Ushshaa Xeelliyaagan Xoossaa Xeelay Aybee?

NUNA Medhidaagee, nuussi loˈˈobaa amottiyaagee, ushshaa bessiyaagaadan uyiyoogaa diggenna. * Ubba i, asaassi “wozanaa ufaissiya woiniyaa, som77⁠uwaa shicissiya zaitiyaanne wolqqaa kunttiya qumaa” immiis. (Mazamure 104:15) Yesuus Kiristtoosi issi wode, haattay “aife woine eessaa” gidanaadan oottidi, bullachan asay ufayttanaadan oottiis.—Yohaannisa 2:3-10.

Ushshay bollaanne guuggiyaa ay keena qohiyaakko medhidaagee loyttidi erees giidi qoppiyoogee bessiyaaba. Saluwan deˈiya nu Aaway Geeshsha Maxaafaa baggaara ‘nuna maaddiyaabaa tamaarissees’; qassi nuuni ushshaa likkiyaappe aattidi uyennaadan minttidi akeekissees. (Isiyaasa 48:17) Kaallidi deˈiya qoncce zoriyaa akeeka:

“Inttena bashshiya woiniyaa giyo eessaa uyidi mattottoppite.” (Efisoona 5:18) “Mattottiyaageeti . . . Xoossaa kawotettaa laattokkona.” (1 Qoronttoosa 6:9-11) “Mattottiyoogaa, yettanchcha kiyiyoogaanne hageeta milatiyaageeta” Xoossaa Qaalay diggees.—Galaatiyaa 5:19-21.

Daro ushshaa uyiyoogee gattiyo daafaappe amaridaageeta ane beˈoos.

Likkiyaappe Aattidi Uyiyoogee Gattiyo Daafaa

Ushshay guuttaa maaddana danddayikkonne, bollaynne guuggee suure oottennaadan diggiyaabay a giddon deˈees. Ushshaa likkiyaappe aattidi uyiyoogee kaallidi deˈiya metuwaa gattana danddayees:

Likkiyaappe aattidi uyiyoogee issi uraa ‘wozanay suure qoppennaadan’ oottees. (Leemiso 23:33) Hagaappe kase deˈiya huuphe yohuwan denttido, likkiyaappe aattidi uyiya Aleni: “Ushshay amale gidiyoogee bollaa hargge gidiyoogaa xalla gidennan, issi aawu qofaanne  xeelaa mooriya hargge. Hara asaa bolli gattiyo qohuwaa neeni qoppakka” yaagiis.

Aliyaappe aattidi uyiyoogee pokko xayanaadan oottana danddayees. Geeshsha Maxaafay: “Gam77⁠ida woine eessainne yelaga woine eessai . . . asaa wozanaa bashshees” yaagees. (Hoose7a 4:11) Waatidi? Hara wode qoncciyaa kiyennaadan teqqiyo qofaanne koshshaa, ushshay cimmin aynne baynnabadan, ubba qassi ufayssiyaabadan xeelliyoogaa doommana danddayoos. Nuuni ubbatoo suurebaa oottanau murttido murttiyaa shugissana danddayees. Ushshay kandduwan moorettanaadan oottana danddayees; hegee ayyaanaaban keehi qohees.

Leemisuwau, Jooni ba macheera ooyettidi, yiillotiiddi ushsha keetti biis. Issi maccaasiyaa akko yiyo wode, ba yiilluwaa danddayanau guuttaa uyi simmees. Jooni guuttaa gujji uyi simmidi, he maccaaseera biidi wodiraa laammiis. Hegaappe simmin, ushshay i pokko xayanaadan oottin, mule qoppennabaa polidoogan keehippe zilˈˈettiis.

Aliyaappe aattidi uyiyoogee haasayaaninne oottiyooban naagettennaadan oottanaukka danddayees. Geeshsha Maxaafay: “Azzanoi oossee? Ooshshi oossee?” yaagi oychidi, “Woine eessaa uyiiddi gam77⁠iyaageetussa gidennee? Walahettida woine eessaa uyi uyi be7⁠iyaageetussa gidennee?” yaagees. (Leemiso 23:29, 30) Aliyaappe aattidi uyiyoogee, neeni “abbaa giddon dambbalai qaattiyo markkabiyaa xeeran zin77⁠ida uraa mala” gidanaadan oottana danddayees. (Leemiso 23:34) Ushshan jiilaawida uri beegottiyo wode, “tana wadhdhidosona; shin tau erettibeenna” yaagana danddayees.—Leemiso 23:35.

Aliyaappe aattidi uyiyoogee harggissana danddayees. “Wurssettan [ushshay] shooshshadan dukkees; mulumuqqe shooshshadankka ba yiishshaa yiishshees.” (Leemiso 23:32) Akkamuwaa saynisee ha beni leemisoy tuma gidiyoogaa bessees. Daro ushshay worana danddayiya marzze; hegee kaalettiyoobaappe amaridaageeti, dumma dumma kansseriyaa, tiriyaanne lanxxiyaa harggiyaa, sukkariyaa harggee deˈiyoogeetu suuttan sukkaaree guuxxiyoogaa, yelettibeenna naatu asatettaaninne guuggiyan gakkiya qohuwaa, suuttay guuggiyan meqqiyoogaa woykko wozanaa harggiyaa. Issitoo gidikkonne, daro ushshaa uyiyoogee issi uri bana erennaadan woykko hayqqanaadan oottana danddayees. Gidikkonne, aliyaappe aattidi uyiyoogee kaalettiyo waanna daafay asatettaa harggiyaa gidenna.

 Kaalettiyo Waanna Daafaa

Issi uri mattottana xayikkonne, bessiyaagaappe aattidi uyiyoogee ayyaanaaban qohees. Geeshsha Maxaafay: “Mattoyiya ushshaa koyanau maallado guuraara denddiyaageetuyyoonne woiniyaa eessan xuugettana gakkanaashin, sa7aa qamissiyaageetuyyo aayye7ana!” yaagidi qoncciyan yootees. Aybissi? Isiyaasi: “Eti GODAA oosuwaa wudokkona; i ba kushiyan oottidobaa bonchchokkona” yaagidi, bessiyaagaappe aattidi uyiyoogee ayyaanaaban kaalettiyoobaa qonccissiis.—Isiyaasa 5:11, 12.

Xoossaa Qaalay nuuni ‘daro woyne eessaa uyiyaageetuura zuppettennaadan’ zorees. (Leemiso 23:20) Cima maccaasati daro ‘woyne eessassi haarettennaadan’ zoree imettiis. (Tiitu 2:3) Aybissi? Loddan loddan, darotoo akeekennan, asay kaseegaappe dariya ushshaa darotoo uyiyoogaa doommees. Wurssettan, uyiya uray ushshan jiilaawidosaappe beegottiyo wode, “hara ushshaa uyanau taani aude denddanddinaashsha?” yaagana danddayees. (Leemiso 23:35) Ushshanchati guuran denddidi, qammi jiilawidosaappe beegottanau issuwaa woy naaˈˈaa uyanau amottiyo wode, keehi iita metuwan geloosona.

“Mattuwan [“likkiyaappe aattidi uyiyoogan,” NW], yettan, ushshan” bantta wodiyaa aattiyaageeti, “paxa de7⁠iya asaa bollinne haiqqida asaa bolli pirddanau giigi uttida Xoossau zaaruwaa” immanaagaa Geeshsha Maxaafay yootees. (1 PHeexiroosa 4:3, 5) Nuuni deˈiyo dumma wodiyaa xeelliyaagan Yesuusi: “Muussan, ushshan, mattooninne aqossi hirggiyooban intte wozanai balenna mala, qassi intte qoppennan [Yihoowa] gallassai intte bolli yeennaadan, inttena naagite” yaagiis.—Luqaasa 21:34, 35.

Gidoppe attin, bessiyaagaappe aattidi uyiyaageeti, ‘ushshaaninne mattuwan bantta wozanay balenna mala’ ay oottana danddayiyoonaa?

[Tohossa qofata]

[Sinttaa 7n deʼiya misiliyaa]

Ushshaa likkiyaappe aattidi uyiyoogee daro metuwaa kaalettana danddayees