Yihooway Nena Ashshanau Oottidobaa Xoqqu Oottada Xeellay?

“Ba asaa maaddanau yiidi, eta wozido gishshau, Godai Israa7eela Xoossai anjjetto.”—LUQAASA 1:68.

1, 2. Nuuni deˈiyo iita hanotaa aybin leemisana danddayettii? Woygiya oyshata beˈanee?

NEENI sahettada issi hosppitaaliyan zinˈˈidabadan qoppa. Xalee beettibeenna, issi harggiyan sahettiya asaa xallay deˈiyo kifiliyan deˈaasa. Xale demmanau issi dottoree baaxetiiddi deˈiyoogaa neeni siyiyo wode, paxana gaada hidootaa wottaasa. Dottoree pilggiyoobaara gayttida ubbabaa eranau koyaasa. Issi gallassi, xalee beettidoogaa siyadasa! Dottoree he xaliyaa demmanau darobaa yarshshiis. Neeyyo aybi siyettanee? Neeninne hara daroti hayquwaappe attanaadan oottida he dottoriyaa neeni wozanappe galatanaageenne bonchanaagee erettidaba.

² Hegee hanennabaa yootiyooba milatana danddayees; shin nu hanotay tumuppe hegaa mala. Nuuni ubbay qommoora giidobaappe keehi aadhiya iita hanotan deˈoos. Nuna ashshiya uri keehippe koshshees. (Roome 7:24 nabbaba.) Yihooway nuna ashshanau gitabaa yarshshiis. A Naˈaykka gitabaa yarshshiis. Yaatiyo gishshau, ane oyddu waanna oyshata beˈoos. Nuussi atotettay koshshidoy aybissee? Nuna ashshanau Yesuusi ay yarshshana koshshidee? Yihooway shin ay yarshshana koshshidee? Xoossaappe demmiyo atotettaa neeni xoqqu oottada xeelliyoogaa waatada bessana danddayay?

Nuussi Atotettay Koshshiyoy Aybissee?

3. Nagaraa wurssiya harggiyaara waatidi geeddarssana danddayiyoo?

³ Malan qoodaa yootido mata wode naqaashay bessiyoogaadan, asaa naatu taarikiyan gakkida  wurssiya harggetuppe issoy, 1918n tammu miilooniyan qoodettiya asaa worida, Isppaanish infiluwenzzaa geetettiya harggiyaa. Hara harggeti hegaappe aaruwan worana danddayoosona gaana danddayettees. He harggeti daro asaa oyqqennaba gidikkonne, oyqqidoogeetuppe daroti hayqqoosona. * Gidoppe attin, nagaraa hegaa mala wurssiya harggiyaara gatti xeelliyaakko woygana danddayettii? Roome 5:12n deˈiya qofaa hassaya: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis.” Polo gidenna asa ubbay nagaraa oottiyo gishshau, ubba asaa harggee oyqqiyoogaadan nagaray oyqqiis. (Roome 3:23 nabbaba.) Nagaray aappun asaa worii? Nagaray “asa zare ubbaa” woriyoogaa PHauloosi yootiis.

4. Nu bariyaa xeelliyaagan Yihoowa qofay aybee? Ha wodiyan deˈiya darotuugaappe a qofay dummatiyoy ayba ogiyaanee?

⁴ Ha wodiyan daro asau nagaraynne hayqoy wottin deˈiyaabadan siyettees. Wodee gakkennan hayqqiyoogaa geetettiya hanotay asaa qofissees; shin ceeggi ceeggi biidi hayqqiyo hayquwaa asay “wottin deˈiyaaba” gees. Asay darotoo Medhidaagaa qofaa dogees. Nu baree i halchidoogaappe keehi guutta. Yihoowa xeelan “issi gallassa” deˈida asikka baawa. (2 PHeexiroosa 3:8) Hegaa gishshau, Xoossaa Qaalay deˈoy maataadan woykko issitoo shemppiyo carkkodan sohuwaara xayiyaaba gidiyoogaa yootees. (Mazamure 39:5; 1 PHeexiroosa 1:24) Nuuni ha qofaa hassayana koshshees. Aybissi? Nuna keehippe qohiya “harggiyaabaa” akeekikko, “xalee” woykko atotettay nuussi ay keena koshshiyaakko akeekana danddayoos.

5. Nagaraa gaasuwan nuuppe aybi attidee?

⁵ Nagaraynne i kaalettiyoobay ay keena iitabaakko akeekanau, nagaray nu bolli gattidobaa eranau baaxetana koshshees. Nagaraa gaasuwan nu koyro aawaayyoonne aayeeyyo deˈiyaabay nuussi deˈenna gishshau, koyro hegee metana danddayees. Addaameenne Hewaana koyro polo asa gididi deˈidosona. Eti qofaaninne asatettan polo gidiyo gishshau, bantta qofaanne banttau siyettiyaabaa naaganaunne bantta oottiyooban naagettana danddayoosona. Eti Xoossaa Yihoowau oottiyaageeta gididi, loˈˈo eeshshaa aggennan dichanau doorana danddayoosona. Yaatiyoogaappe, eti he alˈˈo imotaa tixxi oottidi olidosona. Eti Yihoowa bollan nagaraa oottanau dooridi, Yihooway etassi halchido deˈoy banttappenne bantta naatuppe halanaadan oottidosona. (Doomettaabaa 3:16-19) Hegaadankka, nuuni tobbiiddi takkido “harggiyan” banttau oyqettidi nuunikka oyqettanaadan oottidosona. Yihooway eta pirddidoogee bessiyaaba. SHin, i nuussi atotettaa hidootay deˈanaadan oottiis.—Mazamure 103:10.

Nuuni Attanaadan Yesuusi Ay Oottana Koshshidee?

6, 7. (a) Nu atotettau gita yarshshoy koshshiyoogaa Yihooway kasetidi waati qonccissidee? (b) Muuse Higgee imettanaappe kase deˈida, Aabeelinne bantta soo asau huuphe gidida asati shiishshido yarshshuwaappe nuuni ay tamaarana danddayiyoo?

⁶ Addaamenne Hewaani naata ashshanau gitabaa yarshshana koshshiyoogaa Yihooway erees. Doomettaabaa 3:15n deˈiya hiraagan atotettau aybi koshshidaakko nuuni akeekoos. Issi wode Seexaanaa xayssanau deˈiya “zerettaa” woykko ashshiyaagaa Yihooway giigissiis. Gidikkonne, hegee haniyo wode, qirbbiyan masunxxiyoogee leemiso gidido hanotan ashshiyaagee tuggatana. Hegee sakkiyaaba, qassi guutta wodiyau oosuwaa diggiyaaba milatees; shin hegaa birshshettay aybee? Yihooway Dooridoogee genccidi aattana koshshiyoobay aybee?

⁷ Ashshiyaagee asaa naata nagaraappe ashshanau, nagaraa atto giissiyaabaa, giishin  nagaray kaalettidobaa xayssidi, asaa naata Xoossaara sigettiyaabaa immana koshshees. Yarshshoy koshshiyoogaa malaatiyaabay beni haniis. Ammanettida asatuppe koyroy, Aabeeli, Yihoowayyo mehiyaa yarshshuwaa shiishshiis; Xoossan nashettiis. Guyyeppe, Nohe, Abrahaama, Yaaqoobanne Iyyooba mala bantta soo asau huuphe gidida, Xoossau yayyiya asati Xoossaa ufayssida hegaa mala yarshshuwaa shiishshidosona. (Doomettaabaa 4:4; 8:20, 21; 22:13; 31:54; Iyyooba 1:5) Daro layttappe guyyiyan, Yarshshuwaabaa Muuse Higgee asau loyttidi qonccissiis.

8. Layttan Nagaraa Atto Giissiyo Gallassi qeesetu ubbaa halaqay ay oottii?

⁸ Muuse Higgiyan keehi koshshiya yarshshotuppe issoy, layttan Nagaraa Atto Giissiyo Gallassi shiiqiya yarshshuwaa. He gallassi qeesetu ubbaa halaqay leemiso gidiyaabata oottees. I koyruwan qeesetuyyo, kaallidi qeese gidenna sheeshshatuyyo nagaraa atto giissanau Yihoowayyo yarshshuwaa shiishshees. Qeesetu ubbaa halaqay, gayttiyo dunkkaaniyan woykko beeta maqidasiyan a xallay gelana danddayiyoonne layttan he gallassa xallan geliyo, Ubbaappe Aadhiya Geeshsha Sohuwaa gelees. He sohuwan i Maachaa Taabootaa sinttan yarshshiyo mehiyaa suuttaa caccafees. He geeshsha saaxiniyaappe bolla baggan, Yihooway qoncciyoogaa bessiya, keehippe pooˈiyaanne phooliyaa shaaray issi issitoo beettees.—Kessaabaa 25:22; Wogaabaa 16:1-30.

9. (a) Nagaraa Atto Giissiyo Gallassi qeesetu ubbaa halaqay oona malaatii? I shiishshiyo yarshshoy shin? (b) Qeesetu ubbaa halaqay Ubbaappe Aadhiya Geeshsha Sohuwaa geliyoogee ay malaatii?

⁹ Leemiso gidiya he oosoti ay malaatiyaakko kiitettida PHauloosi ayyaanay denttettin qonccissiis. Qeesetu ubbaa halaqay Masiyaa, Yesuus Kiristtoosa malaatiyoogaanne yarshshuwaa shiishshiyoogee Kiristtoosi yarshsho gididi hayqqiyoogaa malaatiyoogaa i yootiis. (Ibraawe 9:11-14) Polo gidida he yarshshoy, naaˈˈu citan deˈiya asaassi, giishin ayyaanan tiyettida, Kiristtoosa ishantta gidida 144,000u qeesetu citaunne ‘hara dorssatussi,’ tumuppe nagaray atto geetettanaadan oottees. (Yohaannisa 10:16) Qeesetu ubbaa halaqay Ubbaappe Aadhiya Geeshsha Sohuwaa geliyo wode, Yesuusi wozuwaa yarshshuwaa waagaa ekkidi Xoossaa Yihoowa sintti saluwaa geliyoogau eesho gidees.—Ibraawe 9:24, 25.

10. Geeshsha Maxaafaa hiraagay Masiyaa aybi gakkanaagaa yootii?

¹⁰ Addaamenne Hewaani zerettaa atotettau gita yarshsho koshshiyoogee qoncce. Masee ba deˈuwaa yarshshana koshshees! Ibraysxxe Geeshsha Maxaafaa xuufetun hananabaa yootidaageeti hegaabaa aahuwan qonccissidosona. Leemisuwau, hananabaa yootiya Daaneeli, ‘nagaray atto geetettana’ mala ‘Halaqaa Masiyaa’ ‘asi woranaagaa’ qonccissidi yootiis. (Daaneela 9:24-26) Polo gidenna asaa naatu nagaraa gishshau, Masiyaa asay ixxanaagaa, yedettanaagaanne caddidi masunxxissanaagaa woykko woranaagaa Isiyaasi kasetidi yootiis.—Isiyaasa 53:4, 5, 7.

11. Yihoowa Naˈay nu atotettaa gishshau bana yarshshanau eeno giyoogaa bessidoy ayba ogiyaanee?

¹¹ Xoossau mexi issi Naˈay nu atotettau i ay oottana koshshiyaakko ha saˈaa yaanaappe kase erees. I keehippe waayettananne hegaappe simmin hayqqana koshshees. A Aaway he tumaa tamaarissido wode, i guyye giidee woykko makkalidee? Hegaappe dumma hanotan, ba Aawaa  kaaletuwau eeno giidi haarettiis. (Isiyaasa 50:4-6) Yesuusi saˈan deˈiyo wodekka, ba Aawaa sheniyau hegaadan azazettiis. Aybissi? ‘Taani Aawaa siiqays’ yaagidi hegau issi zaaruwaa yootiis. Hara zaaruwaa qassi: “Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa” yaagidi yootiis. (Yohaannisa 14:31; 15:13) Yaatiyo gishshau, nu atotettay daro baggan baasettidoy Yihoowa Naˈay siiqiyaagaa gidiyoogaana. I polo asa gididi deˈiyo ba deˈuwaa yarshshana koshshidaba gidikkokka, nu atotettaa gishshau hegaa ufayssan oottiis.

Nuuni Attanaadan Yihooway Oottidobaa

12. Wozoy o shenee qonccido hanotee? I hegaa giigissidoy aybissee?

¹² Wozuwaa yarshshuwaa Giigissidaagee woykko Halchidaagee Yesuusa gidenna. Hegaappe dumma hanotan, atotettaayyo giigida giigissoy Yihoowa sheniyan xoqqa sohoy deˈiyooba. Beeta maqidasiyan yarshshuwaa shiishshiyo sohoy Yihoowa sheniyaa malaatiyaaba gidiyoogaa kiitettida PHauloosi yootiis. (Ibraawe 10:10) Yaatiyo gishshau, Kiristtoosa yarshshuwan nuuni atotettaa demmanaadan oottida waannay Yihoowa. (Luqaasa 1:68) Hegee polo gidida a sheneenne asaa naata i siiqiyo gita siiqoy qonccido hanota.—Yohaannisa 3:16 nabbaba.

13, 14. Abrahaama leemisoy Yihooway nuussi oottidobaa akeekanaadaaninne xoqqu oottidi xeellanaadan waatidi maaddana danddayii?

¹³ Yihooway hegaa mala ogiyan ba siiquwaa nuussi bessanau ay yarshshidee? Hegee nuuni akeekanau metiyaaba. Gidikkokka, he hanotaa loyttidi akeekanau nuna maaddana danddayiya qofay Geeshsha Maxaafan deˈees. Yihooway, ammanettida asa gidida Abrahaamee keehippe deexxiyaabaa oottanaadan, giishin ba naˈaa Yisaaqa yarshshanaadan oychiis. Abrahaamee siiqiya aawa. Yihooway Yisaaqa xeelliyaagan ayyo “neeni siiqiyo ne mexi issi na7aa” yaagiis. (Doomettaabaa 22:2) Gidoppe attin, Abrahaamee Yihoowa sheniyaa poliyoogee Yisaaqa siiqiyoogaappekka keehi aadhiyaaba gidiyoogaa akeekiis. Abrahaami Yihooway giidoogaadan oottiyoogaa doommiisinne azazettiis. Gidikkokka, Yihooway Ba huuphe oottanau deˈiyoobaa Abrahaamee oottanaadan paqqadibeenna. Abrahaami ba naˈaa yarshshana hanishin a digganaadan Xoossay issi kiitanchaa kiittiis. Abrahaami ba naˈaa zaarettidi beˈana hidootay dendduwaa xallaana gidiyoogaa ammanettidi, he deexo paaciyan ba Xoossau azazettanau murttiis. SHin Xoossay denttana danddayiyoogaa kumetta wozanan ammaniis. Abrahaami Yisaaqa ‘hayquwaappe denddiyoogaa’ mala hanotan zaaridi ekkidoogaa PHauloosi yootiis.—Ibraawe 11:19.

¹⁴ Abrahaami ba naˈaa yarshshanau giigettiyo wode ayyo siyettidabay nuuni qoppanaukka metiyaaba. Abrahaama hanotay, Yihooway ‘taani siiqiyo ta Naˈaa’ giidi xeegiyoogaa yarshshido hanotaa qonccissanau maaddees. (Maatiyoosa 3:17) Gidoppe attin, Abrahaameegaappekka aaruwan Yihoowayyo siyettana danddayiyoogaa hassaya. Inne a Naˈay daro miilooniyan, ubba biilooniyan qoodettiya laytta gidennan aggenna, mata lagge gididi issippe deˈidosona. Naˈay ba Aawaayyo “waanna oosanchcha,” qassi a gishshaa haasayiya ‘Qaala’ gididi ufayssan aara issippe oottiis. (Leemiso 8: 22, 30, 31; Yohaannisa 1:1) Ba Naˈay waayettiyo wode, tooshettiyo wodenne hegaappe simmin danobaa oottida uradan hayqqiyo wode Yihooway genccidi aattidobay nuuni qoppanaunne danddayennaba. Nu atotettau Yihooway gitabaa yarshshiis! Yaatin, nuuni he atotettaa xoqqu oottidi xeelliyoogaa waatidi bessana danddayiyoo?

Atotettaa Xoqqu Oottada Xeelliyoogaa Waatada Bessana Danddayay?

15. Yesuusi nagaraa atto giissiya hanotaa muleera polidoy ayba ogiyaanee? Hegee ayba hanotay merettanaadan oottidee?

¹⁵ Yesuusi hayquwaappe denddi saluwaa bi simmidi, nagaraa atto giissiya hanotaa muleera poliis. Ba siiqo Aawaakko simmi biidi ba yarshshuwaa waagaa Ayyo immiis. Hegee daro anjjuwaa demissiis. Koyruwan, ayyaanan tiyettida Kiristtoosa ishanttu nagaray, hegaappe simmin “asa ubbaa” nagaray atto geetettiyo hanotay merettiis. He yarshshuwaa gaasuwan, ha wodiyan bantta nagaraappe wozanappe simmiyaanne tumuppe Kiristtoosa kaalliya ubbay Xoossaa Yihoowaara mata dabbotaa medhana danddayees. (1 Yohaannisa 2:2) Hegee neessikka haniyoy ayba ogiyaanee?

16. Yihooway nuussi giigissido atotettaa aybissi nashshana koshshiyaakko waatidi leemisuwan qonccissana danddayiyoo?

¹⁶ Doomettan denttido leemisuwaa zaarettidi ane beˈoos. Harggiyau xaliyaa demmida dottoree neeni zinˈˈido kifiliyan deˈiya hargganchata: Akkamuwaa maayidi ekkiyaanne odettida kaaletuwaa kaalliya hargganchi ooninne paxanaagee erettidaba gees giidi qoppoos. Nenaara he kifiliyan zinˈˈida hargganchatuppe daroti xaliyaa mittiyoogee woykko odettida kaaletuwaa kaalliyoogee keehippe metiyaaba giidi dottoriyaa kaaletuwaa siyennan ixxikko shin? Xalee pattiyoogau ammanttiya naqaashay deˈiyaaba gidikkonne, neeni etaagaadan oottuutii? Oottennaagee tuma! Neeni xalee beettidoogau galatanaageenne dottoriyaa kaaletuwaa loyttada kaallanaagee, geella neeni kuuyidobaa haratussi yootanaageekka qoncce. Hegaappe keehi aadhiya hanotan, nuuni ubbay Yihooway ba Naˈaa wozuwaa yarshshuwaa baggaara nuussi giigissido atotettaa keehippe nashshiyoogaa bessanau wozanappe yeemottana koshshees.—Roome 6:17, 18 nabbaba.

17. Yihooway nena ashshanau oottidobaa nashshiyoogaa ayba ogiyan bessana danddayay?

¹⁷ Nuna nagaraappenne hayquwaappe ashshanau Yihoowaynne a Naˈay oottidobaa nuuni nashshiyaaba gidikko, hegaa oosuwan bessoos. (1 Yohaannisa 5:3) Nagaraa oottanaadan sugiya koshshaara nuuni baaxetana bessees. Eriiddi nagaraa oottiyo meeziyau mule kushiyaa immokko; qassi he meezee kaalettiyo, loˈˈo milatiya iita asa gidiyo naˈˈu mera deˈuwaa mule deˈokko. Hegaa mala deˈoy nuuni wozuwaa mule xoqqu oottidi xeellennaagaa woykko nashshennaagaa bessiyaaba. Hegaappe, Xoossaa sinttan geeshsha gididi deˈanau baaxetiyoogan, nashshiyoogaa bessoos. (2 PHeexiroosa 3:14) Haratikka Yihoowa sinttan geeshsha gidanaadaaninne etau merinaa deˈuwaa hidootay deˈanaadan, maalaalissiya nu atotettaa hidootaa etassi yootiyoogan hegaa bessoos. (1 Ximootiyoosa 4:16) Nuuyyo deˈiya wodiyaanne wolqqaa ubbaa goˈettidi galatiyoogee Yihoowayyoonne a Naˈayyo bessiyaaba gidiyoogee tuma! (Marqqoosa 12:28-30) Ane hagaa qoppa! Nuuni nagaraappe muleera geeyiyo wodiyaa naagana danddayoos. Xoossay koyiyoogaadan, polotettan merinau deˈana danddayoos; hegee ubbay haniyoy Yihooway nuna ashshanau oottidobaa gaasuwaana!—Roome 8:21.

[Footnotes]

Woygada Zaaruutii?

• Neessi atotettay keehippe koshshiyoy aybissee?

• Yesuusi ba goˈˈaa yarshshidoogee nena waatidi bochii?

• Yihooway wozuwaa immidoogan neeyyo aybi siyettii?

• Yihooway nena ashshanau giigissidobay neeni ay oottanaadan denttettii?

[Oyshata]

[Sinttaa 30n deʼiya misiliyaa]

Nagaraa Atto Giissiyo Gallassi, Israaˈeelen qeesetu ubbaa halaqay Masiyau leemiso

[Sinttaa 31n deʼiya misiliyaa]

Abrahaami ba naˈaa yarshshanau eeno giidoogee Yihooway yarshshido gita yarshshuwaabaa nuna darobaa tamaarissees