‘Asa Ubbaara Sarotettan Deˈite’

“Asa ubbaara sarotettan de7anau, intte baggaara, intteyyo danddayettidabaa ubbaa oottite.”—ROOME 12:18.

1, 2. (a) Yesuusi bana kaalliyaageeta ay akeekissidee? (b) Yedetay gakkiyo wode ay oottana koshshiyaakko zoriyaa awuppe demmana danddayiyoo?

YESUUSI bana kaalliyaageeta alamiyan deˈiya asaappe yedetay gakkanaagaa akeekissiis; qassi hegee gakkiyo gaasuwaa hayqqanaappe kase qammi qonccissiis. I ba kiittidoogeetussi: “Intte sa7aabaa gididaakko, sa7ai babaadan inttena siiqana; shin taani inttena sa7aappe dooridoogaappe attin, intte sa7aabaa gidekketa; sa7ai inttena ixxiyoogee hegaassa” yaagiis.—Yohaannisa 15:19.

² Yesuusa qaalay tuma gidiyoogaa kiitettida PHauloosi ba deˈuwan gakkidaban beˈiis. PHauloosi ba yelaga laggiyaa Ximootiyoosassi xaafido naaˈˈantto dabddaabbiyan: “Neeni ta timirttiyaa, ta hanotaanne ta qofaa, ta ammanuwaanne ta danddayaa, ta siiquwaanne ta genccaa, ta yedetaanne ta waayiyaa be7adasa” yaagiis. PHauloosi gujjidikka: “Tumatettan Kiristtoos Yesuusan Xoossaa milatidi de7anau dosiya ubbai yedetettana” yaagiis. (2 Ximootiyoosa 3:10-12) PHauloosi Roomen deˈiya Kiristtaanetussi xaafido dabddaabbiyaa  12tta shemppuwan, yedetay gakkiyo wode eti ay oottana koshshiyaakko aadhida eratetta zoriyaa zoriis. I yootidobay ha wurssetta wodiyan nuussikka kaaleto gidana danddayees.

‘Loˈˈobaa Oottite’

3, 4. Roome 12:7n deˈiya zoriyaa (a) so asay ubbay Yihoowayyo goynnenna keettan (b) nu shoorotuura deˈiya gaytotettan waatidi oosuwan peeshshana danddayiyoo?

³Roome 12:17 nabbaba. Nuna asay ixxiyo wode nuuni zaarettidi ixxana koshshennaagaa PHauloosi yootiis. So asay ubbay Yihoowayyo goynnenna keettan a zoriyaa oosuwan peeshshiyoogee keehippe koshshiyaaba. Kiristtaane gidida aqo laggee haasayan woykko hara hanotan kehatettaa bessennaadan oottiya paaciyaa xoonana koshshees. ‘Iitabaa iitaban zaariyoogee’ aynne goˈˈenna. Hegaappe dumma ogiyan, hegaadan oottiyoogee hanotay yaa iitanaadan oottees.

⁴ PHauloosi: “Asa ubbau lo77obaa oottanau qoppite” yaagidi, hegaappe loˈˈo ogiyaa yootiis. So giddon, azinay i ammanuwaabaa ufayssennabaa haasayi makkin, wozanappe ayyo kehatettaa bessiya maccaasiyaa palamay denddennaadan oottana danddayawusu. (Leemiso 31:12) Ha wodiyan Beeteele so asaa yame gidida Karlloosi ba aaway gattiyo wolqqaama yedetaa, keha gidiyoogaaninne keettaa loytta oyqqiyoogan ba aayyiyaa waatada xoonidaakko yootees. “Nuuni naati ubbatoo a bonchanaadan minttettausu. Taani dosiyo kaassa gidana xayikkokka, issi kaassaa aara kaaˈanaadan yootaasu. SHin hegee a xeelay loˈˈo gidanaadan oottiis.” Guyyeppe i Geeshsha Maxaafaa xannaˈiyoogaa doommiisinne xammaqettiis. ‘Asa ubbau loˈˈobaa oottiyoogaa’ xeelliyaagan, Yihoowa Markkati daafay gakkiyo wode bantta shoorota maaddiyoogan, gaasoy baynna ixuwaa darotoo xoonoosona.

Yedetaa ‘Tamaa Bonqquwan’ Seerissiyoogaa

5, 6. (a) Morkkiyaa huuphiyan “tamaa bonqquwaa” shiishshiyoy ayba ogiyaanee? (b) Roome 12:20n deˈiya zoriyaa oosuwan peeshshiyoogee loˈˈo ayfiyaa demissana danddayiyoy ayba ogiyaanakko bessiya, heeran hanettidabaa yoota.

⁵Roome 12:20 nabbaba. PHauloosi ha xiqisiyan deˈiya qaalata dooriyo wode, Leemiso 25:21, 22n deˈiya: “Ne morkkee namisettikko, miza; saamettikko, ushsha. Aissi giikko, neeni hegaa oottiyoogee a huuphiyan tamaa bonqquwaa kaashidi qoliyoogaa mala. GODAIKKA neeyyo woitana” yaagiya qaalaappe yootidaba milatees. Roome shemppo 12n deˈiya a zoriyaa beˈiyo wode, PHauloosi bonqquwan leemisidobati ixxiyaageeta qaxxayanau woy yeellayanau oottiyoobata giyoogaa gidenna. Hegaappe, Leemiso maxaafaaninne PHauloosi Roome Kiristtaanetussi xaafido dabddaabbiyan deˈiya qofay, beni wode birataa seerissanau goˈettiyo hiillaa malaatiyaaba milatees. Inggilize biitta erancha gidida, 19tta xeetu layttan deˈida CHarles Brijizi: “Eesuwan simmenna birataa tamaa bolli wottiyoogaa xalla  gidennan, a yuushuwan bollaaranne garssaara bonqquwaa shiishsha. Danddayay, ba goˈˈaa yarshshiyoogeenne keehippe siiqiyoogee seerissenna wozani baawa gaana danddayettees” yaagiis.

⁶ ‘Tamaa bonqquwaagaadan,’ Kehatetta oosoy ixxiyaageeti bantta xeelaa laammanaadaaninne Xoossaa ashkkarata ixxiyoogaa agganaadan oottana danddayees. Kehatetta oosoy Yihoowa ashkkaratussinne eti Geeshsha Maxaafaappe yootiyoobau asau loˈˈo xeelay deˈanaadan oottana danddayees. Kiitettida PHeexiroosi: “Aihuda gidenna asai inttena iitabaa oottiyaageetudan zigiriyo wode, Kiristtoosi yiyo gallassi intte lo77o oosuwaa eti akeekidi, Xoossaa galatana mala, intte de7uwaa eta giddon loitti naagite” yaagidi xaafiis.—1 PHeexiroosa 2:12.

‘Asa Ubbaara Sarotettan Deˈite’

7. Kiristtoosi ba erissiyo ashkkaratuura wottiyo sarotettay aybee? Hegee ay oottanaadan nuna denttettana koshshii?

⁷Roome 12:18 nabbaba. Yesuusi saˈan deˈido wurssetta qammi ba kiittidoogeetussi: “Taani sarotettaa inttenaara wottais; ta sarotettaa intteyyo immais” yaagiis. (Yohaannisa 14:27) Kiristtoosi ba erissiyo ashkkaratuura wottiyo sarotettay Xoossaa Yihoowaynne a siiqo Naˈay eta siiqiyoogaanne etan ufayttiyoogaa eriyoode etau siyettiya garssa sarotettaa. Ha garssa sarotettay haratuura sarotettan deˈanaadan nuna denttettana koshshees. Tumu Kiristtaaneti sarotettaa medhiyaageeta.—Maatiyoosa 5:9.

8. Sooninne gubaaˈiyan ayba ogiyan sarotettaa medhiyaageeta gidana danddayiyoo?

⁸ So giddon sarotettaa medhiyo issi ogee, walaqettidobay ooshshaa medhanaappe kase sohuwaara sigettiyoogaa. (Leemiso 15:18; Efisoona 4:26) Hegee Kiristtaane gubaaˈiyankka oosuwan peˈana danddayees. Kiitettida PHeexiroosi sarotettaa koyiyoogaa inxxarssaa naagiyoogaara gattidi yootiis. (1 PHeexiroosa 3:10, 11) Yaaqoobikka, inxxarssaa bessiyaagaadan goˈettiyoogaanne qanaatiyoogaappenne ooyettiyoogaappe haakkana koshshiyoogaa mintti zori simmidi hagaadan giis: “Bollappe yiya aadhdhida eratettai ubbaappe kase geeshsha. Qassi sarotetta, ashkkenne ero giyaagaa; qassi maarotettinne lo77o aifee kumidoogaa. Sireenne lo77o milatiya iitatetti bainnaagaa. Xillotettaa aifee sarotettaa oottiyaageeti sarotettan zerido zerettaappe beettiis.”—Yaaqooba 3:17, 18.

9. “Asa ubbaara sarotettan de7anau” baaxetiyo wode, nuuni ay hassayana koshshii?

⁹ PHauloosi Roome 12:18n deˈiya qofaa so giddooninne gubaaˈiyan sarotettan deˈiyoogaappe aadhiyaabau goˈettiis. I nuuni ‘ubba asaara sarotettan deˈanaadan’ yootiis. Hegee shooruwaa, issippe oottiyaageeta, issippe tamaariyaageetanne haggaazuwan nuuni demmiyo asaa gujjees. Gidikkokka, PHauloosi, “intte baggaara, intteyyo danddayettidabaa ubbaa” yaagiyoogan ba zoriyaa qanttiis.  Hegaa giyoogee “asa ubbaara sarotettan de7anau” nuuyyo danddayettidabaa ubbaa oottiyoogaa giyoogaa; shin Xoossaa geeshsha baaso siraataa kanttiyoogaa giyoogaa gidenna.

Halo Kessiyay Yihoowa

10, 11. Nuuni ‘Xoossaa hanqquwaassi aggibayiyoy’ ayba ogiyaanee? Hegee bessiyaaba gididoy aybissee?

¹⁰Roome 12:19 nabbaba. Yedettiyaageeta gujjin, nu oosuwaanne nuuni yootiyoobaa ‘ixxiyaageetuurakka’ “danddayanchcha” gididi deˈanaunne “ashkketettan” simerettanau bessees. (2 Ximootiyoosa 2:23-25) PHauloosi Kiristtaaneti bantta huuphe haluwaa kessennaadan, hegaappe ‘Xoossaa hanqquwaassi aggi bayanaadan’ zoriis. Kiristtaane gidiyoogaadan nuuni haluwaa kessana koshshennaagaa eroos. Mazamuraawee: “Hanqquwaa agga; yiilluwaappe teqetta. Yiillotoppa; aissi giikko, hegee metuwan yeggees” yaagiis. (Mazamure 37:8) Qassi Solomoni: “Neeyyo iitaa oottida urau, taanikka ayyo iitaa oottana gooppa; GODAN ammanettada naaga; i nena ashshana” yaagiis.—Leemiso 20:22.

¹¹ Yedettiyaageeti nuna qohiyo wode, koshshiyaaba gidikko Yihooway eta qaxxayanaadan aggibayiyoogee aadhida eratetta. PHauloosi Yihoowa hanqquwaa hassayiyoogaa bessiya ogiyan: “Xoossaa maxaafai, ‘Godai, “Taani haluwaa kessana; taani kushiyaa zaarana” yaagees’” yaagidi, gujjidi yootiis. (Zaarettido Wogaa 32:35⁠ra gatta xeella.) Nuuni nu huuphe halo kessanau malikko, Yihooway oottana koshshiyaabaa otoruwan oottiyaageeta gidoos. Gujjidikka, “Taani kushiyaa zaarana” giidi Yihooway gelido qaalaa ammanennaagaa bessoos.

12. Yihoowa hanqqoy qonccanay awudee, qassi waanidi?

¹² PHauloosi Roome Kiristtaanetuyyo xaafido dabddaabbiyau koyro heeran: “Tumatettai erettanaagaa bantta iita hanotan diggiya nagara ooso ubbaa bollinne asaa iita ooso ubbaa bolli, Xoossaa hanqqoi saluwaappe wodhdhidi qonccana” yaagiis. (Roome 1:18) “Daro waayiyaa” wode, Yihoowa hanqqoy a Naˈaa baggaara saluwaappe qonccana. (Ajjuutaa 7:14) PHauloosi geeshsha ayyaanay denttettin xaafido hara dabddaabbiyan qonccissidoogaadan: “Xoossai pirddiyo xillo pirddau hagee malaata. Xoossai tumu pirddaa pirddana. Godai Yesuusi ba wolqqaama kiitanchchatuura tamaa lacuwaa giddon saluwaappe yiyo wode, Xoossai inttena waissiyaageetu bolli waayiyaa ehaana. Qassi waayettiya inttenanne nuna shemppissana. Qassi Xoossai bana erennaageetanne nu Godaa Yesuus Kiristtoosa wonggeliyaa mishiraachchuwaayyo azazettennaageeta qaxxayana.”—2 Tasalonqqe 1:5-8.

‘Iitabaa Loˈˈoban Xooniyoogaa’

13, 14. (a) Yedetay gakkiyo wode nuuni garamettennay aybissee? (b) Nuna yedettiyaageeta anjjana danddayiyoy ayba ogiyaanee?

¹³Roome 12:14, 21nabbaba. Yihooway ba halchuwaa muleera polanaagaa ammanettidi, i nuuyyo immido oosuwan, giishin ‘kawotettaa wonggeliyaa mishiraachuwaa saˈa ubban’ odiyoogan kumetta xeelaa wottana danddayoos. (Maatiyoosa 24:14) Yesuusi: “Ta sunttaa gishshau, dere ubbai inttena ixxana” giidi akeekissido gishshau, ha oosoy nu morkketa yiilloyanaagaa eroos. (Maatiyoosa 24:9) Yaatiyo gishshau, yedetay gakkiyo wode, garamettokko woykko hidootaa qanxxokko. Kiitettida PHeexiroosi: “Ta dabbotoo, intte giddon tamadan xuuggidi paacciya waayee yiyaagaa oorattabai haniyaabaadan garamettoppite. . . . [Kiristtoosaara] waayettiyoogan ufaittite” yaagidi xaafiis.—1 PHeexiroosa 4:12, 13.

¹⁴ Nuna yedettiyaageeta ixxiyoogaappe, etappe issoti issoti erennaagaappe denddidaagan hegaadan oottana danddayiyoogaa eriyo gishshau, eta tamaarissanau baaxetoos. (2 Qoronttoosa 4:4) Nuuni PHauloosi: “Inttena yedettiyaageeta anjjite; eta anjjanaappe attin, qanggoppite” yaagido zoriyaa naaganau baaxetoos. (Roome 12:14) Yedettiyaageeta anjjiyo issi ogee etayyo woossiyoogaa. Yesuusi Deriyaa Bolla Timirttiyan:  “Intte morkketa siiqite; inttena ixxiyaageetussi lo77obaa oottite; inttena qanggiyaageeta anjjite; inttena naaqqiyaageetussi Xoossaa woossite” yaagiis. (Luqaasa 6:27, 28) Yedettiya uri Kiristtoosa kaalliya ammanettidaagaanne mishettidi Yihoowayyo oottiyaagaa gidana danddayiyoogaa PHauloosi ba hanotaappe erees. (Galaatiyaa 1:13-16, 23) Hara dabddaabbiyan, PHauloosi: “Nuna asi cayiyo wode, anjjoos. Nuna yedetti yuuyiyo wodekka danddayoos. Nu bolli iitabaa haasayiyo wode, nuuni lo77o qaalaa zaaroos” yaagiis.—1 Qoronttoosa 4:12, 13.

15. Iitabaa loˈˈoban xooniyo aybippenne aadhiya ogee awugee?

¹⁵ Hegaa gishshau, tumu Kiristtaanee Roome shemppo 12 wurssettan deˈiya: “Iitabaa lo77oban xoonappe attin, iitabai nena xoonoppo” yaagiya zoriyaa oosuwan peeshshees. Iitabaa ubbaa pulttoy Seexaanaa Dabloosa. (Yohaannisa 8:44; 1 Yohaannisa 5:19) Kiitettida Yohaannisi beˈido ajjuutan Yesuusi ayyaanan tiyettida ba ishati, “Dorssaa suuttaaninne bantta tumu markkatettan miimminttiyaara olettidi” xoonidoogaa qonccissiis. (Ajjuutaa 12:11) Seexaanaanne ha siraataa baggaara i gattiyo iita qohuwaa xooniyo aybippenne aadhiya ogee, nuuni markkattiyo woykko Kawotettaa mishiraachuwaa yootiyo oosuwan loˈˈobaa oottiyoogaa gidiyoogaa hegee bessees.

Hidootan Ufayttiyoogaa

16, 17. Roome shemppo 12ppe (a) nu deˈuwaa goˈettana bessiyo ogiyaa, (b) gubaaˈiyan simerettiyo ogiyaa, (c) nu ammanuwaa ixxiyaageeta oyqqiyo ogiyaa xeelliyaagan ay tamaaridoo?

¹⁶ PHauloosi Roomen deˈiya Kiristtaanetussi xaafido dabddaabbiyaa 12tta shemppuwaa qanttan beˈidoogee nuna darobaa hassayissiis. Nu huuphiyaa geppida Yihoowa ashkkarata gidiyoogaadan yarshshiyoobaa yarshshanau eeno gaana koshshiyoogaa beˈida. Nuuni eeno giidi yarshshiyoogee Xoossaa shene gidiyoogaa nu qoppiyo abbiyaa goˈettidi akeekido gishshau, Xoossaa ayyaanay denttettin hegaadan oottoos. Nuuni ayyaanan dochokko; qassi nuuyyo deˈiya dumma dumma imotaa mishettidi goˈettoos. Nu Kiristtaane issippetettaa naaganau nuuyyo danddayettidabaa ubbaa oottiiddi, nu huuphiyaa kaushshidi haggaazoos. Nuuni imattaa mokkoos; qassi haratuyyo qarettoos.

¹⁷ Yedetay gakkiyo wode nuuni oottana koshshiyaabaa xeelliyaagankka, Roome shemppo 12n daro zoree deˈees. Asay nu bolli oottido iitabaa zaarettidi oottana koshshenna. Nuuni yedetaa kehatetta oosuwan xoonana bessees. Geeshsha Maxaafaa baaso siraataa kanttennan, danddayettida keenan asa ubbaara sarotettan deˈanau baaxetana koshshees. Hegee so giddon, gubaaˈiyan, shooron, ooso keettan, timirtte keettaaninne nu haggaazuwan oosuwan peˈees. Halo kessiyay Yihoowa gidiyoogaa hassayidi, yedetay gakkiyoode gidinkka iitabaa loˈˈoban xoonanau nuuyyo danddayettidabaa ubbaa oottoos.

18. Roome 12:12n deˈiya heezzu zoree aybee?

¹⁸Roome 12:12 nabbaba. Ha maaddiya ubba zoriyaa bolli gujjidi, PHauloosi minttettiya heezzubaa yootiis. Nuuni ha ubbabaa Yihoowa maadoy baynnan polanau mule danddayenna gishshau, PHauloosi “ubba wode Xoossaa” woossanaadan zoriis. PHauloosi “waayiyan genccite” yaagido zoriyaa naaganaadan hegee nuna maaddees. Wurssettan, saluwaana gidin saˈaana gidin, Yihooway ‘nuuyyo immana giidoban’ nu xeelaa wottanaunne merinaa deˈuwaa hidootan ufayttana koshshees.

Zaarettanau

• Yedetay gakkiyo wode nuuni ay oottana koshshii?

• Nuuni sarotettaa medhiyaageeta gidana koshshiyoy ayba hanotatuunee, qassi waatidi?

• Nuuni nu huuphe halo kessana koshshennay aybissee?

[Oyshata]

[Sinttaa 16n deʼiya misiliyaa]

Nu shoorota goˈˈiya ogiyan maaddiyoogee, gaasoy baynnan ixxiyoogaa xoonanaadan nuna maaddana danddayees

[Sinttaa 17n deʼiya misiliyaa]

Intte gubaaˈiyan sarotettaa medhanau baaxeteetii?