Geeshsha Maxaafay Nu Wodiyau Goˈˈiyo Gaasuwaa

“Xoossaa maxaafa ubban Xoossaa Ayyaanai de7ees. Qassi he maxaafati . . . de7uwau zoriyaa immanau maaddoosona.”—2 XIMOOTIYOOSA 3:16, 17.

DARO xeetu layttau, Geeshsha Maxaafay daro wogatun deˈiya asati bantta deˈo ogiyaa laammidi loˈˈo deˈuwaa deˈanaadan denttettiis. Qommoora deˈiya xiqisee Geeshsha Maxaafay hegaadan keehippe goˈˈiyaagaa gididoy aybissakko qonccissees; hegeekka Geeshsha Maxaafan deˈiya aadhida eratettay yiidoy Xoossaappe. Geeshsha Maxaafay xaafettidoy asaana gidikkonne, i nuussi Xoossaa qofaa yootees. Geeshsha Maxaafay: “Asati Geeshsha Ayyaanai kaalettin, Xoossaa qaalaa [haasayidosona]” yaagidi qonccissees.—2 PHeexiroosa 1:21.

Geeshsha Maxaafay baa giishin naaˈˈu ogiyan goˈˈiya kaaleto gidees. Koyroy, loˈˈo deˈuwaa deˈanau ay oottana bessiyaakko tuma gidida qofaa immees. Naaˈˈanttoy, asay loˈˈo deˈuwaa deˈanau koshshiya laamiyaa oottanaadan denttettiyo wolqqay au deˈees. Ha naaˈˈu ogeta ane beˈoos.

Loˈˈo Halchuwau Gakkanaadan Maaddiya Timirttiyaa

Geeshsha Maxaafan Xoossay hagaadan qaalaa geliis: “Taani nena erissananne neeni baanau bessiya ogiyaa nena tamaarissana; taani nena zorananne naagana.” (Mazamure 32:8) Nuuni keehippe aadhida erancha gidanaadan maaddiya zoriyaanne timirttiyaa Xoossay immiyoogaa akeeka. Ay halchoy keehippe goˈˈiyaakko akeekanau he timirttiyaa demmiyoogee goˈˈennabata kaalliyoogan nu wodiyaa wurssenna mala maaddana danddayees.

Leemisuwau, daro asay bantta deˈuwan hayttatiyoogaa woykko duretiyoogaa halchoosona. Asi barkka bana maaddanaadan giigissiyo maxaafati darotoo haratuppe aadhidi waani hayttatana woykko duretana danddayiyaakko yootoosona. Hara baggaara Geeshsha Maxaafay hagaadan gees: “Ba laggiyaa bollan qanaatiyo [qofay] . . . hada; carkkuwaa oiqqanau yedettiyoogaa mala.” “Bira dosiya uraassi biri gidi erenna.” (Eranchchaa 4:4; 5:10) Hagee ha wodiyan nuuyyo goˈˈiya zoree?

Geeshsha Maxaafan deˈiya zoree ay keena goˈˈiyaakko leemisuwan yootanau, Jaappaane biittan deˈiya Akinoora hanotaa ane beˈoos. Akinoori erettida yuniverssitiyaappe anjjettanaunne asay xoqqu oottidi xeelliyo ooso keettan qaxarettanau wolqqaama annaaciyan harata xoonidi ba halchuwau gakkiis. Ubbabay i koyidoogaadan hanidaba milatees. SHin i qoppidoogaadan hegee au ufayssaa immibeenna.  Ubba unˈˈoynne daafuray a payyatettaa qohiis. Aara oottiya laggeti a aynne minttettibookkona. Keehippe unˈˈettido gishshau, ushshancha gidiis; ubba bana woranau qoppiis. He wode Yihoowa Markkatuura Geeshsha Maxaafaa xannaˈiyoogaa doommiis. I tamaaridobay deˈuwan xoqqu oottidi xeelliyooban, ba xeelaa laammanaadan oottiis. Hegaappe sohuwaara, unˈˈuwaa gaasuwan a bolli gakkida payyatettaa pacay deciyoogaa doommiis. Akinoori bana xoqqu oottidi xeelliyoogaappenne erettida asa gidanau koyiyoogaappe Geeshsha Maxaafay: “Woppu giida wozanai bollaa payya wottees” yaagiya leemisoy tuma gidiyoogaa ba deˈuwan beˈiis.—Leemiso 14:30.

Deˈuwan keehippe goˈˈiya halchoy ayba gaada qoppay? Neeni tumuppe ufayttanaadan oottiya, halchada gakkiyoobay aybee? Ufayssay deˈiyo aqo deˈo oyqqiyoogee? Woy ne naati loˈˈo deˈuwaa doommanaadan oottiyoogee? Daro laggeti deˈiyoogee? Deˈuwan ufayssaa demmiyoogee? Hageeti ubbaykka loˈˈo halcho. Geeshsha Maxaafay hegaa minttettikkonne, nu deˈuwan waanna halcho gidanaadaana gidenna. Geeshsha Maxaafay akeekanau goˈˈiya zoriyaa: “Xoossaassi yayya; a azazuwaa naaga. Aissi giikko, hegee asassi waanna ooso” yaagidi deˈuwan ufayssaa immiya waannabaa yootees. (Eranchchaa 12:13) Nuuni ha azazuwaa polanau koyennaba gidikko, deˈoy halchoy baynnaagaa, salettiyaagaanne keehippe hidootaa qanxxissiyaagaa gidees. Hara baggaara Geeshsha Maxaafay: “GODAN ammanettiya uri anjjettidaagaa” yaagidi nuna minttettees.—Leemiso 16:20.

Geeshsha Maxaafay Asay Laamettanaadan Oottiyo Ogiyaa

Kiitettida PHauloosi: “Xoossaa qaalai paxa de7eesinne oottees” yaagidi xaafiis. Naaˈˈu zoozee deˈiyo qara bisuwaadan, asa wozanan deˈiya qofaanne koshshaa shaakkana danddayees. (Ibraawe 4:12) Geeshsha Maxaafay asay ba qoppidoogaadan gidennan, tumuppe ba deˈiyo hanotaa akeekanaadan maaddiyo gishshau, asay deˈiyo maaraa laammanaadan oottiyo wolqqay au deˈees. Hegaa gishshau, suure wozanay deˈiyoogeeti laamiyaa oottana koshshiyoogaa akeekoosona. Leemisuwau, beni Qoronttoosa gubaaˈiyan issi wode wuuqqiyaageeta, mattottiyaageeta, shaaramuxiyaageetanne hegaa mala harabaa oottiyaageeta xeelliyaagan kiitettida PHauloosi: “Intteppekka issi issi asai hegeetu mala. SHin . . . Xoossaa Ayyaanan intte meecettidetanne geeyideta” yaagiis. (1 Qoronttoosa 6:9-11) Yihoowa geeshsha ayyaanay ha wodiyankka ootteesinne wolqqaama; qassi asay koshshiya laamiyaa oottanaadan denttettana danddayees.

Awurooppan deˈiya Maariyo geetettiya makkalancha bitanee, maariwaana giyo jallissiya xaliyaa goˈettiyaanne bayzziya asa. Issi wode, issi polisee a xaliyaa oyqqin, keehippe yiillotidi he polisiyaa shociisinne a kaamiyaakka goˈˈennaagaa oottidi mooriis. Hegaa bollankka, Maariyoyyo oosoy baawa; qassi ayyo daro acoy deˈees. I ba metuwaa barkka giigissanau danddayennaagaa akeekidi, Geeshsha Maxaafaa xannaˈanau koyiis. Maariyoy dichaa bessidi, ba huuphiyaa suure oyqqiis; jallissiya xaliyaa goˈettiyoogaanne bayzziyoogaa, qassi makkalancha gidiyoogaa aggiis. A kase eriya daroti a hanotan garamettidosona. Eti aara gayttiyo wode, “Maariyo, hagee tumu nenee?” yaagidi oychoosona.

Akinooranne Maariyo mala asati bantta deˈuwaa laammanaadaaninne deˈuwan tumu woppaanne ufayssaa demmanaadan denttettidabay aybee? Geeshsha Maxaafaa xannaˈiyoogan, Xoossaabaa xeelliyaagan eti demmido ooratta eraa gidiyoogee qoncce. Nuuni ha wodiyan deˈuwan ufayttanaunne sinttappe merinaa deˈuwaa demmanau koshshiya, goˈˈiya kaaletuwaa immana danddayiyay Xoossaa xalla. Xoossaa Yihooway Aawadan, Geeshsha Maxaafaa baggaara: “Ta na7au, siya; taani giyoogaakka ekka; ne bareekka aduqqana. . . . Neeni hemettiyo wode, ne hemettiyoosan xubbiyaabi de7enna; woxxikkokka xubettakka. Tamaaridoogaa hassaya; timirttee neeyyo de7o gidido gishshau, loitta naaga; yeddoppa” yaagees. (Leemiso 4:10-13) Nuna Medhidaagaa kaaletuwaa kaallanau koyiyoogaappe aaruwan maaddana danddayiya ayba zoree deˈii?

 [Box/Picture on page 7]

Ha Wodiyau Goˈˈiya Zoriyaa

Ha wodiyan ubba ogiyan kaaletto gidiya, keehippe goˈˈiya baaso siraataa Geeshsha Maxaafay yootees. Amarida leemisoy hagaappe kaallidi deˈees:

• Haratuura loˈˈo gaytotettay deˈiyoogan

“Hegaa gishshau, hara asi intteyyo oottanau koyiyo ubbabaa inttekka asau oottite.”—Maatiyoosa 7:12.

“Intte ubbaa giddon guuxxiyaagee ubbaappe gitatees.”—Luqaasa 9:48.

“Imattaa mokkite.”—Roome 12:13.

• Iita eeshshaa aggiyoogan

“Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.”—Leemiso 13:20.

“Daro woine eessaa [uyiyaageetuura] . . . zuppetoppa.”—Leemiso 23:20.

“Hanqqettiya uraara laggetoppa.” —Leemiso 22:24.

• Loˈˈo aqo deˈoy deˈanaadan

“Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efisoona 5:33.

“Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite. Issoi issuwaabaa, danddayite; ooninne ba laggiyaa bolli hanqqettidobai de7ikko, issoi issuwau atto yaago.”—Qolasiyaasa 3:12, 13.

• Naata Maaddiyoogan

“Na7i waanidi de7ana bessiyaakko tamaarissa; yaatikko, i cimidikka hegaa aggenna.”—Leemiso 22:6.

“Aawatoo, intte intte naata Godaa seeraaninne zoriyan dichchiteppe attin, eta hanqqetissoppite.”—Efisoona 6:4.

• Ooshshaappe haakkiyoogan

“Liiqo haasayai hanqquwaa zarbbissees; shin porddolla qaalai hanqquwaa denttettees.”—Leemiso 15:1.

“Issoi issuwaa bonchchiyoogan ufaittite.”—Roome 12:10.

Maayettidobaa xaafi oyqqiyoogee laggetu giddonkka gidin, zalˈˈiyaara gayttidaagan darotoo ooshshay denddennaadan oottana danddayees. Hegaa gishshau, Xoossaa ashkkaraa Ermmaasi: “SHamaa paramaa markkati de7iyoosan paramada, maatafaa an wottaas; miishshaakka meezaanan kilada immaas” yaagidi xaafiis.—Ermmaasa 32:10.

• Loˈˈo xeelay deˈanaadan maaddiyoogan

“Tuma gidiyaabaa ubbaa, bonchchissiyaabaa ubbaa, mooro gidennabaa ubbaa, geeshshabaa ubbaa, siiqobaa ubbaa, lo77o haasaya gidiyaabaa ubbaa qoppite.” —Piliphphisiyuusa 4:8.

Geeshsha Maxaafay loˈˈo gidenna qofaa qoppiyoogaanne hara asaa boriyoogaa, qassi ‘zuuzummiyoogaanne harata amassaliyoogaa’ minttettenna. I: “Xoossai intteyyo immana giidoogan ufaittite” yaagees. —Yihudaa 4, 16; Roome 12:12.

Ha loˈˈo baaso siraatata oosuwan peeshshiyoogee nuuni ha wodiyan sarotettaanne woppatettaa demmana xallaassa gidennan, Xoossay nuuppe koyiyoobata oottiyaageeta gidanaadaaninne a anjjuwaa demmanaadan maaddoosona. Geeshsha Maxaafay: “Xilloti biittaa laattananne yan merinau de7ana” yaagees.—Mazamure 37:29.

[Sinttaa 5n deʼiya misiliyaa]

Akinooree oosancha gididi deˈiyo wode, (haddirssa baggan) qassi ha wodiyan ba keettaayeera ufayssan Geeshsha Maxaafaa tumaa yootiyo wode