Neeyyo Kiristtoosaagaa Mala Qofay Deˈo
Neeyyo Kiristtoosaagaa Mala Qofay Deˈo
“Kiristtoos Yesuusan de7iya ha qofai qassi inttenankka de7anau bessees.”—PILIPHPHISIYUUSA 2:5.
1. Nuussi Kiristtoosaagaa mala qofay deˈanaadan koyana bessiyoy aybissee?
YESUUS KIRISTTOOSI: “Taakko haa yiite; . . . taani ashkkenne wozanappe kauyyiyaagaa gidido gishshau, . . . taappe tamaarite; intte shemppuwaukka intte shemppo demmana” yaagiis. (Maatiyoosa 11:28, 29) Ha keha shoobee Yesuusau deˈiya siiqo xeelaa loytti qonccissees. Kaallanau appe aadhidi loˈˈo leemiso gidiya asi baawa. Yesuusi gita wolqqaynne maatay deˈiyo, Xoossaa Naˈaa gidikkokka, tuggatidaageetussi dumma ogiyan azzaniisinne qarettiis.
2. Yesuusa qofaara gayttidaagan ay ay pilgganee?
2 Hagaaninne kaallidi deˈiya naaˈˈu huuphe yohotun, nuuni waatidi Yesuusaagaa mala qofaa oyqqanaunne naagidi deˈanau danddayiyaakko, qassi nu deˈuwan waanidi “Kiristtoosa wozanai” deˈiyoogeeta gidana danddayiyaakko beˈana. (1 Qoronttoosa 2:16) Yesuusa qofaara gayttidaagan kaallidi ichashubata pilggana; hegeetikka, a ashkketettaanne i ba huuphiyaa kawushshiyoogaa, a kehatettaa, i Xoossaayyo azazettiyoogaa, a xalatettaanne a aggenna siiquwaa.
Kiristtoosa Ashkketettaappe Tamaara
3. (a) Ba huuphiyaa kawushshiyoogaa xeelliyaagan Yesuusi ba erissiyo ashkkarata tamaarissido issi ogee aybee? (b) Yesuusi ba erissiyo ashkkarati daafurancha gidido wode woygidee?
3 Polo gidida, Xoossaa Naˈay Yesuusi, polo gidennanne nagarancha asaa giddon haggaazanau ba dosan saˈaa yiis. He asatuppe issoti issoti guyyeppe a woranaageeta gidikkonne, Yesuusi ubbatoo ufayttidinne danddayidi deˈiis. (1 PHeexiroosa 2:21-23) Yesuusa leemisuwaa akeekan ‘xeelliyoogee,’ haratu mooroynne polotettaa pacay nuna qohiyo wode nuunikka ufayttidinne danddayidi deˈanaadan maaddana danddayees. (Ibraawe 12:2) Yesuusi ba erissiyo ashkkarati banaara ba qambbaran waaxettidi baappe tamaaranaadan shoobbiis. (Maatiyoosa 11:29) Eti tamaarana danddayiyoobay aybee? Issibay, Yesuusi ashkke, qassi ba ashkkarati mooriyaaba gidikkonne eta danddayiis. Yesuusi hayqqanaappe kase qammi, ba erissiyo ashkkaratu gediyaa meecciyoogan, i “wozanappe kauyyiyaagaa” gidiyoogaa eti awudenne dogenna ogiyan tamaarissiis. (Yohaannisa 13:14-17 nabbaba.) Guyyeppe, PHeexiroosi, Yaaqoobinne Yohaannisi beegotti naagennan aggidi ‘xiskkido’ wode, Yesuusi kehatettan eti daafurancha gidiyoogaa akeekiis. I: “Simoonaa, xiskkadii?” yaagidi oychiis. “Paaciyan intte gelenna mala, naagitenne Xoossaa woossite; ayyaanai giigi uttiis; shin ashoi daafuranchcha” yaagiis.—Marqqoosa 14:32-38.
4, 5. Haratu balaa nuuni danddayanaadan Yesuusa leemisoy waatidi maaddana danddayii?
4 Issi Kiristtaanee keesettiyaagaa, sohuwaara yiillotiyaagaa woy cimati woykko ‘ammanettida wozannaama ashkkaray’ immiyo zoriyaa sohuwaara ekkennaagaa gidiyo wode waati oyqqiyoo? (Maatiyoosa 24:45-47) Alamiyan deˈiya asay hegaa mala polotettaa pacaa bessiyoogaa naaganaunne etau atto gaanau danddayoos; shin nu ishantti hegaa malabaa bessiyo wode atto gaanau metootana danddayoos. Haratu balan nuuni eesuwan yiillotiyaaba gidikko, ‘Waatada “Kiristtoosa wozanai” deˈiyoogaa gidana danddayiyaanaa?’ yaagidi nuna oychana koshshees. Yesuusi ba erissiyo ashkkarati “Kiristtoosa wozanai” deˈiyoogeeta gidennan aggidaba gidikkonne, etau yiillotibeennaagaa hassaya.
5 Kiitettida PHeexiroosa hanotaa qoppa. PHeexiroosi wolwoluwaappe wodhidi haattaa bolli hemettidi Baakko yaanaadan Yesuusi yootido wode, PHeexiroosi haattaa bolli guuttaa hemettiis. Hegaappe guyyiyan, PHeexiroosi wolqqaama carkkuwaa xeellido wode haattay a mituwaa doommiis. Yesuusi keehippe yiillotidi ayyo: “Hegee neessi bessiyaaba. Hegaappe timirtte demma” giidee? Akkay gibeenna! “Sohuwaara Yesuusi ba kushiyaa yeddidi, PHeexiroosa oiqqidi, ‘Laa ha ammanoi laafidoogoo! Aissi siradii?’ yaagiis.” (Maatiyoosa 14:28-31) Yesuusi PHeexiroosa maaddanau ba kushiyaa yeddidoogaadan, ammanuwan minnana koshshiyo issi ishaa kehatettan maaddana danddayiyoo? Hegee Yesuusi PHeexiroosau ashkketettaa bessidoogan qonccida timirtte gidiyoogee tuma.
6. Kiitettidaageeti issoy issuwaappe aadhanau koyiyoogaa xeelliyaagan Yesuusi ay tamaarissidee?
6 Kiitettidaageeti issoy issuwaappe ooni dariyaakko yaagidi aggennan palamettido palaman PHeexiroosikka geliis. Yaaqoobinne Yohaannisi Kawotettan Yesuusappe ushacha baggaaninne haddirssa baggan uttanau koyidosona. Hegaa PHeexiroosinne hara kiitettidaageeti siyido wode yiillotidosona. Etayyo keesettiyo xeelay deˈanaadan oottiday eti diccido deretettaa gidana danddayiyoogaa Yesuusi erees. Eta baakko xeegidi i: “Aihuda gidennaageetu halaqatinne hegeeta kaalettiya asati bantta asaa haariyoogaa ereeta. Intte giddon hegaa mala gidenna; shin intte giddon gitatana koyiya ooninne intteyyo ashkkara gidanau bessees. Qassi intte giddon ubbaappe bolla gidana koyiyai ooninne intteyyo aille gidanau bessees” yaagiis. Hegaappe simmidi Yesuusi: “Hegaadan taani, Asa Na7ai, asaayyo oottanaunne daro asaa wozanau ta shemppuwaa immanau yiidoogaappe attin, asi tau oottanau yabeikke” yaagidi ba leemisuwaa yootiis.—Maatiyoosa 20:20-28.
7. Nuuni ubbay gubaaˈiyan issippetettay deˈanaadan waatidi maaddana danddayiyoo?
7 Yesuusi ba huuphiyaa kawushshidoogan wotti denttidi qoppiyoogee nu ishanttuppe nuuni ‘guuxxiyoobadan’ xeellanaadan maaddana danddayees. (Luqaasa 9:46-48) Hegaadan oottiyoogee issippetettau maaddees. Daro so asay deˈiyo aawadan, Yihooway ba naati issoy issuwaara maayidi ‘issippetettan deˈanaadan’ koyees. (Mazamure 133:1) Yesuusi: “Neeni tana siiqiyoogaadan, etakka siiqidoogaanne tana sa7aa kiittidoogaa sa7ai eranaadan” yaagidi, tumu Kiristtaaneti ubbay issuwaa gidanaadan ba Aawaakko woossiis. (Yohaannisa 17:23) Yaatiyo gishshau, nu issippetettay nuuni Kiristtoosa kaalliyaageeta gidiyoogaa erissees. Hegaa mala issippetettaa demmanau, haratu polotettaa pacaa Kiristtoosi xeellidoogaadan xeellanau bessees. Yesuusi atto giis; qassi nuuyyo atto geetettana danddayiyoy nuunikka atto giyo wode xallaana gidiyoogaa tamaarissiis.—Maatiyoosa 6:14, 15 nabbaba.
8. Daro wodiyau Xoossau oottidaageetu leemisuwaappe ay tamaarana danddayiyoo?
8 Daro layttau Kiristtoosa leemisuwaa kaallidaageetuugaa mala ammanuwaa bessiyoogankka darobaa tamaarana danddayoos. Yesuusaagaadan hegeetikka darotoo haratu polotettaa pacaa akeekiyoogaa bessoosona. Kiristtoosaagaadan qarettiyoogee “daafuranchchatu toohuwaa tookkanau” maaddiyoogaa xalla gidennan, issippetettaukka maaddiyoogaa eti akeekidosona. Hegaa bollankka, kumetta gubaaˈiyau Kiristtoosaagaa mala qofay deˈanaadan minttettees. Kiitettida PHauloosi Roomen deˈiya Kiristtaanetuyyo: “Intte ubbai issi wozana gididi, issi qaalan Xoossaa, nu Godaa Yesuus Kiristtoosa Aawaa, bonchchana mala, genccaanne minotettaa immiya Xoossai, intteyyo Kiristtoos Yesuusi oottidoogaadan, issoi issuwaara issippe de7iyo issi qofaa immo” yaagidi amottidoogaadan eti bantta ishanttuyyo amottoosona. (Roome 15:1, 5, 6) Ee, nuuni issippetettan goynniyoogee Yihoowa bonchissees.
9. Nuuni Yesuusa leemisuwaa kaallanau geeshsha ayyaanay koshshiyoy aybissee?
9 Yesuusi, ‘wozanappe kauyyiyoogaa’ Xoossaa ayyaanaa ayfiyaa macara gidida ashkketettaara gattidi yootiis. Hegaa gishshau, Yesuusa leemisuwaa suure kaallanau, a leemisuwaa pilggiyoogaa bolli Yihoowa geeshsha ayyaanay nuussi koshshees. Xoossaa ayyaanaa demmanau woossana, qassi ayyaanaa ayfiyaa, giishin “siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa” dichanau baaxetana koshshees. (Galaatiyaa 5:22, 23) Ashkketettaaninne ba huuphiyaa kawushshiyoogan Yesuusi bessido leemisuwaa hegaa mala hanotan kaalliyoogan, saluwan deˈiya nu Aawaa Yihoowa ufayssoos.
Yesuusi Harata Kehatettan Oyqqiis
10. Yesuusi kehatettaa bessidoy ayba ogiyaanee?
10 Kehatettaykka geeshsha ayyaanaa ayfiyaa macara. Yesuusi harata ubbatoo kehatettan oyqqiis. Yesuusa koyidi akko yiida ubbay i banttana kehatettan mokkidoogaa akeekidosona. (Luqaasa 9:11) Yesuusi bessido kehatettaappe ay tamaarana danddayiyoo? Keha uri ashkke, qarettiyaanne pashkka asa. Yesuusi hegaa mala asa. “Heemmiya asi bainna dorssadan asai hirggiyo gishshaunne asaa maaddiyaabi bainna gishshau,” Yesuusi etau qarettiis.—Maatiyoosa 9:35, 36.
11, 12. (a) Yesuusi qaretaa bessido issi hanotaa qonccissa. (b) Ha beˈido leemisuwaappe neeni ay tamaarana danddayay?
11 Yesuusi qarettiyoogaa ba oottidoban bessiis. Issi leemisuwaa beˈa. Issi maccaasiyaa 12u layttau suuttay goggin waayettaasu. Ba hanotaappe denddidaagan, a tuna gidiyoogaanne haratuura Xoossau goynnanau issi paqqadettennaagaa, qassi o bochiya ooninne tuna gidiyoogaa erausu. (Wogaabaa 15:25-27) Gidikkonne, asay Yesuusa loˈˈoban denttiyoogeenne i asaa oyqqiyo ogee i bana pattana danddayiyoogaa, qassi pattanaagaa a ammananaadan oottennan aggenna. A: “Taani harai atto, a afalaa bochchikko paxana” yaagada qoppaasu. A xalada hegaadan oottaasu; qassi paxidoogaa sohuwaara akeekaasu.
12 Yesuusi issi uri bana bochidoogaa eridi, ooni bochidaakko beˈanau yuushshi aattidi xeelliis. He mishiriyaa Higgiyaa kanttido gishshau bana hanqqettees gaada yayyennan aggukku, kokkoraydda a tohuwan gufannada ubbabaa odaasu. Yesuusi ha metootida hiyyeesa maccaasiyo hanqqettidee? Mule hegaadan oottibeenna! I o minttettidi: “Ta na7ee, nena ne ammanoi pattiis; saruwan ba” yaagiis. (Marqqoosa 5:25-34) A hegaa mala keha qaalaa siyada ayba minettadeeshsha!
13. (a) Yesuusa qofay Parisaawetuugaappe dummatiyoy ayba ogiyaanee? (b) Yesuusi naata oyqqidoy ayba ogiyaanee?
13 Qareti baynna Parisaawetuugaappe dumma hanotan, Kiristtoosi haratu toohuwaa deexettanau ba maataa mule goˈettibeenna. (Maatiyoosa 23:4) Hegaappe, kehatettaaninne danddayan harata Yihoowa ogiyaabaa tamaarissiis. Yesuusi bana kaalliyaageetussi qarettiya lagge; ubba wode siiqiyaanne keha gidida tumu lagge. (Leemiso 17:17; Yohaannisa 15:11-15) Naatikka Yesuusakko shiiqanau yayyokkona; qassi i ufayttidi eta shiishshi ekkidoogee qoncce. Ba oosuwaa essidi guutta naatuura wodiyaa aattanau wode xayibeenna. Issi wode, Yesuusi erissiyo ashkkarati, bantta wode deˈiya haymaanootiyaa kaalettiyaageetudan bantta gitatettaa qoppidi, Yesuusi bochana mala asay guutta naata akko eheennaadan digganau malidosona. Ba erissiyo ashkkarati hegaadan oottidoogan Yesuusi ufayttibeenna. I etassi: “Guutta naati taakko yiyoogaa diggoppite; aissi giikko, Xoossaa kawotettai hageetu malaassa” yaagiis. Yesuusi erissiyo ashkkarata keehi koshshiyaabaa tamaarissanau naata goˈettidi: “Taani intteyyo tumaa gais; Xoossaa kawotettaa guutta na7adan ekkenna urai ooninne he kawotettaa mulekka gelenna” yaagiis.—Marqqoosa 10:13-15.
14. Wozanappe qoppiyoogaa bessido naati ayba goˈˈaa demmiyoonaa?
14 He naatuppe issoti issoti daro layttappe guyyiyan gasttidi, Yesuus Kiristtoosi ‘ba kushiyaa eta bolli wottidi, eta anjjidoogaa’ akeekiyo wode, etau aybi siyettidaakko issi kutti qoppa. (Marqqoosa 10:16) Cimatinne harati wozanappe etau qoppiyoogan goˈettida, ha wodiyan deˈiya naatikka wodeppe eta siiquwan hassayana. Ubbaappekka aaruwan, naatettaappe doommidi gubaaˈiyan wozanappe qoppiyo hegaa mala hanotan oyqqido naati, Yihoowa ayyaanay a asaara deˈiyoogaa akeekoosona.
Kehatettay Baynna Alamiyan Kehatettaa Bessa
15. Ha wodiyan kehatettay xayidoogan nuuni garamettana koshshennay aybissee?
15 Ha wodiyan daro asay haratussi kehatettaa bessanau bau wodee baynnabadan qoppees. Yaatiyo gishshau, Yihoowa asay timirtte keettan, ooso sohuwan, ogiyaaninne haggaazuwan ubba wode alamiyaa ayyaanaa eqettana bessees. Kehatettay baynna xeelay nuna azzanissana danddayees; shin garamissana koshshenna. Wayssiya ha ‘wurssetta gallassan’ ‘banttana siiqiya, siiqoy baynna’ asatuura tumu Kiristtaaneti ubbatoo gayttanaagaa PHauloosi nuna kasetidi akeekissanaadan Yihooway ayyaanan denttettiis.—2 Ximootiyoosa 3:1-3.
16. Kiristtoosaagaa mala kehatettaa gubaaˈiyan waatidi bessana danddayiyoo?
16 Hara baggaara, tumu Kiristtaanetu gubaaˈiyan deˈiya hanotay kehatettay baynna alamiyaagaappe dumma ogiyan woppa demissiyaagaa. Yesuusa leemisuwaa kaalliyoogan, nuuni ubbay he loˈˈo hanotay deˈanaadan maaddana danddayoos. Nuuni hegaadan oottana danddayiyoy ayba ogiyaanee? Koyruwan, gubaaˈiyan deˈiya daroti payyatettaa pacay woykko hara meto hanotay deˈiyoogeeta gidiyo gishshau, nu maadoynne minttettoy etassi koshshees. Ha ‘wurssetta gallassatun,’ hegaa mala metoti gujjana danddayoosona; shin ooratta gidokkona. Beni wodekka Kiristtaaneti hegaa mala metotun waayettidosona. Yaatiyo gishshau, he wode deˈida Kiristtaanetussi maadoy koshshidoogaadan, ha wodiyankka koshshees. Leemisuwau, PHauloosi Kiristtaaneti ‘unˈˈettidaageeta minttettanaadan, daafuranchata kaafanaadan, asa ubbaa danddayanaadan’ zoriis. (1 Tasalonqqe 5:14) Hegee Kiristtoosaagaa mala kehatettaa oosuwan peeshshiyoogaa gujjees.
17, 18. Nuuni Yesuusi kehatettaa bessido leemisuwaa kaallana danddayiyo amarida ogeti awugeetee?
17 Kiristtaaneti bantta ishantta kehatettan mokkana Koshshees. Qassi nuuni daro wodiyau eriyoogeeta gidin woykko mule gaytti erennaageeta gidin, etau wozanappe qoppiyoogaa bessidi, Yesuusi eta oyqqiyo ogiyan oyqqana koshshees. (3 Yohaannisa 5-8) Yesuusi kasetidi haratussi qarettiyoogaa bessidoogaadan, nuunikka ubbatoo harata minttettiyoogan hegaadan oottana koshshees.—Isiyaasa 32:2; Maatiyoosa 11:28-30.
18 Nuuni ubbay haratussi qoppiyoogaanne eta metuwaa akeekiyoogaa bessiyaabaa oottiyoogan, kehatettaa bessana danddayoos. Hegaadan oottiyo ogiyaanne injjiyaa koyananne baaxetana koshshees. PHauloosi: “Issoi issuwaara ishanttudan siiqettite; issoi issuwaa bonchchiyoogan ufaittite” yaagidi zoriis. (Roome 12:10) Hegaa giyoogee Kiristtoosa leemisuwaa kaalliyoogaa, harata siiquwaaninne kehatettan oyqqiyoogaa, ‘tumu siiquwaa’ bessiyoogaa tamaariyoogaa giyoogaa. (2 Qoronttoosa 6:6) Kiristtoosaagaa mala gidida he siiquwaa PHauloosi: “Siiqoi danddayanchcha. Siiqoi kehees. Siiqoi qanaatenna. Ceeqettenna; qassi otorettenna” yaagidi qonccissiis. (1 Qoronttoosa 13:4) Nu ishanttuyyoonne michonttuyyo lanccidi uluwan oyqqiyoogaappe: “Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite” yaagiya zoriyaa siyiyaageeta gidoos.—Efisoona 4:32.
19. Kiristtoosaagaa mala kehatettaa bessiyoogan demmiyo loˈˈobay aybee?
19 Nuuni ubba wodenne ubbaban Kiristtoosaagaa mala kehatettaa bessanau baaxetiyoogee daro anjjuwaa demissees. Ubbay ayyaanaa ayfiyaa ayfanaadan maaddidi, Yihoowa ayyaanay gubaaˈiyan oottees. Hegaa bollikka, nuuni Yesuusa leemisuwaa kaalliyo wodenne harati hegaadan oottanaadan maaddiyo wode, nuuni ufayssan issippe goynniyoogee Xoossaa ufayssees. Yaatiyo gishshau, harata oyqqiyo ogiyan Yesuusaagaa mala ashkketettaanne kehatettaa ubbatoo bessanau baaxetiyaageeta gidoos.
Qonccissana Danddayay?
• Yesuusi “ashkkenne wozanappe kauyyiyaagaa” gidiyoogaa waatidi bessidee?
• Yesuusi kehatettaa bessidoy ayba ogiyaanee?
• Polotettay baynna ha alamiyan Kiristtoosaagaa mala ashkketettaanne kehatettaa bessana danddayiyo issi issi ogeti awugeetee?
[Oyshata]
[Sinttaa 11n deʼiya misiliyaa]
Issi ishaa ammanoy PHeexiroosaagaadan shuggiyo wode, nuuni maaddiyoo?
[Sinttaa 13n deʼiya misiliyaa]
Gubaaˈee kehatettaa demmiyo soho gidanaadan waatada maaddana danddayay?