiyosaara saloi dooyettishiininne Geeshsha Ayyaanai ba bolli haraphphedan wodhdhishin be7iis.” (Marqqoosa 1:9, 10) Yesuusi Yorddaanoosa SHaafan xammaqettido wode, i haattan xammaqettiis. Saluwaappe ayyaanay a bolli wodhido wode, i geeshsha ayyaanan xammaqettiis.

Yesuusi xammaqettoosappe heezzu laytta gidiyaagee aadhi simmin: “Guutta wodiyaappe guyyiyan, Geeshsha Ayyaanan intte xammaqettana” yaagidi ba erissiyo ashkkarata minttettiis. (Oosuwaa 1:5) Hegee awude polettidee?

PHenxxaqosxxe gallassi 33 K.S., Yerusalaamen issi keettan 120 gidiya, Yesuusi erissiyo ashkkarati issippe shiiqi uttidosona. “Gagantti yeggiya gotiyaadan guummiya gunttai akeekennan saluwaappe yiidi, eti uttido keettaa ubbaa kumiis. Qassi tama laco milatiya inxxarssati etassi beettidi, . . . , eta ubbaa bolli wodhdhidosona. Eta ubban Geeshsha Ayyaanai” kumiis. (Oosuwaa 2:1-4) He gallassi, Yerusalaamen deˈiya hara asay haattan xammaqettanaadan minttettoy imettiis. Kiitettida PHeexiroosi asau: “Intte nagarai atto geetettana mala, nagaraappe simmidi, intte huuphiyan huuphiyan Yesuus Kiristtoosa sunttan xammaqettite. Xoossai immiyo Geeshsha Ayyaanaa intte ekkana” yaagiis. Asay hegau ayba zaaro immidee? “PHeexiroosi yootidoogaa ekkidaageeti xammaqettidosona; he gallassi heezzu sha7u gidiya asai ammaniis.”—Oosuwaa 2:38, 41.

Naaˈˈu Qommo Xinqqatiyaa

Ha xinqqateti naaˈˈantto yelettiyoogaa xeelliyaagan ay qonccissiyoonaa? Eti issi uri naaˈˈantto yelettanau naaˈˈu qommo xinqqatee koshshiyoogaa bessoosona. Yesuusi koyro haattan xammaqettidoogaa akeeka. Hegaappe simmidi, geeshsha ayyaanay a bolli wodhiis. Hegaara issi mala ogiyan, beni wode erissiyo ashkkarati koyro (issoti issoti Xammaqiya Yohaannisan) haattan xammaqettidosona; hegaappe simmin, geeshsha ayyaanay eta bolli wodhiis. (Yohaannisa 1:26-36) Hegaadankka, 3,000 ooratta erissiyo ashkkarati koyro haattan xammaqettidosona; hegaappe simmidi, geeshsha ayyaanaa ekkidosona.

PHenxxaqosxxe gallassi 33 K.S. polettida xinqqatiyaa hassayiyoogan, naaˈˈantto yelettiyoogee ha wodiyan waanidi polettees giidi naagana koshshii? Kiristtoosi kiittidoogeetinne beni wode erissiyo ashkkarati naaˈˈantto yelettidoogaadan polettees giidi naagana koshshees. Koyro, issi asi ba nagaraappe simmees, iitabaa oottiyoogaa aggees, Yihoowayyo goynnanaunne ayyo oottanau ba huuphiyaa geppeesinne hegaa asaa sinttan haattan xammaqettiyoogan bessees. Hegaappe simmin, Xoossay Ba Kawotettan haaranaadan a dooridaba gidikko, i geeshsha ayyaanan tiyettees. Ha naaˈˈu xinqqatetuppe koyroy (haattan xammaqettiyoogee) issi aawu koyin oosettiyaaba; naaˈˈanttoy (ayyaanan xammaqettiyoogee) Xoossay oottiyooba. Issi asi ha naaˈˈu xinqqateta xammaqettiyo wode, i naaˈˈantto yelettees.

Ha naaˈˈu qommo xinqqatiyaa xammaqettiyaageeti woykko naaˈˈantto yelettidaageeti Kiristtoosaara saluwan haarana deˈoosona. Hegaadaana gidikko, o bolli haaranau deˈiyoonaa? Kaalliya huuphe yohoy ha oyshaa zaarees.

[Tohossa qofata]

[Sinttaa 9n deʼiya misiliyaa]

Yohaannisi bantta nagaraappe simmida Israaˈeeleta haattan xammaqiis