Seexaanay Haariyo Ogee Ushachennaagee Erettidaba

‘Iitatussi sarotetti baawa.’—ERANCHCHAA 8:13.

1. Iitatu bolli gakkana pirdday minttettiyaaba gidiyoy aybissee?

IITATI pirddettanaagee attennaba. Eti bantta oottidobau zaaruwaa immana. (Leemiso 5:22; Eranchchaa 8:12, 13) Hegee ubba, xillotettaa dosiyaageetussinne iitati waayiyaanne pirdda pacaa gattidoogeetussi minttettiyaaba. Pirddettanau deˈiyaageetuppe waannay, iitatettau aawa gidida Seexaanaa Dabloosa.—Yohaannisa 8:44.

2. Edenen denddida hanotaa giigissanau wodiyaa koshshidoy aybissee?

² Beni Edenen, Seexaanay otoruwan bau bessiyaagaappe aattidi qoppiyoogan, Yihooway haariyo ogiyaa asay ixxis gaanaadan oottiis. Hegaappe denddidaagan, nu koyro aawaynne aayyiyaa, Yihooway haariyo maataa eqettiyoogan Seexaanaara exatidi, A bolli nagaraa oottidosona. (Roome 5:12-14) Kariyoogaanne makkaliyoogaa bessiya eta oosoy, eta bolli ay kaalettanaakko Yihooway eriyoogee qoncce. SHin, he gakkanabay qoppi danddayiya mereta ubbau qonccanau bessees. Yaatiyo gishshau, he hanotaa giigissanaunne makkalanchati keehi iitabaa oottidoogaa ammanttiya ogiyan qonccissanau wodiyaa koshshees.

3. Asaa haaruwaa nuuni ayba ogiyan xeellana bessii?

³ Yihoowa haaruwaa ixxido gishshau, asay ba haaruwaa essana koshshiis. Kiitettida PHauloosi  Roomen deˈiya ba mala Kiristtaanetussi xaafiiddi, hegaa mala aysota ‘deriyaa heemmiyaageeta’ yaagiis. PHauloosa wode, deriyaa heemmiyaageeta giidoy koyro xekkan, 54-68 M.L. gakkanaashin Kawuwaa Neeroy haarido Rooma kawotettaa malaatees. PHauloosi hegaadan deriyaa haariyaageeta xeelliyaagan, “Xoossai geennan de7⁠ishin, dere heemmiyaabi de7anau danddayenna” yaagiis. (Roome 13:1, 2 nabbaba.) Hegee woygiyoogee? PHauloosi asaa haaroy Xoossay haariyo ogiyaappekka aadhiyoogaa yootiiddi deˈiiyye? CHii, gidenna. Hegaappe, asaa haaroy deˈanaadan Yihooway paqqadido wodiyan, Kiristtaaneti “Xoossaa azazuwaa” bonchanaunne haariyaageetuyyo azazettana koshshiyoogaa yootiiddi dees.

Bashshau Efiya Ogiyaa

4. Asaa haaroy ushachennaagee aybissakko qonccissa.

⁴ Gidoppe attin, Seexaanay kaalettiyo, asa haaroy ushachennaagee qoncce. Aybissi? Koyruwan, hegee baasettidoy Xoossaa aadhida eratettaana gidenna. Polo gidida aadhida eratettay deˈiyoy Yihoowa xallaassa. Hegaa gishshau, ushachiya haaruwau koshshiya, ammanttiya kaaletuwaa immiyay A xalla. (Ermmaasa 8:9; Roome 16:27) Darotoo mali beˈiyoogan tamaariya asaa naatuugaappe dumma hanotan, Yihooway oottana bessiya keehi loˈˈo ogiyaa ubbatoo erees. A kaaletuwaa kaallenna ay haaroynne kunddiyoogee attenna. Seexaanaa denttettida iita koshshaa gujjennan, hegaa xallan, i asaa haaruwaa goˈettidi ayssiyo ogee ushachennaagee koyroppekka erettiis.

5, 6. Seexaanay Yihoowaara eqettanaadan oottidabay ayba gidanee?

⁵ Suure qoppiya asi, ushachennaagee erettido oosuwaa oottiyoogaa darotoo doommenna. I he oosuwaa doommiyaaba gidikkokka, hegee bala gidiyoogaa akeekiyoogee attenna. Ubbabaa danddayiya Medhidaagaara eqettiyoogee goˈˈennaba gidiyoogee darotoo taarikiyan qonccidaba. (Leemiso 21:30 nabbaba.) Gidikkonne, Seexaanay bessiyaagaappe aaruwan bana xoqqu oottiyoogaaninne otorettiyoogan jallidi, Yihoowayyo zokkuwaa zaariis. Yaatiyo gishshau, Dabloosi bashshau kaalettiya ogiyaa ba dosan dooriis.

⁶ Seexaanaagaadan otorettiyoogee: “Taani saluwaa kiyana; ta kawotettaa araataakka Xoossaa xoolinttetuppe bollaara xoqqan wottana; huuphessa bagga gaxan, yaa7ai shiiqiyo deriyaa huuphiyan uttana. SHaarati de7⁠iyo xoqqaappekka bollau pude aadhdhana; taani tana Ubbaappe Xoqqiya Xoossaa mala oottana” yaagidi axiraarida Baabloona kawuwaa hanotan qoncciis. (Isiyaasa 14:13-15) He kawoy eeyyatettan oottidobay ushachibeenna; ubba Baabiloona kawotettay kawushsha hanotan xayiis. Hegaadan, Seexaanaynne a alameekka mata wode muleera xayana.

 Paqqadettidoy Aybissee?

7, 8. Yihooway iitatettaa guutta wodiyau paqqadidoogan nuuni demmido issi issi goˈˈay aybee?

⁷ Asaa naati Seexaanaa exa gidennaadaaninne ushachennaagee erettido hara haaruwaa kaallennaadan Yihooway teqqibeennay aybissee, giidi issoti issoti qoppana danddayoosona. I Ubbaa Danddayiya Xoossaa gidiyoogaadan hegaadan oottana danddayiyoogee tuma. (Kessaabaa 6:3) Gidikkonne, i hegaadan oottibeenna. Wurssettay loˈˈanaagaa ba aadhida eratettan eriis; hegee i asaa naatu makkalan kelttiyaa gelennan guutta wodiyau takkanaadan oottiis. Wurssettan, Yihooway geeshshatettaaninne siiquwan Haariyaagaa gidiyoogee qonccana; qassi ammanettida asaa naati Xoossaa haaruwan goˈettana.

⁸ Asaa naati Seexaanaa halchuwaa ixxis giidabanne Yihoowa haaruwaappe kiyanau koyibeennaba gidiyaakko, keehi daro metuwaappe attana danddayoosona shin! Gidikkonne, asaa naati guutta wodiyau banttana haaranaadan Yihooway kuuyidoogee goˈˈiis. Hegee, Xoossay giyoobaa siyiyoogeenne an ammanettiyoogee aadhida eratetta gidiyoogaa suure wozanay deˈiyoogeeti loytti akeekanaadan oottiis. Daro xeetu layttau, asaa naati daro qommo haaruwaa mali beˈidosona; gidikkonne, hegaappe issoynne ushachibeenna. He hanotay, Xoossau goynniyaageeti Yihooway haariyo ogee ubbaappe aadhidi loˈˈo gidiyoogaa ammaniyoogaa minttanaadan oottiis. Seexaanaa iita haaroy deˈanaadan Yihooway paqqadidoogee, ammanettidi Xoossaayyo goynniyaageeta gujjin, asaa naatu bolli metoy gakkanaadan oottidoogee qoncce. Gidikkonne, iitatettaa guutta wodiyau paqqadidoogee ammanettidi Xoossau goynniyaageeti goˈettanaadankka oottiis.

Yihooway Bonchettanaadan Gaaso Gidida Makkalaa

9, 10. Seexaanaa haaroy Yihooway bonchettanaadan waati oottidaakko qonccissa.

⁹ Asaa naati Seexaanaa kaaletuwan banttana haaranaadan Yihooway paqqadidoogee i haariyo ogee tooshettanaadan oottibeenna. Hegaappe dummabay haniis! Asay bana barkka haarana danddayennaagaa Ermmaasi ayyaanaa kaaletuwan xaafidoogee tuma gidiyoogaa taarikee qonccissiis. (Ermmaasa 10:23 nabbaba.) Hegaa bollikka, Seexaanaa makkalay Yihooway ba loˈˈo eeshshata loytti qonccissiyo injjiyaa medhiis. Waanidi?

¹⁰ Seexaanaa haaroy bashshaa kaalettiyoogaa nuuni akeekiyo gishshau, Yihoowa polo eeshshati hegan keehippe qonccidosona. Hegaappe denddidaagan, i bana siiqiyaageetun bonchettiis. Ee; hegee malatennaba gidikkonne, Seexaanay haariyo ogee Xoossay bonchettanaadan gaaso gidiis. Hegee, Yihooway ubbaa haariyo ba maataa bolli denddida ha hanotaa giigissanau keehippe loˈˈo ogiyaa dooridoogaa qonccissiis. Hegaa leemisuwan qonccissanau, ane Yihoowa eeshshatuppe amaridaageeta qanttan beˈoos; qassi Seexaanaa iita haaroy Yihooway he eeshshata hara ogiyan qonccissanaadan waati oottidaakko beˈoos.

11. Yihoowa siiqoy qonccidoy ayba ogiyaanee?

¹¹Siiquwaa. Geeshsha Maxaafay “Xoossai siiqo” gidiyoogaa yootees. (1 Yohaannisa 4:8) Koyruwan, asaa naata medhidoogee Yihooway ba siiquwaa qonccissido oge. Hegaa bollikka, Xoossay nuna medhido maalaalissiya ogee a siiquwaa qonccissees. Yihooway asaa naati ufayttanau koshshiya ubbabay kumido, eti  deˈiyo sohuwaakka siiquwan giigissiis. (Doomettaabaa 1:29-31; 2:8, 9; Mazamure 139:14-16) SHin asaa naati iitatettaa doommido wode, Yihooway hara ogiyan ba siiquwaa qonccissiis. Waatidi? Yesuusi: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagidoogaa kiitettida Yohaannisi xaafiis. (Yohaannisa 3:16) Xoossay nagaranchata wozanau ba mexi issi Naˈaa saˈaa kiittiyoogaappe aadhiya ogiyan asaa naatussi siiquwaa bessana danddayii? (Yohaannisa 15:13) Siiqoy qonccido ha maalaalissiya ogee asaa naatussikka leemiso gidiis; Xoossay ba goˈˈaa yarshshiyoogan bessidoogaa mala siiquwaa, Yesuusaagaadan eti bantta galla galla deˈuwan qonccissanaadan hegee injjiyaa medhiis.—Yohaannisa 17:25, 26.

12. Yihoowa wolqqay qonccidoy ayba ogiyaanee?

¹²Wolqqaa. Deˈuwaa immana danddayiyay “Ubbaappe Wolqqaama” Xoossaa xalaala. (Ajjuutaa 11:17; Mazamure 36:9) Asi yelettiyo wode aybinne xaafettibeenna woraqata mala. Hayqqiyo wode, ba eeshshaynne ba oonatettay qonccanaadan oottida, kuuyidoban, oottidobaaninne deˈuwan beˈidoban he woraqatay kumees. He hanotay ubbay Yihooway hassayiyooba. Yihooway ba keerido wodiyan, he uraa au kase deˈiya dumma eeshsha ubbaara deˈuwau zaarettidi denttana. (Yohaannisa 5:28, 29) Hegaa gishshau, hayqoy asaa naatuyyo Xoossay koyro halchidoba gidana xayikkonne, hayqqidaageeta denttanau Yihoowayyo wolqqay deˈiyoogaa bessana mala injjiyaa medhiis. Tumakka; Yihooway “Ubbaappe Wolqqaama” Xoossaa.

13. Yesuusa yarshshoy polo gidida Yihoowa suure pirddaa waati qonccissii?

¹³Suure Pirddaa. Yihooway worddotenna; qassi pirdda pacissenna. (Zaarettido Wogaa 32:4; Tiitu 1:2) Yihooway ubbatoo xoqqa gidida tumatettaanne suure pirddaa maaraa kaallees; hegee issi issitoo i azzananaadan oottana danddayees. (Roome 8:32) A siiqo Naˈay, Yesuusi Xoossaa cayida worddo asadan mittan kaqettidi waayiyan hayqqiyoogaa beˈiyo wode, Yihooway ay keena azzanideeshsha! Gidikkonne, Yihooway nagarancha asaa naata siiqiyo gishshau, polo gidida ba suure pirddaa maaraa naaganau he azzanttiyaabay hananaadan paqqadiis. (Roome 5:18-21 nabbaba.) Pirdda pacay kumido alamee, suure pirddaa pirddiyoogan banaara laggetiyaabi baynnaagaa Yihooway qonccissanaadan ayyo injjiyaa medhiis.

14, 15. Laggetiyay baynna Yihoowa aadhida eratettaynne danddayay qonccido issi issi ogeti awugeetee?

¹⁴Aadhida Eratettaa. Addaameenne Hewaana nagaraa oottosaara eta makkalay kaalettido iitabaa ubbaa xayssiyo ogiyaa Yihooway yootiis. (Doomettaabaa 3:15) Hegaadan sohuwaara tangguwaa ekkidoogeenne ba ashkkaratuyyo he halchuwaara gayttida ubbabaa wodiyaappe wodiyan qonccissidoogee, Yihoowa aadhida eratettay keehippe qonccanaadan oottiis. (Roome 11:33) Xoossay hanotata loˈˈo ogiyan giigissennaadan diggiya aybinne baawa. SHori baynna kanddoy, olay, bessennabaa oottiyoogee, azazettennaagee, qareta xayiyoogee, asaa lagiyoogeenne loˈˈo  milatiya iitatetti kumido alamiyan, Yihooway ba meretatussi aadhida eratettay tumuppe aybakko bessiyo daro injjee merettiis. Erissiyo ashkkaraa Yaaqoobi: “Bollappe yiya aadhdhida eratettai ubbaappe kase geeshsha. Qassi sarotetta, ashkkenne ero giyaagaa; qassi maarotettinne lo77⁠o aifee kumidoogaa. Sireenne lo77⁠o milatiya iitatetti bainnaagaa” yaagiis.—Yaaqooba 3:17.

¹⁵Gencciyoogaanne Danddayiyoogaa. Polotettay paccido, nagaranchanne baliya asaa naata Yihooway oyqqido hanotay baynnaakko, a genccaanne danddayaa loytti akeekiyo injjee deˈenna. SHaˈan qoodettiya layttau Yihooway hegaadan oottanau koyidoogee, ha eeshshata i polo gidida ogiyan bessiyoogaa qonccissees; nuuni hegau a keehippe galatana koshshees. Kiitettida PHeexiroosi, ‘Godaa danddayay atotettaa gidiyoogaa nu wozanan qoppanaadan’ yootidoogee bessiyaaba.—2 PHeexiroosa 3:9, 15.

16. Yihooway atto gaanau koyiyaagaa gidiyoogee keehippe ufayssiyaaba gididoy aybissee?

¹⁶Atto Gaanau Koyiyoogaa. Nuuni ubbay nagaranchanne darotoo baleettees. (Yaaqooba 3:2; 1 Yohaannisa 1:8, 9) Yihooway “coo” atto gaanau koyiyaagaa gidiyo gishshau, nuuni keehippe galatana koshshees! (Isiyaasa 55:7) Issi hanotaakka qoppa: Nuuni nagarancha gididi yelettido gishshau, Xoossay nu nagaraa atto giyo wode keehippe ufayttoos. (Mazamure 51:5, 9, 17) Ha keehippe ufayssiya Yihoowa eeshshaa nu deˈuwan beˈiyoogee, a kaseegaappe gujji siiqanaadan ootteesinne haratuura deˈiya gaytotettan a leemisuwaa kaallanaadan minttettees.—Qolasiyaasa 3:13 nabbaba.

Alamee Sahettiyo Gaasuwaa

17, 18. Seexaanay haariyo ogee ushachibeennay ayba ogiyaanee?

¹⁷ Seexaanaa haaroy ehiido a kumetta alamee giigennaagaa gidiyoogee aadhida xeetu layttatu ubban keehippe qoncciis. Zi Yuurooppiyan giyo gaazeexay 1991n: “Alamee sahettii? Ee; shin . . . hegaadan oottiday Xoossaa gidenna—alamee sahettanaadan oottidaageeti an deˈiya asata” yaagiis. Hegee tuma! Nu koyro aawaynne aayyiyaa Seexaanaa kaaletuwan Yihoowa haaruwaa aggidi, asa haaruwaa dooridosona. Eti hegaadan oottiyoogan, ushachennaagee erettido haaroy deˈanaadan oottidosona. Alame yuushuwan deˈiya, asaa bolli gakkiya metoynne waayee asaa haaroy keehippe sahettiyoogau malaata.

¹⁸ Seexaanay haariyo ogee yaaretiyoogan baasettiis. Gidikkokka, yaaretiyoogee Yihooway haariyo ogiyau baaso gidida siiquwaa mule xoonana dnddayenna. Seexaanay haariyo ogee woppatettaa, ufayssaanne sarotettaa ehaanau danddayibeenna. Yihooway haariyo ogee suure gidiyoogee qoncciis! Ha wodiyan hegau naqaasha gidiyaabi deˈii? Ee; hegaa kaalliya huuphe yohuwan beˈana.

Kaalliya Xiqiseta Nabbabiyoogan Haaruwaa Xeelliyaagan Ay Tamaaridoo?

• Roome 13:1, 2

• Leemiso 21:30

• Ermmaasa 10:23

• Qolasiyaasa 3:13

[Oyshata]

[Sinttaa 25n deʼiya misiliyaa]

Seexaanaa haaroy asaa naata mule goˈˈibeenna

[Misilee Ekettidosaa]

U.S. Army photo

WHO photo by P. Almasy

[Sinttaa 26n deʼiya misiliyaa]

Hayqqidaageetakka denttanau Yihoowayyo wolqqay deˈees

[Sinttaa 27n deʼiya misiliyaa]

Yihooway ba Naˈaa yarshshidoogan a siiqoynne a suure pirdday qoncciis