Ammanoy Aybee?

AMMANUWAA woygada qonccissuutee? Issoti issoti ammanoy, issibaa coo ammaniyoogaa goosona. Gaazeexan issi issi huuphe yohuwaa xaafiyoogan erettida, Amarkka biitta asa gidida, H. L. Menkeni issi wode, ammanoy “hananau danddayennabaa hanees giidi bessenna ogiyan ammaniyoogaa” yaagiis.

Geeshsha Maxaafay hegaappe dumma gidida ogiyan, ammanoy coo woykko bessenna ogiyan ammaniyoogaa gidennaagaa qonccissees. Xoossaa Qaalay: “Ammano giyoogee, demmana giidi ufaissan naagi uttidobai ammanttiyoogaanne be7anau danddayennabaa erissiyaagaa” yaagees.—Ibraawe 11:1.

Ammanuwaa xeelliyaagan asaassi dumma dumma xeelay deˈiyo gishshau, kaallidi deˈiya oyshatu zaaruwaa ane beˈoos:

• Daroti ammanuwaabaa haasayiyo wode yootiyoogaappe Geeshsha Maxaafay yootiyoogee dummatiyoy ayba ogiyaanee?

• Geeshsha Maxaafay yootiyoogaa mala ammanoy nuussi deˈiyoogee keehippe koshshiyoy aybissee?

• Ne ammanuwaa waatada minttana danddayay?

Cira Madiina Woraqataa Malanne Mino Naqaashaa

“Naagi uttidobai ammanttiyoogaa” geetettidi birshshettida Giriiketto qaalay, Geeshsha Maxaafaa kifile gidida Ibraawe maxaafay xaafettiyo wode, asay meeze oottidi goˈettiyo qaala. Darotoo zalˈˈiyaara gayttida mazggabatun goˈettiyoobanne issibaa sinttanau babaa oottanau danddayiyoogaa ammanettanaadan oottiya xuufiyaa malaatees. Hegaa gishshau, issi xuufee Ibraawe 11:1y: “Ammanoy demmana giidi ufayssan naagi uttidobau cira madiina woraqataa mala” geetettidi birshshettana danddayees yaagees.

Issi ammanettiya dirijjitiyaappe issibaa shammanau miishshaa qanxxada kaarinniyaa ekkadasa giidi qoppoos; he shammidobaa hara wode ekkanau naagaasa; hegaadan oottiyo wode hegaa mala ammanoy deˈiyoogaa bessaasa. Ne ekkido kaarinnee, he dirijjitiyan neeni ammanettanaadan oottees. Hegaa mala hanotan, he kaarinnee neeni shammidobaa demmanaagaa ammanettanaadan oottiya cira madiina woraqataa mala. He kaarinnee bayidaba woykko neeni a olidaba gidikko, neeni shammidobaa demmana danddayakka. Hegaadankka, Xoossay qaalaa gelidobaa polees giidi ammaniyaageeti ufayssan naagiyoobaa demmanau ammanettana danddayoosona. Hara baggaara qassi, ammanoy baynnaageeti woykko ammanuwaa aggidaageeti, Xoossay qaalaa gelidobaa demmana danddayokkona.—Yaaqooba 1:5-8.

Ibraawe 11:1n “erissiyaagaa” geetettidi birshshettida naaˈˈantto qofay, nuussi milatiyaabaappe dumma gididabau naqaasha gidiyaabaa malaatees. Leemisuwau, awa ayfee arshsho baggaara kiyidi, arggo baggaara wulliyoogan, biittaa yuushuwan yuuyiyaaba milatees. Gidikkokka, hegaara gayttidabaa xannaˈiyaageeti, biittay awa ayfiyaa yuushuwan yuuyiyoogaa qonccissidosona. He naqaashaa eroogaappenne tuma gidiyoogaa ammanoogaappe guyyiyan, ne beˈiyoobaappe dumma gidida ogiyan, biittay awa ayfiyaa yuushuwan yuuyiyoogaa ammanaasa. Ne ammanoy issibaa coo ammaniyoogaa gidenna. Hegaappe dumma ogiyan, ammanoy issibay neessi milatido gishshau coo ammaniyoogaappe, hanotaabaa shaakki eridi ammaniyoogaa.

Mino Ammanoy Ay Keenaa Koshshiyaabee?

Mino ammanuwau nuuni ammaniyoobatun laamiyaa oottana koshshiyaabaa gidikkokka, hegee mino naqaashan baasettees; Geeshsha Maxaafay minttettiyoy hegaa mala ammanuwaa. Hegaa mala ammanoy keehippe koshshees. Kiitettida PHauloosi: “Ammanoi bainnan ooninne Xoossaa ufaissanau danddayenna; aissi giikko, Xoossaakko yiya ooninne Xoossai de7iyoogaanne bana koyiyaageetuyyo woituwaa immiyoogaa ammananau koshshees” yaagidi xaafiis.—Ibraawe 11:6.

Neeyyo mino ammanoy deˈennaadan xubbiya darobay deˈees. SHin kaallidi deˈiya sinttatun qonccida oyddubata oosuwan peeshshiyoogan, hegaa xoona kiyana danddayaasa.