Miishshay Tumu Ufayssaa Demissii?

SOONIYA yelettidoy Isppeene biittaana. Naatettan ba aayeera Yihoowa Markkatu shiiquwan beettawusu. SHin a gitaa gidada, Inggilize biittaa Londdene katama baasu; wurssettan gita zalˈˈe dirijjitetuura oottiyoogaa doommaasu.

Sooniya ba oosuwaa keehippe dosawusu. A daro damoozaa demmawusu; qassi a keehi daro miishsha zalˈˈiyaa dallaallawusu. He oosuwan a keehippe ufayttaasunne murutaasu. Sooniya galla galla 18 saatiyaa oottawusu; qassi issi issitoo naaˈˈu woy heezzu saate xallaa xiskkawusu. I oosoy iyyo deˈo. Hegaappe simmin, qoppennan i deˈoy wolqqaama hanotan laamettiis. Sooniya guuggiyan suuttay gukkidoogaappe denddidaagan keehippe sahettaasu; hegau gaasoy unˈˈissiya i deˈuwaa gidennan aggenna. Iyyo layttay he wode 30 xalla.

Iyyo issi bagga bollay mule qaaxxenna; qassi dottoreti a zaarettada haasayanaagaa siridosona. Koshshiyaaban o maaddanau i aayyiyaa sohuwaara Inggilize biitti baasu. Sooniya zaarettada hemettiyoogaa doommido wode, i aayyiyaa iyyo, “Taani gubaaˈiyaa shiiquwaa baana; nena nerkka aggada baana danddayenna gishshau, neeni tanaara baana koshshees” yaagaasu. Sooniya iira baanau maayaasu. Hanidabay aybee?

Sooniya hagaadan gaasu: “Taani siyidobay ubbay tuma. Hegee keehippe ufayssiyaaba. Taani koyro Kawotettaa Addaraashaa biido wode tana sarotida darotuppe issinniira Geeshsha Maxaafaa xannaˈanau ufayssan eeno gaas. Kase tanaara erettiya asati tana oychiyoogaa aggidosona; shin ta ooratta laggeti tana siiqoosonanne koshshiyaaban maaddoosona.”

Loddan loddan Sooniya zaarettada haasayiyoogaa doommaasu; qassi ayyaanaabankka eesuwan dichaa bessaasu. Issi laytta kumennan a xammaqettaasu. I ooratta laggetuppe daroti kumetta wodiyaa haggaaziya Kiristtaaneta gidiyo gishshau, eti ay keena ufayttiyaakko akeekaasu. Sooniya, ‘Taanikka hegaadan ufayttana koyays. Xoossaa Yihoowayyo taani danddayidobaa ubbaa immanau koyays!’ gaada qoppaasu. Sooniya haˈˈi kumetta wodiyaa haggaazawusu.

Sooniya bana gakkidabaappe ay tamaaradee? “Taani kase daro miishshaa demmiyaaba gidikkokka, oosuwaappe denddidaagan unˈˈettiyoogeenne hirggiyoogee taani ufayttennaadan oottiis. Deˈuwan aybippenne aadhidi koshshiyaabay saluwan deˈiya ta Aawaa Yihoowaara loˈˈo dabbotaa medhiyoogaa gidiyoogaa akeekaas. Taani haˈˈi tumuppe ufayttays” yaagaasu.

Kiitettida PHauloosi: “Miishsha siiqiyoogee iitatetta ubbau pultto. Issooti issooti hegaa amottiiddi, ammanuwaappe balettidi, daro metuwan banttana qohidosona” yaagidi xaafiis. (1 Ximootiyoosa 6:10) Sooniya bana gakkidabaappe ha qaalati tuma gidiyoogaa yootawusu.