Geeshsha Ayyaanay Aybee?

ISSI wode Yesuusi ba erissiyo ashkkarata: “Intte giddon ba na7i, ‘Quma imma’ giikko, shuchcha immana aawi de7ii? ‘Mole imma’ giikko shooshsha immanee? Woi, ‘PHuuphulle imma’ giikko masimaso immanee?” yaagidi oychiis. (Luqaasa 11:11, 12) Galiila heeran deˈiya naati phuuphulliyaanne moliyaa miyoogaa dosoosona; eti bantta koyiyo qumaa eroosona.

Issi namisettida naˈi qumaa oychiyoogaadan, nuuni geeshsha ayyaanaa demmanau aggennan oychana koshshiyoogaa Yesuusi yootiis. (Luqaasa 11:9, 13) Geeshsha ayyaanay aybakko eriyoogee, i nu deˈuwan ay keena koshshiyaakko akeekanaadan oottees. Yaatiyo gishshau, Geeshsha Maxaafay geeshsha ayyaanaabaa woygiyaakko ane koyro pilggoos.

‘Ubbaappe Bolla Xoossaa Wolqqaa’

Geeshsha ayyaanay Xoossay ba sheniyaa polanau goˈettiyo wolqqa gidiyoogaa Geeshsha Maxaafay qonccissees. Mayraama geelaˈo gidikkokka naˈa yelanaagaa kiitanchaa Gabreeli yootido wode: “Geeshsha Ayyaanai ne bolli yaana; Ubbaappe Bolla Xoossaa wolqqai nenan shemppana; hegaa gishshau, ne yelana geeshsha na7ai Xoossaa Na7aa geetettana” yaagiis. (Luqaasa 1:35) Geeshsha ayyaanay ‘Ubbaappe Bolla Xoossaa wolqqaara’ gayttidaba gidiyoogaa Gabreeli yootido qaalay bessees.

Geeshsha Maxaafaa giddon harasan hegaa mala qofay deˈees. Hananabaa yootiya Mikiyaasi: “Taani . . . wolqqan, GODAA Ayyaanan, . . . kumaas” yaagiis. (Mikiyaasa 3:8) Yesuusi ba erissiyo ashkkaratussi: “Geeshsha Ayyaanai intte bolli wodhdhiyo wode, wolqqaa intte ekkana” yaagidi qaalaa geliis. (Oosuwaa 1:8) Qassi kiitettida PHauloosi ‘geeshsha ayyaanaa wolqqaabaa’ yootiis.—Roome 15:13, 19.

Yaatin, qommoora beˈidobaappe ay kuuyana danddayiyoo? Geeshsha ayyaanaynne Xoossaa wolqqay keehippe gayttidaba. Geeshsha ayyaanay oosuwan peˈiya Yihoowa wolqqaa. Qanttan qonccissanau, geeshsha ayyaanay Xoossay ba halchuwaa polanau goˈettiyo wolqqa. Hegee ayba maalaalissiya wolqqee! Salo gufanttooninne saˈa micettan deˈiya mereta ubbaa medhanau koshshida wolqqay ay keenakko qoppanaukka danddayettenna. Hananabaa yootiya Isiyaasa baggaara, Yihooway nuuni kaallidi deˈiyaagaa wotti dentti qoppanaadan yootiis: “Intte aifiyaa xoqqu oottidi, saluwaa xeellite; he xoolintteta medhdhidai oonee? I eta olanchchaadan kaalettees; eta qoodaakka erees. I eta ubbaakka eta sunttan sunttan xeesees. A anggaa gitatettaappenne a wolqqaa minotettaappe denddidaagan, etappe issoinne xayenna.”—Isiyaasa 40:26.

Yaatiyo gishshau, salo gufanttooninne  saˈa micettan deˈiya mereta ubbay maaraaninne moggottidi deˈiyoy, Ubbaa Danddayiya Xoossaa “wolqqaa minotettaappe” denddidaagaana gidiyoogaa Geeshsha Maxaafay yootees. Xoossaa wolqqay zawi baynnaagaa gidiyoogeenne nuuni deˈiyoy aana gidiyoogee qoncce.—“Ooso Bolli Deˈiya Geeshsha Ayyaanaa” giya saaxiniyaa xeella.

Salo gufanttooninne saˈa micettan deˈiyaabaa medhido wodeegaadan, Yihooway ba geeshsha ayyaanaa keehippe goˈettana danddayees. SHin asaa naata maaddanaukka a goˈettana danddayees. Xoossay ba ayyaanaa baggaara saˈan deˈiya ba ashkkaratuyyo waatidi wolqqaa immiyaakko bessiya daro leemisoy Geeshsha Maxaafan deˈees.

 “Godaa Ayyaanai Ta Bollan De7ees”

Xoossay ba ashkkaratussi wolqqaa waatidi immiyaakko Yesuusa haggaazoy maalaalissiya hanotan nuussi qonccissees. Yesuusi Naazireete asaassi: “Godaa Ayyaanai ta bollan de7ees” yaagiis. (Luqaasa 4:18) Yesuusi “Ayyaanaa wolqqan” ay polidee? (Luqaasa 4:14) Ubba qommo harggiyaappe asaa pattiis; abbaa beetaa woppissiis; guutta oyttaanne moliyaa shaˈan qoodettiya asaa miziis; ubba hayqqidaageetakka denttiis. Kiitettida PHeexiroosi Yesuusi, “Xoossai banan oottido wolqqaama oosuwan, oorattabaaninne malaatan [asaayyo] qonccissido asa” gidiyoogaa yootiis.—Oosuwaa 2:22.

Geeshsha ayyaanay ha wodiyan hegaa mala maalaalissiyaabaa polenna. Gidikkokka, wolqqaamabaa nuussi oottana danddayees. Yesuusi ba erissiyo ashkkaratussi qaalaa gelidoogaadan, Yihooway baayyo goynniyaageetussi geeshsha ayyaanaa immanau koyees. (Luqaasa 11:13) Yaatiyo gishshau, kiitettida PHauloosi: ‘Xoossay tau immido wolqqan, ubbabaa oottanau taani danddayays’ yaagiis. (Piliphphisiyuusa 4:13) Geeshsha ayyaanay ne deˈuwan hegaa malabaa oottana danddayii? Kaalliya huuphe yohoy ha oyshaa zaarees.

[Box/Picture on page 5]

Geeshsha Ayyaanay Bolli Deˈiyooba Gidennay Aybissee?

Geeshsha Maxaafay geeshsha ayyaanaa haattaara geeddarssees. Xoossay: “Taani saamettida biittan haattaa gussana; mela biittankka pulttuwaa gogissana. Taani ta Ayyaanaa ne naatu bolli, ta anjjuwaakka ne zerettatu bolli gussana” yaagidi, ba asaa sinttappe anjjanaagaa qaalaa geliis.—Isiyaasa 44:3.

Xoossay ba ashkkaratu bolli ba ayyaanaa gussiyo wode, etan ‘geeshsha ayyaanay kumees’ woykko eti ‘geeshsha ayyaanan kumoosona.’ Yesuusi, Xammaqiya Yohaannisi, PHeexiroosi, PHauloosi, Barnnaabaasinne 33 M.Ln, PHenxxaqosxxe gallassi shiiqida erissiyo ashkkarati geeshsha ayyaanan woykko etan geeshsha ayyaanay kumidoogee qoncciis.—Luqaasa 1:15; 4:1; Oosuwaa 4:8; 9:17; 11:22, 24; 13:9.

Ane kaallidi deˈiyaagaa qoppa: Bolli deˈiyoobi dumma dumma asan ‘gukkana’ danddayii? Issi uri daro asaa bolli ‘kumana’ danddayees guutii? Hegee gelennaba. Geeshsha Maxaafay asay aadhida eratettaaninne akeekan kumiyoogaa yootees; shin issi uri hara uran kumiyoogaa mule yootenna.—Luqaasa 2:40; Qolasiyaasa 1:9.

Ayyaanaa geetettida Giriike qaalay pniyuma yaagiyaagaa; hegee ayfiyan beettenna wolqqa giya qofaakka oyqqiis. Vayn giyo bitanee xaafido Ekspozitery Dikshineerii of Niwu Testament Words giya maxaafay pniyuma giya qaalay “koyruwan carkkuwaa, . . . qassi shemppuwaa, haray qassi carkkuwaadan ayfiyan beettenna, wolqqaama ayyaanaa malaatees” yaagees.

Yaatiyo gishshau, geeshsha ayyaanay bolli deˈiyooba gidennaagee qoncce. *

[Tohossa qofata]

[Misilee Ekettidosaa]

Photodisc/SuperStock