“Ayyaanainne Bullashettiyaara, ‘Haaya’ yaagoosona”

“Ayyaanainne bullashettiyaara, “Haaya” yaagoosona. . . . Saamettida asi ooninne haa yo. De7⁠o haattaa koyiya asi ooninne coo ekko.”—AJJUUTAA 22:17.

1, 2. Kawotettaara gayttidabau nu deˈuwan ayba sohoy deˈana koshshii? Aybissi?

KAWOTETTAARA gayttidabau nu deˈuwan ayba sohoy deˈana koshshii? Yesuusi bana kaalliyaageeti ‘kasetidi kawotettaa koyanaadan’ minttettiis; eti hegaadan oottikko, Xoossay etau koshshiyaabaa kunttanaagaa akeekissiis. (Maatiyoosa 6:25-33) I Xoossaa Kawotettaa, issi zalˈˈanchay “baayyo de7⁠iyaabaa ubbaa baizzidi” shammido keehi alˈˈo inqquwan leemisiis. (Maatiyoosa 13:45, 46) Nuuni Kawotettaabaa sabbakiyoonne erissiyo ashkkara oottiyo oosuwaa xoqqu ootti xeellana koshshennee?

² Aadhida naaˈˈu huuphe yohotun beˈidoogaadan, nuuni xalan yootiyoogeenne haggaazuwan  Xoossaa Qaalaa hiillan goˈettiyoogee Xoossaa ayyaanaa kaaletuwaa kaalliyoogaa bessees. He ayyaanay nuuni ubbatoo Kawotettaabaa sabbakanaadankka keehi maaddees. Hegaadan waati maaddiyaakko ane beˈoos.

Qoncce SHoobiyaa

3. Asaa naati ubbay ‘yiidi’ uyanaadan shoobettidoy ayba haattee?

³ Asaa naati geeshsha ayyaanaa baggaara qoncce shoobiyaa shoobettiiddi deˈoosona. (Ajjuutaa 22:17 nabbaba.) He shoobee, saamettida uray issi dumma haattaa ‘yiidi’ uyanaadaana. Hegee coo haatta gidenna. Haattay deˈuwau keehi koshshiyaaba gidikkonne, Yesuusi haatta ollaa matan Samaare maccaaseeyyo: “Taani immana haattaa uyiya ooninne mulekka saamettenna. Taani immana haattai he aawu giddon merinaa de7⁠uwau pulttiya pultto gidana” yaagido wode dumma haattaabaa yootiis. (Yohaannisa 4:14) Asaa naati uyanaadan shoobettido dumma haattay merinaa deˈuwaa demissiyaagaa.

4. Deˈo haattay koshshidoy aybissee? He haattay ay malaatii?

⁴ Koyro bitanee Addaamee ba machee Hewaaniira banttana medhida, Xoossaa Yihoowayyo azazettennan ixxido wode, he deˈo haattay koshshiis. (Doomettaabaa 2:16, 17; 3:1-6) “[Addaamee] ba kushiyaa yeddidi, de7⁠o mittaappe ekkidi, qassi meenna malanne merinau paxa de7⁠enna mala” koyro azinaynne machiyaa bantta deˈiyo gannatiyaappe yedetettidosona. (Doomettaabaa 3:22) Asaa naatu aawa gidiyoogaadan, Addaamee asa zeretta ubbau hayquwaa laatissiis. (Roome 5:12) Deˈo haattay azazettiya asaa naata nagaraappenne hayquwaappe ashshanaunne etau Gannate saˈan polo gidida merinaa deˈuwaa immanau Xoossay giigissidobaa ubbaa malaatees. Ha giigissoy giigidoy Yesuus Kiristtoosa wozuwaa yarshshuwaana.—Maatiyoosa 20:28; Yohaannisa 3:16; 1 Yohaannisa 4:9, 10.

5. “De7⁠o haattaa” coo ekkiyo shoobiyau pulttoy oonee? Qonccissa.

⁵ “De7⁠o haattaa” coo ekkiyo shoobiyau pulttoy oonee? Yesuusa baggaara deˈuwau giigissido giigisso ubbay Kiristtoosa SHaˈu Layttaa Haaruwaa wode asaa naatussi kumetta hanotan polettiyoogee, “birilledan phooliya de7⁠o haattaa” shaafan leemisettiis. He shaafay “Xoossaa kawotaa araataappenne Dorssaa kawotaa araataappe” goggiyoogaa Yohaannisi beˈiis. (Ajjuutaa 22:1) Hegaa gishshau, deˈo haattau pulttoy Deˈuwaa Immiya, Yihoowa. (Mazamure 36:9) ‘Dorssaa,’ Yesuus Kiristtoosa baggaara he haattay deˈanaadan oottiday Yihoowa. (Yohaannisa 1:29) Ha shaafan leemisettidabay, Addaamee makkalidoogan asaa naata gakkida qoho ubbaa xayssanau Yihooway giigissidobaa malaatees. Ee, “haaya” giya shoobiyau Pulttoy Xoossaa Yihoowa.

6. ‘Deˈo haattaa shaafay’ goggiyoogaa doommidoy awudee?

⁶ ‘Deˈo haattaa shaafay’ kumetta hanotan gogganay Kiristtoosa SHaˈu Layttaa Haaruwaa wode gidikkonne, “dorssai” saluwan kawotido 1914n, “Godaa gallassan” goggiyoogaa doommiis. (Ajjuutaa 1:10) Yaatiyo gishshau, deˈuwau koshshiya issi issi giigissoti hegaappe simmin demmiyooba gididosona. Hegee Xoossaa Qaalan, Geeshsha Maxaafan deˈiya, “haattan” leemisettida qofaa gujjees. (Efisoona 5:26) Xoossaa Kawotettaa mishiraachuwaa siyidi zaaruwaa immidi, “de7⁠o haattaa” ekkanaadan ubba asay shoobettiis. SHin Godaa gallassan shoobbiiddi deˈiyay oonee?

“Bullashettiyaara, ‘Haaya’” Yaagausu

7. “Godaa gallassan” koyro “haaya” giya shoobiyaa shoobbiday oonee? Oona?

⁷ “Haaya” giya shoobiyaa koyro shoobbidaageeti bullashettiyaari yameta; giishin ayyaanan tiyettida Kiristtaaneta. Oona shoobbidonaa? Bullashettiyaara bana barkka, “Haaya” gabeennagee qoncce. A shoobbidoy, “Ubbaappe Wolqqaama Xoossaa gita” gallassaa olaappe simmin saˈan merinaa deˈuwaa demmanau hidootiyaageeta.—Ajjuutaa 16:14, 16 nabbaba.

8. Ayyaanan tiyettida Kiristtaaneti Yihoowa shoobiyaa 1918⁠ppe doommidi yootiiddi deˈiyoogaa bessiyay aybee?

 ⁸ Kiristtoosa kaalliya, ayyaanan tiyettidaageeti 1918⁠ppe doommidi, shoobbiiddi deˈoosona. Armmageedoona olaappe simmin daro asay gannate saˈan deˈiyo hidootay, “Ha Wodiyan Deˈiya Miilooniyan Qoodettiya Asay Hayqqennan Aggana Danddayees” giya dere haasayan he laytti qoncciis. Geeshsha Maxaafaa Tamaareti 1922n Amarkkan, Ohayon, Seedar Poyntti giyoosan awuraajjaa shiiquwaa shiiqido wode ‘Kawuwaanne a kawotettaa erissanaadan’ minttettiya haasayay shiiqiis. He minttettoy bullashettiyaari yametuppe attidaageeti daro asaa shoobbanaadan maaddiis. Laappune 15, 1929 Wochiyo Keelan Ajjuutaa 22:17n baasettida, “Keha SHoobiyaa” giya huuphe yohoy kiyiis. He huuphe yohuwan deˈiya amarida qofay: “Ayyaanan tiyettidaageetuppe attidaageeti [Ubbaappe Xoqqiyaagaara] hashetiyoogan, ‘Haaya’ giya keha shoobiyaa shoobboosona. Ha kiitay xillotettaanne tumaa dosiyaageetuyyo odettana koshshees. Hegaa haˈˈi yootana bessees” yaagees. Hanno gakkanau, bullashettiyaari yameti he shoobiyaa shoobbiiddi deˈoosona.

“Siyiya Ooninne, ‘Haaya’ Yaago”

9, 10. SHoobiyaa siyiyaageeti hara asaa, “Haaya” gaanaadan shoobettidoy ayba ogiyaanee?

⁹ “Haaya” giya shoobiyaa siyiyaageeti shin? Etikka, hara asaa “Haaya” gaanaadan shoobettidosona. Leemisuwau, Naase 1, 1932 Wochiyo Keelay sinttaa 232n yaagees: “Kawotettaa mishiraachuwaa yootanaadan ayyaanan tiyettidaageeti ubbaa minttettona. Hegeeti Godaa kiitaa yootanau Goday tiyidoogeeta gidana koshshenna. Armmageedoonappe attidi saˈan merinaa deˈuwaa demmiya asau haˈˈi deˈo haattaa gattiyo maatay deˈiyoogaa eriyoogee, Yihoowa Markkata keehippe minttettiyaaba.”

¹⁰ Naase 15, 1934 Wochiyo Keelay sinttaa 249n, shoobiyaa siyiyaageeti, “Haaya” giyo aawatettaa xeelliyaagan: “Yonadaaba bagga geetettidaageeti Yeehu bagga geetettidaageetuura,  giishin ayyaanan tiyettidaageetuura issippe baana koshshees; qassi eti ayyaanan tiyettida Markka gidana xayikkonne kawotettaa kiitaa yootoosona” yaagees. Ajjuutaa 7:9-17n “zawai bainna daro asaa” geetettidaageeti oonakko 1935n qoncciis. Hegee Xoossaa shoobiyaa eesuwan gattanau keehippe maaddiis. He wodeppe doommidi, tumatettan goynniya, ha wodiyan laappun miilooneppe dariya, qooday gujji gujji biyo zaway baynna daro asay he shoobiyaa ekkiis. Eti he kiitaa ufayssan siyidi, bantta huuphiyaa Xoossau geppidi haattan xammaqettidosona; qassi harati ‘yiidi deˈo haattaa coo ekkanaadan’ bullashettiyaari bagga gididaageetuura shoobboosona.

‘Ayyaanay, “Haaya” Yaagees’

11. Koyro xeetu layttan geeshsha ayyaanay sabbakiyo oosuwaa ayba ogiyan maaddidee?

¹¹ Yesuusi Naazireeten Ayhuda woosa keettan sabbakido wode, hananabaa yootiya Isiyaasi xaafido xaatta maxaafaa dooyidi: “Taani hiyyeesaassi lo77⁠o mishiraachchuwaa yootanau tiyettido gishshau, Godaa Ayyaanai ta bollan de7⁠ees. Qashettidaageetussi birshshettiyoogaa, qooqetussi xeelliyoogaa yootana mala, qassi qohettidaageeta qohuwaappe kessana mala, dosettida Godaa laittaa yootana mala, tana kiittiis” yaagidi nabbabiis. Hegaappe simmidi: “Hachchi nabbabettin, intte siyiyo wode, ha Xoossaa maxaafai giidoogee polettiis” yaagidi, Yesuusi he qaalati ba bolli polettidoogaa yootiis. (Luqaasa 4:17-21) Yesuusi saluwaa baanaappe kase ba erissiyo ashkkaratuyyo: “Geeshsha Ayyaanai intte bolli wodhdhiyo wode, wolqqaa intte ekkana; ekkidi . . . sa7aa gaxaa gakkanaashinkka taassi markkattiyaageeta gidana” yaagiis. (Oosuwaa 1:8) Koyro xeetu layttan sabbakiyo oosuwaara gayttidaagan geeshsha ayyaanay gitabaa oottiis.

12. Ha wodiyan harata shoobbiyoogan Xoossaa ayyaanay waatidi maaddii?

¹² SHoobiyaa asau gattanaadan Xoossaa ayyaanay ha wodiyan waatidi maaddii? Geeshshaa ayyaanaa Pulttoy Yihoowa. I ba ayyaanaa goˈettidi bullashettiyaari yameti ba Qaalaa, Geeshsha Maxaafaa akeekanaadan oottees. SHoobiyaa gattanaadaaninne saˈan Gannatiyan merinaa deˈuwaa hidootay deˈiyoogeetussi Geeshsha Maxaafaa tumaa qonccissanaadan he ayyaanay eta denttettees. He shoobiyaa ekkidi, Yesuus Kiristtoosi erissiyo ashkkara gididi, harata shoobbiyaageeta xeelliyaagan shin, woygana danddayettii? Ayyaanay etakka maaddees. Eti ‘geeshsha ayyaanaa sunttan’ xammaqettidi, geeshsha ayyaanaa kaaletuwaa kaalloosona; qassi a maaduwan ammanettoosona. (Maatiyoosa 28:19) Ayyaanan tiyettidaageetinne gujji gujji biya zawi baynna daro asay sabbakiyo kiitaakka qoppa. He kiitay, Xoossaa ayyaanaa kaaletuwan xaafettida Geeshsha Maxaafan deˈiyaagaa. Yaatiyo gishshau, he shoobee yiidoy geeshsha ayyaanaa baggaara. Nuna kaalettiyay he ayyaanaa gidiyoogee qoncce. Harata shoobbiyoogan ay keena wodiyaa aattana bessiyaakko, hegee nuna waatidi denttettana koshshii?

Aggennan, “‘Haaya’ Yaagoosona”

13. “Ayyaanaynne bullashettiyaara, ‘Haaya’ yaagiiddi deˈoosona” giyaagee ay malaatii?

¹³ “Geeshsha Ayyaanainne bullashettiyaara, ‘Haaya’” giidi shoobbiyoy issitoo xalla gidenna. Koyro xaafettido doonan ha sohuwan goˈettido qaalay aggennan shoobbiyoogaa malaatees. Hegaa gishshau, Ooratta Alamiyaa Birshshettay: “Ayyaanaynne bullashettiyaara, ‘Haaya’ yaagiiddi deˈoosona” yaagees. Hegee Xoossaa shoobiyaa aggennan yootiyoogaa bessees. He shoobiyaa siyidi ekkiyaageetubaa shin, woygana danddayettii? Etikka, “Haaya” yaagoosona. Tumatettan goynniya zawi baynna daro asay ‘qamminne gallassi Yihoowa beeta maqidasiyan’ geeshsha oosuwaa ayyo oottoosona geetettiis. (Ajjuutaa 7:9, 15) ‘Qamminne gallassi oottiyoy’ ayba ogiyaanee? (Luqaasa 2:36, 37; Oosuwaa 20:31; 2 Tasalonqqe 3:8 nabbaba.) Cima gidida, hananabaa yootiya Haanni leemisoynne kiitettida PHauloosa leemisoy qonccissiyoogaadan, ‘qamminne gallassi oottiyoogee’ aggennan wozanappe haggaaziyoogaa malaatees.

14, 15. Ubbaton goynniyoogee koshshiyoogaa Daaneeli waatidi bessidee?

 ¹⁴ Ubbatoo goynniyoogee koshshiyoogaa hananabaa yootiya Daaneelikka bessiis. (Daaneela 6:4-10, 16 nabbaba.) I ayyaanaaban ubbatoo oottiyoobaa, giishin, “ba kase woossiyoogaadankka . . . hachchi hachchi heezzutoo” woossiyo meeziyaa aggibeenna; hegee gaammuwaa ollan yegissiyaaba gidikkokka, issi aginaukka hegaadan oottiyoogaa aggibeenna. A hanotay, ubbatoo Yihoowayyo goynniyoogaappe aadhiyaabi baynnaagaa harati akeekanaadan oottiis!—Maatiyoosa 5:16.

¹⁵ Daaneeli issi qammaa gaammuwaa ollan aqi simmin, kawoy yaa biidi: “De7⁠o Xoossaa ashkkarau Daaneelaa, neeni ubbaton goinniyo ne Xoossai nena gaammotuppe ashshanau danddayidee?” yaagiis. Daaneeli sohuwaara: “Kawuwau, merinau de7a! Ta Xoossai bari kiitanchchaa kiittidi, gaammotu doonaa gorddiis; eti tana bochchibookkona. Aissi giikko, taani a sinttan xillo. Qassi kawuwau, taani ne sinttankka moorobaa oottabeikke” yaagiis. “Ubbaton” au oottiyo gishshau, Yihooway Daaneela anjjiis.—Daaneela 6:19-22.

16. Nuuni haggaazuwan shaahettiyoogaa xeelliyaagan Daaneela leemisoy woygidi oychanaadan denttettana koshshii?

¹⁶ Daaneeli ayyaanaabaa meeziyaa aggiyoogaappe hayquwaa dooriis. Nuuni shin? Xoossaa Kawotettaa mishiraachuwaa ubbatoo yootanau, ayba yarshsho yarshshiyoo woykko yarshshanau eeno giyoo? Nuuni haratussi Yihoowabaa yootennan issi agininne aadhana koshshenna! Nuuyyo danddayettiyaaba gidikko, saaminttan saaminttan haggaazuwan shaahettanau baaxetana koshshennee? Nuuyyo abbee paca gidin, aginaa giddon haggaazidoy 15 daqiiqa xalla gidikkokka, hegaa irpportte oottana koshshees. Aybissi? Ayyaanaaranne bullashettiyaariira issippe aggennan, “Haaya” gaanau koyiyo gishshataassa. Ee, Kawotettaabaa aggennan aassiyaagaa gidanau nuuyyo danddayettida ubbabaa oottanau koyoos.

17. Yihoowa shoobiyaa asau yootanau nuuppe halana koshshenna injjeti awugeetee?

¹⁷ Haggaazuwaa kiyanau keerido wode xalla gidennan, demmido injje ubban nuuni Yihoowa shoobiyaa asau yootana koshshees. Nuuni giyaa woy oge biyo wode, ooso sohuwan, timirtte keettaaninne asaara gayttiyo hara sohotun, saamettidaageeti ‘yiidi deˈo haattaa coo ekkanaadan’ shoobbiyoogee gita maata! Sabbakiyoogaa heeraa sunttati diggiyaaba gidikkokka, hiillan sabbakiyoogaa aggokko; yeddi yeddi sooppe soo oottiyoogan woy demmiyo injje ubban asau yootiyoogan hegaadan oottana danddayoos.

Aggennan, “Haaya” Yaaga

18, 19. Xoossaara issippe oottiyo maataa xoqqu oottada xeelliyoogaa waata bessana danddayay?

¹⁸ Ayyaanaynne bullashettiyaara deˈo haattaa saamettida ooninne yiidi ekkanaadan, uddufun tammu layttappe dariya wodiyau, “Haaya” giiddi takkidosona. Eti shoobbiyo ufayssiya shoobiyaa siyadii? Yaatikko, he shoobiyaa neeni haratuyyo yootanaadan minttettoos.

¹⁹ Yihooway siiquwan shoobbiyo shoobee awude gakkanau odettanaakko erokko; shin nuuni hegaa siyidi, “Haaya” giyo wode Xoossaara issippe oottiyaageeta gidoos. (1 Qoronttoosa 3:6, 9) Hegee ayba gita maatee! Aggennan sabbakiyoogan he maataa xoqqu oottidi xeelliyaageetanne “ubba wode galataa yarshshuwaa” Xoossaayyo immiyaageeta gidoos. (Ibraawe 13:15) Nuuni saˈaa hidootay deˈiyoogeeti bullashettiyaariira issippe aggennan, “Haaya” giyaageeta gidoos. Daroti ‘deˈo haattaa coo ekkanaadan’ amottoos!

Ay Akeekadii?

• “Haaya” giyo shoobiyaa shoobettiday oonee?

• “Haaya” giyo shoobiyau pulttoy Yihoowa gaana danddayettiyoy aybissee?

• “Haaya” giyo shoobiyaa shoobbiyo wode geeshsha ayyaanay waati maaddii?

• Nuuni aggennan haggaazanau baaxetana koshshiyoy aybissee?

[Oyshata]

[Sinttaa 22n diya misiliyaa]

(Loyttada beˈana koyikko maxeetiyaa xeella)

Aggennan, “Haaya” Yaaga

1914

Aassiyaageeti 5,100

1918

Saˈan Gannatiyan daroti deˈuwaa demmana

1922

“Kawuwaanne a kawotettaa erissite; erissite; erissite”

1929

Tiyettidaageetuppe attidaageeti, “Haaya” yaagoosona

1932

“Haaya” giya shoobiyaa ayyaanan tiyettidaageetuppe haratikka shoobettidosona

1934

Yonadaaba baggati sabbakanaadan shoobettidosona

1935

“Zawai bainna daro asaa” oonatettay erettiis

2009

Aassiyaageeti 7,313,173