Geeshsha Maxaafaa Xannaˈanau Prograamiyaa Kessadii?

BOLLAARA HEEMMIYAAGEE zillaytti Geeshsha Maxaafaa xannaˈanaunne so asaara issippe tobbanau wodiyaa demmanaadan oottiya, gubaaˈiyaa shiiquwaa prograamiyaa laamiyaa erissiis. Neeni so asau huuphe gidikko, so asaayyo bessiyaanne ubbay goˈettiyo, so asaa Geeshsha Maxaafaa xinaatiyaa ne macheeranne ne naatuura ubbatoo xannaˈa. Naata yelibeenna woy naati son baynna machiyaanne azinay he wodiyaa Geeshsha Maxaafaa issippe xannaˈanau goˈettana danddayoosona. So asaa aawatetti baynna ekkibeenaageetinne gelibeennaageeti, Geeshsha Maxaafaa loyttidi buzo xannaˈanau he wodiyaa goˈettana danddayoosona.

So Asaa Goynuwaa omarssaa giigissuwan ufayttidoogaa daroti yootidosona. Leemisuwau, Keeven giyo gubaaˈiyaa cimay hagaadan giidi xaafiis: “‘Galatays’ giyoogaa xallay gubaaˈiyan deˈiyaageetussi siyettidabaa loytti qonccissenna. SHiiquwau biyoogee attido omarssan, Bollaara Heemmiyaagee nu soo asaara xannaˈanaadan yootidoogaadan waatidi goˈettana danddayiyaakko cimati issippe tobbida.”

I azinay gubaaˈiyaa cima gidido Jooda hagaadan gaada xaafaasu: “Layttay 15, 11nne 2 gidido heezzu macca naati nuuyyo deˈoosona. Mata wode malaatan haasayiya gubaaˈiyaa yame gidida. SHiiqotu ubbau giigettanau daro wodiyaanne baaxiyaa koshshees. Haˈˈi ha giigissuwaappe denddidaagan, so asaa goynuwan qofaa wottana danddayiyo issi omarssaa demmida!”

Kumetta wodiyaa aqinye gidida Jooninne Joˈan giyo azinaynne machiyaa hagaadan giidi xaafidosona: “Gubaaˈiyaara gayttida hara oosotuura gattiyo gishshau, darotoo nu soo asaa Geeshsha Maxaafaa xinaatiyaa issi issitoo xannaˈoos. He wodiyaa nuuppe koyettiyaagaadan goˈettiyaaba gidikko, ha ooratta giigissoy Yihooway immido, ayyaanaaban nuna minttettiya imota.”

Layttay 25 heera gidido, Tooni giyo machibeenna ishay Masqqaynno omarssan buzo xinaatiyaa xannaˈees. I hara omarssata gubaaˈiyaa shiiquwau giigettanau goˈettees. Gidikkonne, Tooni, “Taani Masqqaynno omarssaa yeemottada naagays” yaagiis. Aybissi? Tooni: “He omarssay taani Yihoowaara gayttiyo dumma omarssa. Naaˈˈu saate gidiyaagaa, Yihoowaara deˈiya dabbotaa minttiyaaba xannaˈays. Daro saatiyaa Xannaˈiyoogee taani nabbabiyo Geeshsha Maxaafaa xiqisetun wotta denttada qoppanaadan maaddees” yaagiis. I ayba ayfe demmidee? “Yihoowa zoriyaa kaseegaappe aaruwan loyttada eraas” yaagiis. I hegau leemiso yootana danddayii? “Loytti Akeekiyoogaa giya maxaafan, Daawitanne Yonaataana laggetettaabaa nabbabaas. Yonaataani ba goˈˈaa yarshshido qofaappe darobaa tamaaraas. Tumu lagge gidiyoogee woygiyoogaakko loyttada akeekanaadan tana a leemisoy maaddiis. Hagaa mala aloˈˈobaa daruwaa demmanau Masqqaynno omarssaa yeemottada naagays!” yaagiis.

Yihoowa ashkkarati ubbay Geeshsha Maxaafaa xinaatiyaunne so asaa goynuwau demmido gujo saatiyaa loytti goˈettiyoogan daro anjjuwaa demmanaagau siree baawa.