Naaˈˈantto Yelettiyoogaa—Issi Aawu Bau Kuuyiyoobee?

NAAˈˈANTTO yelettanaadan oottiyay oonee? Issi issi sabaaketi eti yootiyoobaa ezggiya asay naaˈˈantto yelettida Kiristtaane gidanaadan minttettiiddi, Yesuusi: “Intte naa77antto yelettanau bessees” giido qaalaa goˈettoosona. (Yohaannisa 3:7) He sabaaketi he qaalaa azazodan goˈettidi, “Naaˈˈntto yelettite!” yaagoosona. Hegaa gishshau, eti ammaniya asa ubbay Yesuusau azazettanaunne naaˈˈantto yelettanau koshshiya tangguwaa ekkana bessees giidi sabbakoosona. Asay naaˈˈantto yelettanau bari huuphe doorana danddayees giidi tamaarissoosona. SHin he qofay Yesuusi Niqoodimoosau yootidobaara moggiyaabee?

Yesuusa qaalata akeekan nabbabiyoogee issi asi naaˈˈantto yelettanau bari huuphe kuuyana danddayees giidi i tamaarissibeennaagaa bessees. Nuuni hegaadan giyoy aybissee? “Naaˈˈantto yelettiyoogaa” geetettidi birshshettida Giriiketto qaalay “bollappe yelettana koshshees” geetettidikka birshshettana danddayees. * Yaatiyo gishshau, he qaalaa maaraadan, naaˈˈantto yelettiyoogee “bollappe” yees; hegaa giyoogee “saluwaappe” woykko “Xoossaappe” yees giyoogaa. (Yohaannisa 19:11; Yaaqooba 1:17) Ee, naaˈˈantto yelettanaadan oottiyay Xoossaa.—1 Yohaannisa 3:9.

Nuuni “bollappe” giya qonccissuwaa hassayiyaaba gidikko, issi uri bari huuphe naaˈˈantto yelettana danddayennaagaa  akeekanau metootokko. Asa gidada yelettido hanotaa ane qoppa. Neeni ne huuphe koyada yelettadii? Akkay! Neeni yelettidoy ne aaway nena yelido gishshataassa. Hegaadankka, nuuni naaˈˈantto yelettana danddayiyoy Xoossay, saluwan deˈiya nu Aaway nuuni yelettanaadan oottiyaaba gidikko xallaana. (Yohaannisa 1:13) Kiitettida PHeexiroosi: “Kiristtoosa Aawaa, ba maarotettaa daruwaadankka nuna naa77anttuwaa yelidaagaa . . . galatoos” yaagidi qoncciyan yootidoy hegaassa.—1 PHeexiroosa 1:3.

Hegee Azazoo?

Gidikkokka, issoti issoti ‘Ooninne naaˈˈantto yelettanau bari huuphe kuuyennaba gidikko, Yesuusi: “Intte naa77antto yelettanau bessees” giidi azazidoy aybissee?’ yaagidi oychana danddayoosona. Hegee keehippe bessiya oysha. Yesuusa qaalay tumuppe azazo gidikko, nuuni oottana danddayennabaa azaziis giyoogaa. Hegee bessiyaaba milatenna. Yaatikko, intte “naaˈˈantto yelettanau” bessees giya qaalaa nuuni ayba ogiyan akeekana koshshii?

He qofay koyro xaafettido doonan azazodan gidennan azazoppe dumma gidida ogiyan qoncciis. Hara guussan, Yesuusi intte “naaˈˈantto yelettanau” bessees giido wode, azaziiddi gidennan issi tuma gidida yohuwaa yootiiddi deˈees. I: “Intte bollappe yelettiyoogee bessiyaaba” yaagiis.—Yohaannisa 3:7, Modern Yang’s Literal Transileeshin.

Qommoora deˈiya qofaa leemisuwan qonccissanau, kaallidi deˈiya qofaa beˈa. Amarida timirtte keettati deˈiyo issi katamaa qoppa. He timirtte keettatuppe issoy he katamaappe haakkidi deˈiya sohuwaappe yiya, he biittaa naati tamaariyoogaa. Issi gallassi he biittaa asa gidenna issi yelagay he timirtte keettaa dilekteriyau, “Taani intte timirtte keettan mazggabettanau koyays” yaagiis. Yaatin, dilekteree, “Mazggabettanau, neeni ha biittaa asa gidanau bessees” yaagiis. Dilekteree haasayidobay azazo gidennaagee qoncce. I he tamaariyaa, “Ha biittaa asa gida!” giidi azaziiddi deˈenna. Dilekteree issi tuma gididabaa, he timirtte keettan tamaaranau koyettiyaabaa yootiiddi deˈees. Hegaara issi mala ogiyan, Yesuusi “Intte naa77antto yelettanau bessees” yaagido wode, tuma gidida issibaa, “Xoossaa kawotettaa gelanau” issi urappe koyettiyaabaa yootiiddi deˈees.

Ha wurssetta qofay, giishin Xoossaa Kawotettay naaˈˈantto yelettiyoogaara gayttida hara allaalle. Hegee naaˈˈantto yelettiyoogaa halchoy aybee? yaagiya oyshaa zaarees. He oyshaa zaaruwaa eriyoogee naaˈˈantto yelettiyoogee woygiyoogaakko loytti akeekanau keehippe koshshiyaaba.

[Tohossa qofata]

[Sinttaa 6n deʼiya misiliyaa]

Naaˈˈantto yelettiyoogaanne asa gididi yelettiyoogaa issi mala oottiyay aybee?