Nabbabiyaageetu Oyshaa

Zaaretti xammaqettana koshshiyoy ayba hanotaanee?

Xammaqettida uri issi issi hanotan ba xinqqatiyaabaa yuushshi qoppidi, zaaretti xammaqettanau qoppana danddayees. Leemisuwau, issi uri xammaqettiyo wode, kaseti xammaqettidaba gidiyaakko bohettanaadan oottiya hanotan geeman deˈidaba gidana danddayees. I hegaa mala hanotan Xoossaayyo ba huuphiyaa geppana danddayii? Hegaa mala uri ba huuphiyaa Yihoowayyo bessiyaagaadan geppana danddayiyoy Geeshsha Maxaafaara moggenna kandduwaa aggiyoogaa xallaana. Yaatiyo gishshau, hegaa mala gita xubee deˈishin xammaqettida uri zaaretti xammaqettiyoogee koshshiyoogaa qoppiyoogee bessiyaaba gidana danddayees.

Xammaqettiyo wode nagaraa oottiyaagaa gidana xayikkonne, pirdda komitiyan oyshissiya nagaraa hegaappe simmidi oottida uri shin? I xammaqettiyo wode ba oottiyoobaa loytti akeekibeennaagaa, qassi he wode xammaqettana bessennaagaa haˈˈi hassayiis giidi qoppoos. Nagaraa oottida he uraara cimati tobbiyo wode, a xinqqatiyaabaa denttana koshshenna; qassi i ba huuphiyaa geppidoogeenne xammaqettidoogee likke giidi qoppiyaakkonne oychana koshshenna. Aybissi giikko, xammaqettiyoogee koshshiyaaba gidiyoogaa Geeshsha Maxaafan baasettida haasayan i siyiis. I ba huuphiyaa geppiyoogaanne xammaqettiyoogaa xeelliyaagan oychido oyshata ee giidi zaariis. Hegaappe simmidi, ba maayuwaa laammidi haattan xammaqettiis. Yaatiyo gishshau, ba ekkido tanggoy xoqqu oottidi xeelliyooba gidiyoogaa akeekiis giidi qoppiyoogee bessiyaaba. Hegaa gishshau, cimati a xammaqettida uradan xeelloosona.

He uri ba xinqqatee bessiyaaba gidiyoogau oyshaa denttikko, zaarettidi xammaqettiyoogaa xeelliyaagan aaho qofay deˈiyo, Laappune 1, 1960, sintta 159⁠nne 160, qassi Usuppune 15, 1964, sintta 123-126, Wochiyo Keelaa cimati yootanaunne aara issippe tobbanau danddayoosona. Wurssettan, issi issi hanotan (issi uri xammaqettiyo wode Geeshsha Maxaafaa eraa loytti demmibeennaba mala hanotan) zaaretti xammaqettiyoogee issi uri ba huuphe kuuyiyooba.

Issi keettan issippe deˈiyoogaara gayttidaagan Kiristtaaneti qoppana bessiyo issi issibati aybee?

Ubba asau deˈiyo soho koshshees. SHin ha wodiyan daro asau buzo keetti baawa. Ikkonoomee, payyatettay woykko hara hanotay daro dabbotuura issippe deˈanaadan oottana danddayees. Issi issi biittatun issi kifiliyan daro dabboti issippe deˈana danddayoosona.

Alame yuusho gubaaˈetun deˈiya ubbay ay mala sohuwan deˈana bessiyaakko Yihoowa dirijjitee ubbabau higge kessenna. Kiristtaaneti deˈiyo hanotay Xoossaa ufayssiyaagaakkonne kuuyanau Geeshsha Maxaafaa baaso siraataa wotti denttidi qoppanaadan minttettoos. He baaso siraatatuppe amaridaageeti awugeetee?

Qoppana bessiya waannabay, haratuura  deˈiyo hanotay nunanne ayyaanaaban nu hanotaa goˈˈiyaaba woykko qohiyaaba gidana danddayiyoogaa. Hegeeti ay mala asee? Eti Yihoowayyo goynniyaageetee? Eti Geeshsha Maxaafaa maaraadan deˈiya asee? Kiitettida PHauloosi: “Cimettoppite; iita laggetettai lo77⁠o hanotettaa moorees” giidi xaafiis.—1 Qoronttoosa 15:33.

Wodiraa laammiyoogaanne bessenna asho gaytotettaa Yihooway diggiyoogaa Geeshsha Maxaafay yootees. (Ibraawe 13:4) Azinanne macho gidenna naaˈˈu asati azinanne macho milatissiya hanotan issi kifiliyan deˈiyoogee, Xoossaa ufayssennaagee qoncce. SHori baynna kandduwaa coˈˈu giidi xeelliyo keettan issi Kiristtaanee deˈanau koyenna.

Hegaa bollikka, Xoossan nashettanau koyiya ubbay ‘shaaramuxiyoogaappe baqatanaadan’ Geeshsha Maxaafay zorees. (1 Qoronttoosa 6:18) Hegaa gishshau, bessenna asho gaytotettaa polanau paacettanaadan oottiya keettan deˈiyoogaappe issi Kiristtaanee naagettana bessees. Leemisuwau, amarida Kiristtaaneti issi kifiliyan deˈiyo hanotaa qoppa. Hegaadan deˈiyoogee qoppennan paaciyan yeggiyaabay merettanaadan oottana danddayii? Son issippe deˈiya hara asati baynna saatiyan, azinanne macho gidenna naaˈˈu asati qoppennan banttarkka son attiyaaba gidikko shin? Hegaadankka, issoy issuwaa siiqiya, machonne azina gidennaageeti issi keettan deˈiyoogee kandduwaaban daafaa gattana danddayees. Hegaa mala hanotaappe haakkiyoogee eratetta.

Issi azinay ba yeddido macheera issi keettan deˈiyoogeekka bessiyaaba gidenna. Eti kase matattidi deˈido meezee, sohuwaara shori baynna kandduwaa bessanaadan oottana danddayees.—Leemiso 22:3.

Qoppana bessiya harabay qassi, issi uri deˈiyo hanotaa hara asay waati xeelliyaakko akeekiyoogaa. Ba deˈiyo hanotaa issi Kiristtaanee metoy baynnabadan qoppana danddayees; shin asay a iitaban denttikko, hegee qoppana bessiyaaba. Nu oottiyoobay Yihoowa sunttaa tooshissanaadan mule koyokko. PHauloosi hagaadan giis: “Intte Aihuda asatussi woi Giriike asatussi woikko Xoossaa woosa keettaassi xube gidoppite. Taani qassi daroti attana mala, eta ubbaa go77aappe attin, ta huuphe go77aa koyennan, asa ubbaa ubbaban ufaissiyoogaadan, inttekka oottite.”—1 Qoronttoosa 10:32, 33.

Yihoowa geeshshatetta maaraa naaganau koyiyaageeti, deˈiyo injje hanotaanne injje keettaa demmanaagee metiyaaba gidana danddayees. Gidikkokka, Kiristtaaneti “Godaa ufaissiyaabai aibakko” tamaarana bessees. Eti bantta son bessennabi aybinne polettennaagaa akeekana koshshees. (Efisoona 5:5, 10) Hegaadan oottanau, Kiristtaaneti Xoossaa kaaletuwau woossanaunne asatettaaninne kandduwan banttananne harata qohiyaabaappe naagettanau koshshees; qassi Yihoowa loˈˈo sunttaa mooriyaabaappekka naagettana koshshees.