So Asaa Goynuwaa Atotettau Keehi Koshshiyaabaa!

“UBBAAPPE Wolqqaama Xoossaa gita” gallassaa olay ayba yashshiyaagaa gidanaakko qoppa! (Ajjuutaa 16:14) Hananabaa yootiya Mikiyaasi qoncce leemisuwan: “Eessaa muqaaddai taman seeriyoogaadan, dereti . . . seerana; eti keraappe zanggaarau duge goggiya haattaadan goggana” yaagiis. (Mikiyaasa 1:4) Yihoowassi oottennaageeta ayba wolqqaama bashshay gakkanee? Xoossaa Qaalay: “He wodiyan GODAI woridoogeetu ahai, biittaa bollan ha gaxaappe hini gaxaa gakkanau laalettana” yaagees.—Ermmaasa 25:33.

Hegaa mala akeekissuwaa qoppiyo wode, bantta huuphessi qofaa qachana danddayiya naati deˈiyo, so asau huuphe gididaageeti (etappe dariya baggay yelidaageetuppe issuwaa xallay naata dichiyaageeta), ‘Ta naati Armmageedoonappe attana danddayiyoonaa?’ yaagidi banttana oychana koshshees. Geeshsha Maxaafay, eti banttappe koyettiyaagaa keenaa Yihoowaara mino dabbotaa medhidaageeta gidikko, attanaagee ammanttiyaaba gidiyoogaa yootees.—Maatiyoosa 24:21.

So Asaa Goynuwau Wodiyaa Keeriyoogee Keehippe Koshshiyaaba

Yelidaagaa gidiyoogaadan, ne naata “Godaa seeraaninne zoriyan” dichanau neeyyo danddayettidabaa ubbaa ootta. (Efisoona 6:4) Geeshsha Maxaafaa ne naatuura xannaˈiyoogee keehippe koshshiyaaba. Yihoowayyo bantta dosan azazettido gishshau PHauloosi galatido, Piliphisiyuusa Kiristtaanetu mala nu naati gidanaadan koyoos. I: “Ta dabbotoo, taani inttenaara de7iyo wode ubban intte tau azazettidoogaadan, ha77i taani intte matan de7enna wodekka, intte kaseegaappe aattidi tau azazettanau bessees; yashshatettaaninne kokkorssan intte atotettaa polanau oottite” yaagidi xaafiis.—Piliphphisiyuusa 2:12.

Ne naati neeni baynnasan Yihoowa higgiyaa azazettiyoonaa? Timirtte keettan shin? Neeni baynnasan Yihoowa higgiyaa kaallanaadan, he higgeti aadhida eratettay deˈiyoogeeta gidiyoogaa ne naati ammananaadan waatada maaddana danddayay?

Hegaa xeelliyaagan ne naˈaa ammanuwaa minttanau so asaa goynoy keehippe maaddana danddayees. Hegaa gishshau, so asaa Geeshsha Maxaafaa xinaatiyaa murutissanau maaddiya heezzu waannabata ane tobboos.

So Asaara Geeshsha Maxaafaa Ubbatoo Xannaˈite

Geeshsha Maxaafay xaafettido koyro doonan, Iyyooba 1:6n “issi gallassi” geetettidi birshshettida qaalay Xoossaa naata gidida kiitanchati keerettida wodiyan a sinttan shiiqiyoogaa bessees. Ne naatuurakka hegaadan ootta. Ne So Asaa Goynuwaa omarssau gallassaanne saatiyaa keera; qassi hegaa ubbatoo naaga. Hegaa bollikka, qoppibeennabay gakkiyo wodessi hara wodiyaa keera.

Aqa peˈada, So Asaa Geeshsha Maxaafaa xinaatiyaa issi issitoo xannaˈana danddayettees gaada qoppoppa. Ne naati neeni xannaˈissiyo hara xinaatetuppe aadhiyoogaa hassaya. Gidikkonne, Seexaanay eta ba piriyan oyqqana koyees. (1 PHeexiroosa 5:8) Neeni So Asaa Goynuwaa omarssan xinaatiyaa aggada televizhiiniyaa beˈiya woy hara pattennabaa oottiyaaba gidikko, Seexaanay xooniis giyoogaa.—Efisoona 5:15, 16; 6:12; Piliphphisiyuusa 1:10.

Galla Galla Deˈuwan Goˈettana Danddayiyoobaa Xannaˈite

So Asaa Goynuwaa omarssay tuma gididabaa eriyoogaappe aadhiyaaba gidana  koshshees. He wodiyan galla galla deˈuwan goˈˈiyaabaa xannaˈanau baaxetite. Waatidi? Issi issitoo, intte naata mata wode gakkanabaara gayttida huuphe yohuwaa doorite. Leemisuwau, haggaazuwau meezetiyoogaakka ayssi gujjekketii? Yelagati danddayiyoobaa oottiyoode ufayttoosona. Asaa woygi haasayissanaakko meezetiyoogeenne hasayissiyo asay eqettiyoode waatanaakko qoppiyoogee, eti dumma dumma ogetun Kawotettaabaa sabbakiyo wode banttanan ammanettanaadan maaddees.—2 Ximootiyoosa 2:15.

Ne naati laggiyaa sugettaa xoonanaadan maaddiya, meezetiyo prograamiyaa giigissana danddayaasa. Ne naˈay woy naˈiyaa ufayttiyo zaaruwaa giigettidi shaahettiyo injjee deˈanaadan oottiya, tobbiyo prograamiyaa giigissa. Hegee, ayba paacee gakkiyaakko, awaani gakkiyaakko, xoonettiyaaba gidikko aybi gakkanaakko, xooni kiyiyaaba gidikko ay demmanaakko ne naˈaa oychiyoogaa gujjana danddayees. Wodiyaappe wodiyan, paacee gakkiyo wode zaariyoobaa ayssi meezetekketii?

So asaa goynoy yelidaageeti ayyaanaabaa hoolliyaa kessiyoogee goˈˈiyoogaa mintti yootiyo injje gidees. Hegaa xeelliyaagan, nu maxeetiyan kiyiya, ammanettidaageetu deˈuwaabaa yootiya taarikee, deˈuwan Yihoowayyo oottiyoogaa kaseyiyoogee aybippenne aadhiyaaba gidiyoogaa ne naˈay akeekanaadan maaddanau keehippe goˈˈiyaaba.

Bantta naatussi loˈˈobaa qoppiya issi issi yelidaageeti bantta naati sinttappe waanana mala koyiyaakko keehippe qoppidi, haˈˈi eti oottiyoobaa xaasayidi xeelliyoogee bala gidiyoogaa nuuni akeekana koshshees. Beeteelen oottiyoogaanne misoonaawe gidiyoogaa mala loˈˈo hoolliyaa kessanaadan ne naata minttettiyoogee loˈˈoba gidiyoogee qoncce. Gidikkonne, hegaadan oottiyo wode neeni appe naagiyooban ne naˈaa yiilloyennaadaaninne a woy o azzanttennaadan naagetta. (Qolasiyaasa 3:21) Ne naˈay woy ne naˈiya neeni koyido gishshau gidennan, banttau koyidi Yihoowa wozanappe siiqana bessiyoogaa ubbatoo hassaya. (Maatiyoosa 22:37) Yaatiyo gishshau, ne naˈi oottiyo loˈˈobau galatiyo injjiyaa koya; i woy a oottibeennaban ne qofaa wottennaadan naagetta. Yihooway oottido ubbabaa nashshanaadan minttetta. Yaatada ne naˈay Yihoowa kehatettaa wozanappe nashshiyoogaa bessanaadan ootta.

So Asaa Xinaatee Ufayssiyaagaa Gidanaadan Ootta

So Asaa Goynuwaa omarssay muruta gidanaadan keehippe koshshiya heezzanttobay, ufayssiyaagaa gidanaadan oottiyoogaa. Hegaadan waatada oottana danddayay? Issi issitoo diraamaa kaasetiyaa ezgganau woykko Yihoowa Markkati giigissido viiduwaa beˈidi tobbana danddayeeta. Woykko Geeshsha Maxaafaappe issi kifiliyaa son deˈiya ubbay shaahettidi nabbabana danddayeeta.

So asay issippe tobbanau keehippe maaddiya huphe yohoti Wochiyo Keelaaninne Beegottite! maxeetiyan deˈoosona. Leemisuwau, Beegottite! maxeetiyan ubban, sinttaa 31n deˈiya, “Woyga Zaaruutii?” yaagiya huphe yohuwaa goˈettana danddayaasa. Asau immiyo Wochiyo  Keelaa maxeetiyan naaˈˈu aginaappe issitoo kiyiya, “Yelaga Naatuyyo” xinaatiyau maaddiya huuphe yohoy dees. Ha huuphe yohoy yelaga naatussi giigiya, “Intte Naata Tamaarissite” giya huuphe yohuwaara kayan kayan kiyees.  

Beegottite! maxeetiyan kiyiya “Yelagati Oychiyo Oyshaa” giya huuphe yohoy panttatettau gakkida naati deˈiyo yelidaageetuyyo keehippe maaddiyaaba. Hegaa bollikka, “Qoppana Bessiyaabata” giya saaxiniyaa xaasaya xeelloppa. He saaxiniyaa so asay tobbanau goˈettana danddayees.

Gidikkokka, so asaa xinaatiyaa wode oyshan melissennaadan naagetta. Leemisuwau, yelidaageeti bantta naati so asay xannaˈiyoobaanne hegaa bantta deˈuwan goˈettiyo ogiyaa xeelliyaagan banttau siyettiyaabaa xaafi oyqqanaadan minttettana mala odettiis. Gidoppe attin, ne naˈi ba xaafidobaa sissidi nabbabanaadan wolqqanttoppa. Yaatikko, ne naˈay bau siyettiyaaba ubbabaa xaafennan aggana danddayees. Ne naˈay baassi giidi xaafido, odanau koyennabaa oychoppa.

Neeni ne soo asaa xinaatee goˈˈiyaagaanne ufayssiyaagaa gidanaadaaninne ubbatoo xannaˈanaadan oottiyaaba gidikko, Yihooway ne baaxiyaa keehippe anjjana. So asaayyo dumma wode gidida he omarssay ne siiqiyoogeeti Yihoowaara dabbotaa minttanaadan maaddana danddayees.

[Sinttaa 31n deʼiya saaxiniyaa]

Ooratta Hiillaa Goˈettite

“Nu yelaga macca naatuura xannaˈiyo wode, gubaaˈiyau giigettiyo xuufiyaa taaninne ta azinay tobboos; yaatidi nu naati qofaa qanttan qonccissiya misiliyaa giigissanaadan oottoos. Issi issitoo Geeshsha Maxaafaa taarikiyaa milatissidi oottoos, woykko haggaazuwan asaa waatidi haasayissanaakko meezetoos. Xinaatee eta hanotau bessiyaagaa, ufayssiyaagaa, minttettiyaagaanne miichiyaagaa gidanaadan oottoos.”—J.M., Amarkkaa.

“Tanaara Geeshsha Maxaafaa xannaˈiyaari naˈay beni wode xaatta maxaafaa goˈettiyoogee ay malakko akeekanaadan maaddanau, Isiyaasa maxaafaa shemppuwaanne payduwaa xayssidi attamida. Woraqataa issuwaa issuwaara gattidi naaˈˈu gaxaa maqa malabaara gattidi oyttida. Hegaappe simmin, naˈay Yesuusi Naazireeten Ayhuda woosa keettan oottidoogaadan oottanau baaxetiis. Yesuusi Isiyaasa ‘maxaafaa dooyidi’ ba koyido sohuwaa ‘demmidoogaa’ Luqaasa 4:16-21n deˈiya taarikee yootees. (Isiyaasa 61:1, 2) Gidikkokka, naˈay hegaadan oottanau malido wode, shemppoynne paydoy baynna he adussa xaatta maxaafaa goˈettidi Isiyaasa 61 kessanau metootiis. Yesuusi xaatta maxaafaa goˈettido hiillan garamettidi, naˈay: ‘Yesuusaara laggetiyay baawa!’” yaagiis.—Y.T., Jaappaane.

[Sinttaa 30n deʼiya misiliyaa]

Ne naati laggiyaa sugettaa xoonanaadan, meezetiyo prograamee maaddana danddayees

[Sinttaa 31n deʼiya misiliyaa]

So Asaa Goynuwaa omarssay ufayssiyaagaa gidanaadan baaxeta