Yihooway Ba Eeshshaa Muuseyyo Qonccissido Wode
Xoossaakko SHiiqa
Yihooway Ba Eeshshaa Muuseyyo Qonccissido Wode
XOOSSAA eeshshaanne i issi issibata oottiyo ogiyaa waatada qonccissuutee? Neeni Xoossaabaa a oychanaunne i ba eeshshaa qonccissishin siyanau danddayiyaabadan qoppa. Hananabaa yootiya Muusee hegaadan oottiis. Hanettidabaa i xaafidoogee nuna ufayssiyaaba.
2 Siinaa Deriyaa bolli, Muusee Yihoowa: “Ne qonccettaa bonchchuwaa tana bessarkkii?” yaagidi woossiis. (Kessaabaa 33:18) Wonttetta gallassi, Muusee Xoossaa bonchuwaa amarida ogiyan beˈiyo maataa demmiis. * He maalaalissiya ajjuutan beˈido ubbabaa Muusee xaafibeenna. Hegaappe, Xoossay yootido, keehippe koshshiyaabaa xaafiis. Yihooway yootidobaa, Kessaabaa 34:6, 7n deˈiyaagaa ane pilggoos.
3 Yihooway babaa qonccissido koyrobay, i “qaretainne maarotai kumido Xoossaa” gidiyoogaa. (Paydo 6) Issi eranchay giidoogaadan, ‘maarotaa’ geetettida Ibraysxxe qaalay “issi aaway ba naˈayyo bessiyoogaa mala qaretaa” malaatees. ‘Qaretaa’ giya qaalay “metootida urau koshshiyaabaa immanau issi uri wozanappe oottiyoobaa malaatiya” qaalaara gayttidaba. Yelidaageeti bantta naata loyttidi oyqqiyoogaadan, Yihoowaykka baassi goynniyaageeta siiqiyoogaaninne etau koshshiyaabaa wozanappe qoppiyoogan eta loyttidi oyqqees.—Mazamure 103:8, 13.
4 Kaallidi, Yihooway “danddayanchchaa” gidiyoogaa yootiis. (Paydo 6) I saˈan baayyo oottiyaageeta hanqqettanau eesotenna. Hegaappe, eti bantta nagaraappe simmanaadan wodiyaa immiyoogan, eta mooruwaa danddayees.—2 PHeexiroosa 3:9.
5 Xoossay “aggenna siiqoi daridoogaanne daro ammanettiyaagaa woykko tumanchaa” gidiyoogaakka yootiis. (Paydo 6) Aggenna siiqoy, Yihooway ba asaara duuxxenna issippetettaa medhanaadan oottiya alˈˈo eeshsha. (Zaarettido Wogaa 7:9) Yihooway tumaukka pultto. I cimmanau woy cimettanau danddayenna. I ‘tumaa Xoossaa’ gidiyo gishshau, i sinttappe oottanau qaalaa gelidobata gujjin, i yootiyo ubbabaa muleera ammanettana danddayoos.—Mazamure 31:5.
6 Nuuni abaa eranaadan Yihooway koyiyo keehi koshshiya hara tumay “iitatettaa, makkalaanne nagaraa atto yaagiyaagaa” gidiyoogaa. (Paydo 7) I nagaraappe simmiyaageetuyyo “atto giyaagaa.” (Mazamure 86:5) Gidikkokka, Yihooway iitatettaa coˈˈu gi aadhenna. I “mooranchchaa qaxxayennan aggennaagaa” gidiyoogaa yootiis. (Paydo 7) Suure pirddiyaanne geeshsha Xoossay, eriiddi nagaraa oottiyaageeta qaxxayennan aggenna. Sohuwaara gidin woy takkidi, eti bantta nagaraa oosoy kaalettiyoobaa demmana.
7 Ba eeshshaa xeelliyaagan Yihooway qonccissidobay, nuuni a, a eeshshatanne a ogeta loytti eranaadan i koyiyoogaa bessees. A loˈˈo eeshshata xeelliyaagan gujjada eranau hagee nena denttettennee?
[Tohossa qofata]
^ MENT. 2 Asi Xoossaa beˈidi deˈana danddayenna gishshau, Muusee Yihoowa beˈibeenna. (Kessaabaa 33:20) Yihooway Muusa ajjuutan ba bonchuwaa bessidoogeenne bana kalˈˈatiya issi kiitanchaa baggaara a haasayssidoogee qoncce.