Kiristtaane Gubaaˈiyan Neeyyo Deˈiya Sohuwaa Xoqqu Oottada Xeella

“Xoossai ba koyidoogaadan, bollaa qommota issuwaa issuwaa bollan wottiis.”—1 QORONTTOOSA 12:18.

1, 2. (a) Gubaaˈiyan deˈiya ubbay huuphiyan huuphiyan nashshiyo sohoy deˈana danddayiyoogaa nuna akeekissiyay aybee? (b) Ha huuphe yohuwan pilggana oyshati awugeetee?

BENI Israaˈeeletu wodeppe doommidi, gubaaˈee Yihooway ba asaassi koshshiyaabaa kunttanaunne eta kaalettanau goˈettiyo oge gididi takkiis. Leemisuwau, Israaˈeeleti Aaya katamaa olan xooni simmin, “Higgiyaa Maxaafan xaafidoogaadan, Yaasu higgiyaa qaalaa ubbaa, anjjuwaakka qanggettaakka . . . kumetta Israa7eela yaa7aassi . . . nabbabiis.”—Yaasa 8:34, 35.

² Koyro xeetu laytta M.Ln, kiitettida PHauloosi Kiristtaane cimaa Ximootiyoosassi, Kiristtaane gubaaˈee ‘Xoossaa keettanne’ “tumatettau tuussanne tuuqe” gidiyoogaa yootiis. (1 Ximootiyoosa 3:15) Xoossaa ‘keettay’ ha wodiyan saˈaa yuushuwan deˈiya tumu Kiristtaanetu ishatetta maabaraa. PHauloosi Qoronttoosa gubaaˈiyau ayyaanaa kaaletuwan xaafido koyro dabddaabbiyan, shemppo 12n, gubaaˈiyaa issi asa bollan leemisiis. Bollaa qommotu oosoy dumma dumma gidikkonne, ubbaykka koshshiyaaba gidiyoogaa i yootiis. PHauloosi, “Xoossai ba koyidoogaadan, bollaa qommota issuwaa issuwaa bollan wottiis” yaagidi xaafiis. I ubba, “bollaa qommotuppe bonchchettennabaa nuussi milatiyaageeta nuuni daro bonchcheettees” yaagiis. (1 Qoronttoosa 12:18, 23) Yaatiyo gishshau, issi Kiristtaanee Xoossaa keettan oottiyoobay hara ammanettida Kiristtaaniyaagaappe aadhiyaaba woy guuxxiyaaba giyoogaa gidenna. Issuwaagee haraagaappe dumma. Yaatin, nuuni Xoossaa giigissuwan nuuyyo deˈiya sohuwaa waatidi nashshana woykko xoqqu ootti xeellana danddayiyoo? Kiristtaane gubaaˈiyan nuuyyo deˈiya sohoy dummatanaadan oottiyaabati aybee? ‘Asa ubbau nu dichay qonccanaadan’ waati oottana danddayiyoo?—1 Ximootiyoosa 4:15.

Nuuyyo Deˈiya Sohuwaa Nashshiyoogaa—Waatidi?

3. Gubaaˈiyan nuuyyo deˈiya sohuwaa akeekiyoonne hegaa nashshiyoogaa bessiyo issi ogee aybee?

³ Kiristtaane gubaaˈiyan nuuyyo deˈiya sohuwaa akeekiyoonne hegaa nashshiyoogaa bessiyo issi ogee, ‘ammanettida wozannaama ashkkaraaranne’ a kalˈˈatiya Bollaara Heemmiyaagaara wozanappe hashetiyoogaa. (Maatiyoosa 24:45-47 nabbaba.) Ammanettida wozannaama ashkkaray immiyo kaaletuwaa loytti kaalliyaakkonne nu hanotaa akeekana koshshees. Leemisuwau, maayiyoobaanne alleeqettiyoobaa, wodiyaa aattiyoobaanne Intternneetiyaa bessenna ogiyan goˈettiyoogaa xeelliyaagan daro layttau zoree imettiis. Nuuni ayyaanaaban naagettanau ha loˈˈo zoriyaa akeekan siyiyoo? So asaa goynuwau aggennan shiiqanaadan imettida zoriyaa shin? He zoriyaa wozanan wottidi hegau issi omarssaa bazzidetii? Nuuni ekkibeenna woy gelibeennaba gidikko,  Geeshsha Maxaafaa buzo xannaˈanau prograamiyaa kessidoo? Ammanettida wozannaama ashkkaraa kaaletuwaa kaalliyaaba gidikko, Yihooway nuna huuphe xekkaaninne so asa xekkan anjjana.

4. Buzo allaalle giyooban nuuni kuuyiyo wode qoppana koshshiyoy aybee?

⁴ Issoti issoti wodiyaa aattiyoobay, maayiyoobaynne alleeqettiyoobay buzo allaalle gaana danddayoosona. Gidikkokka, gubaaˈiyan bau deˈiya sohuwaa nashshiya, ba huuphiyaa geppida Kiristtaanee kuushsha kuuyiyo wode ba dooro xallan kuuyana koshshenna. Yihoowa Qaalan, Geeshsha Maxaafan qonccida A xeelaa loytti akeekana bessees. Geeshsha Maxaafan deˈiya qofay ‘nu gediyaassi xomppe, nu ogiyaassikka pooˈo’ gidana koshshees. (Mazamure 119:105) Nuuni buzo allaalle gididaban kuuyiyoobay nu haggaazuwaa, gubaaˈiyan deˈiya asatanne hara asata bochana danddayiyoogaa qoppiyoogeekka eratetta.—2 Qoronttoosa 6:3, 4 nabbaba.

5. Nu huuphiyan ammanettiyo koshshay deˈennaadan naagettana koshshiyoy aybissee?

⁵ “Xoossaayyo azazettenna asaa ha77i haariya” ayyaanay carkkodan ubbasaa gakkidaba. (Efisoona 2:2) He ayyaanay nuussi Yihoowa dirijjitiyaa kaaletoy koshshenna giidi qoppanaadan oottana danddayees. Nuuni, ‘kiitettida Yohaannisi giyoogaa ekkenna’ Diyotirefeesa mala gidana koyennaagee qoncce. (3 Yohaannisa 9, 10) Nu huuphiyan ammanettiyo koshshay deˈennaadan naagettana koshshees. Yihooway ha wodiyan ba kiitaa yootanau goˈettiyo ogiyaa nuuni bonchennaagaa haasayan woykko oosuwan mule qonccissana bessenna. (Qoodaabaa 16:1-3) Hegaadan oottiyoogaappe, nuuni ammanettida wozannaama ashkkaraara hashetiyo maataa nashshana koshshees. Nu gubaaˈiyan sintta xeera gididi oottiyaageetuyyo azazettanaunne haarettanau baaxetana koshshennee?—Ibraawe 13:7, 17 nabbaba.

6. Nu hanotaa akeekana koshshiyoy aybissee?

⁶ Gubaaˈiyan nuuyyo deˈiya sohuwaa nashshiyoogaa bessiyo hara ogee, nu hanotaa loytti akeekidi ‘nu haggaazuwaa sabbanaunne’ Yihoowa bonchissanau nuuyyo danddayettida ubbaa oottiyoogaa. (Roome 11:13) Issoti issoti kumetta wodiyaa aqinye gididosona. Harati qassi misoonaawe, woradaanne awuraajjaa bollaara geeddiyaageetanne alame yuushuwan deˈiya Beeteele keettaa asa gididi oottoosona. Daro ishatinne michoti Kawotettaa Addaraashshaa keexxiyo oosuwan maaddoosona. Yihoowa asaappe dariya baggay ba keettaa asau ayyaanaaban koshshiyaabaa kunttanaunne saaminttan saaminttan haggaazuwan shaahettanau minnidi oottees. (Qolasiyaasa 3:23, 24 nabbaba.) Xoossaa oosuwaa oottanau wozanappe koyiyaabanne nuuyyo danddayettida ubban kumetta shemppuwaappe ayyo oottiyaaba gidikko, ubba wode a giigissuwan nuuyyo sohoy deˈiyoogaa ammanettana danddayoos.

Gubaaˈiyan Nuuyyo Deˈiya Sohuwan Dummatettaa Medhiyaabata

7. Gubaaˈiyan nuuyyo deˈiya sohuwaa nu hanotay waatidi bochana danddayiyaakko qonccissa.

⁷ Nuuni nu hanotaa akeekiyoogee koshshiyaabaa; aybissi giikko, nuuni gubaaˈiyan oottana danddiyoobaa amarida ogiyan bochiyo gishshataassa. Leemisuwau, gubaaˈiyan ishatuyyo deˈiya sohoy issi issiban michotuugaappe dummatees. Layttay, payyatettaynne harabaykka nuuni Yihoowayyo oottiyo oosuwan dummatettay deˈanaadan oottees. Leemiso 20:29y: “Yelagatu bonchchoi eta wolqqaa; cimatuyyookka eta puulunttai etau bonchcho” yaagees. Gubaaˈiyan deˈiya yelagati wolqqa koshshiya daro oosuwaa oottana danddayoosona; shin  gasttati aadhida eratettaaninne deˈuwan demmidoban gubaaˈiyaa keehippe maaddoosona. Yihoowa dirijjitiyan oottana danddayiyo ubbabay Xoossaa aaro kehatettan oottiyooba gidiyoogaakka hassayana koshshees.—Oosuwaa 14:26; Roome 12:6-8.

8. Nuuni gubaaˈiyan oottiyoobaa likkiyaa nu koshshay waati bochii?

⁸ Michontta gidida naaˈˈu yelagatu leemisoy Kiristtaane gubaaˈiyan nuuyyo deˈiya sohuwaa bochiya harabaa qonccissees. Naaˈˈaykka naaˈˈantto xekka timirttiyaa wurssidosona. Eta hanotay issi mala. Eti timirttiyaa wurssidi kumetta wodiyaa haggaaziya aqinye gidanaadan minttettiyoogan, yelidaageeti banttau danddayettiyaabaa oottidosona. Timirttiyaa wurssa simmada, issinniyaa kumetta wode aqinye gidaasu; hankkoriyaa kumetta gallassaa oottiyo oosuwaa oyqqaasu. Eti dumma dummabaa dooridoy aybissee? Eta koshshay dumma dumma gidiyo gishshataassa. Wurssettan, naaˈˈaykka bantta dosiyoobaa dooridosona. Nu giddoppe darotu hanotay hegaa mala gidennee? Xoossaa oosuwan nuuni ay oottana koyiyaakko loytti qoppana koshshees. Nu hanotaa giigissana koshshiyaaba gidikkokka, Xoossaa oosuwaa kaseegaappe gujjidi oottana danddayiyoo?—2 Qoronttoosa 9:7.

9, 10. Nuuni Yihoowa oosuwaa kaseegaappe gujjidi oottanau qoppennaba gidikko, ay oottana koshshii?

⁹ Yihoowa oosuwaa kaseegaappe gujjidi oottanau nuuni qoppennabanne gubaaˈiyau oottiyo amaridabay gidees giidi qoppiyaaba gidikkoshin? PHauloosi Piliphisiyuusa gubaaˈiyau xaafido dabddaabbiyan: “Xoossai inttena bau eeno giissanaadaaninne qassi i qoppidobaa intte oottanaadan intte giddon ubba wode oottees” yaagiis. Ee, Yihooway nu giddon woykko nu garssan oottanaunne nu koshshaa laammanau danddayees.—Piliphphisiyuusa 2:13; 4:13.

¹⁰ Yaatiyo gishshau, nuuni a sheniyaa oottanau koyanaadan Yihoowa oychana koshshennee? Beni Israaˈeele Kawuwaa Daawiti hegaadan oottiis. I: “Abeet GODAU, tana ne ogiyaa bessa; ne ogiyaa tana tamaarissa. Neeni tana ashshiya Xoossaa gidiyo gishshau, ne tumatettan tana kaalettanne tamaarissa. Gallassa kumettan taani nenan ufaissaa oottais” yaagidi woossiis. (Mazamure 25:4, 5) Nuunikka Yihoowa ufayssiyaabaa oottanau koyanaadan woossiyoogan hegaadan oottana danddayoos. Nuuni etassi oottiyooban Xoossaa Yihoowaunne a Naˈau aybi siyettiyaakko wotti denttidi qoppiyo wode, eta wozanappe nashshoos. (Maatiyoosa 26:6-10; Luqaasa 21:1-4) Hegaadan nashshiyoogee nuuni ayyaanaaban diccanau koyana mala Yihoowa woossanaadan denttettana danddayees. Nuuyyo deˈana koshshiya xeelaa bessiyoogan hananabaa yootiya Isiyaasi loˈˈo leemiso gidees. Yihooway: “Oona kiittoo? Nuuyyo oonee baanai?” yaagiyoogaa Isiyaasi siyidi: “Hekko, tana kiitta” yaagiis.—Isiyaasa 6:8.

 Dichaa Bessiyoogaa —Ayba Ogiyan

11. (a) Ishati Yihoowa dirijjitiyan aawatetta maataa demmanau baaxetiyoogaa koshshidoy aybissee? (b) Issi ishay Kiristtaane gubaaˈiyan maataa demmanau waani baaxetana danddayii?

¹¹ Saˈa yuushuwan, haggaazo laytta 2008n, 289,678 asay xammaqettiis; hegee sintta xeera gididi kaalettiya ishati keehi koshshiyoogaa bessees. Issi ishay hegau waatidi zaaro immana koshshii? Geeshsha Maxaafay yootiyo, gubaaˈiyau oottiyaageetuppenne cimatuppe koyettiya gidaa kunttanau baaxetiyoogaana. (1 Ximootiyoosa 3:1-10, 12, 13; Tiitu 1:5-9) Issi ishay Geeshsha Maxaafay yootiyo he gidaa kunttanau waani baaxetana danddayii? Haggaazuwan, qassi gubaaˈiyan oottanaadan imettida oosuwaa minnidi oottiyoogan, Kiristtaane shiiqotun immiyo qofaa kaseegaappe murutissiyoogaaninne ba mala Kiristtaanetuyyo qoppiyoogan hegaa bessana danddayees. I hegaadan oottiyoogan, Kiristtaane gubaaˈiyan bau deˈiya sohuwaa xoqqu ootti xeelliyoogaa bessees.

12. Yelagati tumau mishettiyoogaa waati bessana danddayiyoonaa?

¹² Yelaga ishati, ubba qassi panttatettaa wodiyan deˈiyaageeti gubaaˈiyan dichaa bessanau ay oottana danddayiyoonaa? Eti Geeshsha Maxaafaa eraa demmiyoogan, ‘Xoossaa ayyaanay immiyo aadhida eratettaaninne akeekan’ diccanau baaxetana danddayoosona. (Qolasiyaasa 1:9) Xoossaa Qaalaa minnidi xannaˈiyoogeenne gubaaˈiyaa shiiqotun wozanappe shaahettiyoogee hegau maaddiyoogee qoncce. Yelagati dumma dumma qommo gidida kumetta wode haggaazuwan oottiyo ‘oosoy kumido aaho penggiyaara’ gelanaassi gidaa kunttanau baaxetana danddayoosona. (1 Qoronttoosa 16:9) Nu deˈuwan Yihoowa oosuwaa oottiyoogee keehippe ufayssiyaanne daro anjjo demmiyo deˈo oge.—Eranchchaa 12:1 nabbaba.

13, 14. Gubaaˈiyan banttau deˈiya sohuwaa nashshiyoogaa michoti ayba ogiyan bessana danddayiyoonaa?

¹³ Michotikka Mazamure 68:11 polettanaadan oottiyo maataa xoqqu oottidi xeelliyoogaa bessana danddayoosona. He xiqisee: “Godai kiitaa kiittiis; he kiitaa efiida maccaasati daro” yaagees. Michoti gubaaˈiyan banttau deˈiya sohuwaa nashshiyoogaa bessana danddayiyo ogetuppe erettida issi ogee, erissiyo ashkkarata oottiyo oosuwan shaahettiyoogaa. (Maatiyoosa 28:19, 20) Yaatiyo gishshau, michoti haggaazuwan kumetta hanotan shaahettiyoogaaninne he oosuwau bantta goˈˈaa yarshshiyoogan, gubaaˈiyan banttau deˈiya sohuwaa nashshiyoogaa bessoosona.

 ¹⁴ PHauloosi Tiituyyo hagaadan giidi xaafiis: “Cima maccaasai geeshsha de7o de7iya maccaasatudan haniyaagaa, . . . lo77obaa tamaarissiyaagaa gidanau bessees. Eti Xoossaa qaalai borettenna mala, bantta keettaawatanne bantta naata siiqiyaageeta, banttanakka naagiyaageeta, geeshshata, bantta keettan oottiyaageeta, kehatanne bantta keettaawatussikka azazettiyaageeta gidana mala, yelaga maccaasaa tamaarissona.” (Tiitu 2:3-5) Gastta michoti gubaaˈiyaa keehippe goˈˈana danddayoosona! Gubaaˈiyan sintta xeera gididi oottiya ishata bonchiyoogaaninne maayiyoobaa, alleeqettiyoobaanne wodiyaa aattiyoobaa milatiyaabata xeelliyaagan eratetta kuushshaa kuuyiyoogan, eti haratuyyo loˈˈo leemiso gidoosonanne gubaaˈiyan banttau deˈiya sohuwaa xoqqu oottidi xeelliyoogaa bessoosona.

15. Baddotettay siyettiyo gelabeenna issi michiyaa hegaa waata xoona kiyana danddayay?

¹⁵ Gelabeenna michiyaa gubaaˈiyan bau deˈiya sohuwaa akeekanau issi issitoo metootana danddayausu. Hegaadan siyettido issi michiyaa: “Gelennan deˈiyoogee, issi issitoo baddotettay siyettanaadan oottana danddayees” yaagaasu. A he hanotaa waata xoona kiyidaakko odaydda: “Woossiyoogeenne xannaˈiyoogee taani ta sohuwaa akeekanaadan maaddiis. Yihooway tana waatidi xeelliyaakko xannaˈaas. Yaatada gubaaˈiyan deˈiya harata maaddanau baaxetaas. Hegee taani tabaa xallaa qoppiyoogaa agganaadan maaddiis” yaagaasu. Mazamure 32:8y yootiyoogaadan, Yihooway Daawitayyo: “Taani nena zorananne naagana” yaagiis. Ee, Yihooway gelibeenna michota gujjin, ba ashkkara ubbatuyyo qoppees; qassi eti ubbay gubaaˈiyan banttau deˈiya sohuwaa akeekanaadan maaddees.

Ne Sohuwaa Naaga!

16, 17. (a) Ba dirijjitiyaa yame gidanaadan Yihooway shoobbido shoobiyaa ekkiyoogee, nuuni kuuyido kuushsha ubbaappe aadhiyaaba gididoy aybissee? (b) Yihoowa dirijjitiyan nuuni nu sohuwaa waatidi naagana danddayiyoo?

¹⁶ Yihooway ba ashkkarata ubbaa banaara dabbotanaadan siiquwan baakko ehees. Yesuusi: “Ta Aawai taakko ehiido asappe attin, taakko yaanau danddayiya asi baawa” yaagiis. (Yohaannisa 6:44) Saˈan deˈiya, biilooniyan qoodettiya asa ubbaappe Yihooway ha wodiyan nuna ba soo shoobbiis. Nuuni kuuyido hara ubbabaappe he shoobiyaa ekkidoogee aadhiyaaba. He shoobiyaa ekkidoogee nu deˈuwau halchoy deˈanaadan oottiis. Kiristtaane gubaaˈiyan nuuyyo sohoy deˈiyo gishshau, keehippe ufayttoos!

¹⁷ Mazamuraawee: “Abeet GODAU, neeni de7iyo keettaa . . . taani dosais” yaagiis. I: “Ta tohoi lo77o sohuwan eqqiis; taani kunttida yaa7an GODAA galatana” yaagidikka yexxiis. (Mazamure 26:8, 12) Tumu Xoossay nu ubbau ba dirijjitiyan sohoy deˈanaadan oottiis. Xoossaa kaaletuwaa ubbatoo kaalliyoogaaninne Xoossaa oosoy daridoogeeta gidiyoogan, Yihoowa giigissuwan nuuyyo deˈiya alˈˈo sohuwaa naagana danddayoos.

Hassayay?

• Ubba Kiristtaanetuyyo gubaaˈiyan sohoy deˈees giyoogee bessiyaaba gididoy aybissee?

• Xoossaa dirijjitiyan nuuyyo deˈiya sohuwaa nashshiyoogaa waati bessiyoo?

• Nuuyyo gubaaˈiyan deˈiya sohuwan dummatettaa medhiyaabati aybee?

• Yelaga Kiristtaanetinne gasttati Xoossaa giigissuwan banttau deˈiya sohuwaa nashshiyoogaa waatidi bessana danddayiyoonaa?

[Oyshata]

[Sinttaa 22n deʼiya misiliyaa]

Ishati Kiristtaane gubaaˈiyan maataa demmanau ayba ogiyan baaxetana danddayiyoonaa?

[Sinttaa 23n deʼiya misiliyaa]

Michoti gubaaˈiyan banttau deˈiya sohuwaa nashshiyoogaa waatidi bessana danddayiyoonaa?