Siiqoy Baynna Alamiyan Laggetettaa Naagidi Deˈiyoogaa

“Taani inttena azaziyoogee hagaa; issoi issuwaara siiqettite.”—YOHAANNISA 15:17.

1. Koyro xeetu layttan deˈida Kiristtaaneti issoy issuwau mata lagge gididi deˈana koshshidoy aybissee?

YESUUSI saˈan deˈido wurssetta qammi, ammanettida ba erissiyo ashkkarata issoy issuwaara laggetettan deˈanaadan minttettiis. He gallassi omarssa heeran, eti issoy issuwaara siiqettiyoogee a kaalliyaageeta gidiyoogaa shaakki erissiyoogaa yootiis. (Yohaannisa 13:35) Kiitettidaageeti sinttappe banttana gakkana paaciyan genccanaunne Yesuusi mata wode etassi immana oosuwaa polanau issoy issuwaara mata lagge gididi deˈanau koshshees. Koyro xeetu layttan deˈida Kiristtaaneti Xoossaanne issoy issuwaa minttidi siiqiyoogan erettoosona.

2. (a) Nuuni ay oottanau murttidoo, qassi aybissi? (b) Nuuni woygiya oyshata beˈanee?

² Koyro xeetu layttan deˈida Kiristtaanetu leemisuwaa kaalliya yameti deˈiyo, alame yuushuwan deˈiya dirijjitiyaara ha wodiyan issippetettaa medhiyoogee ayba ufayssiyaabee! Issoy issuwaa wozanappe siiqanaadan Yesuusi zorido zoriyaa azazettanau nuuni murttida. Gidoppe attin, ha wurssetta gallassan daro asay  ammanettennaagaanne siiqoy baynnaagaa. (2 Ximootiyoosa 3:1-3) Eti bantta goˈˈaa qoppidi, qassi qooreppe qommo gidida laggetettaa medhoosona. Nuuni tumu Kiristtaane gidiyoogaa shaakki erissiyaabaa naagidi deˈanau, nu goˈˈa xallaa xeellana bessenna. Yaatiyo gishshau, ane ha oyshata qoppoos: Loˈˈo laggetettau baasoy aybee? Loˈˈo laggetettaa waatidi medhana danddayiyoo? Laggetettaa aggana koshshiyoy awudee? Mino laggetettaa naagidi deˈana danddayiyoy ayba ogiyaanee?

Mino Laggetettau Baaso Gidiyaabay Aybee?

3, 4. Mino laggetettau baasoy aybee, qassi aybissi?

³ Mino laggetettau baasoy Yihoowa siiqiyoogaa. Kawuwaa Solomoni: “Issi asi barkka teqqanau danddayenna metuwaa naa77u asati issippe eqettidi, teqqanau danddayoosona. Heezzu achchan dooqettida wodoroikka elle duuxxenna” yaagidi xaafiis. (Eranchchaa 4:12) Laggetettan Yihooway heezzantto acha gidikko, he laggetettay duuxxenna.

⁴ Yihoowa siiqennaageetikka ufayssiya laggetettaa medhana danddayiyoogee tuma. SHin, laggeti naaˈˈaykka Xoossaa siiqiyaageeta gidikko, eta laggetettay mino gidees. Maayettennabay merettiyo wode, tumu laggeti issoy issuwaa oyqqiyoy Yihoowa ufayssiya ogiyaana. Xoossaa morkketi tumu Kiristtaanetu giddon shaahotettaa medhanau maliyo wode, eta giddon deˈiya laggetettay duuxxennaagaa gidiyoogaa akeekoosona. Taarike wode ubban, Yihoowayyo oottiyaageeti issoy issuwaa aatti immiyoogaappe bantta shemppuwaa aatti immanau eeno giidosona.—1 Yohaannisa 3:16 nabbaba.

5. Urutinne Naaˈoomi laggetettay keehippe mino gididoy aybissee?

⁵ Nuuni medhana danddayiyo laggetetta ubbaappe aadhidi ufayssiyaagee, Yihoowa siiqiyaageetuura medhiyoogaa gidiyoogee sirissenna. Urutinne Naaˈoomi leemisuwaa akeeka. Ha maccaasati medhido laggetettay Geeshsha Maxaafan xaafettida keehippe loˈˈo laggetettaappe issuwaa. Eta laggetettay duuxxennaadan oottiday aybee? Uruta Naaˈoomissi: “Ne asai ta asaa gidana; ne Xoossai ta Xoossaa gidana. . . . Haiqoppe attin, harabai tana neeppe shaakkikko, GODAI tana woro” yaagido wode, hegaa gaasuwaa qonccissaasu. (Uruto 1:16, 17) Urutanne Naaˈooma naaˈˈaykka Xoossaa wozanappe siiqidoogeenne eti issoy issuwaa waatidi oyqqanaakko he siiqoy denttettanaadan oottidoogee qoncce. Hegaappe denddidaagan eta naaˈˈaakka Yihooway anjjiis.

Loˈˈo Laggetettaa Medhiyo Ogiyaa

6-8. (a) Mino laggetettau koshshiyaabi aybee? (b) Laggetettaa medhanau neeni kasetana danddayiyoy ayba ogiyaanee?

⁶ Loˈˈo laggetettay qoppennan merettiyaaba gidennaagaa Urutinne Naaˈoomi leemisoy bessees. Loˈˈo laggetettau baasoy naaˈˈaykka Yihoowa siiqiyoogaa. Gidikkokka, mino laggetettau minnidi oottiyoogaanne ba goˈˈaa yarshshiyoogaa koshshees. Kiristtaane keettan deˈiya, issippe Yihoowayyo goynniya ishanne micho gididaageetikka mata laggetettaa medhanau baaxetana koshshees. Yaatin neeni waatada loˈˈo laggetettaa medhana danddayay?

 ⁷Kasetiyaagaa gida. Kiitettida PHauloosi Roome gubaaˈiyan deˈiya ba laggeti ‘imattaa mokkanaadan’ minttettiis. (Roome 12:13) Yaatiyo gishshau, loˈˈo laggetettaa medhanau imatta shoobbiyo injje ubbaa goˈettana koshshees. Ne gishshaa hara uri imatta shoobbana danddayenna. (Leemiso 3:27 nabbaba.) Neeni laggetettaa medhana danddayiyo issi ogee, gubaaˈiyaappe dumma dumma asaa ne son imattiyoogaa. Ne gubaaˈiyan deˈiyaageeta imattiyoogaa meeze oottana danddayay?

⁸ Neeni laggetettaa medhanau kasetana danddayiyo hara ogee, nenaara sabbakanaadan dumma dumma asaa shoobbiyoogaa. Nenaara sabbakiyaagee Yihoowa siiqiyoogaa bessiya hanotan issi erenna urau wozanappe yootiyoogaa siyiyo wode, neeni he uraara matattanaagee erettidaba.

9, 10. PHauloosi leemiso gidiyaaba ay oottidee? Nuuni a leemisuwaa waatidi kaallana danddayiyoo?

⁹Ne siiquwaa aassa. (2 Qoronttoosa 6:12, 13 nabbaba.) Neeni laggetana danddayiyo asi ne gubaaˈiyan baynnabadan neeyyo siyetti erii? Hegaadaana gidikko, neeni lagge gidana gaada qoppiyoogeeta xeelliyaagan aassa qoppanau koshshanee? Kiitettida PHauloosi ba siiquwaa aassiyoogan loˈˈo leemiso gidiis. I Ayhuda gidennaageetuura mata laggetettaa medhanau kase mule qoppi erenna. Gidikkokka, i “Aihuda gidenna asaayyo Yesuusi kiittidoogaa” gidiis.—Roome 11:13.

¹⁰ Hegaa bollikka, PHauloosi layttan ba lagge gididaageetu xallaara laggetettaa medhibeenna. Leemisuwau, layttaanne diccido hanotaa dummatettay deˈishinkka, inne Ximootiyoosi mata lagge gididosona. Ha wodiyan, daro yelagati gubaaˈiyan deˈiya gasttatuura medhido laggetettaa xoqqu oottidi xeelloosona. Layttay 20 heera gidido Vaaneessa: “Layttay 50ppe dariyo, taani keehippe siiqiyo issi laggiyaa taassi deˈausu. Tanaara layttan laggetiya urau yootana danddadayiyoobaa ubbaa issi yootana danddayays. A taassi keehippe qoppausu” yaagaasu. Hegaa mala laggetettay waanidi merettii? Vaaneessa: “Ha laggetettaa medhanau taani baaxetana koshshiis” yaagaasu. Layttan nenaara lagge gidennaageetuura laggetanau koyay? Ne baaxiyau Yihooway nena anjjana.

11. Yonaataananne Daawita leemisuwaappe ay tamaarana danddayiyoo?

¹¹Ammanettiyaagaa gida. Solomoni, “Laggee mule wodekka siiqees; ishaikka metuwaa wode maaddanaassi yelettees” yaagidi xaafiis. (Leemiso 17:17) Solomoni ha qofaa xaafido wode, ba aawaa Daawiti Yonaataanaara medhido laggetettaa qoppennan aggenna. (1 Sameela 18:1) Kawuwaa Saaˈooli ba naˈaa Yonaataani Israaˈeele kawotettaa laattanaadan koyiis. SHin kawo gidanaadan Yihooway dooridoy  Daawita gidiyoogaa Yonaataani ammanidi ekkiis. Saaˈoolaagaappe dumma hanotan, Yonaataani Daawita qanaatibeenna. (1 Sameela 20:24-34) Nuuni Yonaataana malee? Nu laggeti gubaaˈiyan maata demmiyo wode, ufayttiyoo? Eta metoy gakkiyo wode, minttettyoonne kaafiyoo? Issi uri nu laggiyaa zigirikko, hegaa sohuwaara ammanidi ekkiyoyye, Yonaataanaagaadan nu laggiyau ammanettidi a kaafiyoo?

Laggetettaa Aggana Koshshiyoy Awudee?

12-14. Issi issi Geeshsha Maxaafaa tamaareta ayba paacee gakkii? Nuuni eta waatidi maaddana danddayiyoo?

¹² Issi Geeshsha Maxaafaa tamaaree ba deˈuwan laamettiyoogaa doommiyo wode, laggetettaa xeelliyaagan a paacee gakkana danddayees. Eta laggetettan i ufayttiyaaba gidikkonne, Geeshsha Maxaafaa maaraadan deˈenna laggeti ayyo deˈana danddayoosona. Kase i etaara darotoo wodiyaa aattana danddayees. Gidikkokka, haˈˈi, eti oottiyoobay bana qohana danddayiyoogaa akeekiis; qassi hegaa mala laggetuura daro wodiyaa aattana koshshennaagaa qoppiis. (1 Qoronttoosa 15:33) Gidoppe attin, etaara laggetiyoogaa aggikko, etau ammanettenna asa gidiyaabadan qoppana danddayees.

¹³ Neeni hegaa mala paacee gakkiyo Geeshsha Maxaafaa tamaare gidikko, tumu laggee neeni ne deˈuwaa giigissanau baaxetiyoogan ufayttiyoogaa hassaya. Ne laggee nenaara Yihoowabaa tamaaranau koyanakka danddayees. Hara baggara, worddo laggeti neeni etaara “shori bainna oosuwaa issippe oottenna gishshau,” nena “cayoosona.” (1 PHeexiroosa 4:3, 4) Neeni he laggetussi gidennan, eti neessi ammanettiya asa gidennaagee qoncce.

¹⁴ Xoossaa siiqenna, eta kase laggeti Geeshsha Maxaafaa tamaaretuura laggetiyoogaa aggiyo wode, gubaaˈiyaa yameti eta lagge gidana danddayoosona. (Galaatiyaa 6:10) Geeshsha Maxaafaa xannaˈiya, shiiquwan beettiyaageeta eray? Issi issitoo minttettiya hanotan etaara wodiyaa aattana danddayay?

15, 16. (a) Issi laggee Yihoowayyo oottiyoogaa aggikko, nuuni ay oottana koshshii? (b) Xoossaa siiqiyoogaa waatidi bessana danddayiyoo?

¹⁵ Yaatin, gubaaˈiyan deˈiya issi laggee Yihoowassi zokkuwaa zaaranau qofaa qachiyaabanne geella bohettanau koshshiyaaba gidikko shin? Hegaa mala hanotay keehippe azzanttana danddayees. Issi michiyaa, iyyo mata laggiyaa Yihoowayyo haggaaziyoogaa aggido wode: “Taani keehippe dagammaasinne azzanaas. Ta laggiyaa tumaa mintta oyqqidabadan qoppaas; shin hegaadaana gidenna. A Yihoowayyo haggaazidoy bantta soo asaa ufayssanaassa gaada qoppaas. Hegaappe simmada, taani Yihoowassi oottiyoy suure koshshaanee? gaada ta koshshaa pilggiyoogaa doommaas” yaagada bau siyettidabaa yootaasu. He michiyaa hanotaa waata danddayadee? A: “Taani ta toohuwaa Yihoowan wottaas. Yihoowa siiqiyoy i gubaaˈiyan taani lagge demmanaadan oottiyoogaappe aadhiya gaasuwaana gidiyoogaa bessanau murttaas” yaagaasu.

¹⁶ Nuuni alamiyaa dabbo gididaageetuura laggetikko, Xoossaa dabbo gididi deˈana giidi qoppana danddayokko. Erissiyo ashkkaraa Yaaqoobi: “Ha sa7aara dabbotiyoogee Xoossaayyo ixo gidiyoogaa erekketii? Aissi giikko, ha sa7aara dabbotana koyiyai ooninne Xoossaara morkkettees” yaagidi xaafiis. (Yaaqooba 4:4) Laggee aggin azzaniyo wode nuuni Xoossaayyo ammanettiyaageeta gidikko, hegaa danddayanaadan Xoossay maaddiyoogaa ammanettiyoogan A siiqiyoogaa bessana danddayoos. (Mazamure 18:25 nabbaba.) Qommoora qofaa yootida michiyaa: “Nuuni issi uri Yihoowa woykko nuna siiqanaadan oottana  danddayennaagaa eraas. Hegee he uri dooriyooba” yaagada he qofaa qanttan kuuyaasu. Gidikkonne, gubaaˈiyan deˈiyaageetuura loˈˈo laggetettaa naagidi deˈanau ay oottana danddayiyoo?

Mino Laggetettaa Naagidi Deˈiyoogaa

17. Loˈˈo laggeti issoy issuwaara ayba ogiyan haasayiyoonaa?

¹⁷ Issoy issuwaara loˈˈo hanotan haasayiyoogee mata lagge gididi deˈanaadan oottees. Urutonne Naaˈoomo, Daawitanne Yonaataana, qassi PHauloosanne Ximootiyoosa xeelliyaagan Geeshsha Maxaafay yootiyoogaa neeni nabbabiyo wode, loˈˈo laggeti bantta wozanaabaa qosennaba gidikkonne, bonchuwan issoy issuwaara haasayiyoogaa akeekaasa. Haratuura haasayana koshshiya ogiyaa xeelliyaagan PHauloosi: “Intte haasayai ubba wode, siyanau kehiyaagaanne ufaissiyaagaa gidanau bessees” yaagidi xaafiis. PHauloosi yootidoy nuuni ‘ammanennaageetuura,’ giishin Kiristtaane ishata gidennaageetuura haasayana koshshiyo ogiyaa xeelliyaagaana. (Qolasiyaasa 4:5, 6) Nuuni ammanennaageeta bonchuwan haasayissana koshshikko, gubaaˈiyan deˈiya nu laggeta hegaappe aaruwan bonchuwan haasayissana koshshiyoogee qoncce!

18, 19. Kiristtaane laggee zoriyo zoriyaa nuuni waatidi xeellana koshshii? Efisoonan deˈida cimati nuussi ayba ogiyan leemiso gidiyoonaa?

¹⁸ Loˈˈo laggeti issoy issuwaa qofaa bonchoosona; yaatiyo gishshau, eti issoy issuwaara kehanne qoncce gidida hanotan haasayana koshshees. Erancha Kawuwaa Solomoni: “SHittoinne sawiya ixaani asaa ufaissiyoogaadan, siiqo laggiyaa zoreekka ufaissees” yaagidi xaafiis. (Leemiso 27:9) Laggee zoriyo ayba zoriyaanne neeni hegaadan xeellay? (Mazamure 141:5 nabbaba.) Neeni oottiyo issibay bana qofissiyoogaa ne laggee neessi yootikko, waanuutii? He zoriyaa kehatetta zoredan xeellayiyye, lanccay?

¹⁹ Kiitettida PHauloosi Efisoona gubaaˈiyaa cimatuura mata lagge gididi deˈiis. Etappe issoti issoti tumaa siyiyoode i eta erennan aggenna. Gidikkonne, wurssettan etaara shiiqido wode, bau siyettidabaa qoncce gidida hanotan zoriis. Etau aybi siyettidee? PHauloosa laggeti lanccibookkona. Hegaappe, i banttassi qoppiyoogaa nashshidosona; ubba a zaarettidi beˈana danddayennaagaa qoppidi yeekkidosona.—Oosuwaa 20:17, 29, 30, 36-38.

20. Siiqiya laggee ay oottii?

²⁰ Loˈˈo laggeti loˈˈo zoriyaa siyiyoogaa xalla gidennan etikka zoroosona. Nuuni “haratu allaalliyan kelttiyaa gelenna” wodee awudekko akeekana koshshees. (1 Tasalonqqe 4:11, NW) Qassi “nuuni huuphiyan huuphiyan nubaa Xoossau” yootanaagaakka akeekana bessees. (Roome 14:12) SHin Yihoowa maaraabaa siiqiya laggee koshshiyo wodiyan ba laggiyaa kehatettan akeekissees. (1 Qoronttoosa 7:39) Leemisuwau, gelabeenna woy ekkibeenna laggee ammanenna ura siiqiyoogaa akeekikko, neeni ay oottuutii? Intte laggetettay duuxxenna mala yayyada nena qofissiyaabaa yootennan agguutii? Woykko ne laggee ne zoriyaa siyennan ixxikko, ay oottuutii? Loˈˈo laggee moorobaa oottida laggiyaa maaddanau, siiquwan heemmiyaageeti maaddanaadan oychees. Hegaa oottanau xalatettaa koshshees. Gidikkokka, Yihoowa siiqiyoogee baaso gidido laggetettay duuxxenna.

21. Issi issitoo nuuni ubbay ay oottiyoo? SHin gubaaˈiyan mino laggetettaa naagidi deˈiyoogee keehippe koshshiyoy aybissee?

²¹Qolasiyaasa 3:13, 14 nabbaba. Issi issitoo nu laggeti nu ‘bolli hanqqettiyoobaa’ oottana danddayoos; qassi etikka nuna yiilloyiyaaba oottana woykko haasayana danddayoosona. Yaaqoobi: “Nuuni ubbaikka daroban baleettees” yaagidi xaafiis. (Yaaqooba 3:2) Gidoppe attin, laggetettay mino gidiyoogaa erissiyay nuuni issoy issuwaa naaqqiyo hanotaa gidennan, wozanappe atto giyo hanotaa. Issoy issuwaara wozanappe haasayiyoogaaninne wozanappe atto giyoogan mino laggetettaa medhiyoogee ay keena koshshiyaabee! Nuuni hegaa mala siiquwaa bessikko, hegee “ubbabaa issippe shiishshi qachchiya” siiqo gidees.

Woygada Zaaruutii?

• Loˈˈo laggetettaa medhana danddayiyoy ayba ogiyaanee?

• Laggetettaa aggana koshshiyoy awudee?

• Mino laggetettaa naagidi deˈanau nuuni ay oottana bessii?

[Oyshata]

[Sinttaa 25n deʼiya misiliyaa]

Urutinne Naaˈoomi laggetettay mino gidanaadan baaso gididabay aybee?

[Sinttaa 26n deʼiya misiliyaa]

Neeni ubbatoo imattaa mokkay?