‘Maaduwaa Koyada Taani Waassiyoy Awude Gakkanaashiinee?’

Jeena yeekkaydda, “Tana ha hanttaara sahoy agganaadan koyays!” yaagaasu. O sakkiya kanssere harggee i bollaa ubbaa gakkiiddi deˈees. I soo asaynne i laggeti i harggiyaanne i waayiyaa qaarana danddayiyaakko ixxokkona! Eti Xoossay o maaddanaadan woossidosona. I eta woosaa siyanee? Hegee a qofissiyaabee?

XOOSSAY asaa naatu hanotaa akeekees. A Qaalaa, Geeshsha Maxaafay, “mereta ubbai issippe . . . maccaasa leessoi oiqqin ooliyoogaadan, sahuwan ooliyoogaa” yootees. (Roome 8:22) Xeetu miilooniyan qoodettiya asay, asatettan, qofaaninne guuggiyan gidana danddayees, Jeeniigaadan ubba gallassi waayettiyoogaa Xoossay erees. Ubba gallassi 800 miiloone asay namisettiyoogaa, miilooniyan qoodettiya harati so giddon gakkiya danoban waayettiyoogaa, qassi yelida daroti bantta naata sinttappe gakkanabaunne eta sarotettau hirggiyoogaa Xoossay beˈees. Hegaa malabaa Xoossay xayssaneeshsha gaada qoppa eray? Nuuni nu siiqiyoogeeta maaddanau koyiyaaba gidikko, Xoossay ba medhido asaa naata maaddanau koyennee?

Neeni hegaadan qoppiyaaba gidikko, hegaadan qoppiyay ne xalla gidakka. Ammanettida asa gidida Imbbaaqoomi, 2,600ppe dariya layttappe kase, ha wodiyan daroti qoppiyoogaadan qoppiis; i: “Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? Qassi taani naaqettada neeyyo waassiyo wode, aude gakkanaashin ashshennan ixxuutee? Ha naaquwaa tana aissi bessai? Mooruwaa xeellaidda neeni aissi co77u gaada danddayai? Bashshainne makkalai ta sinttaana; waretainne ooshshai biitta ubban dariis” yaagidi Xoossaa oychiis. (Imbbaaqooma 1:2, 3) Ibraawe gidida, hananabaa yootiya Imbbaaqoomi ba wode deˈiya iita danuwaanne makkala oosuwaa beˈiis. Hegaa malabay ha wodiyan ubbatoo siyiyooba; qarettiya asati hegan keehippe azzanoosona.

Xoossay Imbbaaqooma qofissidabaa karidee? CHii, karibeenna. I Imbbaaqoomi wozanappe oychidobaa siyidi, he azzanida bitaniyaa minttettiis. Xoossaa Yihooway tuggaa xayssanaagaa qaalaa gelidi, Imbbaaqooma ammanoy minnanaadan oottiis. Xoossay immido hidootay Jeenonne i soo asaa minttettidoogaadan nenakka minttettana danddayees. Kaalliya huuphe yohoti: Xoossay nuussi tumuppe qoppiyoogaa waatidi erana danddayiyoo? Xoossay tuggaa xayssanau ay oottanee, awude xayssanee? giya oyshata zaaroosona.