Xoossaappe Demmiyo Duretaa

NEENI Xoossaayyo ammanettidaagaa gidikko, i nena dureyidi anjjanee? Anjjana danddayees; shin neeni qoppiyo duretettan gidennan aggana danddayees. Yesuusa aayee Mayraami leemisuwaa akeeka. Kiitanchaa Gabreeli ikko yiidi, a Xoossan ‘daro doorettidaaro’ gidiyoogaanne Xoossaa Naˈaa yelanaagaa yootiis. (Luqaasa 1:28, 30-32) Gidikkokka, a dure gidukku. Mayraama Yesuusa yela simmada yarshshuwaa shiishshido wode, hiyyeesa asay Yihoowayyo yarshshiyo meeziyaadan “naa77u buuba haraphpheta woikko naa77u mara haraphpheta” ehaasu.—Luqaasa 2:24; Wogaabaa 12:8.

Mayraama hiyyeesa gididoogee o Xoossay anjjibeenna giyoogee? Hegaappe dumma hanotan, a ba dabbiyo Elssaabeexo oychanau biido wode, Elssaabeexa banan “Geeshsha Ayyaanai kumin, qaalaa xoqqissada, ‘Neeni maccaasa ubban anjjettidaaro; ne uluwan de7iya na7ainne anjjettidaagaa’” yaagaasu. (Luqaasa 1:41, 42) Mayraama Xoossay dosiyo a Naˈaa yeliyo maataa demmaasu.

Yesuusi ba huuphe dure asa gidenna. Yesuusi hiyyeesa keettan diccidoogaa xalla gidennan, i saˈan deˈido wode ubban hiyyeesa. I issi wode bana kaallanau koyida issi bitaniyau: “Worakanatussi ollai de7ees; kafotussikka keettai de7ees; shin taani Asa Na7ai, zin77ada shemppa ekkiyoosikka tau baawa” yaagiis. (Luqaasa 9:57, 58) Gidoppe attin, Yesuus Kiristtoosi saˈaa yiidoogan oottidobay, i erissiyo ashkkarati daro aquwaa demmanaadan oottiis. Kiitettida PHauloosi: “Intte a hiyyeesatettan duretanaadan, intte gishshau hiyyeesiis” yaagidi xaafiis. (2 Qoronttoosa 8:9) Yesuusi ba erissiyo ashkkaratussi immido duretettay ay malee? Ha wodiyan nuussi shin ay mala duretetta immii?

Ay Mala Duretettee?

Dure asi Xoossan ammanettiyoogaappe ba miishshan ammanettana danddayiyo gishshau, aquwaabaa duretettay darotoo ammanuwau xube gidees. Yesuusi: “Daro dure asi Xoossaa kawotettaa gelanaagee waani metanddeeshsha!” yaagiis. (Marqqoosa 10:23) Yaatiyo gishshau, Yesuusi bana kaalliyaageetussi immiyo duretettay aquwaaba gidennaagee tuma.

Koyro xeetu layttan deˈida Kiristtaanetuppe daroti hiyyeesa. Yelettoosappe doommidi wobbe bitanee miishshaa immanaadan woossido wode PHeexiroosi: “Tau miishshi baawa; shin taassi de7iyaabaa taani neessi immana; Naazireeta Yesuus Kiristtoosa sunttan denddada hemetta” yaagiis.—Oosuwaa 3:6.

Erissiyo ashkkaraa Yaaqoobi giidobaykka Kiristtaane gubaaˈiyan deˈiyaageetuppe daroti hiyyeesa gidiyoogaa bessees. I: “Ta siiqo ishatoo, siyite; Xoossai ha sa7an de7iya hiyyeesa asai ammanuwan duretanaunne bana siiqiyaageetuyyo immana giido saluwaa kawotettaa laattanau dooribeenneeyye?” yaagidi xaafiis. (Yaaqooba 2:5) Hegaa bolli, kiitettida PHauloosikka Kiristtaane gubaaˈiyaa yame gidanau  xeegettidaageetuppe daroti ‘asa qofan aadhida eranchata’ woykko ‘wolqqaamata’ woykko ‘xoqqa sheeshshata’ gidennaagaa yootiis.—1 Qoronttoosa 1:26.

Yesuusi bana kaalliyaageeta dureyidoy aquwaabaana gidana xayikko, aybin dureyidee? Yesuusi Samirnneesan deˈiya gubaaˈiyau kiittido dabddaabbiyan: “Taani ne waayiyaanne ne hiyyeesatettaa erais; shin neeni dure” yaagiis. (Ajjuutaa 2:8, 9) Samirnneesan deˈiya Kiristtaaneti hiyyeesa gidikkokka, biraa woy worqqaappe keehi aadhiya alˈˈoban duretidosona. Eti bantta ammanuwaappenne Xoossaa sinttan suure gidiyoogaappe denddidaagan dure. Ammanoy ‘asa ubbaassi’ deˈiyaaba gidenna gishshau, i ba huuphe alˈˈoba. (2 Tasalonqqe 3:2) Ammanoy baynnaageeti Xoossaa xeelan hiyyeesa.—Ajjuutaa 3:17, 18.

Ammanuwan Beettiya Duretaa

SHin ammanoy alˈˈo gididoy ayba ogetuunee? Xoossaa ammaniyaageeti a “kehatettaa, genccaa, danddayaanne duretettaa” gaasuwan goˈettoosona. (Roome 2:4) Eti Yesuusa wozuwaa yarshshuwan ammaniyo gishshau, ‘eta nagaray atto geetettiis.’ (Efisoona 1:7) Hegaa bolli, “Kiristtoosa qaalai” ammanoy deˈiyoogeetussi demissiyo aadhida eratettay etau deˈees. (Qolasiyaasa 3:16) Eti ammanuwan Xoossaa woossiyo wode, “asa eratettaa ubbaappe aadhdhiya Xoossaa sarotettai” eta wozanaanne qofaa naagidi, eti woppaanne ufayssaa demmanaadan oottees.—Piliphphisiyuusa 4:7.

Ha ubba goˈˈaa bolli, A Naˈaa Yesuus Kiristtoosa baggaara Xoossaa ammaniyaageetussi merinaa deˈuwaa hidootay deˈees. Yesuusi: “Xoossaa Na7aa ammaniya ubbai  merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagidi yootidobay keehippe erettiyaaba. (Yohaannisa 3:16) Qassi Yesuusi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” giido gishshau, issi uri Aawaabaanne Naˈaabaa tumu eraa demmiyo wode, he alˈˈo hidootay keehippe qoncce gidees.—Yohaannisa 17:3.

Xoossay anjjiyo waanna ogee ayyaanaabaana gidikkonne, hegee asatettaaninne qofankka goˈˈees. Leemisuwau, Brazilen deˈiya Daaliidiyo hanotaa qoppa. I Xoossaa halchuwaabaa tumu eraa demmanaappe kase, cammiya ushshaa bessiyaagaappe aaruwaa uyees. Hegee a soo asaa gaytotettan keehippe qohuwaa gattiis. Hegaa bolli, i miishshaa oyqqiyo hanotan metootees. Guyyeppe i Yihoowa Markkatuura Geeshsha Maxaafaa xinaatiyaa doommidi, keehippe laamettiis.

Daaliidiyoy Geeshsha Maxaafaappe tamaaridobay, i ba iita eeshshaa agganaadan oottiis. I ayyaanaaban keehippe dichaa bessidoogaappe denddidaagan, “Taani kase ushsha keettaappe ushsha keettaa bays; shin haˈˈi sooppe soo bays” yaagiis. I kumetta wodiyaa Xoossaa Qaalaa sabbakiyaagaa gidiis. He laamee, i payyatettaa xallan gidennan miishshaa oyqqiyo hanotankka laamettanaadan oottiis. Daaliidiyoy, “Taani kase ushshan xayssiyo miishshaa haˈˈi hiyyeesata maaddanau woykko taayyo koshshiyaabaa shammanau goˈettays” yaagiis. Qassi baagaadan hanotata Xoossay xeelliyo ogiyan xeelliya asatuura laggettiyoogan, tumu lagge gidida darota demmiis. Daaliidiyoy Xoossaa eranaappe kase i mule qoppana danddayennaagaa keena sarotettaanne ufayssaa demmiis.

Xoossaa Yihoowa ammaniyaageeti demmiyo, deˈuwaa laammiya hanotau hara leemiso gidiya Renaatobaa ane qoppa. Ha wodiyan i ufayttiyoogaanne pashkkiyoogaa beˈiyo wode, a bolli iita qohoy gakkidoogaa ammananau metiyaaba. I yelettido wode a aayyiyaa a ola aggaasu. A borssan yeggidi issi zalanggaa garssan wottido wode, a bollay keehippe gaarettiisinne zirimotiis; qassi a gulˈˈaykka qanxxettibeenna. Naaˈˈu maccaasati he sohuwaara aadhiiddi, zalanggaa garssan borssay qaaxxiyaagaa beˈidosona. Koyro eti gawara maraa issi uri olidabadan qoppidosona. Hegee gacino naˈa gidiyoogaa eti erido wode, sohuwaara a aakime keetta efiidosona.

He maccaasatuppe issinna Yihoowa Markka; a Ritto geetettiya hara Yihoowa Markkeessi he naˈaabaa yootaasu. Ritta darotoo boshettaasu; qassi iyyo deˈiyay issi macca naˈee xalaala. A attuma naˈa keehippe koyiyo gishshau, Renaata dichanau qofaa qachaasu.

Renaatoy naatettan deˈishin Ritta a yelida aayo gidennaagaa ayyo yootaasu. Gidikkokka, ayyo koshshiyaabaa siiquwan kunttaasunne Geeshsha Maxaafaa baaso siraataa minnada tamaarissaasu. I dicciyo wode Geeshsha Maxaafaa dosiyoogaa doommiis. I maalaalissiya ogiyan paxa attidi diccidoogau keehippe galatees. Mazamuraawee  Daawiti: “Ta aawainne ta aayyiyaa tana aggiyaakkonne, GODAI tana dichchana” giidoogaa nabbabiyo wode ubban a ayfiyan afuttay kumees.—Mazamure 27:10.

Renaatoy Yihooway baassi oottidobaa akeekiyoogaanne nashshiyoogaa bessanau, 2002n xammaqettidi, issi layttappe guyyiyan kumetta wodiyaa haggaaziya Kiristtaane gidiis. I hanno gakkanau bana yelida aawaanne aayyiyo erenna; geella sinttappekka waayi erana. Gidikkokka, i demmido alˈˈo imotatuppe issoy, Yihooway siiqiyaanne qoppiya Aawa gidiyoogaa eriyoogaanne a ammaniyoogaa gidiyoogee Renaatoyyo siyettees.

Ne deˈuwaa tumuppe ufayssiyaagaa oottana danddayiya, matanne siiqo dabbotaa Xoossaara medhanau koyennan aggakka. Hiyyeesa gidin dure gidin ubba asau, Xoossaa Yihoowaaranne a Naˈaa Yesuus Kiristtoosaara hegaa mala dabbotaa medhiyo injjee deˈees. Hegee aquwaaban dureyennan aggana danddayees; shin ha alamiyan deˈiya miishsha ubban demmana danddayenna garssa sarotettaanne woppaa demissees. Leemiso 10:22n deˈiya: “GODAA anjjoi dure kessees; i he duretettan meto walakkenna” yaagiya qaalay tuma gidiyoogee qoncce.

Xoossaa Yihooway baakko yiya asan keehippe ufayttees: “Neeni ta azazuwaa siyidabaa gidiyaakko, ne sarotettai shaafaa haattaadan goggana shin; ne xillotettaikka abbaa beetaadan hanana shin.” (Isiyaasa 48:18) Yihooway wozanaa koshshay suure gidido, baakko yiyaageeta keehippe anjjanaagaa: “Neeni ashkke gidikkonne GODAASSI yayyikko, duretettaa, bonchchuwaanne de7uwaa demmana” giidi qaalaa geliis.—Leemiso 22:4.

[Sinttaa 6n deʼiya misiliyaa qonccissuwaa]

Xoossaa ammaniyoogee sarotettaa, woppaanne ufayssaa demissees

[Sinttaa 5n deʼiya misiliyaa]

Saˈan Yesuusi diccido keettaa asay hiyyeesa gidikkokka, Xoossay eta keehippe anjjiis