Xoossau Oottiyaageeta Gidiyoogaadan Loˈˈo Eeshshaa Bessiyoogaa

‘Xoossaa milatite.’—EFISOONA 5:1.

1, 2. (a) Loˈˈo eeshshay keehi koshshiyoy aybissee? (b) Ha huuphe yohuwan ay tobbanee?

LOˈˈO eeshshaa xeelliyaagan, Su Foks giyo xaafiyaa: “Nuuni ubbatoo loˈˈo eeshshaa bessana koshshees. Ubbasaaninne ubba wode pashkkiyaageeta gidana koshshees” yaagada xaafaasu. Asay pashkkiyoogaa meeze oottiyo wode, haratuura daro ooshshay merettennaadan, ubba qassi darotoo mule ooyettennaadan oottees. Hegaadan oottana xayikko, hegaappe dummabay hanees. Haratuyyo loˈˈo gidenna eeshshaa bessiyoogee, ooyettanaadan, lanccanaadaaninne azzananaadan oottees.

² Tumu Kiristtaane gubaaˈee xaaxi waaxi xeelliyo wode loˈˈo eeshshay kumidoogaa. Gidikkonne, ha wodiyan alamiyan kumida iita eeshshaa kaallennaadan naagettana koshshees. Pashkkatettaa xeelliyaagan Geeshsha Maxaafaa baaso siraataa oosuwan peeshshiyoogee, iita eeshshaappe nuuni naagettanaadaaninne asay tumu goynuwaa goynnanaadan waati maaddiyaakko ane beˈoos. Loˈˈo eeshshaa bessiyoogee ay gujjiyaakko akeekanau, Xoossaa Yihoowanne a Naˈaa leemisuwaa qoppa.

Yihoowaynne A Naˈay Loˈˈo Eeshshau Leemiso

3. Xoossaa Yihooway loˈˈo eeshshaa bessiyoogan leemiso gidiyaabaa ay oottidee?

³ Xoossaa Yihooway loˈˈo eeshshaa bessiyoogan polo leemiso. I Ubbabaa Haariyo xoqqa maatay  deˈiyoogaa gidikkonne, asaa naatuyyo gita kehatettaanne bonchuwaa bessees. Geeshsha Maxaafay koyro xaafettido doonan, Yihooway Abrahaamanne Muusa haasayissido wode, azaziyoogaa ashkketetta oyshau laammiya Ibraysxxe qaalaa goˈettiis. (Doomettaabaa 13:14; Kessaabaa 4:6) A ashkkarati moorobaa oottiyo wode, Yihooway “qarettiyanne maariya Xoossaa; hanqqettanau gam77iyaagaa; aggenna siiqoinne ammanettiyoobai dariyoogaa.” (Mazamure 86:15) Eti qoppidoogaadan harati hanennan ixxiyo wode yiillotiya asaa naatuppe i keehi dumma.

4. Harati nuna haasayissiyo wode Yihoowa leemisuwaa waatidi kaallana danddayiyoo?

⁴ Xoossaa loˈˈo eeshshay asaa naati giyoobaa i siyiyo ogiyankka qoncciis. Sadooma asaara gayttidaagan Abrahaami oychido wode, Yihooway a oyshaa ubbaa salettennan zaariis. (Doomettaabaa 18:23-32) Yihooway Abrahaama qofissidabau zaaro immiyoogaa Ba wodiyaa wurssiyaabadan xeellibeenna. Yihooway ba ashkkaratu woosaa siyeesinne bantta nagaraappe simmiyaageetu azzanuwaa akeekees. (Mazamure 51:11, 17 nabbaba.) Harati nuna haasayissiyo wode ezggiyoogan Yihoowa leemisuwaa kaallana koshshennee?

5. Yesuusa ashkketettaa leemisuwaa kaalliyoogee haratuura deˈiya gaytotettaa loyttanau waati maaddana danddayii?

⁵ Yesuus Kiristtoosi ba Aawaappe tamaarido darobaappe issoy ashkketettaa. Yesuusi issi issitoo haggaazuwan daro wodiyaanne wolqqaa wurssiyaaba oottidaba gidikkonne, i ubbatoo danddayanchanne keha. Inchirichay oyqqidoogeeti, ayfee qooqin woosancha gididaageetinne maadoy koshshiyo harati, Yesuusi banttana maaddanau koyiyoogaa akeekidosona. Eti kasetidi odennan yiidaba gidikkonne, i etabaa sheneho gibeenna. Keehippe metootidaageeta maaddanau darotoo ba oottiyoobaa aggibayees. Yesuusi bana ammaniyaageetussi keehippe qoppees. (Marqqoosa 5:30-34; Luqaasa 18:35-41) Kiristtaane gidiyoogaadan, nuuni kehanne harata maaddiyaageeta gidiyoogan Yesuusa leemisuwaa kaalloos. Hegaa mala eeshshaa nu dabboti, nu shoorotinne hara asati akeekoosona. Hegaa bollankka, hegaa mala eeshshay Yihoowa bonchissees; nuunikka ufayttanaadan oottees.

6. Yesuusi harata siiquwaaninne kehatettan oyqqiyoogan leemiso gidiyaabaa ay oottidee?

⁶ Yesuusi harata eta sunttan xeegiyoogankka asaa bonchiyoogaa bessiis. Ayhuda haymaanootiyaa kaalettiyaageeti harata hegaadan bonchidonaa? Bonchibookkona. Eti Higgiyaa erennaageeta ‘qanggettidabadan’ xeelloosonanne hegaadan oyqqoosona. (Yohaannisa 7:49) Xoossaa Naˈay hegaadan oottibeenna. Martto, Mayraamo, Zakkiyoosanne hara darota eta sunttan xeegiis. (Luqaasa 10:41, 42; 19:5) Wogaynne issi issi hanotay asaa xeegiyo ogiyan dummatettay deˈanaadan oottana danddayiyaaba gidikkonne, Yihoowa ashkkarati asaa siiquwan oyqqanau baaxetoosona. * Asaa giddon shaahotetta medhiyaabati bantta Kiristtaane laggeta bonchiyoogaa digganaadan eti paqqadokkona.—Yaaqooba 2:1-4 nabbaba.

7. Geeshsha Maxaafaa baaso siraatay nuuni ubbasan deˈiya asau ashkketettaa bessanaadan waatidi maaddii?

⁷ Xoossaynne a Naˈay ubba deriyan deˈiya asaanne dumma dumma sheeshshaa kehatettan oyqqido hanotay eti he asata bonchiyoogaa bessees; qassi suure wozana koshshay deˈiyoogeeti tumaa siyanaadan oottees. Loˈˈo eeshsha giyoobi issisaappe harasan dummatiyoogee qoncce. Yaatiyo gishshau, loˈˈo eeshshaa xeelliyaagan nuuni laamettenna higgiyaa kaallokko. Hegaappe dumma ogiyan, Geeshsha Maxaafaa baaso siraatay nuuni ubbasan deˈiya asaa bonchanaadan oottees. Asaa ashkketettan oyqqiyoogee nuuni Kiristtaane haggaazuwan demmiyo ayfiyan murutanaadan waati maaddiyaakko ane pilggoos.

Asaa Sarotiyoogaanne Etaara Haasayiyoogaa

8, 9. (a) Ayba meeziyaa asay iita eeshshadan xeellana danddayii? (b) Nuuni asaa oyqqiyoogaa xeelliyaagan, Yesuusi Maatiyoosa 5:47n yootido qofaa kaallana koshshiyoy aybissee?

⁸ Daro biittatun deˈoy bichaarissiyoogee meeze gidido ha wodiyan, darotoo naaˈˈu asati issoy issuwaa sarotennan miyyiyaara aadhoosona. Daro asay hemettiyo ogiyan ooninne ba miyyiyaara aadhiya ubbaa sarotana bessees giyoogaa gidenna. Gidikkokka, hara daro hanotatun, harata sarotiyoogee bessiyaabanne koyettiyaaba. Asaa sarotiyo meezee neeyyo deˈii? Woykko pashkki geennan woy keha qaalaa haasayennan darotoo  coo kanttay? Iitabaa qoppennan, issi uri pashkki giidi sarotennan aggana danddayees.

⁹ Yesuusi: “Intte intte ishanttu xalaalaa sarotikko, harati oottiyoogaappe aadhdhiyaabaa ai oottidetii? Harai atto, Xoossaa ammanenna asaikka hegaadan oottees” yaagidi yootiis. (Maatiyoosa 5:47) Hegaa xeelliyaagan, asaa zoriya Donald wisi: “Harati bana coˈˈu giidi aadhiyo wode asay lanccees. Issi ura coˈˈu giidi aadhanaadan oottiya gaasoy baawa. Hegau xalee: Asaa sarotiyoogaanne etaara haasayiyoogaa” yaagiis. Nuuni harata siiquwaaninne kehatettan oyqqiyaaba gidikko, loˈˈo ayfiyaa demmoos.

10. Loˈˈo eeshshay haggaazuwan nuuni murutanaadan waati maaddana danddayii? (“Siiquwaaninne Pashkki Gaada Haasayaa Doomma” giya saaxiniyaa xeella.)

¹⁰ Huuphessa Amarkkan issi gita kataman deˈiya, Toomanne Kaarolo giyo Kiristtaane azinaanne machee hanotaa qoppa. Eti bantta shoorotuura ufayssiya ogiyan haasayiyoogaa haggaazo ogedan xeelloosona. Eti hegaadan waatidi oottiyoonaa? Toomi Yaaqooba 3:18 hassayidi hagaadan giis: “Nuuni asaara haasayanaunne sarotettaa medhanau baaxetoos. Bantta karen deˈiyaageetuuranne heeran oottiyaageetuura haasayoos. Nuuni pashkki giidi eta sarotoos. Eti dosiyoobaa, giishin eta naatubaa, eta kanatubaa, eta keettaabaanne eta oosuwaabaa denttidi haasayoos. Guyyeppe, eti nuna bantta laggedan xeelloosona.” Qassi Kaarolakka: “Haranttuwaa gayttiyo wode, nu sunttaa yootidi etaagaa oychoos. Nuuni eta heeran ay oottiiddi deˈiyaakko qanttan yootoos. Wurssettan etau markkattoos” yaagaasu. Toomanne Kaaroli shooro gidida daroti etan ammanettoosona. Daroti Geeshsha Maxaafan baasettida xuufiyaa ekkidosona; qassi amaridaageeti tumaa eranau keehippe koyidosona.

Metiya Hanotan Ashkke Gidiyoogaa

11, 12. Nuuni mishiraachuwaa sabbakiyo wode, asay loˈˈo eeshshaa bessennaagaa naagana koshshiyoy aybissee? Qassi nuuni hegaa waati zaarana koshshii?

¹¹ Issi issitoo, nuuni mishiraachuwaa yootiyo wode, asay iita eeshshaa bessees. Yesuusi ba erissiyo ashkkarata: “Eti tana yedettidabaa gidikko, inttenakka yedettana” yaagidi akeekissido gishshau, hegaa nuuni naagana bessees. (Yohaannisa 15:20) SHin etaagaadan asau iita ogiyan zaariyoogee loˈˈo ayfiyaa demissenna. Nuuni ay oottana koshshii? Kiitettida PHeexiroosi: “Kiristtoosa intte wozanan bonchchitenne a intte Goda oottite. Xoossai intteyyo immana giido inttenan de7iyaagau gaaso oichchiya ooyyoonne zaaro immanau ubba wode giigi uttite; shin hegaa ashkketettaaninne yashshatettan oottite” yaagidi xaafiis. (1 PHeexiroosa 3:15) Loˈˈo eeshshaa bessiyoogee, giishin ashkketettaaninne yashshatettan haasayissiyoogee, nuna  cayiyaageeti nuuni yootiyoobaa siyanaadan oottana danddayees.—Tiitu 2:7, 8.

¹² Asay nuna toochiyo wode Xoossaa ufayssiya ogiyan zaaranau giigettana danddayiyoo? Ee. PHauloosi: “Intte ubbau waati zaaranau bessiyaakko erana mala, intte haasayai ubba wode, siyanau kehiyaagaanne ufaissiyaagaa gidanau bessees” yaagiis. (Qolasiyaasa 4:6) So asaa, issippe tamaariyaageeta, issippe oottiyaageeta, gubaaˈiyan deˈiyaageetanne nu shoorota ashkketettan haasayissiyoogaa meeze oottikko, issi Kiristtaaniyau bessiya ogiyan, qilliicciyaanne cashshaa xooni kiyanau giigettana danddayoos.—Roome 12:17-21 nabbaba.

13. Loˈˈo eeshshaa bessiyoogee eqettiyaageetu xeelaa laammana danddayiyoogau issi leemisuwaa yoota.

¹³ Metiya hanotan loˈˈo eeshshaa bessiyoogee loˈˈo ayfiyaa demissees. Leemisuwau, Jaappaane biittan issi ishay markkattiyo wode, keettaawaynne a soo yiida imattay qilliiccidosona. Ishay ashkketettan aggidi biis. I he moottan sabbakishin, he imattay a xeelliyoogaa akeekiis. Ishay he bitaniyaakko shiiqin, bitanee: “Hanettidaban azzanaas. Nuuni nena toochidaba gidikkonne, ne pashkkatettaa akeekaas. Taani hegaadan hananau ay oottana koshshii?” yaagiis. He bitanee oosuwaappe kiyidonne a aayyiyaa mata wode hayqqido gishshau, mule ufayttanau danddayennabadan qoppees. He ishay bitaniyaa Geeshsha Maxaafaa xannaˈanaadan shoobbin, bitanee eeno giis. I sohuwaara saaminttan naaˈˈutoo xannaˈiyoogaa doommiis.

Ashkketettau Maaddiya Keehi Loˈˈobaa

14, 15. Beni wode Yihoowa ashkkarati bantta naata waatidi loohissiyoonaa?

¹⁴ Xoossau yayyiya yelidaageeti beni wode loˈˈo eeshshaa bessanau koshshiya waanna qofaa bantta naata tamaarissoosona. Abrahaaminne a naˈay Yisaaqi Doomettaabaa 22:7n issoy issuwaara ashkketettan haasayido hanotaa qoppa. Yooseefa hanotankka, yelidaageeti a loyttidi loohissidoogee qoncciis. I qashuwan deˈiyo wode, banaara qashettidaageetuyyokka loˈˈo eeshshaa bessiis. (Doomettaabaa 40:8, 14) I Paaroonayyo giidobay maati deˈiyo asa haasayissana bessiya ogiyaa tamaaridoogaa qonccissees.—Doomettaabaa 41:16, 33, 34.

¹⁵ Israaˈeele naatuyyo imettida Tammu Azazotun: “GODAI ne Xoossai neeyyo immiyo biittan ne baree aduqqana mala, ne aawaanne ne aayyiyo bonchcha” yaagiya azazoy deˈees. (Kessaabaa 20:12) Naati banttana yelidaageeta bonchiyo issi ogee son loˈˈo eeshshaa bessiyoogaa. Yofttaahe naˈiyaa keehi paacciya hanotankka ba aaway shiiqettidoogaadan polana mala eeno gaada, ba aawaa keehippe bonchiyoogaa bessaasu.—Daannatu 11:35-40.

16-18. (a) Naatuyyo loˈˈo eeshshay deˈanaadan waati tamaarissana danddayettii? (b) Naata loˈˈo eeshshaa tamaarissiyoogan demmiyo goˈˈatuppe amaridaageeti awugeetee?

 ¹⁶ Nu naatuyyo loˈˈo eeshshay deˈanaadan loohissiyoogaa goˈˈaa xaasayi xeellana bessenna. Eti gitatiyo wode metootennaadan, imattaa mokkiyo, asaa silkkiyan haasayissiyoonne haratuura qumaa miyo suure ogiyaa tamaarana koshshees. Eti uttosaappe denddidi cima asaa utissana, cima asaunne harggida asau kehatettaa bessananne deexxiyaabaa tookkida asaa maaddana koshshiyoy aybissakko akeekanaadan yelidaageeti maaddana koshshees. Eti wozanappe “hayyanaa,” “galatays,” “taani nena maaddoo?,” nne “tau atto ga” giyoogee keehippe koshshiyoogaa akeekana bessees.

¹⁷ Naatuyyo loˈˈo eeshshay deˈanaadan loohissiyoogee metiyaaba gidana koshshenna. Keehi maaddiya ogee loˈˈo leemiso gidiyoogaa. Inne a heezzu ishati ashkketettaa tamaarido ogiyaa yootiiddi, layttay 25 gidido Kurtti: “Nu aayyiyaanne aaway issoy issuwaara kehatettan haasayiyoogaanne hara asaa danddayaaninne siiquwan oyqqiyoogaa akeekoos. Kawotettaa Addaraashshan, shiiquwaappe kasenne shiiquwaappe simmin ta aaway cima ishatuuranne michetuura haasayanau tana ekkidi bees. I sarotiyoogaa siyays; qassi eta bonchiyoogaa akeekays” yaagiis. Kurtti gujjidikka: “Guyyeppe, aagaa mala eeshshaa bessiyoogaa doommaas. Asau loˈˈo eeshshaa bessiyoogee tau meeze gidiis. Issi uri loˈˈo eeshshaa bessiyoy azazettido gishshau gidennan, koyiyo gishshataassa” yaagiis.

¹⁸ Yelidaageeti bantta naatuyyo loˈˈo eeshshay deˈanaadan tamaarissikko, aybi hanana danddayii? Naati haratuura laggetanaunne sarotettan deˈanau danddayoosona. Eti banttana ootissiyaageetuuranne issippe oottiyaageetuura moggidi oottana danddayoosona. Hegaa bollankka, loˈˈo eeshshay deˈiyo suure naati, banttana yelidaageeti ufayttanaadan oottoosona.—Leemiso 23:24, 25 nabbaba.

Loˈˈo Eeshshaa Bessiyoogee Haratuppe Dummatanaadan Oottees

19, 20. Nu keha Xoossaanne a Naˈaa milatanau murttana koshshiyoy aybissee?

¹⁹ PHauloosi: “Xoossai siiqiyo naatudan, a milatite” yaagidi xaafiis. (Efisoona 5:1) Xoossaa Yihoowanne a Naˈaa milatiyoogee, ha huuphe yohuwan beˈidoogeetu mala Geeshsha Maxaafaa baaso siraataa oosuwan peeshshiyoogaa gujjees. Hegaadan oottiyoogan, maati deˈiyo uran nashettanau woykko goˈˈa demmanau giidi coo loˈˈo eeshshaa bessennaadan naagettoos.—Yihudaa 16.

²⁰ Seexaanay ba iita haaruwaa wurssetta gallassatun, Yihooway loˈˈo kandduwau wottido maaraa mooranau murttiis. SHin Dabloosi tumu Kiristtaanetu loˈˈo eeshshaa xayssanau mule danddayenna. Nu keha Xoossaanne a Naˈaa milatanau nuuni ubbay murttidaageeta gidoos. Yaatikko, nu haasayaynne nu eeshshay ubbatoo iita eeshshaa bessanau dooriyaageetuugaappe dummatees. Loˈˈo eeshshaa bessiyoogan polo leemiso gidida Xoossaa Yihoowa sunttaa bonchissoos; qassi ashkke asati tumu goynuwau yaanaadan maaddoos.

[Tohossa qofata]

Hassayay?

• Loˈˈo eeshshaa bessiyoogaa xeelliyaagan Yihoowappenne a Naˈaappe ay tamaariyoo?

• Kiristtaane gidiyoogaadan, asaa siiquwan sarotiyoogee nubaa ay loˈˈobaa qonccissii?

• Loˈˈo eeshshaa bessiyoogee haggaazuwan murutanaadan waatidi maaddii?

• Yelidaageeti bantta naata loˈˈo eeshshaa tamaarissiyoogan waati maaddana danddayiyoonaa?

[Oyshata]

[Sinttaa 31n diya misiliyaa]

Siiquwaaninne Pashkki Gaada Haasayaa Doomma

Daro asay erenna uraara haasayaa doommanau mammottees. Gidoppe attin, Yihoowa Markkati Xoossaanne bantta shooruwaa siiqiyo gishshau, haratuyyo Geeshsha Maxaafaa tumaa yootanau waati haasayanaakko tamaaranau wozanappe baaxetoosona. Ha hanotaara gayttidaagan neeni murutanaadan aybi maaddana danddayii?

Piliphphisiyuusa 2:4n deˈiya, keehippe maaddiya baaso siraatay: “Issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite” yaagees. Ha qofaa kaallidi deˈiyaagaadan qoppa: Issi uraara kase gaytta erennaba gidikko, i nena imattadan xeellees. Neeni i boorasennaadan ay oottana danddayay? Siiquwaaninne pashkki gaada sarotiyoogee maaddana danddayees. Gidikkonne, qoppana koshshiya harabay deˈees.

Issi uraara haasayanau koyiyo wode, i qoppiyoobaa agganaadan oottana danddayaasa. I ay qoppiyaakko akeekennan neeni qoppiyoobaa tobbanau koyiyaaba gidikko, loˈˈo zaaro zaarennan aggana danddayees. Hegaa gishshau, geella he uri qoppiyoobaa gaada neeni akeekidobi deˈikko, ayssi hegaa denttada haasayiyoogaa doommikkii? Yesuusi Samaariyan haattaa ollaa matan issi maccaaseera gayttido wode hegaadan oottiis. (Yohaannisa 4:7-26) A qoppiyoy haattaa duuqqiyoogaabaa. Yesuusi hegaa baaso oottidi haasayaa iira doommiis; yaatidi sohuwaara ufayssiya ogiyan ayyaanaabaa haasayiyoogaa doommidosona.   

[Sinttaa 30n deʼiya misiliyaa]

Asaa kehatettan haasayissiyoogee mishiraachuwaa markkattanau maaddana danddayees

[Sinttaa 32n deʼiya misiliyaa]

Loˈˈo eeshshay ubbatoo bessiyaaba