Bala Timirttiyaa 2: Iita Asati Siˈooliyan Xuugettoosona

Ha bala timirttiyau denddoy aybee? “Beni wode Giriike palasppatu ubbaappe aaruwan Siˈooliyaa xeelliyaagan woga ammanuwaa minttidaagee Pilaata.”—Histoire des enfers (Siˈooliyaa Taarikiyaa) ZHorzh Menuway xaafidoogaa, sinttaa 50.

“Giriike palasppatu timirttiyaa amaridaagaa tamaarida Kiristtaaneti 2ntta xeetu laytta M.L. baggaappe doommidi, bantta ammanuwaa he palasppatu qofaadan qonccissana koshshiyaabadan qoppidosona. . . . Etau keehippe injjetida timirttee Pilaato timirttiyaa.”—Ze Niwu Inssaykilopidiya Biritanika (1988), Vooliyum 25, sinttaa 890.

“Woosa keettay tamaarissiyoobay siˈoolee merinau deˈiyoogaa qonccissees. Nagaranchati hayqqosaara eta shemppoy ‘merinaa taman’ qaxxayettanau siˈooliyaa wodhees. Siˈooliyaa qixaatiyan waannay Xoossaappe merinau shaahettiyoogaa.”—Katekiizim of ze Kaatolik CHerch, 1994n attamettidaagaa, sinttaa 270.

Geeshsha Maxaafay woygii? “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona. . . . Neeni baanasan duufuwan woy siˈooliyan oosoi, woikko halchchoi, woikko eri, woikko aadhdhida eratetti baawa.”—Eranchchaa 9:5, 10.

“Hayqqidaageeti deˈiyoosaa” malaatiya SHiˈol giya Ibraawetto qaalay, issi issi Geeshsha Maxaafaa birshshettatun “siˈooliyaa” geetettidi birshshettiis. Qommoora deˈiya xiqisee hayqqidaageetu hanotaa ay qonccissii? Eti oottido nagaraa gishshau Siˈooliyan qaxxayettiyoonaa? Eti ‘aybanne erenna’ gishshau qaxxayettokkona. Ba soo asau huuphe gidida Iyyoobi wolqqaama harggiyaa harggidi: ‘Tana duufo [Ibraawettuwan, SHiˈol] giddon gentta’ giidi Xoossaa woossidoy hegaassa. (Iyyooba 14:13) Siˈoolee merinaa tamay deˈiyoosaa gidikko, a woosau ayba goˈˈi deˈii? Siˈoolee oottiyoobi baynnasaa, asaa naatu ubbaa duufuwaa gidiyoogaa Geeshsha Maxaafay qonccissees.

Siˈooliyaa hagaadan qonccissiyoogee tumanne Geeshsha Maxaafaara moggiyaaba gidennee? Gidoppe attin, siiqo Xoossay issi uraa hegaa keeni merinau qaxxayanay ayba wolqqaama nagara oottiinee? (1 Yohaannisa 4:8) SHin siˈooliyaa tamay bala timirtte gidikko, saluwaa biyoogaabaa woygana danddayettii?

Kaallidi deˈiya Geeshsha Maxaafaa xiqiseta beˈa: Mazamure 146:3, 4; Oosuwaa 2:25-27; Roome 6:7, 23

TUMAA:

Xoossay asaa siˈooliyan qaxxayenna

[Sinttaa 5n deˈiya Misilee Ekettidosaa]

Barrators—Giampolo/The Doré Illustrations For Dante’s Divine Comedy/Dover Publications Inc.