Intte Shooruwaara Tumaa Haasayite
Intte Shooruwaara Tumaa Haasayite
“Simmi worddotoppite. . . . Asai ubbai ba ishau woykko ba shooruwau tumaa haasayanau bessees.”—EFISOONA 4:25.
1, 2. Daro asay tumaa waatidi xeellii?
TUMANCHA gidanau woy tuma gididabaa eranau danddayiya danddayennaakko asay daro wodiyau palamettiiddi takkiis. Usuppuntta xeetu layttan K.K., Giriike erancha gidida Alsiyoosi: “Ushshay tumay qonccanaadan oottees” yaagiis. Hegaa giyoogee tumay qoncciyoy issi uri aliyaappe aatti uyidi coo haasayiyo wode xallaana giyoogaa. Rooma asa gidida, Biittaa Haariya PHenxxeniyaa PHilaaxoosi koyro xeetu layttan: “Tumatetti aibee?” yaagiya sire oyshaa Yesuusa oychido wode, tumaa xeelliyaagan ayyookka bala xeelay deˈiyoogaa qonccissiis.—Yohaannisa 18:38.
2 Ha wodiyan tumaa xeelliyaagan issoy issuwaara moggenna daro xeelay asau deˈees. Daro asay, issi issi asay ubbatoo muleera tumancha gidenna, woykko tumay asappe asan dummatees yaagees. Harati tumaa haasayiyoy, eta goˈˈiyaaba, woykko issibaa sohuwaara giigissiyo oge gidiyo wode xallaana. Zi Impporttans of Laying giyo maxaafay: “Ammanettiyoogee loˈˈo baaso siraata gidana danddayees; shin deˈuwaunne sarotettau wolqqaama baaxiyaa baaxetiyo wode goˈˈiyaaba gidenna. Hegaa xeelliyaagan issi urau dooroy baawa; deˈanau i worddotana koshshees” yaagees.
3. Tumaa haasayiyoogan Yesuusi ubbaappe aadhiya leemiso gididoy aybissee?
3 Kiristtoosi erissiyo ashkkaratu hanotay hegaappe keehi dumma! Tumaa xeelliyaagan qommoora qonccida qofay Yesuusa xeelaappe dummatees. I ubbatoo tumaa haasayiis. A morkketikka: “Tamaarissiyaagoo, neeni tumaa haasayiyoogaanne Xoossaa ogiyaa tumatettan tamaarissiyoogaa nuuni eroos” yaagidosona. (Maatiyoosa 22:16) Ha wodiyankka, hegaadan tumu Kiristtaaneti Yesuusa leemisuwaa kaalloosona. Eti tumaa haasayanau mammottokkona. Eti: “Simmi worddotoppite. . . . Asai ubbai ba ishau woykko ba shooruwau tumaa haasayanau bessees” yaagidi kiitettida PHauloosi ba mala Kiristtaaneta zorido zoriyaa wozanappe maayoosona. (Efisoona 4:25) PHauloosa zoree oyqqido heezzu qofaa ane beˈoos. Koyruwan, nu shooroy oonee? Naˈˈanttuwan, tumaa haasayiyoogee woygiyoogee? Heezzanttuwan, hegaa ubba galla nu deˈuwan waatidi oosuwan peeshshana danddayiyoo?
Nu SHooroy Oonee?
4. Koyro xeetu layttan Ayhuda haymaanootiyaa kaalettiyaageetuppe dumma ogiyan, nu shooroy oonakko Yihoowa xeelaa Yesuusi waatidi qonccissidee?
4 Koyro xeetu layttan K.S., Ayhuda haymaanootiyaa kaalettiya issoti issoti, “shooro” geetettana danddayiyay bantta mala Ayhudatu xalla woykko mata laggetu xalla yaagidi tamaarissoosona. Gidikkokka, Yesuusi ba Aawaa eeshshaanne qofaa polo hanotan qonccissiis. (Yohaannisa 14:9) Xoossay issi zariyaa woykko issi dere asaa haraappe aattidi xeellennaagaa Yesuusi ba erissiyo ashkkaratuyyo bessiis. (Yohaannisa 4:5-26) Hegaa bollikka, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa” geeshsha ayyaanay kiitettida PHeexiroosassi qonccissiis. (Oosuwaa 10:28, 34, 35) Yaatiyo gishshau, nuna morkkedan xeelliyaageetakka siiqiyoogan, nuuni ubba asaa shoorodan xeellana koshshees.—Maatiyoosa 5:43-45.
5. Nu shooruwaara tumaa haasayiyoogaa giyoogee woygiyoogee?
5 Yaatin, PHauloosi nuuni nu shooruwaara tumaa haasayana koshshiyoogaa yootiyo wode woygana koyidee? Tumaa haasayiyoogee, ayba cimoynne baynnan tuma gidida qofaa yootiyoogaa gujjees. Tumu Kiristtaaneti harata balettanau tumaa geellayokkona, woykko wordduwaa yootokkona. Eti ‘iitabaa ixxoosona;’ qassi ‘loˈˈobaa minttidi oyqqoosona.’ (Roome 12:9) ‘Tumaa Xoossaa’ milatiyoogan, nuuni oottiyoobaaninne haasayiyooba ubban tumanchanne ammanettiyaageeta gidanau baaxetana koshshees. (Mazamure 15:1, 2; 31:5) Nu doonaappe kiyiyaabaa akeekan doorikko, yeellayiya woykko ufayssenna hanotatakka worddotennan giigissana danddayoos.—Qolasiyaasa 3:9, 10 nabbaba.
6, 7. (a) Tumancha gidiyoogaa giyoogee nuna oychida ubbau nu buzo allaalliyaa yootana bessees giyoogee? Qonccissa. (b) Nuuni ubbabaa yootana bessiyoonne ammanettana danddayiyo asati oonee?
6 Haratuura tumaa haasayiyoogaa giyoogee issibaa xeelliyaagan nu eriyo ubbabaa nuna oychida oossinne odana koshshees giyoogee? Gidennan aggana danddayees. Yesuusi saˈan deˈido wode, issi issi asau qoncce zaaroy woykko issi issi naqaashaa yootiyoogee koshshennaagaa bessiis. Haymaanootiyaa kaalettiya loˈˈo milatiya iitati malaatatanne maalaalissiyaabata oottanaadan ayyo alaafetettaa ooni immidaakko oychido wode, Yesuusi: “Taanikka inttena issibaa oichchana; tau odite; taani qassi hagaa ai alaafetettan oottiyaakko, intteyyo odana” yaagiis. Higgiyaa tamaarissiyaageetinne cimati zaarennan ixxido wode, Yesuusi: “Taanikka hagaa ai alaafetettan oottiyaakko, intteyyo odikke” yaagiis. (Marqqoosa 11:27-33) Eta iita oosuwaappenne ammanoy baynnaageeta gidiyoogaa bessiya hanotaappe denddidaagan eta oyshaa zaaranau koshshennabadan qoppiis. (Maatiyoosa 12:10-13; 23:27, 28) Ha wodiyankka hegaadan, bantta xallaa siiqiyo halchuwan asaa cimmiya woy balettiya kaddidaageetuppenne iita asatuppe Yihoowa asay naagettana koshshees.—Maatiyoosa 10:16; Efisoona 4:14.
7 PHauloosikka hegaadan issi issi asaa oyshau kumetta zaaruwaa immana bessennaagaa qonccissiis. I: ‘Zigiriyaageetinne yohon coo geliyaageeti, banttau bessennabaa haasayiyoogaa’ yootiis. (1 Ximootiyoosa 5:13) Issi ura buzo allaalliyaa eranau qoriyaageeti woykko ammanettidi asa xuura naagennaageeti, harati banttassi issibaa yootana koyennaagaa akeekana danddayoosona. Ayyaanay denttettin PHauloosi xaafido: “Woppu giida deˈuwaa deˈite. Qassi haratu allaalliyan geloppite” yaagiya zoriyaa siyiyoogee keehi koshshiyaaba. (1 Tasalonqqe 4:11, NW) Gidikkokka, issi issi wode gubaaˈiyaa cimati bantta oosuwaa polanau issi aawu buzo allaalliyaa oychiyoogee koshshana danddayees. Hegaa mala hanotan etassi tumaa yootiyoogee nashettiyaabanne maaddiyaaba.—1 PHeexiroosa 5:2.
So Asaara Gayttidaban Tumaa Haasayite
8. Tumaa haasayiyoogee so asay issoy issuwaara matattanaadan waatidi maaddii?
8 Nu soo asaara mino issippetettay deˈiyoogee erettidaba. He issippetettaa minttanau issoy issuwaara tumaa haasayiyoogee keehippe koshshiyaaba. Qonccenne tuma gididabaa kehatettan nuuni haasayiyoogan, metuwaanne bala ogiyan akeekido darobaa giigissana danddayettees. Leemisuwau, nuuni balabaa oottiyo wode, nu aqo laggiyaassi, nu naatussi woykko son deˈiya haratussi hegaa yootanau mammottiyoo? Nu mooruwaa wozanappe ammaniyoogee so giddon sarotettaynne issippetettay deˈanaadan maaddees.—1 PHeexiroosa 3:8-10 nabbaba.
9. Tumaa haasayiyoogee qoppennan coo haasayanau gaaso gidennay aybissee?
9 Issi uri qoppennan coo haasayiyo wode, tumaa haasayiyaaba gidikkonne, i yootiyoobaa goˈˈaa asay akeekennaadan oottees. PHauloosi: “Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite. Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite” yaagiis. (Efisoona 4:31, 32) Nuuni kehatettaaninne bonchuwan haasayiyoogee, nuuni haasayiyoobaa asay xoqqu oottidi xeellanaadan oottees; qassi nuuni haasayissiyoogeeta bonchiyoogaa bessees.—Maatiyoosa 23:12.
Gubaaˈiyaara Gayttidaban Tumaa Haasayite
10. Tumaa haasayiyoogan Yesuusa loˈˈo leemisuwaappe Kiristtaane cimati ay tamaarana danddayiyoonaa?
10 Yesuusi ba erissiyo ashkkaratussi qonccenne geliya ogiyan haasayiis. I ubbatoo siiquwan zoriis; gidikkokka, bana ezggiyaageeta ufayssanau giidi tumaa lefissidi yootibeenna. (Yohaannisa 15:9-12) Leemisuwau, i kiittidoogeeti etappe ooni aadhiyaakko issoy issuwaara zaari zaari palamettido wode, Yesuusi danddayan gidikkonne minttidi, ashkketettay koshshiyoogaa eti akeekanaadan maaddiis. (Marqqoosa 9:33-37; Luqaasa 9:46-48; 22:24-27; Yohaannisa 13:14) Hegaara issi mala hanotan, ha wodiyan Kiristtaane cimati xillotettaa mintti naagiyaageeta gidikkonne, Xoossaa wudiyaa wolqqan haarokkona. (Marqqoosa 10:42-44) Eti haratuura deˈiya gaytotettan ‘issoi issuwau kehiyoogaaninne qarettiyoogan’ Kiristtoosa leemisuwaa kaalloosona.
11. Nu ishantta siiqiyoogee nu inxxarssaa ayba ogiyan goˈettanaadan denttettana koshshii?
11 Nu ishanttuura haasayiyooban qoncce gididi, nu qofan deˈiya ubbabaa yootana xayikkonne, eta yiilloyennan haasayana danddayoos. Cashshan woykko kawushshiya haasayan qohanau goˈettiyoogan, nu inxxarssay “qara magilaalaa mala” gidanaadan mule koyokko. (Mazamure 52:2; Leemiso 12:18) Nu ishantta siiqiyoogee “[nu] inxxarssai iitabaa haasayennaadan, [nu] doonaikka wordduwaa odennaadan” teqqana mala nuna denttettees. (Mazamure 34:13) Hegaadan oottiyoogan, Xoossaa bonchoosinne gubaaˈiyan issippetettay deˈanaadan oottoos.
12. Worddotiya uri pirddau shiiqana koshshiyoy awudee? Qonccissa.
12 Issi ura qohanau giidi wordduwaa yootiyaageetuppe cimati gubaaˈiyaa minttidi naagoosona. (Yaaqooba 3:14-16 nabbaba.) Issi uri hegaa mala wordduwaa yootiyoy issi ogiyan hara ura qohanaassa woykko azzanttanaassa. Hegee balettiya guuttabaa woykko baynnabaa gujjidi haasayiyoogaappe aadhiyaabaa gujjees. Ubba worddoy bala gidikkonne, tuma gidennabaa haasayida uri ubbay pirddau shiiqana koshshees giyoogaa gidenna. Yaatiyo gishshau, wordduwaa haasayida uri pirddau shiiqanau bessiya hanotan, harata eriiddi qohanau worddotiyoogaa meeze oottidaakkonne cimati shaakkanau, bessiyaagaadan qoppiyaageetanne akeekancha gidana koshshees. Woykko, siiquwan Geeshsha Maxaafaappe mintti zoriyoogaa xallay gidanaakkonne qoppana koshshees.
Oosuwaara Gayttidaagan Tumaa Haasayite
13, 14. (a) Issi issi asati banttana ootissiyaageetussi ammanettennaageeta gidiyoy ayba ogiyaanee? (b) Oosuwan ammanettidaageetanne tumancha gidiyoogee ayba loˈˈo ayfe demissana danddayii?
13 Nuuni deˈiyoy worddotiyoogee aakkido wodiyaana; yaatiyo gishshau, ootissiya urau ammanettennaadan paacciya hanotaa eqettiyoogee metiyaaba gidana danddayees. Daroti oosuwau malkkachaa gelissiyo wode, qoncce wordduwaa worddotoosona. Leemisuwau, eti loˈˈo oosuwaa woykko daro damoozaa demissiya oosuwaa oyqqanau, oosuwaa meeziyan woykko tamaaridoban baynnabaa gujjana danddayoosona. Hara baggaara, ooso saatiyan buzo allaalliyaa poliyoogee digettidaba gidikkokka, daro oosanchati hegaadan oottiiddi ooso bollan deˈiyaabadan qoppoosona. Eti bantta oosuwaara gayttennabaa nabbabanau, buzo allaalliyau silkkiyaa dawalanau woy elektiroonike miishshatun kiitaa yeddanau, woykko Intterineetiyaa goˈettanau danddayoosona.
14 Tumu Kiristtaaneti ammanettiyoogaanne tumancha gidiyoogaa koyikko oottiyoobadan xeellokkona. (Leemiso 6:16-19 nabbaba.) PHauloosi: “Nuuni ubbaban ammanettanau koyoos” yaagiis. (Ibraawe 13:18, NW) Yaatiyo gishshau, Kiristtaaneti demmiyo damoozau bessiya keenaa oottana koshshiyoogaa akeekoosona. (Efisoona 6:5-8) Mino oosancha gidiyoogee saluwan deˈiya nu Aawaakka bonchissana danddayees. (1 PHeexiroosa 2:12) Leemisuwau, Isppeene biittan deˈiya Robertti ammanettidanne mino oosancha gidiyo gishshau, ootissiyaagee a galatiis. Robertto loˈˈo eeshshaa gaasuwan, a ooso keettay hara Yihoowa Markkata qaxariis. Hegeetikka mino oosancha gidiyoogaa bessidosona. Amarida layttatun, Roberttoy 23 xammaqettida ishanttussinne 8 xinaatetussi yan oosuwaa demmiis!
15. Zalˈancha gidida Kiristtaanee tumaa haasayiyoogaa waatidi bessana koshshii?
15 Nu buzo oosuwaa oottiyaaba gidikko, nu oosuwaara gayttida ubbaban nuuni ammanettiyaageetee, woy issitoo issitoo nu shooruwau worddotiyoo? Zalˈˈancha gidida issi Kiristtaanee issibaa eesuwan bayzzanau giidi baynnabaa gujjidi yootana koshshenna; woykko i maganxxaa ekkana woy immana bessenna. Harati nuna oyqqanaadan koyiyo ogiyan eta oyqqanau koyoos.—Leemiso 11:1; Luqaasa 6:31.
Deriyaa Ayssiyaageetuura Gayttidaagan Tumaa Haasayite
16. Kiristtaaneti (a) deriyaa ayssiyaageetuyyo immiyoy aybee? (b) Yihoowayyo immiyoy aybee?
16 Yesuusi: “Qeesaaraagaa Qeesaarassi, Xoossaagaa Xoossaassi immite” yaagiis. (Maatiyoosa 22:21) Nuuni Qeesaarayyo, giishin deriyaa ayssiyaageetuyyo ‘immana’ bessiyaabay aybee? Yesuusi hegaadan giidoy giiraa xeelliyaagan denddida oyshaa zaarido wode. Yaatiyo gishshau, Xoossaanne asaa sinttan geeshsha zoriyaa wozanay deˈanaadan, giiraa qanxxiyoogaara gayttidabaa gujjin, Kiristtaaneti bantta biittaa higgiyau azazettoosona. (Roome 13:5, 6) Gidikkokka, Yihooway nuuni kumetta wozanaappe, kumetta shemppuwaappe, kumetta qofaappenne kumetta wolqqaappe siiqiyo, Ubbaappe Bollaara Ubbabaa Haariyaagaa, a xallay tumu Xoossaa gidiyoogaa eroos. (Marqqoosa 12:30; Ajjuutaa 4:11) Yaatiyo gishshau, ubbaban Xoossaa Yihoowau haarettoos.—Mazamure 86:11, 12 nabbaba.
17. Deriyau immiyo maaduwaa ekkiyoogaa Yihoowa asay waatidi xeellii?
17 Daro biittatun metootidaageeta koshshiyaaban maaddiyo giigissoy deˈees. Hegaa mala maadoy koshshiyo issi Kiristtaanee he giigissuwan goˈettiyoogee bala gidenna. Nu shooruwaara tumaa haasayiyoogee, maaduwaa demmanau giidi deriyaa ayssiyaageetuyyo worddotennaadan woykko eta balettennaadan oottees.
Tumancha Gidiyoogee Demissiyo Anjjuwaa
18-20. Nu shooruwau tumaa haasayiyoogan ayba anjjuwaa demmiyoo?
18 Tumancha gidiyoogee daro anjjuwaa demissees. Garssa sarotettaynne woppu giida wozanay deˈanaadan oottiya, geeshsha zoriya wozanay deˈiyoogeeta gidoos. (Leemiso 14:30; Piliphphisiyuusa 4:6, 7) Geeshsha zoriya wozanay deˈiyoogeeta gidiyoogee Xoossay xoqqu oottidi xeelliyooba. Qassi nuuni ubbaban ammanettiyaageeta gidiyo wode, nu balaa woykko mooruwaa asi erees giidi hirggokko.—1 Ximootiyoosa 5:24.
19 Hara anjjuwaakka ane qoppoos. PHauloosi: “Ubbaban nuuni Xoossaa ashkkarata gidiyoogaa . . . tumaa haasayiyoogan” bessiyoogaa yootiis. (2 Qoronttoosa 6:4, 7) Hegee Biritaaniyaa biittan deˈiya issi Yihoowa Markkaa hanotan qoncciis. Kaamiyaa shammanau koyiya issuwau ba kaamiyaa bayzzanau koyido wode, ba kaamiyaa xeelliyaagan loˈˈobaanne qonccidi beettenna pacaa gujjin ubbabaa yootiis. SHammiyaagee kaamiyaa laaggidi beˈanau efi simmidi, neeni Yihoowa Markkee yaagidi ishaa oychiis. I hegaadan qoppidoy aybissee? Bitanee ishay tumaa yootidoogaanne bonchissiya ogiyan maayidoogaa akeekiis. Hegaappe simmin haasayidobay ishay bitaniyau loyttidi markkattanaadan ogiyaa dooyiis.
20 Nuunikka hegaadan ubbatoo ammanettiyaageetanne tumancha gidiyoogan nuna Medhidaagaa bonchissiyoo? PHauloosi: “Nuuni geeman oottiyo yeellayiya ooso ubbaa aggi bayida; qassi gene oosokka oottokko” yaagiis. (2 Qoronttoosa 4:2) Yaatiyo gishshau, nuuyyo danddayettida ubban nu shooruwaara tumaa haasayiyaageeta gidoos. Hegaadan oottiyoogan, saluwan deˈiya nu Aawaanne a asaa bonchissoos.
Woygada Zaaruutii?
• Nu shooroy oonee?
• Nu shooruwaara tumaa haasayiyoogaa giyoogee woygiyoogee?
• Ammanettiyaageeta gidiyoogee Xoossaa bonchissiyoy ayba ogiyaanee?
• Tumancha gidiyoogee ayba anjjo demissii?
[Oyshata]
[Sinttaa 25n deʼiya misiliyaa]
Guutta balaa sohuwaara ammanada ekkay?
[Sinttaa 26n deʼiya misiliyaa]
Oosuwau malkkachaa gelissiyo wode tumaa haasayay?