Wozanappe ‘Qarettite’

HA WODIYAN koshay, sahoy, hiyyeesatettay, makkalay, olaynne meretay gattiyo daafay qohiyo wode, awudeegaappenne aaruwan qarettiya uraa asaa naatuppe daroti keehippe koyoosona. Qarettiyoogee issi uraa bolli gakkiya metuwaa woy tuggaa akeekidi azzaniyoogaanne he metuwaappe woppaa demmanaadan koyiyoogaa bessees. Bollaa birshshiya, hoˈˈiya awaadan, qarettiyoogee unˈˈettidaageeti metuwaappe woppaa demmanaadaaninne minettanaadan oottana danddayees.

Nuuni oottiyoobaaninne haasayiyooban, harati nuna koyiyoode etakko biyoogaaninne maaddiyoogan qaretaa bessana danddayoos. Nuuni qarettana bessiyoy nu soo asau, nu laggetunne nuuni eriyoogeetu xallaassi gidenna. Nuuni ubba erennaageetuyyookka qarettana danddayoos. Yesuus Kiristtoosi Deriyaa Bollan Tamaarissido Timirttiyan: “Intte inttena siiqiyaageetu xalaalaa siiqikko, intteyyo ai woitoi de7⁠ii?” yaagidi oychiis. Qarettiya Yesuusi gujjidi: “Hegaa gishshau, hara asi intteyyo oottanau koyiyo ubbabaa inttekka asau oottite” yaagiis.—Maatiyoosa 5:46, 47; 7:12.

Ha qaalaa Geeshsha Maxaafaappe beˈana danddayaasa. Geeshsha Maxaafay qarettanau maaddiya waanna kaaleto gidiyoogaa daroti maayoosona. Ayba gaasuwaaninne gido, banttana maaddana danddayennaageeta nuuni maaddana bessiyoogaa Geeshsha Maxaafay daroosona yootees. Geeshsha Maxaafau Aawatiya, nuna Medhida, Xoossaa Yihooway qarettiyoogan waanna leemiso gidiyoogaa Geeshsha Maxaafay yootees.

Leemisuwau Geeshsha Maxaafay: “[Xoossay] aawu bainna naatussinne am77⁠etussi eta pirddaa kessees; betiyaakka siiqidi, qumaanne maayuwaa ayyo immees” yaagees. (Zaarettido Wogaa 10:18) Xoossaa Yihooway, “naaqettidaageetau pirddiyaagaa; namisettidaageetau qumaa immiyaagaa” gidiyoogee odettiis. (Mazamure 146:7) Beteta xeelliyaagan Yihooway: “Intte biittan . . . de7⁠iya bete asa intte biittaa asadan xeellite; a intte huuphedan siiqite” yaagidi azaziis.—Wogaabaa 19:34.

Gidikkokka, qarettiyoogee issi issitoo metiyaaba. Kiitettida PHauloosi Qolasiyaasan deˈiya Kiristtaanetuyyo: “Ceega meretaa a oosuwaara intteppe xaissirggidi Xoossai, a medhdhidaagee, bana milatissanaunne baayyo de7⁠iya eratetta ubbaa immanau, ubba  wode ooraxissiyo ooratta meretaa maayideta. . . . Xoossai dooridoogeetudan, geeshshanne siiqidoogeeta gididi, maarotettaa, qaretaa . . . maayite” yaagidi xaafiis.—Qolasiyaasa 3:9, 10, 12.

Hegaa gishshau, qarettanau baaxetana koshshees. He eeshshay Kiristtaaneti maayana koshshiyo “ooratta meretaa” eeshshatuppe issuwaa. PHauloosi qareti baynna, beni Rooma haaruwaa wode deˈiis. I ba mala Kiristtaaneti keehippe qarettiyaageeta gidanau gita laamiyaa oottanaadan minttettiis.

Qarettiyoogau Wolqqay Deˈees

Issi issi asay qarettiya asaa laafadaaninne qohettiya asadan xeellees. Hegee tumee?

Mule tuma gidenna! Wozanappe qarettanaadan denttettiyay siiquwaa; siiquwau waanna leemiso gididay Xoossaa. “Xoossai siiqo.” (1 Yohaannisa 4:16) Yihooway “maarotettaa Aawaanne minttetto ubbaa Xoossaa” geetettiyoogee bessiyaaba. (2 Qoronttoosa 1:3) “Maarotettaa” geetettida qaalay “haratu qohuwan azzaniyoogaa, qarettiyoogaa” malaatees. Ubba Yihooway “galatennaageetussikka iitatussikka keha”!—Luqaasa 6:35.

Nuna Medhidaagee nuunikka qaretaanne hegaa mala loˈˈo eeshshata bessanaadan koyees. Mikiyaasa 6:8y: “GODAI neeyyo lo77⁠obaa odi wottiisttenne. GODAI neeppe koyiyoogee aibee giikko, neeni suurebaa oottanaagaa, aggenna siiquwaa [bessanaagaa]” yaagees. Leemiso 19:22y: “Asappe koyettiyaagee aggenna siiquwaa” yaagees. Ba Aawaagaa mala eeshshaa polo hanotan bessida, Xoossaa Naˈaa Yesuus Kiristtoosikka: “Intte Aawai Xoossai maariyoogaadan maarite” yaagidi bana kaalliyaageeta zoriis. (Luqaasa 6:36) Addisu Madabanya Amaaratto birshshettay ha xiqisiyaa: “Intte Aaway qarettiyaagaa gididoogaadan, inttekka qarettiyaageeta gidite” yaagees.

Qarettiyoogee daro anjjuwaa demissiyo gishshau, qarettana bessiyo loˈˈo gaasoy deˈees. Leemiso 11:17n deˈiya, “Keha asi baassi lo77⁠obaa oottees” giya qaalay tuma gidiyoogaa darotoo akeekoos. Issi metootida urau nuuni qarettiyo wode, Xoossay hegaa nuuni Au oottidobadan qoppees. Bau goynniyaageeti bessiyo qareta ubbau Xoossay kehatettan zaarees. Kawuwaa Solomoni ayyaanaa kaaletuwan: “Hiyyeesaassi kehiya asi GODAASSI tal77⁠ees; GODAI he lo77⁠o oosuwaa acuwaa  qanxxees” yaagiis. (Leemiso 19:17) PHauloosi: “Oottiyo lo77⁠o ooso ubbaayyo Godai huuphiyan huuphiyan woitanaagaa ereeta” yaagidi xaafiis.—Efisoona 6:8.

Qarettiyoogee issippetettay deˈanaadaaninne sigaa medhanaadan maaddees. Asaa qofaa bala ogiyan akeekidaba gidikko, hegaa aggi bayidi atto gaanaukka maaddees. Asay nu qofaa bala ogiyan akeekiyoy, nu qofaa woykko nuuyyo siyettiyaabaa darotoo nuuni loˈˈo ogiyan qonccissenna gishshatau, woykko nu oottidobaa asay bala ogiyan akeekiyo gishshatau gidana danddayees. Hegaa mala hanotan, qarettiyoogee sigaanne sarotettaa medhanau maaddees. Qarettiyoogan erettiya uraa atto gaanaagee metiyaaba gidenna. Qarettiyoogee PHauloosi Kiristtaaneta: “Issoi issuwaabaa, danddayite; ooninne ba laggiyaa bolli hanqqettidobai de7⁠ikko, issoi issuwau atto yaago” giido zoriyaa nuuni kaallanaadan maaddees.—Qolasiyaasa 3:13.

Qarettiyoogaa—Azzaniyoogaa Oosuwan Bessiyoogaa

Hegaa bollikka, qarettiyoogee metuwaappekka woppissees. Kaseti beˈidoogaadan, qarettiyoogee unˈˈettidaageetuyyo azzaniyoogaa besseesinne metootidaageetuyyo nuuni azzananaadan oottees. Qarettiyoogee waayettiyaageetuyyo azzaniyoogaanne etau koshshiyaabaa oottiyoogaa gujjees.

Kiristtaaneti qarettiyoogan Yesuusa leemisuwaa kaalloosona. I asatettaaninne ayyaanaaban asaa maaddanau wode xayi erenna. I harati metootidoogaa akeekido wode, qarettidi eta maaddiyaabaa oottiis.

Ayyaanaaban qohettida daro asaa beˈido wode Yesuusi ay oottidaakko qoppa: “Daro asaa be7⁠idi, heemmiya asi bainna dorssadan asai hirggiyo gishshaunne asaa maaddiyaabi bainna gishshau, asaayyo qarettiis.” (Maatiyoosa 9:36) “Qarettiis” giya qaalaa xeelliyaagan Geeshsha Maxaafaa issi eranchay, “issi urau wozanappe azzanoy siyettiyoogaa” malaatiyoogaa yootiis. Giriiketto qaalan hagee qarettiyoogaa qonccissanau goˈettiyo wolqqaama qaalatuppe waannatiyaagaa.

Hegaadankka, qarettiya Kiristtaaneti haratuyyo asatettaaninne ayyaanaaban koshshiyaabaa kunttanau sohuwaara zaaruwaa immoosona. Kiitettida PHeexiroosi: ‘Ubbay issi qofan deˈite. Issoi issuwau qarettidi, ishanttudan siiqettite; qassi issoy issuwau kehite’ yaagidi xaafiis. (1 PHeexiroosa 3:8) Leemisuwau, payyatettaara gayttida metuwan, issi keettaa asay hara heeri biido wode, yan deˈiya eta mala Kiristtaaneti kera qanxxennan usuppun aginau deˈanaadan etau bantta keettaa immidosona. Azinay: “Eti nu payyatettaa ubba galla oychoosona; eta minttettoy nuuni boorasennaadan oottiis” yaagiis.

Tumu Kiristtaaneti eti erenna asau koshshiyaabaukka qoppoosona. Eti erenna asaa maaddanau bantta wodiyaa, wolqqaanne banttau deˈiyaabaa ufayssan immoosona. Aadhida huuphe yohuwan qonccida, kase erenna asata bantta dosan maaddidaageeti Yihoowa Markkata.

Hegaa gishshau, Kiristtaane gubaaˈee qarettiyoogeenne siiqoy kumido soho. Gubaaˈiyaa yameti siiqoy denttettin, harata maaddanau keehippe koyoosona. Dumma dumma metuwaappe denddidaagan, gubaaˈiyan deˈiya, aawu aaya baynna naatussinne amˈˈetussi neeni qoppiyoogeenne qarettiyoogee koshshana danddayees. Hiyyeesata, akkamettanau koshshiyaagaa keena miishshi baynnaageeta, keetti baynnaageeta woy hara metoy oyqqidoogeeta maaddana danddayay?

Giriiken deˈiya issi azinaanne machee hanotaa qoppa. Azinay guugge garssan suuttay meqqin harggees. Anne a keettaayiyo haahosan deˈiya hosppitaaliyaa efiidosona. Gidikkonne, guutta miishsha demmiyo eta burttukaaniyaa maxiyo wodee gakkiis. Yaatin, eti hosppitaaliyaa biichidosan ooni maxanee? Eta gubaaˈiyaa asay maxidi, bayzziis; yaatiyoogan etau miishshaa immidosonanne woppaa demmanaadankka maaddidosona.

 Qarettiyoogee daro ogiyan qonccana danddayees. Leemisuwau, qarettiya Kiristtaaneti issi issi metootidaageetussi koshshiya waannabay, eti giyoobaa qaretan siyiya, etau azzaniyaanne Geeshsha Maxaafaappe eta minttettiya uri oychiyoogaa gidiyoogaa akeekoosona.—Roome 12:15.

Qarettiyoogan Erettiyaageeta

Alame yuushuwan deˈiya Kiristtaane gubaaˈee qaretaynne kehatettay kumido, sarotettaanne minttettuwaa demmiyo soho. Qarettiyoogee asay etakko shiiqanaadan oottiyoogaa, qassi qarettennaagee asay etappe haakkanaadan oottiyoogaa tumu Kiristtaaneti akeekoosona. Hegaa gishshau, saluwan deˈiya bantta Aawaa milatanau eti koyiyo wode, wozanappe ‘qarettiyoogaa’ oosuwan bessanau baaxetoosona.

Yihoowa Markkati bantta giddon deˈiya siiquwaa, qaretaanne issoy issuwau qoppiyoogaa akeekanaadan nena shoobboosona. He hanotaa neeni nashshanaagaanne hegee nena ufayssanaagaa eti ammanettoosona.—Roome 15:7.

[Sinttaa 5n dèiya misiliyaa]

PHauloosi Qolasiyaasan deˈiya Kiristtaaneti qaretaa maayanaadan zoriis

[Sinttaa 7n dèiya misiliyaa]

Yesuusi harati metootidoogaa akeekido wode, qarettidi eta maaddiyaabaa oottiis