“Ayyaanaaban Diccanau Naatussi Deˈiya Maataa”

SIWIDINE Biittaa Naatu Maataa Akkaadaamee, “Ayyaanaaban Diccanau Naatussi Deˈiya Maataa” giya huuphe yohuwan Tisaase 9, 2008n seminaariyaa shiishshiis. Siwidine Woosa Keettaa, Kiristtaane geetettiya hara ammanuwaa, Isilaama haymaanootiyaanne asi koyiyoobaanne xoqqu ootti xeelliyoobaa kaseyiya asa eraa kalˈˈatiya asati daro qofaa qonccissidosona.

Hegeetuppe issi qeesee: “Geeshsha Maxaafaa taariketi naatu ayyaana hanotau keehippe koshshiyoogaa tuma gididanne suure hanotan issi uri qonccissana danddayenna” yaagiis. Naatussi ayyaanaaban koshshiyaabaa Geeshsha Maxaafay ayba ogiyan kunttii?

He qeesee: “Xiqisetinne taariketi naati banttarkka wotti denttidi qoppanaadan maaddiya qofaa oyqqidosona” yaagiis. I, “Addaamenne Hewaani, Qaayeelanne Aabeela, Daawitanne Gooliyaada, Yesuusa yeletaa, giiraa shiishshiya Zakkiyoosa taarikiyaanne miishshaa laalida naˈaa leemisuwaa, qassi keha gidida Samaare bitaniyaa leemisuwaa” yootiis. Hageeta yootidoy “cimuwaa, maariyoogaa, atto giyoogaa, ixuwaa, toochiyoogaa, sigettiyoogaa, mooruwaa giigissiyaabaa oottiyoogaanne ba huuphe xallaa siiqiyoogaappe dummatiya ishatetta siiquwaa malatiya, asa deˈuwan xoqqa sohoy deˈiyo, [naatu] qofaa suurissana maaddiya leemisotuppe amaridaageeta” qonccissanaassa. Gujjidikka, i: “Ha xiqiseti issi uraa deˈon goˈˈana, oosuwan peˈananne i deˈon demmiyo era gidana danddayiyaabata” yaagiis.

Geeshsha Maxaafaa nabbabiyoogaa minttettiyoogee loˈˈo gidiyoogee erettidaba. SHin naati Geeshsha Maxaafaappe nabbabiyoobaa ‘banttarkka wotti denttidi qoppidi’ tumuppe suure kuushshaa kuuyana danddayiyoonaa?

Gastta asaukka ubba Geeshsha Maxaafaa qofaa qonccissana koshshees. Leemisuwau, issi bitanee ‘barkka wotti denttidi qoppiyoogan’ ayyaanaabaa suure akeekibeennaagaa Geeshsha Maxaafay yootees. He bitanee Toophiyaa biittaa suntta. I hananabaa yootiya Isiyaasa maxaafaa nabbabees; shin qofaa akeekibeenna. I hananabaa yootiyaagee giidobaa eranau koyido gishshau, erissiyo ashkkaraa Piliphoosi qonccissidobaa ufayttidi ekkiis. (Oosuwaa 8:26-40) Geeshsha Maxaafaa qofaa akeekanau maaduwaa koshshidoy Toophiyaa sunttaa xalla gidenna. Nu ubbaassi, ubba qassi naatussi Geeshsha Maxaafaa qofaa qonccissiyoogaa koshshees.

Geeshsha Maxaafay: “Na7a wozanaa azallatettai baqqi oiqqees” yaagees. (Leemiso 22:15) Naatussi kaaletuwaanne azazuwaa koshshees; qassi eta yelidaageetuyyo kandduwaabaanne ayyaanaabaa Geeshsha Maxaafaaninne Kiristtaane gubaaˈiyan tamaariyooban baasettidi eta tamaarissiyo aawatettay deˈees. Naatuyyo hegaa mala loohissuwaa demmiyo maatay deˈees. “Oosuwan peeshshiyoogan iitaa kehaa shaakkanau bantta akeekaa abbiyaa loohissida” wozannaama asa gidanau ayyaanaabaa dichau Geeshsha Maxaafan baasettida loohissuwaa naati naatettaappe doommidi demmana koshshees.—Ibraawe 5:14.