Hiyyeesatettay Xoossay Anjjennaagaa Bessiyaabee?

XOOSSAY beni wode Israaˈeeletuyyo: “Intte giddon issi asinne hiyyeesenna” yaagiis. Hegaa giidoy, i etassi immido Higgiyan hiyyeesatussi qoppiyo ogiyaanne acuwaa maariyoogaa xeelliyaagan azazuwaa immido gishshataassa. (Zaarettido Wogaa 15:1-4, 7-10) Hegaappe denddidaagan, Yihooway eta anjjanau qaalaa gelido gishshau, Israaˈeela asaa giddon hiyyeesi deˈana koshshenna. Gidoppe attin, he anjjoy Israaˈeeleti azazettennan aggido Muuse Higgiyau azazettiyoogan baasettidaba.

Gidikkokka, dureti Xoossay anjjidoogeeta giyoogaa gidennaagaadan, hiyyeesati Xoossay anjjibeennaageeta giyoogaa gidenna. Ammanettidi Xoossau oottidaageetuppe daroti aquwaaban hiyyeesa. Hananabaa yootiya Amoxi dorssaa heemmiyaanne ettaa ayfiyaa maxiya hiyyeesa asa. (Amoxa 1:1; 7:14) Hananabaa yootiya Eelaasa wode, Israaˈeelen koshay denddido wode, iyyo deˈiya guutta xiilleenne zaytee koshaa wode maalaalissiya hanotan baraatido issi hiyyeesa amˈˈee imatoy Eelaasassi koshshiis. Eelaasa gidin amˈˈiyo gidin, naaˈˈykka duretibookkona; Yihooway etau koshshiyaabaa xallaa immiis.—1 Kawotu 17:8-16.

Qoppennan gakkiyaabay asay issi kutti hiyyeesanaadan oottana danddayees. Daafaynne harggee issi uri guutta wodiyau woykko muleera oottennaadan diggana danddayees. Hayqoy naata aaya woy aawi baynnaageeta, maccaasaa qassi amˈˈe oottana danddayees. Hegaa mala iita hanotaykka gidin, Xoossay anjjibeennaagaa bessiyaaba gidenna. Naˈoominne Uruti taarikee, Yihooway hiyyeesatuyyo koshshiyaabaa siiquwan kunttiyoogaa bessiya minttettiya leemiso. Naˈoomanne Uruta bantta azinati hayqqin keehippe hiyyeesidaba gidikkokka, Xoossaa Yihooway eta anjjiisinne etau koshshiyaabaa kunttiis.—Uruto 1:1-6; 2:2-12; 4:13-17.

Hiyyeesatettay Xoossay anjjibeennaagaa bessiyaaba gidennaagee qoncce. Xoossaa Yihoowau ammanettiyaageeti, Kawuwaa Daawiti: “Taani kase yelaga; ha77i simmi cimaas; shin xillo asi coo attin, woikko a naati miyoobaa woossin, taani mulekka be7a erikke” yaagido qaalan ammanettana danddayoosona.—Mazamure 37:25.

[Sinttaa 8n deʼiya misiliyaa]

Naˈoomanne Uruta hiyyeesa gidikkokka, Xoossay eta anjjiisinne etau koshshiyaabaa siiquwan kunttiis