Ubbaappe Aadhiya Deˈo Ogiyan Simerettite!

“Simmi nuuni paxa de7⁠in woi haiqqin Godaassa [“Yihoowassa,” NW].”—ROOME 14:8.

1. Ubbaappe aadhiya deˈo ogiyaa xeelliyaagan Yesuusi ay tamaarissidee?

YIHOOWAY nuuni ubbaappe aadhiya deˈo ogiyan simerettanaadan koyees. Asay dumma dumma ogiyan deˈana danddayiyaaba gidikkonne, ubbaappe aadhiya ogee issuwaa xalla. Nuuni deˈana danddayiyo ubbaappe aadhiya ogee, Xoossaa Qaalaara moggidi deˈiyoogaanne a Naˈaa Yesuus Kiristtoosappe tamaariyoogaa. Yesuusi bana kaalliyaageeti ayyaanaaninne tumatettan Xoossau goynnanaadan tamaarissiis; qassi erissiyo ashkkara oottanaadan azaziis. (Maatiyoosa 28:19, 20; Yohaannisa 4:24) Yesuusa azazuwaara moggidi deˈiyoogan, Yihoowa ufayssoosinne A anjjuwaa demmoos.

2. Daroti koyro xeetu layttan Kawotettaa kiitau ayba zaaro immidonaa? “Ogiyaa” kaalloosona geetettidoy aybissee?

² “Merinaa de7⁠uwaassi doorettida [“suure wozanaa koshshay deˈiyo,” NW ]” asati ammanidi xammaqettiyo wode, eta “Ubbaappe aadhiya deˈo ogiyan intte simerettiyoogan ufayttoos” gaanau loˈˈo gaasoy deˈees. (Oosuwaa 13:48) Koyro xeetu layttan dumma dumma biittaappe yiida, shaˈan qoodettiyaageeti tumaa ekkidi, bantta huuphiyaa Xoossau geppidoogaa xammaqettiyoogan qonccissidosona. (Oosuwaa 2:41) Koyro xeetu layttan deˈida he Kiristtaaneti he “ogiyaa” kaallidosona. (Oosuwaa 9:2; 19:23) Kiristtoosa kaalliyaageetu deˈoy baasettidoy, Yesuus Kiristtoosa ammaniyoogaananne a leemisuwaa kaalliyoogaana gidiyo gishshau, hegaadan giyoogee bessiyaaba.—1 PHeexiroosa 2:21.

3. Yihoowa asay xammaqettiyoy aybissee? Aadhida tammu layttatun aappun asay xammaqettidee?

³ Ha wurssetta gallassatun erissiyo ashkkara oottiyo oosoy aakkiis; hegee ha wodiyan 230⁠ppe dariya biittatun oosettiiddi deˈees. Aadhida tammu layttatun, 2,700,000⁠ppe dariyaageeti Yihoowayyo oottanau qofaa qachidi, bantta huuphiyaa ayyo geppidoogaa bessanau xammaqettidosona. Hegee saaminttan saaminttan 5,000⁠ppe dariya asay xammaqettees giyoogaa! Xammaqettanau qofaa qachiyoogee Xoossaa siiqiyoogan, Geeshsha Maxaafaa eraa demmiyoogaaninne an deˈiya timirttiyaa ammaniyoogan baasettees. Xinqqatee Yihoowaara mata dabbotaa medhiyooba gidiyo gishshau, nu deˈuwan xoqqa sohoy deˈiyooba. Yihooway  beni wode bau oottidaageeti ba ogiyan simerettanaadan maaddidoogaadan, au ammanettidi oottanaadan i nuna maaddanaagaa ammanettiyoogaakka bessiyo oge.—Isiyaasa 30:21.

Xammaqettana Koshshiyoy Aybissee?

4, 5. Xammaqettiyoogan demmiyo goˈˈaappenne anjjuwaappe amaridaagaa yoota.

⁴ Geella neeni Xoossaa eraa demmida, ne deˈuwan laamiyaa oottidanne xammaqettennan aassaydda deˈiyaagaa gidana danddayaasa. Hegaa mala dichay ufayssiyaaba. SHin ne huuphiyaa Xoossau geppidoogaa woosan qonccissadii, qassi xammaqettanau qoppadii? Ne deˈuwan xoqqu oottada xeellana bessiyoy ne huuphiyaa ufayssiyoogaa woy aqo demmiyoogaa gidennan, Yihoowa sabbiyoogaa gidana bessiyoogaa Geeshsha Maxaafaa xinaatiyan akeekidoogee sirissenna. (Mazamure 148:11-13 nabbaba; Luqaasa 12:15) Yaatin, xammaqettiyoogan demmiyo issi issi anjjoynne goˈˈay aybee?

⁵ Ne huuphiyaa geppida Kiristtaane gidiyo wode, ne deˈuwau gita halchoy deˈana. Neeni Xoossay koyiyoobaa oottiyo gishshau, ufayttiyaagaa gidana. (Roome 12:1, 2) Yihoowa ayyaanay neeyyo sarotettaanne ammanuwaa mala eeshshati deˈanaadan oottana. (Galaatiyaa 5:22, 23) Xoossay ne woosaa siyana; qassi neeni a Qaalaara moggiya ogiyan deˈanau oottiyoobaa anjjana. Ne haggaazoy ufayssiyaagaa gidana; qassi neeni Xoossaa ufayssiya ogiyan deˈiyoogee neeni merinaa deˈuwaa hidootan keehi ammanettanaadan oottana. Hegaa bollikka, ne huuphiyaa geppiyoogeenne xammaqettiyoogee Yihoowa Markkatuppe issuwaa gidanau neeni tumuppe koyiyoogaa bessees.—Isiyaasa 43:10-12.

6. Nuuni xammaqettiyoogee ay qonccissii?

⁶ Nu huuphiyaa Xoossau geppiyoogaaninne xammaqettiyoogan, nuuni Yihoowassa gidiyoogaa bessoos. Kiitettida PHauloosi: “Nuuppe ooninne ba huuphe xalaalau deˈenna; qassi ooninne ba huuphe xalaalau hayqqenna; nuuni paxa deˈikko, Yihoowau deˈoos; qassi hayqqikkokka, Yihoowau hayqqoos. Simmi nuuni paxa deˈin woy hayqqin Yihoowassa” yaagidi xaafiis. (Roome 14:7, 8, NW) Xoossay nuuyyo koyidobaa dooriyo maataa immiyoogan nuna bonchiis. Nuuni Xoossaa siiqiyo gishshau ha ogiyaa kaallanau minttidi qofaa qachiyo wode, a ufayssoos. (Leemiso 27:11) Nuuni xammaqettiyoogee nu huuphiyaa au geppidoogaanne Yihooway nuna Haariyaagaa gidiyoogaa qonccissiyo malaata. Ubbaa haariyo maataa xeelliyaagan nuuni a bagga gidiyoogaa hegee qonccissees. (Oosuwaa 5:29, 32) Yaatiyo wode, Yihoowaykka nu miyyiyan eqqees. (Mazamure 118:6 nabbaba.) Xammaqettiyoogee nuuni haˈˈi gidin sinttappekka gidin, ayyaanaaban daro anjjuwaa demmiyo ogiyaakka dooyees.

Siiqiya Ishanttu Maabaraa Yame Gidiyo Anjjuwaa

7-9. (a) Ubbabaa aggidi bana kaallida ubbau Yesuusi ammanttiyaabaa ay yootidee? (b) Marqqoosa 10:29, 30n deˈiya, Yesuusi gelido qaalay polettiiddi deˈiyoy ayba ogiyaanee?

⁷ Kiitettida PHeexiroosi Yesuusa: “Be7a, nuuni  nuuyyo de7⁠iya ubbabaa aggi bayidi, nena kaallida; yaatidi nuuni ai demmaneeshsha?” yaagiis. (Maatiyoosa 19:27) PHeexiroosi ba huuphe gidin, Yesuusi erissiyo hara ashkkarati sinttappe ay demmanaakko eranau koyiis. Eti Kawotettaa sabbakiyo oosuwau muleera aqanau, gita yarshsho yarshshidosona. (Maatiyoosa 4:18-22) Yesuusi eta ammanttiyaabaa ay yootidee?

⁸ Marqqoosi xaafidoogaadan, erissiyo ashkkarati ayyaanaaban isha gididaageetu yame gidanaagaa Yesuusi qonccissiis. I: “Ta gishshaunne wonggeliyaa mishiraachchuwaa gishshau, keettaa woi ishantta woi michchentta, woi aawaa woi aayyiyo woi machchiyo, woi naata woi gadiyaa aggida asi ooninne, ha77⁠i ha wodiyan xeetutooppe dariya keettata, ishantta, michchentta, aayeta, naata, gadiyaa, qassi waayiyaakka ekkana. Sinttappe yaana wodiyankka merinaa de7⁠uwaa ekkana” yaagiis. (Marqqoosa 10:29, 30) Lidiyo, Aqiila, PHirisqqilonne Gaayoosa mala koyro xeetu laytta Kiristtaaneti, Yesuusi qaalaa gelidoogaadan bantta mala Kiristtaanetussi “keettaa” immidaageetuppenne “ishantta, michchentta, aayeta” gididaageetuppe amaridaageeta.—Oosuwaa 16:14, 15; 18:2-4; 3 Yohaannisa 1, 5-8.

⁹ Yesuusi yootidobay ha wodiyan gita ogiyan polettiiddi deˈees. I bana kaalliyaageeti aggana giido ‘gadee,’ miisoonaweta, Beeteele keettaa asaa yameta, alame yuusho oosanchatanne harata gujjin daroti dumma dumma biittatun Kawotettaara gayttidabaa oottanau bantta dosan aggi bayido aquwaa malaatees. Daro ishatinne michoti sima deˈuwaa deˈanau bantta keettaa aggidosona; Yihooway etassi koshshiyaabaa kunttidoogaanne ayyo oottiyoogan eti ufayssaa demmidoogaa qonccissiya temokruwaa siyiyoogee nuna ufayssees. (Oosuwaa 20:35) Hegaa bollikka, Yihoowayyo oottiya, xammaqettida ubbay alame yuusho ishatu maabaraa yame gidiyoogaadan, “kasetidi, Xoossaa kawotettaanne a xillotettaa” koyiyoogan anjjuwaa demmana danddayoosona.—Maatiyoosa 6:33.

Ubbaappe Xoqqiya Xoossan Naagettiyoogaa

10, 11. “Ubbaappe Xoqqiya Xoossan” naagettanau akko shiiqiyoogee woygiyoogee? Nuuni he leemiso sohuwan waanidi deˈana danddayiyoo?

¹⁰ Ba huuphiyaa geppiyoogeenne xammaqettiyoogee hara gita anjjuwaa demissees; hegeekka  “Ubbaappe Xoqqiya Xoossan naagettidi” deˈanau akko shiiqiyo maataa. (Mazamure 91:1 nabbaba.) Hegee woygiyoogee? Hegee ayyaanaaban naaguwaanne woppatettaa demmiyo sohuwaa koyiyoogaa woy demmiyoogaa bessiya hanotaa woykko ayyaanaaban qohuwaappe naaguwaa demmiyo hanotaa malaatees. Xoossan ammanettennaageeti he sohuwaa erokkona. Nu huuphiyaa geppidoogaara moggiya ogiyan deˈiyoogaaninne kumetta hanotan Yihoowan ammanettiyoogan a: “Neeni taayyo qatonne baqata attiyo soho; neeni taani ammanettiyo ta Xoossaa” yaagana danddayoos. (Mazamure 91:2) Xoossaa Yihooway nuuni naagettidi deˈiyo soho. (Mazamure 91:9) Hegaappe aadhiya loˈˈo sohoy baawa!

¹¹ Naaguwaanne woppatettaa Yihoowappe demmiyo leemiso sohuwan deˈiyoogee, aara deˈiya dabbotaa minttiyoogan anjjuwaa demmiyo maataakka malaatees. Hegee nu huuphiyaa ayyo geppidi xammaqettiyo wode doommees. Hegaappe simmin, Geeshsha Maxaafaa xannaˈiyoogan, wozanappe woossiyoogaaninne kumetta hanotan azazettiyoogan Xoossaakko shiiqoos; yaatiyoogan aara deˈiya dabbotaa minttoos. (Yaaqooba 4:8) Medhidaagan ammaniyoogan yeeqibeenna Yesuusaagaa keena Yihoowakko shiiqida hara asi baawa. (Yohaannisa 8:29) Yaatiyo gishshau, nuuni nu huuphiyaa geppiyo wode gelido qaalaa polanaadan Yihooway koyiyoogaanne nuna maaddanau danddayiyoogaa mule sirana bessenna. (Eranchchaa 5:4) Xoossay ba asau oottido ayyaanaabaa giigissoti, i nuna tumuppe siiqiyoogaunne ayyo oottiyoogan murutanaadan koyiyoogau qoncce naqaasha.

Ayyaana Gannatiyaa Xoqqu Oottidi Xeellite

12, 13. (a) Ayyaana gannatee aybee? (b) Nuuni oorattata maaddana danddayiyoy ayba ogiyaanee?

¹² Nu huuphiyaa geppiyoogeenne xammaqettiyoogee ufayssiya ayyaana gannatiyan nuuni deˈanaadankka injjiyaa medhees. Hegee Xoossaa Yihoowaaranne issoy issuwaara sarotettan deˈiya, nu mala Kiristtaanetuura deˈiyo, dumma gidida ayyaanaabaa hanotaa. (Mazamure 29:11; Isiyaasa 54:13) Alamiyan nu ayyaana gannatiyaara geeddarssana danddayiyo issibinne baawa. Daro biittaappe yiidaageeti shiiqiyo awuraajjaa shiiquwan, dumma dumma biittaappe, qaalaappenne sheeshshaappe yiida ishatunne michotu giddon deˈiya sarotettay, issippetettaynne ishatettaa siiqoy hegaa loytti qonccissees.

¹³ Nuuni deˈiyo ayyaana gannatee ha wodiyan alamee deˈiyo azzanttiya hanotaappe keehi dumma. (Isiyaasa 65:13, 14 nabbaba.) Nuuni Kawotettaa kiitaa yootiyoogan, harati ayyaana gannatiyaa gelanaadan shoobbiyo maataa demmida. Mata wode gubaaˈiyaa yame gididaageetanne haggaazuwan loohissoy koshshiyoogeeta maaddiyoogeekka anjjo. Aqiilinne PHirisqqila “Xoossaa ogiyaa kaseppe sittayidi, [Aphiloosayyo] geeshshidi” yootidoogaadan, gubaaˈiyaa cimati immiyo kaaletuwan oorattata maaddiyo maataa demmiyoogan nuuni anjjettana danddayoos.—Oosuwaa 18:24-26.

Yesuusappe Tamaariyoogaa Aggoppite

14, 15. Nuuni Yesuusappe tamaariyoogaa aggennaadan oottiya loˈˈo gaasoy aybee?

¹⁴ Nuuni Yesuusappe tamaariyoogaa aggennaadan oottiya loˈˈo gaasoy deˈees. Yesuusi asa gidanaappe kase, zawi baynna wodiyau ba Aawaara issippe oottiis. (Leemiso 8:22, 30) Aybippenne aadhiya deˈo ogee, tishshatettan Xoossaayyo oottiyoogaanne tumatettaayyo markkattiyoogaa gidiyoogaa i eriis. (Yohaannisa 18:37) Hara deˈo oge ubbay yaaretiyoogaanne yuushshi qoppennaagaa bessiyaaba gidiyoogaa Yesuusi loytti akeekiis. I iita hanotan paacettanaagaanne hayqqanaagaakka eriis. (Maatiyoosa 20:18, 19; Ibraawe 4:15) I nuussi leemiso gidiyoogaadan, waanidi ammanettidi deˈana danddayiyaakko tamaarissiis.

¹⁵ Yesuusi xammaqetti simmin, ubbaappe aadhiya deˈo ogiyaa agganaadan Seexaanay a sohuwaara paacciis; shin i koyidoogaadan hanibeenna. (Maatiyoosa 4:1-11) Seexaanay ay oottiyaabaa gidikkokka, nuuni ammanettidi deˈana danddayiyoogaa hegee qonccissees. Xammaqettanau giigettiyaageetu bollinne mata wode xammaqettidaageetu bolli i ba xeelaa wottiyaaba milatees. (1 PHeexiroosa 5:8) Balabaa siyido gishshau nuussi qoppiyoogan so asay nu bolli yedetaa gattana danddayees. Gidikkokka, nuuni oyshettidobaa zaariyo wodenne markkattiyo wode bonchiyoogaanne hiillaa goˈettiyoogaa mala Kiristtaane  eeshshata qonccissanaadan hegaa mala paacee injjiyaa medhees. (1 PHeexiroosa 3:15) Hegaa gishshau, hegaa mala hanotay nuuni yootiyoogaa siyiyaageeti goˈettanaadan oottana danddayees.—1 Ximootiyoosa 4:16.

Ubbaappe Aadhiya Deˈo Ogiyaa Mintti Oyqqite!

16, 17. (a) Zaarettido Wogaa 30:19, 20n qonccida, deˈuwau koshshiya heezzubati aybee? (b) Muusee xaafidobaa Yesuusi, Yohaannisinne PHauloosi waati kaafidonaa?

¹⁶ Yesuusi saˈaa yaanaappe 1,500 layttaa kasetidi, Israaˈeeleti ubbaappe aadhiya deˈo ogiyaa dooranaadan Muusee minttettiis. I: “Taani intte sinttan de7⁠uwaanne haiquwaa, anjjuwaanne qanggettaa wottidoogau hachchi saluwaanne sa7aa intte bolli markkayana; simmi inttenne intte zaree de7⁠uwan de7ana mala, de7⁠uwaa doorite. GODAA intte Xoossaa siiqite; a qaalaa siyite, ayyo azazettite; aara ohettite. Hegaadan hanikko, GODAI kase intte maizza aawatuyyo, Abrahaamayyo, Yisaaqayyoonne Yaaqoobayyo immanau caaqqido biittan inttenne intte naati adussa laittaa de7ana” yaagiis. (Zaarettido Wogaa 30:19, 20) Israaˈeeleti Xoossau ammanettibookkona; shin Muuse yootido, deˈuwau koshshiya heezzubati laamettibookkona. Hegeeta Yesuusinne harati zaarettidi yootidosona.

¹⁷ Koyruwan, ‘nuuni nu Xoossaa Yihoowa siiqana bessees.’ Xoossaa xillotetta ogiyaara moggidi deˈiyoogan nuuni a siiqiyoogaa qonccissoos. (Maatiyoosa 22:37) Naaˈˈanttuwan, Xoossaa Qaalaa xannaˈiyoogaaninne a azazuwaa naagiyoogan ‘nuuni Yihoowa qaalaa siyana bessees.’ (1 Yohaannisa 5:3) Hegaadan oottanau Geeshsha Maxaafaa tamaariyo Kiristtaane shiiqotun nuuni ubbatoo beettana koshshees. (Ibraawe 10:23-25) Heezzanttoy, ‘nuuni Yihoowaara ohettana bessees.’ Nuna gakkiya metoy ayba gidikkokka, ubba wode Xoossan ammanettiyoogaa bessiyaageetanne a Naˈaa kaalliyaageeta gidoos.—2 Qoronttoosa 4:16-18.

18. (a) Wochiyo Keelay 1914n tumaa xeelliyaagan woygi qonccissidee? (b) Ha wodiyan deˈiya tumaa pooˈuwaa xeelliyaagan nuuyyo aybi siyettana koshshii?

¹⁸ Geeshsha Maxaafaa tumaara moggidi deˈiyoogee gita anjjo! Kaallidi deˈiya qofay 1914n, Wochiyo Keelan kiyiis: “Nuuni anjjettidanne ufayttiya asa gidokkonii? Nu Xoossay ammanettiyaagaa gidennee? Hara loˈˈobaa eriya uri deˈikko, hegaa kaallo. Intteppe ooninne hara loˈˈobaa demmidaba gidikko, nuuyyo yootana giidi qoppoos. Nuuni Xoossaa Qaalaappe demmidobaappe hara loˈˈobi aybinne baynnaagaa eroos. . . . Tumu Xoossaa loytti eridoogan nu deˈuwan demmido sarotettaa, ufayssaanne anjjuwaa yooti wurssana danddayokko. Xoossaa Aadhida Eratettaa, Pirddaa, Wolqqaanne Siiquwaa yootiya Taarikee nu guuggiyaanne wozanaa keehippe woppissiyaaba. Hegaappe harabaa koyokko. Hegaappe harabaa amottiyoogaappe Xoossaa eran dichaa bessanau koyoos.” (Wochiyo Keelaa, Tisaase 15, 1914, sinttaa 377-378) Ayyaanaabaa pooˈuwaanne tumaa nuuni nashshiyoogaa aggokko. Nuuni “GODAA poo7⁠uwan” hemettiyoogee ha wodiyan ufayttanaadan oottiya gita gaaso gidiyoogee qoncce.—Isiyaasa 2:5; Mazamure 43:3; Leemiso 4:18.

19. Xammaqettanau gidaa kunttidaageeti he tangguwaa ekkanau haganaa sugana koshshennay aybissee?

¹⁹ Neeni “GODAA poo7⁠uwan” hemettana koyiyaaba gidikkonne, ne huuphiyaa geppada xammaqettabeennaba gidikko, haganaa sugoppa. Geeshsha Maxaafay yootiyo, xammaqettanau koshshiya gida ubbaa kuntta; hegee Xoossaynne Kiristtoosi nuussi oottidobaa nashshiyoogaa bessiyo loˈˈo oge. Neessi deˈiya aqo ubbaappe aadhiya, ne deˈuwaa Yihoowayyo imma. A Naˈaa kaalliyoogan Xoossaa sheniyaa oottanau halchidoogaa bessa. (2 Qoronttoosa 5:14, 15) Hegee ubbaappe aadhiya deˈo oge gidiyoogee erettidaagaa!

Woygada Zaaruutii?

• Nu xinqqatee ay malaatii?

• Nu huuphiyaa Xoossau geppiyoogeenne xammaqettiyoogee ayba anjjuwaa demissii?

• Yesuusappe tamaariyoogee keehippe koshshiyoy aybissee?

• Ubbaappe aadhiya deˈo ogiyaa mintti oyqqanaadan nuna aybi maaddii?

[Oyshata]

[Sinttaa 29n deʼiya misiliyaa]

Ne xinqqatee neeni ubbaappe aadhiya deˈo ogiyaa dooridoogaa bessees

[Sinttaa 30n deʼiya misiliyaa]

Neeni deˈiyoy “Ubbaappe Xoqqiya Xoossan naagettidi” deˈiyoosaanee?