Ne Dichay Qonccanaadan Ootta
Ne Dichay Qonccanaadan Ootta
“Ne dichchai asa ubbau qonccana mala, hegaa mintta qoppa. Hagaa ubba wode ootta.”—1 XIMOOTIYOOSA 4:15.
1, 2. Ximootiyoosa naatetta wodiyaabaanne ayyo layttay 20 heera gidido wode laamettida hanotaabaa ay eriyoo?
XIMOOTIYOOSI naatettan Rooma haaruwan, Galaatiyan deˈiis; hegee ha wodiyan Turkke giyoosan deˈees. Yesuusa hayquwaappe daro layttay aadhi simmin, amarida Kiristtaane gubaaˈeti yan eqqidosona. Issi wode, yelaga Ximootiyoosi, a aayyiyaanne a aaye aayyiyaa tumaa siyidi, he gubaaˈetuppe issuwan haggaaziyaageeta gididosona. (2 Ximootiyoosa 1:5; 3:14, 15) Ximootiyoosi yelagatettan Kiristtaane gididi ba diccido heeran deˈidoogan keehippe ufayttidoogee qoncce. Yaatikkonne, hanotati qoppennan laamettiyoogaa doommidosona.
2 Hegaadan hanidoy, kiitettida PHauloosi naaˈˈantto he heeraa biido wodiyaana. He wode, Ximootiyoosau layttay 20 heera gidennan aggenna. PHauloosi Lisxxira biido wode gidennan aggenna, he gubaaˈiyan deˈiya “ishantti Ximootiyoosabaa loittidi” markkattidoogaa i akeekiis. (Oosuwaa 16:2) Yelaga Ximootiyoosi ayyaanaaban keehi kayma gidennan aggenna. Yaatin, PHauloosinne he gubaaˈiyaa cimati geeshsha ayyaanaa kaaletuwan Ximootiyoosa bolli bantta kushiyaa wottidi, gubaaˈiyan issi dumma oosuwau a kessidosona.—1 Ximootiyoosa 4:14; 2 Ximootiyoosa 1:6.
3. Ximootiyoosassi imettida dumma haggaazo maatay aybee?
3 Ximootiyoosi issi dummabau shoobettiis; hegeekka kiitettida PHauloosaara sibikate oosuwau biyaagaa gidiyoogaa! (Oosuwaa 16:3) Ximootiyoosi ay keena garamettidaakkonne ufayttidaakko qoppa! Yiya layttatun, Ximootiyoosi PHauloosaaranne issi issitoo haratuura, kiitettidaageetunne cimatu dumma dumma kiitaa ekkidi baanau dees. PHauloosinne Ximootiyoosi ishatakka ayyaanaaban minttanau keehippe maaddiya oosuwaa yuuyidi oottidosona. (Oosuwaa 16:4, 5 nabbaba.) Hegaa gishshau, Ximootiyoosi ayyaanaaban dichaa bessidoogaappe denddidaagan daro Kiristtaanetun erettiis. Ximootiyoosaara tammu laytta gidiyaagaa issippe ootti simmidi, kiitettida PHauloosi Piliphisiyuusa Kiristtaanetussi: “Intte de7uwaabau wozanappe hirggiya a mala asi harai ooninne tau baawa. . . . Na7i ba aawau oottiyoogaadan, Ximootiyoosi tanaara issippe gididi, wonggeliyaa oosuwaa oottidoogan, ammanettiya asa gidiyoogaa erissidoogaa intte ereeta” yaagidi xaafiis.—Piliphphisiyuusa 2:20-22.
4. (a) Ximootiyoosayyo ayba keehippe gita aawatettay imettidee? (b) PHauloosi 1 Ximootiyoosa 4:15n yootidobaa xeelliyaagan ayba oyshi denddii?
4 PHauloosi Piliphisiyuusa Kiristtaanetuyyo xaafido heeran, Ximootiyoosayyo keehi gita aawatettaa immiis; hegeekka cimatanne gubaaˈiyau oottiyaageeta sunttiyoogaa. (1 Ximootiyoosa 3:1; 5:22) Ximootiyoosi ammanettiya Kiristtaane cima gididoogee qoncce. Yaatikkonne, PHauloosi he dabddaabbiyan Ximootiyoosi ‘ba dichaa asa ubbau qoncce oottana mala’ zoriis. (1 Ximootiyoosa 4:15) Ximootiyoosi ayyaanaaban keehippe diccidoogee qonccibeenneeyye? Yaatin, PHauloosi woygiiddi deˈii? Nuuni a zoriyaappe waanidi goˈettana danddayiyoo?
Ayyaanaaban Nu Dichay Qoncciyo Ogiyaa
5, 6. Efisoona gubaaˈiyaa ayyaanaabaa geeshshatettay waanidi hambbalaashettidee? Ximootiyoosi gubaaˈiyaa waatidi naagana danddayii?
5 Ane 1 Ximootiyoosa 4:15 yuushuwan deˈiya qofaa pilggoos. (1 Ximootiyoosa 4:11-16 nabbaba.) PHauloosi hegaa xaafanaappe kase, Ximootiyoosi Efisoonan takkanaadan yootidi, Maqidooniyaa biis. Aybissi? He kataman deˈiya issoti issoti he wode worddo timirttiyaa yootiyoogan gubaaˈiyan shaahotettaa medhiiddi deˈoosona. Ximootiyoosi gubaaˈee ayyaanaaban geeshsha gidanaadan naagana koshshiis. I hegaa waatidi oottanee? Issi ogee, haratussi loˈˈo leemiso gidiyoogaana.
6 PHauloosi Ximootiyoosayyo: “Ammaniyaageetuyyo haasayan, hanotettan, siiquwan, ammanuwaaninne geeshshatettan leemiso gida” yaagidi xaafiis. PHauloosi gujjidikka: “Ne dichchai asa ubbau qonccana mala, hegaa mintta qoppa. Hagaa ubba wode ootta” yaagiis. (1 Ximootiyoosa 4:12, 15) He dichay aawatetta maataara gidennan, ayyaanaaban Ximootiyoosi bessana koshshiyo eeshshaara gayttidaba. Hegee ubba Kiristtaaneti bessana koshshiya dicha.
7. Gubaaˈiyan deˈiya ubbay ay oottana koshshii?
7 Ximootiyoosa wodiyaagaadan ha wodiyan, gubaaˈiyan dumma dumma aawatetta maatay deˈees. Issoti issoti cima woykko gubaaˈiyan oottiyaageeta gididi oottoosona. Harati aqinye gididi haggaazoosona. Harati qassi woradaa woy awuraajjaa bollaara geeddiyoogan woykko Beeteelen woykko misoonaawe gididi oottoosona. Cimati woradaanne awuraajjaa shiiqotu mala, dumma dumma tamaarissiyo prograametun shaahettoosona. Gidoppe attin, attumaa, maccaa woykko naatuwaa gidin, ubba Kiristtaaneti ayyaanaaban bantta dichaa qonccissana danddayoosona. (Maatiyoosa 5:16) Dumma aawatetta maatay deˈiyo Kiristtaanetikka Ximootiyoosaagaadan ayyaanaaban bantta dichaa ubbau qonccissana koshshees.
Haasayiyooban Leemiso Gida
8. Nu haasayay nu goynuwaa waatidi bochii?
8 Ximootiyoosi leemiso gidana koshshidobatuppe issoy haasayaa. Nuuni haasayan waatidi nu dichaa qonccissana danddayiyoo? Nu haasayay nubaa darobaa qonccissees. Yesuusi: “Doonai wozana giddon kumidabaa haasayees” giidoogee bessiyaaba. (Maatiyoosa 12:34) Nu haasayay nu goynuwaa bochana danddayiyoogaa, Yesuusa ishaa Yaaqoobikka akeekiis. I: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela” yaagidi xaafiis.—Yaaqooba 1:26.
9. Nu haasayay haratussi leemiso gidana koshshiyoy ayba ogetuunee?
9 Nu haasayay gubaaˈiyan deˈiyaageetussi nuuni ayyaanaaban ay keena diccidaakko qonccissana danddayees. Yaatiyo gishshau, ayyaanaaban kaymida Kiristtaanee bonchissenna, minttettenna, bore woykko qohiya haasayaa haasayiyoogaappe minttettiya loˈˈo haasayaa haasayanau baaxetees. (Leemiso 12:18; Efisoona 4:29; 1 Ximootiyoosa 6:3-5, 20) Kandduwaabaa xeelliyaagan Xoossay kessido maarau exatiyoogeenne hegaara moggidi deˈanau koyiyoogee, nuuni Xoossau aqidoogaa qonccissana danddayees. (Roome 1:15, 16) Suure wozana koshshay deˈiyoogeeti, nuuni haasayiyo imotaa goˈettiyo ogiyaa akeekiyoogeenne nu leemisuwaa kaallana danddayiyoogee qoncce.—Piliphphisiyuusa 4:8, 9.
Nu Eeshshaaninne Geeshshatettan Leemiso Gidiyoogaa
10. Nuuni ayyaanaaban diccanau loˈˈo milatiyo iitatetti baynna ammanoy keehippe koshshiyoy aybissee?
10 Issi Kiristtaanee loˈˈo leemiso gidanau minttettiya haasayaappe aadhiyaabaa koshshees. Suurebaa oottennan doona xallan haasayiyoogee issi uraa loˈˈo milatiya iita oottees. PHauloosi Parisaawetu loˈˈo milatiyo iitatettaanne hegee kaalettiyo qohuwaa loyttidi erees. Hegaa mala cimuwaanne wordduwaa Ximootiyoosi eqettanaadan i akeekissidoy issitoo xalla gidenna. (1 Ximootiyoosa 1:5; 4:1, 2) SHin Ximootiyoosi loˈˈo milatiya iita gidenna. PHauloosi Ximootiyoosau xaafido naaˈˈantto dabddaabbiyan: “Nenan de7iya worddoi bainna ammanuwaa hassayais” yaagiis. (2 Ximootiyoosa 1:5) Gidoppe attin, Kiristtaane gidiyoogaadan Ximootiyoosi tumancha gidiyoogaa haratussi qonccissana koshshiis. I eeshshan leemiso gidana koshshiis.
11. Miishshaa xeelliyaagan PHauloosi Ximootiyoosau woygidi xaafidee?
11 PHauloosi Ximootiyoosau xaafido naaˈˈu dabddaabbetun, dumma dumma eeshshaa xeelliyaagan zoriis. Leemisuwau, Ximootiyoosi miishshaa yedettiyoogaappe naagettana koshshiis. PHauloosi: “Miishsha siiqiyoogee iitatetta ubbau pultto. Issooti issooti hegaa amottiiddi, ammanuwaappe balettidi, daro metuwan banttana qohidosona” yaagidi xaafiis. (1 Ximootiyoosa 6:10) Miishshaa siiqiyoogee ayyaanaaban shuggidoogaa bessiyaaba. Hegaappe dumma hanotan, “miyoobainne maayiyoobai de7ikko, hegee nuuyyo gidana” giidi, sima deˈuwaa deˈiya Kiristtaaneti ayyaanaaban diccidoogaa qonccissoosona.—1 Ximootiyoosa 6:6-8; Piliphphisiyuusa 4:11-13.
12. Nu deˈuwan nu dichaa waatidi qonccissana danddayiyoo?
12 Kiristtaane maccaasay “bessiya maayuwaa kiphataaninne banttana shiishshi ekkiyoogan” maayiyoogee keehippe koshshiyoogaa PHauloosi Ximootiyoosau yootiis. (1 Ximootiyoosa 2:9) Maayuwan, alleeqettiyoobaaninne bantta deˈo macaran harabankka kiphatanchanne banttana shiishshi ekkiyaageeta gidiyoogaa bessiya dooro dooriya maccaasati loˈˈo leemiso gidoosona. (1 Ximootiyoosa 3:11) Ha baaso siraatay attuma Kiristtaanetuyyookka oottees. PHauloosi cimati ‘kiphatancha, banttana naagiyaageeta, bessiyaabaa oottiyaageeta’ gidanaadan zoriis. (1 Ximootiyoosa 3:2) Nu galla galla deˈuwan ha eeshshata bessiyo wode, nu dichay ubba asau qonccidi beettees.
13. Ximootiyoosaagaadan, nuuni waanidi geeshshatettan leemiso gidana danddayiyoo?
13 Ximootiyoosi geeshshatettankka leemiso gidana koshshiis. Ha qaalaa goˈettiyoogan, PHauloosi issi eeshshaa xeelliyaagan, hegeekka kandduwaa geeshshatettaabaa yootiis. Maccaasaara gayttidaagan Ximootiyoosa eeshshay borissiyaagaa gidana koshshenna. I ‘cima maccaasa ba aayeedan, yelaga maccaasa ba micheedan, kumetta geeshshatettan bonchana’ koshshiis. (1 Ximootiyoosa 4:12; 5:2) Kandduwan tuna gididabaa geeman oottiyoobaakka Xoossay erees; qassi takkidi hegaa hara asaykka eriyoogee attenna. SHin issi Kiristtaaniyaa loˈˈo oosoy geemmana danddayennaageekka tuma. (1 Ximootiyoosa 5:24, 25) Gubaaˈiyan deˈiya ubbay eeshshaaninne geeshshatettan ba dichaa qonccissiyo injjee deˈees.
Siiqoynne Ammanoy Keehippe Koshshees
14. Nuuni issoy issuwaara siiqettiyoogee koshshiyoogaa Geeshsha Maxaafay woygi qonccissii?
14 Tumu Kiristtaaneti erettiyo waannabay siiquwaa. Yesuusi ba erissiyo ashkkaratuyyo: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Hegaa mala siiquwaa nuuni waati bessiyoo? Nuuni ‘issoy issuwaa siiquwan’ danddayanaadan, ‘issoy issuwau kehanaadan, qarettanaadaaninne atto gaanaadan,’ qassi imattaa mokkanaadan Xoossaa Qaalay zorees. (Efisoona 4:2, 32; Ibraawe 13:1, 2) Kiitettida PHauloosi: “Issoi issuwaara ishanttudan siiqettite” yaagidi xaafiis.—Roome 12:10.
15. Siiqoy ubbaassi, ubba qassi Kiristtaane cimatussi keehippe koshshiyoy aybissee?
15 Ximootiyoosi hara Kiristtaaneta kehatetti woykko qareti baynna ogiyan oyqqidaba gidiyaakko, hegee i asttamaarenne cima gididi oottido ooso ubbaa mela kessiyaaba. (1 Qoronttoosa 13:1-3 nabbaba.) Hara baggaara, Ximootiyoosi ba ishata tumuppe siiqiyoogaa bolli, imattaa mokkiyoogeenne etau hara loˈˈobaa oottiyoogee gujettidi, i ayyaanaaban dichaa bessidoogaa qonccissiis. Hegaa gishshau, kiitettida PHauloosi Ximootiyoosau xaafido dabddaabbiyan, Ximootiyoosi loˈˈo leemiso gidana bessiyo eeshshatuppe issoy siiquwaa gidiyoogaa yootidoogee bessiyaaba.
16. Ximootiyoosi mino ammanuwaa bessana koshshidoy aybissee?
16 Ximootiyoosi Efisoonan takkido wode, a ammanuwaa paacciyaabay gakkiis. He wode issoti issoti Kiristtaane tumaara moggenna timirttiyaa tamaarissiiddi deˈoosona. Harati worddo “haisiyaa” yootoosona woykko ayyaanaaban gubaaˈiyaa aynne maaddenna qofaa pilggoosona. (1 Ximootiyoosa 1:3, 4 nabbaba.) PHauloosi hegaa mala uri ‘daro otorettees; aynnekka erenna. Qassi qaalaa bollan palamettanaunne ooyettanau au giigenna qofay deˈees’ yaagiis. (1 Ximootiyoosa 6:3, 4) Gubaaˈiyaa gelida qohiya qofaa, Ximootiyoosi issi kutti gidikkokka qoppanee? CHii; ayssi giikko, PHauloosi Ximootiyoosa “ammanuwaa baaxiyaa loitta baaxeta;” qassi “issi issi asai balan eratetta giyo eeyya palamaappenne hada haasayaappe [baqata]” yaagidi zoriis. (1 Ximootiyoosa 6:12, 20, 21) PHauloosi eratettan zorido zoriyaa Ximootiyoosi kaallidoogee sirissenna.—1 Qoronttoosa 10:12.
17. Ha wodiyan nu ammanuwaa paacciyaabay waani gakkana danddayii?
17 PHauloosi, ‘issi issi asay wurssetta wodiyan ammanuwaa agganaagaa, worddo ayyaanatuyyo azazettanaagaanne xalahetu timirttiyaa kaallanaagaa’ Ximootiyoosayyo yootiis. (1 Ximootiyoosa 4:1) Aawatetta maatay deˈiyoogeeta gujjin, gubaaˈiyan deˈiya ubbay Ximootiyoosaagaadan mino ammanuwaa bessana koshshees. Kaddidaageetu timirttiyaa xeelliyaagan mino tangguwaa ekkiyoogan, nu dichay qonccanaadan oottanaunne ammanuwan leemiso gidanau danddayoos.
Ne Dichay Qonccanaadan Baaxeta
18, 19. (a) Ne dichay asa ubbau qonccanaadan oottana danddayiyoy ayba ogiyaanee? (b) Kaallidi ay beˈanee?
18 Issi tumu Kiristtaanee ayyaanaaban dicciyoogee, a qottaara, i meretan demmidobaara woykko erettida asa gidiyoogaara gayttidaba gidennaagee qoncce. Qassi i gubaaˈiyan daro layttau haggaazidoogan qoncciyaaba gidennan aggana danddayees. SHin ayyaanaaban tumuppe diccidoogee, nu qofan, nu haasayaaninne nu oosuwan Yihoowayyo azazettiyoogan qonccees. (Roome 16:19) Issoy issuwaara siiqettanaadaaninne mino ammanuwaa dichanaadan imettida azazuwaa nuuni kaallana koshshees. Ee, nu dichay ubba asau qonccanaadan PHauloosi Ximootiyoosau yootidobaa wotti dentti qoppiyaageetanne hegaa ubba wode oottiyaageeta gidoos.
19 Ayyaanaaban nu dichaynne nuuni kaymida Kiristtaane gidiyoogee qoncciyo hara eeshshay, Xoossaa ayyaanaa ayfe macara gidida ufayssaa. (Galaatiyaa 5:22, 23) Kaalliya huuphe yohoy, meto wode nuuni waanidi ufayttiyaageeta gididi deˈana danddayiyaakko qonccissees.
Woyga Zaaruutii?
• Nuuni haasayiyoobaappe hara asay nubaa ay erana danddayii?
• Nu dichay nu eeshshaaninne nu geeshshatettan waani qonccii?
• Kiristtaaneti siiquwaaninne ammanuwan leemiso gidana koshshiyoy aybissee?
[Oyshata]
[Sinttaa 9n deʼiya misiliyaa]
Yelaga Ximootiyoosi ayyaanaaban keehi kayma asa gidiis
[Sinttaa 11n deʼiya misiliyaa]
Ne dichay hara asau qoncci beettii?