Geeshsha Ayyaanaa—Ne Deˈuwan Koshshiya Wolqqaa

“AMMANETTIYA ayyaanaa ta giddon ooraxissa. Tana ne sinttaappe oloppa; ne Geeshsha Ayyaanaa taappe ekkoppa.” (Mazamure 51:11) Hagee Kawuwaa Daawiti gita balaa bali simmidi, minttidi woossido woosaa.

Daawiti ba deˈuwan geeshsha ayyaanaa wolqqaa darotoo beˈiis. I panttatettan deˈiiddi wolqqaama olancha gidida Gooliyaada xoonanaadan geeshsha ayyaanay a maaddiis. (1 Sameela 17:45-50) Hanno gakkanau xaafettida mazamure ubbaappe aadhiya amarida mazamureta xaafanaadan geeshsha ayyaanay ayyo wolqqaa immiis. Daawiti: “GODAA Ayyanai ta baggaara haasayees; a qaalai ta inxxarssan de7ees” yaagiis.—2 Sameela 23:2.

Yesuus Kiristtoosikka geeshsha ayyaanay Daawita deˈuwan oottidobaa yootiis. Issi wode Yesuusi i yootiyoobaa siyiyaageetuyyo: “Daawiti bana Geeshsha Ayyaanai haasayissin, ‘Godai ta Godaa, “Taani ne morkketa neeni yedhdha eqqiyoobaa oottana gakkanaassi, hagan taappe ushachcha baggaara utta” giis’ yaagiis” yaagiis. (Marqqoosa 12:36; Mazamure 110:1) Daawiti mazamuriyaa xaafido wode bana geeshsha ayyaanay kaalettidoogaa eriis. He geeshsha ayyaanay nunakka maaddana danddayii?

 “Woossite; Intte Ekkana”

Neeni mazamure xaafennan aggana danddayaasa. SHin hidoota qanxxissiya, wogga Gooliyaada mala metoy nena gakkana danddayees. Leemisuwau, Esaabeelibaa qoppa. * I azinay yelaga maccaasiyo ekkidi, o aggidi biis. I o daro acuwaa toossidi biis; qassi bantta naaˈˈu guutta macca naatuyyo koshshiyaabaa kunttanau o miishsha maaddenna. A: “Tana shenetidi aggibayidabadan taayyo siyettiis. SHin i tana aggi boosappe doommidi, Xoossaa ayyaanay tana maaddiyaabadan siyettees” yaagaasu.

Esaabeela sohuwaara geeshsha ayyaanaa demmays gaada qoppadee? CHii, Xoossay ba ayyaanaa immanaadan a galla galla woossaasu. Sinttappe bana gakkiyaabaa xalatettan xoonanau, ba naatussi koshshiyaabaa bessiyaagaadan kunttanaunne bana pattennabadan xeelliyoogaa agganau Xoossay iyyo wolqqaa immana koshshiyoogaa eraasu. Yesuusi: “Woossite; intte ekkana. Koyite; intte demmana. Kare yiidi xeesite; intteyyo karee dooyettana” yaagidoogaa a oosuwan peeshshaasu.—Maatiyoosa 7:7.

Roberttoykka bayyo Xoossaa ayyaanay koshshiyoogaa akeekiis; shin aagee hara allaalliyaana. I ubbatoo uyiyo sijaaraynne hashiishee au amale gidiis. I he amaliyaa xoonanau naaˈˈu layttau baaxetiis; qassi aggi makkidi, darotoo zaaretti zaarettidi uyees. Roberttoy: “Issi uri jallissiya xaliyaa aggiyo wode unˈˈettees. A bollay wodiyaappe wodiyan he xaliyaa koyees” yaagiis.

Roberttoy gujjidi hagaadan giis: “Xoossay koyiyo ogiyan au goynnanau ta deˈuwaa laammanau murttaas. Geeshsha Maxaafan deˈiya suureban ta qofaa wottanau baaxetaas. Ta deˈuwaa Geeshsha Maxaafaara moggoyanau wolqqaa immana mala galla galla Xoossaa minttada woossaas. Taani tarkka xoonana danddayennaagaa eraas. Yihooway ta woosaa waati zaaridaakko beˈaas; zaarettada he amaliyan xoonettada hidootaa qanxxido wode hegaa akeekaas. Xoossaa ayyaanay ta wolqqaa ooraxissidoogaa ammanays; a ayyaanaa maadoy baynnaakko ta amaliyaa mule xoonana danddayikke.”—Piliphphisiyuusa 4:6-8.

“Argganttatudan, Qefiyan Pude” Kiyiyoogaa

Miilooniyan qoodettiya Yihoowa Markkati Esaabeeligaadaaninne Roberttoogaadan geeshsha ayyaanaa wolqqaa bantta deˈuwan beˈidosona. Yihooway salo gufanttuwaanne saˈa micettaa medhido a wolqqay neeni koyikko neessikka imettana danddayees. Neeni wozanappe oychiyaaba gidikko, Xoossay ba ayyaanaa neessi immanau koyeesinne amottees. SHin he ayyaanaa demmanau neeni Xoossaabaa tumaa eranaunne a sheniyaa polanau wozanappe koyana bessees.—Isiyaasa 55:6; Ibraawe 11:6.

Geeshsha ayyaanay immiyo wolqqan neeni Xoossaayyo bessiyaagaadan oottanaunne ne deˈuwan gakkiya ayba metuwaakka xoonanau wolqqaa demmana danddayaasa. Geeshsha Maxaafay nuna hagaadan minttettees: “[GODAY] daafuranchchau wolqqaa immees; minotetti bainnaagaukka minotettaa gujjees. . . . SHin GODAA ammanettidi naagiyaageeti, bantta wolqqaa ooraxissana. Eti argganttatudan, qefiyan pude kiyana; woxxidi daafurokkona; hemettidikka wolqqaa wurokkona.”—Isiyaasa 40:28-31.

[Tohossa qofata]

[Sinttaa 8n deʼiya misiliyaa qonccissuwaa]

‘Ta deˈuwaa Geeshsha Maxaafaara moggoyanau wolqqaa immana mala galla galla Xoossaa minttada woossaas. Taani tarkka xoonana danddayennaagaa eraas. I ta woosaa waati zaaridaakko beˈaas.’

 [Sinttaa 7n diya misiliyaa]

Ooso Bolli Deˈiya Geeshsha Ayyaanaa

Xoossay salo gufanttuwaanne saˈa micettaa medhanau geeshsha ayyaanaa goˈettiis. Mazamuraawee: “Abeet GODAU, ne oosoi ai keena daroo! Ne aadhdhida eratettan neeni eta ubbaa medhdhadasa; sa7ai neeni medhdhidoban kumiis. Neeni ne shemppuwaa kiittiyo wode harati merettoosona; biittaanne ooraxissaasa” yaagiis.—Mazamure 104:24, 30; Doomettaabaa 1:2; Iyyooba 33:4.

Geeshsha ayyaanay, Xoossau goynniya asati Geeshsha Maxaafaa xaafanaadan denttettiis. Kiitettida PHauloosi: “Xoossaa maxaafa ubban Xoossaa Ayyaanai de7ees. Qassi he maxaafati . . . maaddoosona” yaagidi xaafiis. (2 Ximootiyoosa 3:16) “Xoossaa Ayyaanai de7ees” geetettidi birshshettida Giriike qaalaa sitta birshshettay, “Xoossay a bolli shemppiis” yaagiyaagaa. Geeshsha Maxaafaa xaafidaageeti “Xoossaa qaalaa” xaafanaadan Yihoowa shemppoy, woykko ayyaanay kaalettiis.—1 Tasalonqqe 2:13.

Xoossaa ayyaanay, Xoossau oottiyaageeti sinttanaabaa bali baynnan yootanaadan wolqqaa immiis. Kiitettida PHeexiroosi: “Xoossaa maxaafan xaafettida hananabaa yootidobaa ooninne barkka birshshanau danddayenna. Aissi giikko, hananabaa yootidobi ubbai geeshsha asati Geeshsha Ayyaanai kaalettin, Xoossaa qaalaa haasayidosonappe attin, asa sheniyan haasayettibeenna” yaagiis.—2 PHeexiroosa 1:20, 21; Yuu7eela 2:28.

Geeshsha ayyaanay Yesuusinne ammaniya hara asati Xoossaa Kawotettaa mishiraachuwaa sabbakanaadaaninne maalaalissiyaabaa oottanaadan maaddiis. Yesuusi: “Taani hiyyeesaassi lo77o mishiraachchuwaa yootanau tiyettido gishshau, Godaa Ayyaanai ta bollan de7ees. Qashettidaageetussi birshshettiyoogaa, qooqetussi xeelliyoogaa yootana mala . . . tana kiittiis” yaagiis.—Luqaasa 4:18; Maatiyoosa 12:28.

 [Box/Picture on page 9]

GEESHSHA AYYAANAY NUNA MAADDANA DANDDAYIYO OGIYAA

Geeshsha ayyaanay neeni paaciyaanne qohiya meeziyaa xoonanaadan minotettaa immana danddayees. Kiitettida PHauloosi: “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, he paaciyaa i inttena danddayissana. Qassi he paaciyaappe intte kessi ekkiyo ogiyaakka immana” yaagiis.—1 Qoronttoosa 10:13.

Geeshsha ayyaanay Xoossaa ufayssiya eeshshaa dichanau nena maaddana danddayees. “Geeshsha Ayyaanaa aifee, siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa.”—Galaatiyaa 5:22, 23.

Geeshsha ayyaanay neeni paaciyaa xoonanaadan minotettaa immana danddayees. ‘Xoossay tau immido wolqqan, ubbabaa oottanau taani danddayays.’

—Piliphphisiyuusa 4:13.