“Intte Ta Laggeta”
“Intte Ta Laggeta”
“Taani inttena azazidobaa ubbaa oottikko, intte ta laggeta.” —YOHAANNISA 15:14.
1, 2. (a) Yesuusa laggeti kase ayba dumma dumma hanotan deˈidonaa? (b) Nuuni Yesuusa lagge gidiyoogee keehippe koshshiyoy aybissee?
POOQIYAA bollan deˈiya kifiliyan Yesuusaara deˈiya asati kase deˈido hanotay dumma dumma. PHeexiroosinne a ishaa Inddiraasi moliyaa oyqqiyaageeta. Maatiyoosi kase qaraxaa shiishshiyaagaa; he oosuwaa oottiyaageeta Ayhudati karoosona. Yaaqoobanne Yohaannisa mala issoti issoti naatettaappe doommidi Yesuusa eriyaaba milatees. Naatinaaˈeela mala harati Yesuusaara erettoosappe guutta layttay aadhiis. (Yohaannisa 1:43-50) Gidikkonne, Yerusalaamen he dumma Paasikaa Baalaa bonchiyo omarssi yan deˈiya ubbay, Yesuusi qaalaa gelido Masiyaa, deˈo Xoossaa Naˈaa gidiyoogaa ammanidosona. (Yohaannisa 6:68, 69) I: “Taani inttena ta laggeta gaas. Aissi giikko, ta Aawaappe siyido ubbabaa taani intteyyo yootaas” yaagidoogan, banttana siiqiyoogaa eti eridoogee sirissenna.—Yohaannisa 15:15.
2 Yesuusi ammanettida ba kiittidoogeetussi yootido ha qofay ha wodiyan deˈiya tiyettida Kiristtaanetu ubbaassinne eta lagge gidida ‘hara dorssatussikka’ baso siraata gididi oottees. (Yohaannisa 10:16) Nuuni kase deˈido hanotay ayba gidikkonne, Yesuusa lagge gidiyo maataa demmana danddayoos. Nuuni a lagge gidiyoogee Yihoowa dabbo gidanaadan oottiyo gishshau, aybippenne aadhidi koshshiyaaba. Yihoowakko shiiqana danddayiyoy, koyruwan Kiristtoosakko shiiqiyoogaana gidiyoogee tuma. (Yohaannisa 14:6, 21 nabbaba.) Yaatin, Yesuusa lagge gidanaunne hegaadan deˈanau nuuni ay oottana bessii? Ha keehippe koshshiya qofaa tobbanaappe kasetidi, Yesuusi loˈˈo lagge gidiyoogan leemiso gididobaa pilggananne erissiyo ashkkarati au lagge gididoogan yootidobaanne oottidobaa beˈana.
Loˈˈo Lagge Gidiyoogan Yesuusa Leemisuwaa
3. Yesuusi erettiyoy aybiinee?
3 Erancha Kawuwaa Solomoni: “Duretussi daro laggeti de7oosona” yaagidi xaafiis. (Leemiso 14:20) Polo gidenna asaa naati immana danddayiyoobaappe ekkana danddayiyoobaa baaso oottidi laggetettaa medhana koyiyoogaa hegee qanttan qonccissees. Yesuusayyo hegaa mala bala qofay baawa. Yesuusi issi urakko shiiqiyoy ayyo deˈiya miishshaa woykko deretettan deˈiya sohuwaa xeellidi gidenna. Yesuusi biittaa haariya issi dure yelagaa dosidi, bana kaallanaadan shoobbidoogee tuma. Gidikkokka, Yesuusi he bitanee baassi deˈiyaabaa bayzzidi hiyyeesau immanaadan azaziis. (Marqqoosa 10:17-22; Luqaasa 18:18, 23) Yesuusi duretuuranne erettida asatuura gidennan, hiyyeesatuuranne asay kariyoogeetuura laggetiyoogan erettees.—Maatiyoosa 11:19.
4. Yesuusa laggeti polo asa gidokkona gaana danddayiyoy aybissee?
4 Yesuusa laggeti polo asa gidennaagee qoncce. Issi wode PHeexiroosi issibaa Xoossaagaadan xeellibeenna. (Maatiyoosa 16:21-23) Yaaqoobinne Yohaannisi Xoossaa Kawotettan banttassi gita sohuwaa immanaadan Yesuusa oychido wode, boncho koyiyaageeta gidiyoogaa bessidosona. Hara kiitettidaageeti eta hanotan hanqqettidosona; qassi maata koyiyoogee eti darotoo palamettanaadan oottidaba.—Maatiyoosa 20:20-28.
5, 6. (a) Yesuusi kiitettidaageetuppe darotuura laggetiyoogaa aggibeennay aybissee? (b) Yesuusi Yihudaara laggetiyoogaa aggidoy aybissee?
5 Yesuusi polo gidenna ha asatu lagge gididoy eta polotettaa pacaa xaasayidi xeellido woykko akeekibeenna gishshataassa gidenna. Hegaappe, eta loˈˈo koshshaaninne eeshshan xeelaa wottanau koyiis. Leemisuwau, Yesuusa gakkida gita metuwaa wode, PHeexiroosi, Yaaqoobinne Yohaannisi a miyyiyan eqqiyoogaa aggidi xiskkidosona. Yesuusi eta hanotan hidootaa qanxxibeennaagee qoncce. Ubba eta koshshay loˈˈo gidiyoogaa akeekidi: “Ayyaanai giigi uttiis; shin ashoi daafuranchcha” yaagiis.—Maatiyoosa 26:41.
6 Hara baggaara, Yesuusi Asqqorootu Yihudaara laggetiyoogaa aggiis. Yihuday qooreppe qommo laggetettaa bessidaba gidikkonne, ha kase ba mata laggiyaa qofay moorettidoogaa Yesuusi eriis. Yihuday ha saˈaara dabbotido gishshau, Xoossaa morkke gidiis. (Yaaqooba 4:4) Yaatiyo gishshau, Yesuusi ammanettida 11 kiitettidaageeti ba lagge gidiyoogaa yootido wode, Yihudaa moyssiis.—Yohaannisa 13:21-35.
7, 8. Yesuusi ba laggeta siiqiyoogaa bessidoy ayba ogiyaanee?
7 Yesuusi ba ammanettida laggetu balaa aggi aadhiis; qassi etassi loˈˈo gididabaa oottiis. Leemisuwau, eta paacee gakkiyo wode naaganaadan ba Aawaakko woossiis. (Yohaannisa 17:11 nabbaba.) Yesuusi eta abbiyaa pacaa akeekiyoogaa bessiis. (Marqqoosa 6:30-32) Qassi ba qofaa etassi yootiyoogaa xalla gidennan, eta qofaynne koshshay aybakko siyiyoogaaninne akeekiyoogan ufayttees.—Maatiyoosa 16:13-16; 17:24-26.
8 Yesuusi ba laggetussi deˈiisinne eta gishshau hayqqiis. Ba Aawaa suure pirddaa maaran koshshiyaabaa kunttanau ba shemppuwaa yarshshana bessiyoogaa i eriyoogee tuma. (Maatiyoosa 26:27, 28; Ibraawe 9:22, 28) SHin Yesuusi ba siiquwaa bessanau ba shemppuwaa aattidi immiis. “Ba shemppuwaa ba laggiyaayyo aattidi immiyoogaappe aadhdhiya siiqoi ooyyookka baawa.”—Yohaannisa 15:13.
Yesuusa Laggetettay Erissiyo Ashkkarati Ay Oottanaadan Denttettidee?
9, 10. Yesuusa kehatettay asay ay oottanaadan denttettidee?
9 Yesuusi kehatettan ba wodiyaanne bau deˈiyaabaa immiis; qassi siiquwaa bessiis. Hegaappe denddidaagan, asay akko shiiqiisinne i oottidobaa gishshaa ufayssan zaaridi ayyo immiis. (Luqaasa 8:1-3) Yesuusi ba deˈuwan beˈidobaappe hagaadan giis: “Haratu bolli pirddoppite; Xoossai intte bolli pirddenna. Harata iita gooppite; Xoossai inttena iita geenna. Atto giite; Xoossai intteyyo atto gaana. Immite; Xoossai intteyyo immana. Baqqi naaqqidi siilli kunttin, palahidi wora laalettiyaagaa Xoossai intte kiyuwan idinttidi immana. Aissi giikko, intte harau immanau likkidi makkiyooban Xoossai intteyyo likkidi immana.”—Luqaasa 6:38.
10 Issoti issoti Yesuusappe demmiyooba xallau aara laggetanau malidoogee tuma. Yesuusi yootidobaa bala ogiyan akeekido wode, ha worddo laggeti appe shaahettidosona. I yootidobaa akeekibeenna wode Yesuusan ammanettiyoogaappe, sohuwaara bala kuushshaa kuuyidi ayyo zokkuwaa zaaridosona. Hegaappe dumma ogiyan, kiitettidaageeti ammanettidaageeta. Yesuusa laggetettaara gayttidaagan darotoo eta paacee gakkidaba gidikkonne, loˈˈo wodiyankka gidin iita wodiyan, a miyyiyan eqqanau banttau danddayettidabaa oottidosona. (Yohaannisa 6:26, 56, 60, 66-68 nabbaba.) Yesuusi saˈan deˈido wurssetta qammi, ba laggeta ay keena siiqiyaakko: “[Intte] taani paacettiyo wode tana yeggibeennaageeta” yaagidi qonccissiis.—Luqaasa 22:28.
11, 12. Yesuusi erissiyo ashkkarata waatidi minttettidee? Eti shin ayba zaaro immidonaa?
11 Yesuusi ammanettidaageeta gididoogau ba erissiyo ashkkarata galati simmin, sohuwaara eti a aggidi biidosona. Qanttan qonccissanau, eti asa yayyiyoogee Kiristtoosa siiqiyo siiquwaappe aadhiis. Haˈˈikka Yesuusi etau atto giis. I hayquwaappe denddi simmidi, etayyo qoncciisinne eti a lagge gidiyoogaa yootidi minttettiis. Hegaa bollikka, “asa ubbaa” erissiyo ashkkara oottiyoonne “sa7aa gaxaa gakkanaashinkka” a markka gidiyo geeshsha oosuwaa etassi immiis. (Maatiyoosa 28:19; Oosuwaa 1:8) Erissiyo ashkkarati ayba zaaro immidonaa?
12 Erissiyo ashkkarati Kawotettaa kiitaa aassiyoogan banttau danddayettidabaa ubbaa oottidosona. Yihoowa geeshsha ayyaanaa maaduwan, sohuwaara bantta timirttiyaa Yerusalaame katamaa gattidosona. (Oosuwaa 5:27-29) Asay eta woranau yashissiyoogeekka erissiyo ashkkara oottanaadan Yesuusi azazidoogaa eti polennaadan diggibeenna. Yesuusi eta azazoosappe amarida layttay aadhi simmin, kiitettida PHauloosi mishiraachoy “sa7an de7iya mereta ubbaa matan” odettidoogaa xaafiis. (Qolasiyaasa 1:23) Ha erissiyo ashkkarati Yesuusayyo mata lagge gidiyoogaa xoqqu oottidi xeellidoogee erettidaba!
13. Yesuusi erissiyo ashkkarati a timirttee banttana ayba ogiyan denttettanaadan paqqadidonaa?
13 Erissiyo ashkkara gididaageeti Yesuusa timirttee bantta deˈuwaa laammanaadankka paqqadidosona. Darotu eeshshaynne amalee keehippe laamettiis. Ooratta erissiyo ashkkaratuppe issoti issoti kase, attuma asa gidiiddi attuma asaara, macca asa gidiiddi macca asaara asho gaytotettaa poliyaageeta, shaaramuxiyaageeta, mattottiyaageeta woykko wuuqqiyaageeta. (1 Qoronttoosa 6:9-11) Hara zareta xeelliyaagan, harati bantta xeelaa laammidosona. (Oosuwaa 10:25-28) Gidikkokka, eti Yesuusa azazuwaa polidosona. Eti bantta ceega asatettaa qaari olidi ooratta asatettaa maayidosona. (Efisoona 4:20-24) Eti Yesuusa qofaanne oosuwaa leemisuwaa akeekiyoogaaninne kaalliyoogan “Kiristtoosa wozanai” deˈiyoogeeta gididosona.—1 Qoronttoosa 2:16.
Ha Wodiyan Nuussi Kiristtoosaara Deˈiya Laggetettaa
14. “Wodiyaa wurssettan” Yesuusi ay oottanaagaa qaalaa gelidee?
14 Koyro xeetu layttan deˈida Kiristtaanetuppe daroti Yesuusa eriyaageeta woykko i hayquwaappe denddi simmin beˈidaageeta. Nuuni hegaa mala injjiyaa demmibeennaagee qoncce. Yaatin, nuuni Kiristtoosaara laggetanau danddayiyoy ayba ogiyaanee? Issi ogee, ha wodiyan saˈan deˈiya ayyaanan tiyettida, Yesuusa ishata gidida, ammanettida wozannaama ashkkaraa kaaletuwaa azazettiyoogaa. Yesuusi ‘wodiyaa wurssettan’ he ashkkaraa “babaa ubbaa bolli” sunttanaagaa qaalaa geliis. (Maatiyoosa 24:3, 45-47) Ha wodiyan Kiristtoosa lagge gidanau koyiyaageetuppe daroti ha ashkkaraa yame gidokkona. Eti ammanettida wozannaama ashkkaraa kaaletuwau immiyo zaaroy Kiristtoosaara deˈiya eta laggetaa waatidi bochii?
15. Issi uri deeshsha woy dorssa gidiyoogaa shaakki erissiyaabay aybee?
15Maatiyoosa 25:31-40 nabbaba. Yesuusi ammanettida wozannaama ashkkara gidiyaageeta ba ishantta yaagiis. Deeshshatuppe dorssata shaakkiyoogaabaa yootido leemisuwan, Yesuusi nuuni a ishatussi oottiyoobaa ayyo oottiyoobadan xeelliyoogaa qonccissiis. I dorssaa deeshshaappe dummayidi erissiyaabay, issi uri “[a] ishanttu ubbaappe harai atto, laafiya issuwaayyo” oottiyoobaa gidiyoogaa yootiis. Yaatiyo gishshau, saˈan deˈiyo hidootay deˈiyoogeeti Kiristtoosa lagge gidanau koyiyoogaa bessiyo waanna ogee, ammanettida wozannaama ashkkaraa kaafiyoogaa.
16, 17. Nuuni Kiristtoosa ishatu lagge gidiyoogaa waatidi bessana danddayiyoo?
16 Neeni Xoossaa Kawotettaa haaruwaa garssan deˈanau koyiyaaba gidikko, Kiristtoosa ishata xeelliyaagan ne laggetettaa bessana danddayiyoy ayba ogiyaanee? Ane heezzu ogeta beˈoos. Koyroy, kumetta wozanaappe sabbakiyo oosuwan shaahettiyoogaa. Kiristtoosi ba ishati mishiraachuwaa saˈa ubban sabbakanaadan azaziis. (Maatiyoosa 24:14) Gidoppe attin, Kiristtoosa ishatuppe ha wodiyan saˈan attidaageeti, bantta lagge gidida hara dorssatu maadoy baynnan bantta aawatettaa polanaagee deexxiyaaba. Hara dorssatu yameti sabbakiyo wode ubban, Kiristtoosa ishati banttau imettida geeshsha oosuwaa polanaadan maaddoosona. Kiristtoosinne ammanettida wozannaama ashkkaray lagge gididi oottiyo ha oosuwaa wozanappe nashshoosona.
17 Hara dorssati Kiristtoosa ishata maaddana danddayiyo naaˈˈantto ogee, sabbakiyo oosuwaa miishshan kaafiyoogaa. Yesuusi bana kaalliyaageeti ‘worddo miishshan’ banttassi laggeta demmana mala minttettiis. (Luqaasa 16:9) Hegaa giyoogee, nuuni Yihoowaaranne Yesuusaara miishshan dabbotettaa medhana danddayoos giyoogaa gidenna. Hegaappe, Kawotettaara gayttidabaa kaafanau nu miishshaa goˈettiyoogan, nu dabbotaanne siiquwaa doona xalaalan gidennan “oosuwaaninne tumatettan” bessoos. (1 Yohaannisa 3:16-18) Nuuni sabbakiyo wode, nu shiiquwaa sohuwaa keexxanau, bottokonanau, qassi alame yuusho sabbakiyo oosuwau miishshaa immiyo wode hegaadan miishshan maaddoos. Nuuni immiyo miishshay guutta gidin daro gidin, nuuni ufayssan immiyoogaa Yihoowaynne Yesuusi nashshiyoogee qoncce.—2 Qoronttoosa 9:7
18. Nuuni gubaaˈiyaa cimati Geeshsha Maxaafaappe immiyo kaaletuwaa azazettana koshshiyoy aybissee?
18 Nuuni ubbay Kiristtoosa lagge gidiyoogaa bessana danddayiyo heezzantto ogee, gubaaˈiyaa cimati immiyo kaaletuwaa kaalliyoogaa. Kiristtoosi gubaaˈiyau huuphe gidiyo gishshaunne geeshsha ayyaanan kaalettiyo gishshau, ha asati geeshsha ayyaanan sunttettidosona. (Efisoona 5:23) Kiitettida PHauloosi: “Inttena kaalettiyaageetuyyo azazettite; qassi eti azaziyoogaakka oottite” yaagidi xaafiis. (Ibraawe 13:17) Issi issi wode, gubaaˈiyaa cimati Geeshsha Maxaafaappe nuussi immiyo kaaletuwaa azazettiyoogee deexxana danddayees. Nuuni eta polotettaa pacaa akeekana danddayoos; hegee eti immiyo zoriyaa bala ogiyan xeellanaadan oottana danddayees. Gidikkokka, gubaaˈiyaa Huuphee, Kiristtoosi polo gidenna he asata ufayssan goˈettees. Yaatiyo gishshau, nuuni eta maataa xeelliyo ogee Kiristtoosaara deˈiya nu laggetettaa bochees. Nuuni cimatu balaa aggi aadhiyo wodenne eta kaaletuwaa ufayssan kaalliyo wode, Kiristtoosa siiqiyoogaa bessoos.
Loˈˈo Laggeta Nuuni Awuppe Demmana Danddayiyoo?
19, 20. Nuuni gubaaˈiyan ay demmana danddayiyoo? Kaallidi ay beˈanee?
19 Siiquwan heemmiya bollaara xeelliyaageetu baggaara xalla gidennan, gubaaˈiyan ayyaanaaban aayota, ishatanne michota immiyoogan Yesuusi nuuyyo koshshiyaabaa kunttiiddi deˈees. (Marqqoosa 10:29, 30 nabbaba.) Neeni Yihoowa dirijjitiyaara koyro issippetettaa medhiyo wode ne dabboti ay oottidonaa? Neeni Xoossaaranne Kiristtoosaara dabbotaa minttanau baaxetiyoogaa kaafennan aggokkona. SHin Yesuusi issi issitoo “asassi morkketi a so asata” gidanaagaa yootiis. (Maatiyoosa 10:36) Ishappe aadhidi matattiyaageeta nuuni gubaaˈiyan demmana danddayiyoogaa eriyoogee, ayba minttettiyaabee!—Leemiso 18:24.
20 PHauloosi Roome gubaaˈiyau xaafido dabddaabbiyaa wurssettan yootido sarotan qonccidaagaadan, darotuura mata laggetettaa medhiis. (Roome 16:8-16) Kiitettida Yohaannisi ba heezzantto dabddaabbiyaa: “Nu dabbota woykko laggeta ubbaa eta sunttaa sunttaa xeesada, tana saro saro giis yaaga” yaagidi kuuyiis. (3 Yohaannisa 14) Ikka darotuura mata laggetettaa medhidoogee qoncce. Nuuni ayyaana ishatuuranne michetuura laggetettaa medhiyoogaaninne hegaa naagidi deˈiyoogan Yesuusa leemisuwaanne beni wode deˈida erissiyo ashkkaratu leemisuwaa waatidi kaallana danddayiyoo? Kaallidi deˈiya huuphe yohuwan ha oyshaa zaaruwaa beˈana.
Woygada Zaaruutii?
• Loˈˈo lagge gidiyoogan Yesuusi leemiso gidiyaabaa ay oottidee?
• Yesuusa laggetettay erissiyo ashkkarati ay oottanaadan denttettidee?
• Nuuni Kiristtoosa lagge gidiyoogaa bessana danddayiyoy ayba ogiyaanee?
[Oyshata]
[Sinttaa 21n deʼiya misiliyaa]
Yesuusi ba laggetu qofaaninne koshshan ufayttiis
[Sinttaa 23n deʼiya misiliyaa]
Nuuni Kiristtoosa lagge gidanau koyiyoogaa waatidi bessana danddayiyoo?