“Ayyaanaa Bisuwaa” Hiillan Goˈettite

“Geeshsha Ayyaanaa bisuwaa, Xoossaa qaalaa, oiqqite.”—EFISOONA 6:17.

1, 2. Kawotettaabaa yootiya daro asaa koshshiyo gishshau nu zaaroy ay gidana koshshii?

YESUUSI asau ayyaanaaban koshshiyaabaa akeekidi, ba erissiyo ashkkarata: “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite” yaagiis. Yesuusi hegaadan giidi aggiigibeenna. Yesuusi hegaadan gi simmidi, “tammanne naa77⁠u erissiyo ashkkarata xeesidi,” sabbakanaadan woykko ‘cakkanaadan’ kiittiis. (Maatiyoosa 9:35-38; 10:1, 5) Takkidi, Yesuusi “hara laappun tammu asata dooriis. Etappe naa77aa naa77aa” hegaa mala oosuwau kiittiis.—Luqaasa 10:1, 2.

² Ha wodiyankka Kawotettaabaa yootiya daro asaa koshshees. Alame yuushuwan, 2009 haggaazo layttan Kiristtoosa Hayquwaa Hassayiyo Baalan shiiqida asaa qooday 18, 164,539. He qooday Yihoowa Markkatu qoodaappe 10 miilooneppe dariyaagaa aadhees. Kattay cahaa bessiis. (Yohaannisa 4:34, 35) Hegaa gishshau, daro oosancha yeddana mala nuuni woossana koshshees. SHin he woosaara moggiya ogiyan waanidi deˈana danddayiyoo? Kawotettaabaa sabbakiyoonne erissiyo ashkkara oottiyo oosuwaa mishettidi oottiyo wode, keehippe murutiyoogan hegaadan oottana danddayoos.—Maatiyoosa 28:19, 20; Marqqoosa 13:10.

3. Nuuni haggaazuwan keehi murutanaadan Xoossaa ayyaanay keehippe maaddiyoy ayba ogiyaanee?

³ Aadhida huuphe yohuwan, Xoossaa ayyaanaa kaaletuwaa kaalliyoogee “Xoossaa qaalaa xalan” yootanau waati maaddiyaakko beˈida. (Oosuwaa 4:31) He ayyaanay nuuni haggaazuwan hiillancha gidanaadankka maaddana danddayees. Nuuni haggaazuwan murutanaadan maaddiya issibay, Xoossaa Yihooway immido muruta miishshaa, a Qaalaa, Geeshsha Maxaafaa loytti goˈettiyoogaa. I xaafettidoy geeshsha ayyaanaana. (2 Ximootiyoosa 3:16) A giddon deˈiya qofay Xoossay yootidoba. Hegaa gishshau, nuuni haggaazuwan Geeshsha Maxaafaa tumaa hiillan goˈettiyo wode, geeshsha ayyaanaa kaaletuwaa kaalloos. Hegaadan waatidi oottana danddayiyaakko beˈanaappe kasetidi, he Qaalay ay keena wolqqaamakko ane qoppoos.

‘Xoossaa Qaalay Oottees’

4. Geeshsha Maxaafay issi uri ayba ogiyan laamettanaadan maaddana danddayii?

⁴ Xoossaa qaalau woykko a giddon deˈiya qofau gita wolqqay deˈees! (Ibraawe 4:12) Geeshsha Maxaafan deˈiya qofay, leemiso hanotan kureenne kolzzee issippe gayttiyoosaa shaakkana gakkanaassi caddiyo gishshau, asi medhiyo ay bisoppekka aadhidi qarattees. Geeshsha Maxaafaa tumay issi uraa wozanaa denttetteesinne a koshshaanne qofaa shaakkidi, i ay mala asakko qonccissees. Geeshsha Maxaafaa tumay issi ura denttetteesinne laamettanaadan oottees. (Qolasiyaasa 3:10 nabbaba.) Ee, Xoossaa Qaalay asa deˈuwaa laammana danddayees!

5. Geeshsha Maxaafay nuna ayba ogiyan kaalettana danddayii, wurssettan ay demissii?

⁵ Hegaa bollikka, Geeshsha Maxaafay aara laggetiyay baynna aadhida eray deˈiyo maxaafa. Ha wuttaawulettida alamiyan asay waani deˈana danddayiyaakko maaddiya qofaa oyqqiis. Xoossaa Qaalay nu tanggo xallaassa gidennan nuuni baana ogiyaukka pooˈo. (Mazamure 119:105) Nuuni laggeta, wodiyaa aattiyoobaa, oosuwaa, maayuwaanne hegaa mala  harabata dooriyo wode woykko nuna metoy gakkiyo wode keehippe maaddees. (Mazamure 37:25; Leemiso 13:20; Yohaannisa 15:14; 1 Ximootiyoosa 2:9) Xoossaa Qaalan deˈiya baaso siraatata nuuni oosuwan peeshshiyoogee haratuura loˈˈo gaytotettay deˈanaadan maaddees. (Maatiyoosa 7:12; Piliphphisiyuusa 2:3, 4) Nuuni baana ogee leemiso hanotan wagaggidi pooˈiyo wode, nuuni kuuyiyoobay ay kaalettanaakko akeekana danddayoos. (1 Ximootiyoosa 6:9) Geeshsha Maxaafay Xoossay sinttanau halchidobaakka yootees; nuuni he halchuwaara moggiya ogiyan deˈanaadankka maaddees. (Maatiyoosa 6:33; 1 Yohaannisa 2:17, 18) Issi uri Xoossay immido baaso siraatan ba deˈuwaa kaalettiyaaba gidikko, keehi ufayssiya deˈo daana danddayees!

6. Nuuni ayyaanaaban olettiyo wode Geeshsha Maxaafay wolqqaama miishshadan waati maaddii?

⁶ Geeshsha Maxaafay nuuni ayyaanaaban olettiyo wode, wolqqaama miishsha gididikka maaddiyoogaa qoppite. PHauloosi Xoossaa Qaalaa “Geeshsha Ayyaanaa bisuwaa” yaagiis. (Efisoona 6:12, 17 nabbaba.) Geeshsha Maxaafaa loyttidi goˈettiyo wode, asay Seexaanau aylletiyoogaappe ayyaanaaban naxa kiyanaadan oottana danddayees. Hegee asaa woriya biso gidennan ashshiya biso. Nuuni a hiillan goˈettanau baaxetana koshshennee?

Xoossaa Qaalaa Suure Goˈettiyoogaa

7. “Geeshsha Ayyaanaa bisuwaa” loytti goˈettiyoogaa tamaarana koshshiyoy aybissee?

⁷ Issi wotaaddaray ba ola miishshaa loytti goˈettiyoogaa meezetidaabanne tamaaridaba gidikko, olaa wode muruta ogiyan goˈettana danddayees. Nuuni ayyaanaaban olettiyo wode, “Geeshsha Ayyaanaa bisuwaa” goˈettiyoy hegaara issi mala ogiyaana. PHauloosi: “Neeni Xoossaa tumatettaa qaalaa suuretettan yootiyaagaanne qassi a oosuwaayyo yeellatenna oosanchcha gidada, Xoossai sabbiyo asadan, ne huuphiyaa Xoossau immanau minna” giidi xaafiis.—2 Ximootiyoosa 2:15.

8, 9. Geeshsha Maxaafay giyoobaa akeekanau nuna aybi maaddii? Leemisuwaa yoota.

⁸ Nu haggaazuwan ‘tumatettaa qaalaa suuretettan yootanau’ aybi maaddii? Geeshsha Maxaafan deˈiyaabaa haratuyyo qonccissidi yootanaappe kase, nuuni hegaa loyttidi akeekana koshshees. Hegee xiqisiyaa yuushuwan deˈiya qofaa akeekiyoogaa gujjees.

⁹ Issi xiqisiyaa suure akeekanau a yuushuwan deˈiya qofaa akeekana koshshees. Galaatiyaa 5:13n PHauloosi goˈettido qaalay hegau leemiso. I: “Inttena gidikko, ta ishanttoo, ailletettaappe kiyanau xeesettideta. Gidinkka ailletettaappe intte kiyidoogan, intte asatettaa amoi inttena haaroppo. Hegaa gishshaa siiquwan issoi issuwaayyo haarettite” yaagidi xaafiis. PHauloosi ayba aylletettaappe kiyiyoogaa yootidee? I yootidoy nagaraanne hayquwaa woy worddo ammanuwaa woy hegaa mala hara aylletettaappe kiyiyoogee? Xiqisiyaa yuushuwan deˈiya qofay ‘higgiyaa qanggettaappe wozettidi’ naxa kiyiyoogaa PHauloosi  yootidoogaa qonccissees. (Galaatiyaa 3:13, 19-24; 4:1-5) I yootidoy Kiristtaaneti naxa kiyiyoogaabaa. He naxatettaa nashshiyaageeti issoy issuwau siiquwan haarettoosona. Siiqennaageeti zigiroosonanne ooyettoosona.—Galaatiyaa 5:15.

10. Geeshsha Maxaafaa loyttidi akeekanau ay qoppana koshshii, he qofaa awuppe demmana danddayiyoo?

¹⁰ Issi xiqisiyaa birshshettaa suure akeekanau hegaara gayttida hanota ubbaa, giishin he maxaafaa xaafida uraa, awudenne ayba hanotan xaafettidaakko akeekana koshshees. Maxaafay ayba halchuwan xaafettidaakko, danddayettiyaaba gidikko qassi, he wode deˈiya asaa wogaa, eeshshaa, eti xoqqu oottidi xeelliyoobaanne eta goynuwaabaa akeekiyoogeekka maaddees. *

11. Xiqisiyaa qonccissiyo wode akeekana koshshiyoy aybee?

¹¹ “Tumatettaa qaalaa suuretettan” yootiyoogee Geeshsha Maxaafaa tumaa suure qonccissiyoogaappe aadhiyaabaa gujjees. Geeshsha Maxaafaa asa yashissanau goˈettennaadan naagettana koshshees. Yesuusi Dabloosan paacettido wode oottidoogaadan, nuuni tumau exatiyoogaa bessanau Geeshsha Maxaafaa goˈettana danddayiyaaba gidikkonne, asa wolqqan ammanttanau woy yeellayanau goˈettana bessenna. (Zaarettido Wogaa 6:16; 8:3; 10:20; Maatiyoosa 4:4, 7, 10) Nuuni kiitettida PHeexiroosa zoriyaa oosuwan peeshshana koshshees: “Kiristtoosa intte wozanan bonchchitenne a intte Goda oottite. Xoossai intteyyo immana giido inttenan de7⁠iyaagau gaaso oichchiya ooyyoonne zaaro immanau ubba wode giigi uttite; shin hegaa ashkketettaaninne yashshatettan oottite.”—1 PHeexiroosa 3:15.

12, 13. Xoossaa Qaalaa tumay laalana danddayiyo ‘qatoy’ aybee? Leemisuwaa yoota.

¹² Suure goˈettiyaaba gidikko Xoossaa Qaalay ay polana danddayii? (2 Qoronttoosa 10:4, 5 nabbaba.) Geeshsha Maxaafaa tumay “qatuwaa laalanau” danddayees; giishin worddo timirttiyaa, qohiya oosuwaa, polo gidenna asaa naatu eran baasettida qofaa qoncciyaa kessees. “Xoossaa eratettaa bolli denddidi xubbiya” qofaa laalanau Geeshsha Maxaafaa goˈettana danddayoos. Harati tumaara moggiya ogiyan deˈanau bantta qofaa giigissanaadan maaddanau Geeshsha Maxaafaa timirttiyaa goˈettana danddayoos.

¹³ Leemisuwau, Hindde biittan deˈiya, layttay 93 gidido maccaaseebaa qoppite. A naatettaappe doommada shemppoy hara mereta gididi zaaretti yelettees giya timirttiyaa ammanausu. A hara biittan deˈiya ba naˈaara dabddaabbiyan Geeshsha Maxaafaa xannaˈiyoogaa doommido wode, Yihoowabaanne i gelido qaalaabaa tamaarada ammanaasu. SHin, shemppoy hara mereta gididi zaaretti  yelettees giya timirttiyaa a mintta ammaniyo gishshau, i naˈay hayqqida asaa hanotaabaa xaafido wode eqettaasu. A hagaadan gaasu: “Intte Geeshsha Maxaafay giyoobay ammananau taayyo metiyaaba. Ubba haymaanootee nu giddon hayqqennabay deˈiyoogaa tamaarissees. Taani ashoy hayqqiyoogaanne ayfiyan beettennabay hara mereta gididi 8,400,000⁠too zaaretti zaaretti yelettiyoogaa ammanaydda takkaas. Hagee tuma gidana danddayennay aybissee? Ha ubba haymaanootee balee?” ‘Geeshsha ayyaanaa bisoy’ hegaa mala qatuwaa laalana danddayii? A he allaalliyaara gayttidaagan Geeshsha Maxaafaappe gujo qofaa demma simmada amarida saaminttaappe guyyiyan: “Taani hayqqida asaabaa tumaa wurssettan akeekiyoogaa doommaas. Asay hayquwaappe denddiyo wode nuuni siiqiyoogeetuura gayttana danddayiyoogaa eridoogee tana keehi ufayssiis. Xoossaa Kawotettay matan yaanaagaa yeemottays” yaagada xaafaasu.

Ammanttanau Goˈettite

14. Nuuni yootiyoobaa siyiyaageeta ammanttiyoogaa giyoogee woygiyoogee?

¹⁴ Haggaazuwan Geeshsha Maxaafaappe yootiyoogaa xallay a muruta ogiyan goˈettiyoogaa bessenna. PHauloosi ‘ammanttiya’ ogiyan yootiis; nuunikka hegaadan oottana bessees. (Oosuwaa 19:8, 9; 28:23 nabbaba.) “Ammanttiyoogaa” giyoogee “akeekanaadan oottiyoogaa” giyoogaa. Ammanida uri “issibay tuma gidiyoogan ammanettees.” Nuuni issi uri Geeshsha Maxaafay yootiyoobaa ammananaadan oottiyo wode, i he timirttiyaa akeekidi ammanettanaadan oottoos. Hegaadan oottanau, nuuni yootiyoobaa siyiya uraa hegee tuma gidiyoogaa ammanttana koshshees. Kaallidi deˈiyaagaadan hegaa oottana danddayoos.

15. Asay Geeshsha Maxaafaa bonchanaadan oottiya ogiyan xiqisiyaa waatada goˈettana danddayay?

¹⁵Xoossaa Qaalaa bonchanaadan oottiya ogiyan xiqiseta goˈetta. Neeni xiqisiyaa erissiyo wode, he allaalliyaara gayttidaagan Xoossaa qofaa eriyoogee keehippe koshshiyoogan xeelaa wotta. Issi oyshaa oychada keettaawaa zaaruwaa siya simmada, kaallidi deˈiyaagaadan gaana danddayaasa: ‘Ha allaalliyaa xeelliyaagan Xoossaa qofay aybakko ane beˈoos.’ Woy, ‘Hagaa xeelliyaagan Xoossay woygii?’ gaada oychana danddayaasa. Xiqisiyaa hagaadan erissiyoogee, Geeshsha Maxaafay Xoossay immidoogaa gidiyoogaa qonccissees; qassi nuuni yootiyoobaa siyiyaageeti a bonchanaadan maaddees. Xoossaa ammaniya ura gididi, Geeshsha Maxaafay tamaarissiyoobaara meezetibeenna urau markkattiyo wode, hegaadan oottiyoogee keehi koshshees.—Mazamure 19:7-10.

16. Neeni xiqisiyaa suure qonccissanaadan maaddiyay aybee?

¹⁶Xiqisiyaa nabbabiyoogaappe aadhiyaabaa ootta; qonccissa. PHauloosi ba tamaarissiyoobaa ‘birshshidi yootiyoogaanne tuma gididoogaa erissiyoogaa’ meeze oottiis. (Oosuwaa 17:3) Geeshsha Maxaafaa xiqisiyan darotoo issi qofaappe daroy dees; neeni tobbiyoobau haniya qofaa dummayada qonccissiyoogaa koshshana danddayees. Qofay deˈiyo qaalaa zaarettada yootiyoogan, woykko keettaaway hegaa akeekanaadan maaddiya oyshaa oychiyoogan hegaadan oottana danddayaasa. Yaatada, xiqisiyan deˈiya he qofaa qonccissa. Hegaappe guyyiyan, neeni yootiyoobaa ezggiyaagee he xiqisiyaa ba deˈuwan waatidi oosuwan peeshshanaakko akeekanaadan maadda.

17. Geeshsha Maxaafaappe ammanttiya ogiyan waatada yootana danddayay?

¹⁷Geeshsha Maxaafaappe ammanttiya ogiyan yoota. PHauloosi kehanne ammanttiya  hanotan “Xoossaa maxaafatuppe asaara haasayiis.” (Oosuwaa 17:2, 4) Neeni yootiyoobaa siyiyaageetu wozanaa denttettanau aagaadan oottanau baaxeta. Izaawuyyo qoppiyoogaa bessiya liiqo oyshaa oychiyoogan a wozanan deˈiyaabaa ‘duuqqa.’ (Leemiso 20:5) Keha gidennabaa haasayennaadan naagetta. Qonccenne ammanttiya ogiyan haasaya. Hegau ammanttiya naqaashaa yoota. Neeni yootiyoobay Xoossaa Qaalan baasettidaagaa gidana bessees. Naaˈˈu woy heezzu xiqisiyaa bolli bollan nabbabiyoogaappe issi xiqisiyaa qonccissiyoogaaninne qofaa leemisuwan yootiyoogan loyttidi goˈettiyoogee loˈˈo. Qofaa kaafiya naqaashaa goˈettiyoogee “asi ekkiyo,” ammanttiya haasayaa haasayanaadan maaddees. (Leemiso 16:23) Issi issitoo, pilggidi gujo qofaa yootiyoogee koshshana danddayees. Qommoora yootido 93 laytta maccaasiyaa shemppoy (woykko ayyaanay) hayqqenna giyo timirttee keehi aakkidoy aybissakko erana koshshiis. Geeshsha Maxaafay hegaa xeelliyaagan tamaarissiyoobaa o ammanttanau he timirttiyaa dendduwaabaanne hegee waanidi daro haymaanootiyaa timirtte gididaakko yootana koshshiis. *

Hiillan A Goˈettiyoogaa Aggoppite

18, 19. Nuuni “Geeshsha Ayyaanaa bisuwaa” hiillan ubbatoo goˈettana koshshiyoy aybissee?

¹⁸ “Ha sa7aa merai” laamettiiddi deˈiyoogaa Geeshsha Maxaafay yootees. Iita asati kaseppe iiti iiti boosona. (1 Qoronttoosa 7:31; 2 Ximootiyoosa 3:13) Yaatiyo gishshau, “Geeshsha Ayyaanaa bisuwaa, Xoossaa qaalaa” goˈettidi nuuni ubbatoo “qatuwaa” laaliyoogee keehippe koshshiyaaba.

¹⁹ Worddo timirttiyaa asaa wozanaappe xayssanaunne suure asaa wozanaa denttettanau nuuyyo Xoossaa Qaalaa, Geeshsha Maxaafay deˈiyoogeenne an goˈettiyoogee keehippe ufayssiyaaba! Geeshsha Maxaafaa qofay laalana danddayenna qatoy baawa. Hegaa gishshau, Xoossay nuuyyo immido, Kawotettaabaa awaajjiyo oosuwan “geeshsha ayyaanaa bisuwaa” hiillan goˈettanau wozanappe baaxettiyaageeta gidoos.

[Footnotes]

Ay Tamaaradii?

• Xoossaa Qaalay ay keena wolqqaamee?

• ‘Tumatettaa qaalaa suuretettan yootana’ danddayiyoy ayba ogiyaanee?

• Geeshsha Maxaafaa qofay “qatuwaa” waatana danddayii?

• Haggaazuwan asaa kaseegaappe aaruwan waatada ammanttana danddayay?

[Questions]

[Sinttaa 18n diya misiliyaa]

Xoossaa Qaalaa Ammanttiya Hanotan Goˈettiyo Ogiyaa

[Sinttaa 18n deʼiya misiliyaa]

▪ Geeshsha Maxaafaa bonchanaadan ootta

▪ Xiqisiyaa qonccissa

▪ Ammanttiyaanne wozanaa denttettiya ogiyan yoota

[Sinttaa 17n deʼiya misiliyaa]

Neeni “Geeshsha Ayyaanaa bisuwaa” loyttada goˈettiyoogaa tamaarana bessees