‘Xoossaa Qaalaa Xalan Yootite’

“Geeshsha Ayyaanai kumin, Xoossaa qaalaa xalan yootidosona.” —OOSUWAA 4:31.

1, 2. Nuuni haggaazuwan murutanau baaxetana koshshiyoy aybissee?

YESUUSI hayqqanaappe heezzu gallassaa kasetidi ba erissiyo ashkkaratussi: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana” yaagiis. Yesuusi hayquwaappe denddidi saluwaa baanaappe kase ba erissiyo ashkkarati, ‘asa ubbaa bana kaalliyaageeta oottanaadan, i azazidobaa ubbaa naagana mala eta tamaarissanaadan’ kiittiis. I ‘wodiyaa wurssettay gakkanaassi ubba wode etaara deˈanaagaa’ qaalaa geliis.—Maatiyoosa 24:14; 26:1, 2; 28:19, 20.

² Yihoowa Markkata gidiyoogaadan, koyro xeetu layttan doomettida oosuwan nuuni minnidi shaahettiyo injjee deˈees. Kawotettaabaa sabbakiyoonne erissiyo ashkkara oottiyo, shemppo ashshiya oosuwaara laggetiya hara oosoy baawa. Hegaa gishshau, nu haggaazuwan muruta gidiyoogee keehippe koshshiyaaba! Nuuni haggaaziyo wode, geeshshaa ayyaanaa kaaletuwaa kaalliyoogee xalatettan yootanaadan waati maaddiyaakko ha huuphe yohuwan beˈana. Kaalliya naaˈˈu huuphe yohoti, hiillan tamaarissanaadaaninne aggennan sabbakanaadan Yihoowa ayyaanay nuna kaalettana danddayiyoogaa qonccissoosona.

Nuuni Xalana Koshshees

3. Kawotettaabaa sabbakiyo oosuwan shaahettanau xalatettaa koshshiyoy aybissee?

³ Xoossay nuuyyo immido, Kawotettaabaa sabbakiyo oosuwaara laggetiyaabi baawa. Gidikkonne, hegee issi issitoo metees. Issi issi asay Xoossaa Kawotettaa mishiraachuwaa ufayssan siyiyaaba gidikkonne, daro asay Nohe wodiyaagaa mala. Yesuusi: “Bashsha haattai yiidi, eta ubbaa efaana gakkanaashin, eti akeekibookkona” yaagiis. (Maatiyoosa 24:38, 39) Hegaa gishshau, nuna toochiyaanne ixxiya asay dees. (2 PHeexiroosa 3:3) Sunttatettay deˈiyoogeetuppe, issippe tamaariyaageetuppe woy oottiyaageetuppe woy nu soo asaappekka yedetay gakkana danddayees. Hegaa bollikka, asay nuna ixxees giidi yayyiyoonne dungguuxiyoogaa mala pacay daana danddayees. Xoossaa Qaalaa “yayyennan” yootiyoogaa daro hanotati diggana danddayoosona. (Efisoona 6:19, 20) Ubbatoo Xoossaa Qaalaa yootanau xalatettaa koshshees. Xala gidanaadan nuna aybi maaddana danddayii?

4. (a) Xalatettay aybee? (b) Kiitettida PHauloosi Tasalonqqen deˈiyaageetussi yootanau waanidi xalana danddayidee?

⁴ “Xalatetta” geetettidi birshshettida Giriiketto qaalay “qoncciyan haasayiyoogaa” giyoogaa. He qaalay “xaliyoogaa, banan ammanettiyoogaa, . . . yayyennaagaa” malaatees. Xalatetta giyoogee asa bonchennan haasayiyoogaa gidenna. (Qolasiyaasa 4:6) Nuuni xala gidikkokka, ubba asaara sarotettan deˈanau koyoos. (Roome 12:18) Hegaa bollikka, nuuni Xoossaa Kawotettaa mishiraachuwaa sabbakiyo wode, xalatettan haasayikkokka asaa yiilloyennaadan hiillaakka goˈettana koshshees. Nuuyyo bessiya xalatettay deˈanaadan hara eeshshatakka dichanau baaxetana koshshees. Hegaa mala xalatettay nu huuphen ammanettiyoogan  demmiyooba gidenna. Kiitettida PHauloosinne a laggeti ‘Piliphisiyuusan waayettidoogaappenne cayettidoogaappe’ guyyiyan Tasalonqqen deˈiyaageetuyyo yootanau “minotettaa” awuppe demmidonaa? PHauloosi, “Xoossai nuuyyo minotettaa immiis” yaagidi xaafiis. (1 Tasalonqqe 2:2 nabbaba.) Xoossaa Yihooway nu yashshaa xayssanaunne hegaa mala xalatettaa nuuyyookka immanau danddayees.

5. Yihooway PHeexiroosau, Yohaannisaunne hara erissiyo ashkkaratuyyo xalatettaa waatidi immidee?

⁵ Yesuusa sunttaa denttennaadan “haariyaageeti, cimati, higgiyaa tamaarissiyaageeti” azazido wode, kiitettida PHeexiroosinne Yohaannisi: “Xoossau azazettiyoogaa aggidi, intteyyo azazettiyoogee Xoossaa sinttan lo77⁠okkonne ane intte pirddite. Aissi giikko, nuuni be7⁠idobaanne siyidobaa yootennan agganau danddayokko” yaagidosona. Yedetaa teqqanaadan Xoossaakko woossiyoogaappe etinne ammaniya harati: “Godau, eta manddettaa xeella; nuuni ne ashkkarati, ne qaalaa kumetta xalan yootanaadan, nuna danddayissa” yaagidi woossidosona. (Oosuwaa 4:5, 19, 20, 29) Yihooway eta woosaa waatidi zaaridee? (Oosuwaa 4:31 nabbaba.) Yihooway ba ayyaanaa baggaara eti xalanaadan maaddiis. Xoossaa ayyaanay nunakka hegaadan maaddana danddayees. Yaatin, nuuni Xoossaa ayyaanaa demmanaunne nu haggaazuwan ayyaanaa kaaletuwaa kaallana danddayiyoy ayba ogiyaanee?

Xala Gidiyo Ogiyaa

6, 7. Xoossaa ayyaanaa demmiyo waanna ogee aybee? Leemisuwaa yoota.

⁶ Xoossaa ayyaanaa demmiyo waanna ogee a demmanau woossiyoogaa. Yesuusi bana ezggiyaageetussi: “Intte iita gidiiddi, intte naatussi lo77⁠obaa immiyoogaa erikko, yaatin saluwan de7⁠iya Aawai bana woossiyaageetussi Geeshsha Ayyaanaa waati darissidi immanddeeshsha?” yaagiis. (Luqaasa 11:13) Nuuni geeshsha ayyaanaa demmanau aggennan woossana koshshiyoogee tuma. Haggaaziyo issi issi ogee, giishin ogiyan markkattiyoogee, haggaazuwau kiyennan sabbakiyoogee woykko zalˈˈe moottan markkattiyoogee nuna yashshiyaaba gidikko, Yihooway ba ayyaanaa immanaadaaninne nuussi koshshiya xalatettaa immidi maaddanaadan woossana danddayoos.—1 Tasalonqqe 5:17.

⁷ Roozo geetettiya issi Kiristtaaniyaa hegaadan oottaasu. * Issi gallassi Rooza ooso sohuwan deˈishin hara timirtte keettan naata bessenna ogiyan oyqqidoogaa yootiya irpporttiyaa iira tamaarissiya issi asttamaariyaa nabbabusu. He asttamaariyaa nabbabiyooban keehippe azzanada, “Ha alamee waaniiddi deˈii?” yaagaasu. Rooza markkattiyo he injjee halana mala koyabeykku. Haasayissiyoogaa doommanau xalatettaa waatada demmadee? Rooza: “Ba ayyaanan tana maaddanaadan Yihoowakko woossaas” yaagaasu. A loytta markkattanaunne zaaretta oychiyo injjiyaa demmanau danddayaasu. Amarkkan Niyoorkke kataman deˈiya, Milaano geetettiya ichashu laytta naˈee hanotaakka qoppite. Milaana: “Taani timirtte keettaa baanaappe kase taanne ta aayyiyaa ubbatoo Yihoowakko woosseettees” yaagaasu. Eti aybissi woossiyoonaa? Milaana bana gakkiya paaciyaa xoonanaunne Xoossaabaa yootanau xalanaadaana! I aayyiyaa: “Hegee yeleta gallassaynne hara baalay bonchettiyo wode, Milaana hegaa xeelliyaagan ba ammanuwaa qonccissanaunne he baalata bonchennaadan maaddiis” yaagaasu. Ha leemisoti woosay nuuni xalanaadan maaddiyoogaa qonccissokkonaa?

8. Xalatettaa demmiyoogaa xeelliyaagan hananabaa yootiya Ermmaasappe ay tamaarana danddayiyoo?

⁸ Hananabaa yootiya Ermmaasikka xalanaadan  aybi maaddidaakko qoppite. Kawotettatuyyo hananabaa yootanaadan Yihooway a sunttido wode, Ermmaasi: “Taani na7a. Taani waati haasayiyaakko erikke” yaagiis. (Ermmaasa 1:4-6) Gidikkokka, guyyeppe Ermmaasi ubbatoo xalan yootiyo gishshau, daroti a bashsha xallaa yootiya asadan xeellidosona. (Ermmaasa 38:4) I Yihoowa pirddaa 65 layttappe dariya wodiyau xalatettan awaajjiis. I yayyennan xalatettan sabbakiyoogan Israaˈeele biittan erettiyo gishshau, 600 laytta gidiya wodiyaappe simmin, Yesuusi xalatettan yootido wode, issoti issoti Ermmaasi hayquwaappe denddiis giidi qoppidosona. (Maatiyoosa 16:13, 14) Koyro yayyiya, hananabaa yootiya Ermmaasi yashshaa waatidi aggidee? I: “GODAA qaalai ta meqettaa giddon qum77⁠ettidi, eexxiya tama mala gididi, ta wozanan michchees” yaagiis. (Ermmaasa 20:9) Ee; Yihoowa Qaalay Ermmaasau wolqqaa immiisinne i yootanaadan denttettiis.

9. Xoossaa Qaalay Ermmaasa maaddidoogaadan nuna maaddana danddayiyoy aybissee?

⁹ Kiitettida PHauloosi Ibraawetuyyo xaafido dabddaabbiyan: “Xoossaa qaalai paxa de7⁠eesinne oottees; naa77⁠u zoozee de7⁠iyo bisuwaappekka aadhdhidi qarattees. He qaalai shemppoinne ayyaanai, kureenne kolzzee issippe gaittiyoosaa shaakkana gakkanaassi caddees. Qassi asa wozanan de7⁠iya koshshaanne qofaa i shaakkees” yaagiis. (Ibraawe 4:12) Xoossaa Qaalay Ermmaasa maaddidoogaadan nunakka maaddana danddayees. Geeshsha Maxaafaa asi xaafidaba gidikkonne, Xoossaa ayyaanan xaafettido gishshau asa era oyqqida maxaafa gidenna. Naaˈˈantto PHeexiroosa 1:21, “Hananabaa yootidobi ubbai geeshsha asati Geeshsha Ayyaanai kaalettin, Xoossaa qaalaa haasayidosonappe attin, asa sheniyan haasayettibeenna” yaagees. Nuuni wodiyaa immidi buzo xinaatiyan Geeshsha Maxaafaa loyttidi xannˈiyo wode, geeshsha ayyaanan xaafettida qaalan nu qofay kumees. (1 Qoronttoosa 2:10 nabbaba.) He qaalay nuuni nu xallau coˈˈu giidi oyqqennaadan, nu giddon “eexxiya tama mala” gidana danddayees.

10, 11. (a) Xalatettan yootanau koyikko, Geeshsha Maxaafaa waatidi xannaˈana koshshii? (b) Intte buzo xinaatiyaa kaseegaappe loyttanau qoppido issi hanotaa yoota.

¹⁰ Geeshsha Maxaafaa buzo xinaatee nuna denttettiyo wolqqay deˈiyo gishshau, Geeshsha Maxaafaa qofay nu wozanaanne garssa asatettaa denttettiya ogiyan xannaˈana koshshees. Leemisuwau, hananabaa yootiya Hizqqeeli, siyanau koyenna asau yootiyo wolqqaama kiitaa oyqqida xaatta maxaafaa maanaadan ayyo ajjuutan odettiis. Hizqqeeli he kiitaa siyanaunne aara mogganau koshshiis. Hegaadan oottiyoogee, he kiitaa yootiyoogee ufayssiyaagaa gidanaadan, ubba  eessaadan malˈˈanaadan oottiis.—Hizqqeela 2:8–3:4, 7-9 nabbaba.

¹¹ Nu hanotay Hizqqeelaagaara issi mala. Ha wodiyan daroti Geeshsha Maxaafay yootiyoobaa siyanau koyokkona. Nuuni Xoossaa Qaalaa yootiyoogan genccanau koyiyaaba gidikko, Geeshsha Maxaafaa loytti akeekanaunne i giyoobaa ammananau danddayissiya ogiyan xannaˈana koshshees. Issi issitoo xalla gidennan ubbatoo xannaˈiyo meezee deˈiyoogeeta gidanau koshshees. Nu koshshay: “Abeet GODAU, ta wogga zaallau, tana wozidaagoo, ta doonaappe kiyiya qaalainne ta wozanaa qofai nena ufaissiyaabaa gido” giida mazamuraawiyaagaa mala gidana koshshees. (Mazamure 19:14) Geeshsha Maxaafaa tumay nu wozanan aqana mala, nuuni nabbabiyoobaa wotti dentti qoppanau wodiyaa immiyoogee keehippe koshshees! Nu buzo xinaatiyaa kaseegaappe loyttanau baaxetana koshshiyoogee qoncce. *

12. Geeshsha ayyaanaa kaaletuwaa kaallanaadan Kiristtaane shiiqoti nuna maaddiyoy aybissee?

¹² Yihoowa ayyaanaa maaduwaa demmiyo hara ogee, “issoi issuwaara waani siiqettanaakkonne qassi lo77⁠o oosuwaa waati oottanaakko . . . issippe shiiqiyoogaa” aggenna mala qoppiyoogaana. (Ibraawe 10:24, 25) Nuuni Kiristtaane shiiquwan ubbatoo beettanau, akeekan ezgganaunne tamaariyoobaa oosuwan peeshshanau baaxetiyoogee ayyaanaa kaaletuwaa kaalliyo loˈˈo oge. Qassi Yihoowa ayyaanay kaaletuwaa immiyoy gubaaˈiyaa baggaara gidennee?—Ajjuutaa 3:6 nabbaba.

Xala Gidiyoogan Demmiyo Goˈˈaa

13. Koyro xeetu layttan deˈida Kiristtaaneti sabbakiyo oosuwan polidobaappe ay tamaarana danddayiyoo?

¹³ Geeshsha ayyaanay salo gufantton saˈa micettan deˈiya wolqqa ubbaappe aadhees; i asaa naati Yihoowa sheniyaa polanaadan oottees. Koyro xeetu layttan deˈida Kiristtaaneti ayyaanaa maaduwan wolqqaama sibikate oosuwaa polidosona. Eti mishiraachuwaa “sa7an de7⁠iya mereta ubbaa matan” sabbakidosona. (Qolasiyaasa 1:23) Etappe daroti “tamaaribeenna coo asa” gidiyoogaa nuuni qoppiyo wode, eta denttettiday mino wolqqaa gidiyoogaa akeekoos.—Oosuwaa 4:13.

14. ‘Ayyaanan dochennaadan’ nuna aybi maaddana danddayii?

¹⁴ Nuuni geeshsha ayyaanaa kaaletuwaara moggidi deˈiyoogee, nu haggaazuwaa xalatettan polanaadan denttettees. Ayyaanaa demmanau aggennan woossiyoogan, buzo xinaatiyaa minnidi xannaˈiyoogan,  nuuni nabbabiyoobaa woosan wotti dentti qoppiyoogaaninne ubbatoo Kiristtaane shiiqotun beettiyoogan demmiyo goˈˈay ‘ayyaanan dochennaadan’ maaddees. (Roome 12:11, NW) “Iskkinddiriyan yelettida Aihuda asa issi Aphiloosa giyo yoho eranchchai Efisoona biis.” Abaa Geeshsha Maxaafay “ayyaanan mishettiiddi, Yesuusabaa sitti oottidi haasayeesinne tamaarissees” yaagees. (Oosuwaa 18:24, 25) ‘Ayyaanan dochennaagee’ nuuni sooppe soo biidi haggaaziyoonne haggaazuwau kiyennan markkattiyo wode kaseegaappe xala gidanaadan maaddana danddayees.

15. Kaseegaappe xalidi yootiyoogee nuna waatidi goˈˈii?

¹⁵ Kaseegaappe xalidi markkattiyoogee nuna goˈˈees. Nu oosoy keehippe koshshiyoogaanne goˈˈiyoogaa akeekiyo gishshau, nu xeelay kaseegaappe loˈˈo gidees. Nuuni haggaazuwan murutiyo wode keehippe ufayttiyo gishshau, kaseegaappe mishettidi oottoos. Sabbakiyo oosoy eesuwan oosettana koshshiyoogaa loytti akeekiyo gishshau, keehippe mishettidi oottoos.

16. Nuuni haggaazuwan shuggidaba gidikko, ay oottana koshshii?

¹⁶ Nuuni mishettidi haggaaziyoogaa aggiyaaba woykko kaseegaadan mishettidi haggaazennaba gidikko shin? Hegaadaana gidikko, nu hanotaa qorana bessees. PHauloosi: “Ammanuwan intte de7⁠iyaakkonne ane inttena qoridi pirddite” yaagidi xaafiis. (2 Qoronttoosa 13:5) Inttena hagaadan oychite: ‘Taani ayyaanan dochennan deˈiyaanaa? Ayyaana immanaadan Yihoowakko woossiyaanaa? Taani a sheniyaa polanau an ammanettiyoogaa ta woosay bessii? Nuuyyo imettida haggaazuwaa nashshiyoogaa ta woosay qonccissii? Ta buzo xinaatiyaa meezee ay malee? Taani nabbabiyoobaaninne siyiyooban wotta dentta qoppanau ay keena wodiyaa goˈettiyaanaa? Gubaaˈiyaa shiiqota ay keena xoqqu ootta xeelliyaanaa?’ Hagaa mala oyshata wotti dentti qoppiyoogee intte pacaa akeekanaunne hegaa giigissanau maaddana danddayees.

Xoossaa Qaalay Inttena Xalisso

17, 18. (a) Sabbakiyo oosoy ha wodiyan ay keena hanotan oosettiiddi deˈii? (b) Nuuni Xoossaa Kawotettaa mishiraachuwaa sabbakiyo wode, “yayyennan daro qonccissidi” haggaazana danddayiyoy ayba ogiyaanee?

¹⁷ Yesuusi hayquwaappe denddidi ba erissiyo ashkkaratuyyo: “Geeshsha Ayyaanai intte bolli wodhdhiyo wode, wolqqaa intte ekkana; ekkidi Yerusalaameeninne Yihudaa biitta ubban, Samaariyaaninne sa7aa gaxaa gakkanaashinkka taassi markkattiyaageeta gidana” yaagiis. (Oosuwaa 1:8) He wode doomettida oosoy ha wodiyan keehippe aahuwan oosettiiddi deˈees. Laappun miilooneppe dariya Yihoowa Markkati Xoossaa Kawotettaa kiitaa 230⁠ppe dariya biittatun yootiiddi deˈoosona. Eti issi layttan 1.5 biiloone gidiya saatiyaa haggaazuwan aattoosona. Zaarettidi oosettenna ha oosuwan mishettidi shaahettiyoogee ay keena ufayssiyaabee!

¹⁸ Koyro xeetu layttaagaadan ha wodiyankka sabbakiyo oosoy oosettiyoy Xoossaa ayyaanaa kaaletuwaana. Nuuni ayyaanaa kaaletuwau eeno giikko, “yayyennan daro qonccissidi” haggaazana. (Oosuwaa 28:31) Yaatikko, Xoossaa Kawotettaa mishiraachuwaa awaajjiyo wode ayyaanaa kaaletuwaa kaalliyaageeta gidoos!

[Tohossa qofata]

Ay Akeekadii?

• Nuuni Xoossaa Qaalaa yootiyo wode xalana koshshiyoy aybissee?

• Beni wode erissiyo ashkkarati xalan yootanaadan aybi maaddidee?

• Nuuni xalatettaa waatidi demmana danddayiyoo?

• Xala gidiyoogee nuna waatidi goˈˈii?

[Oyshata]

[Sinttaa 13n deʼiya misiliyaa]

Naati xala gidanaadan yelidaageeti waatidi maaddana danddayiyoonaa?

[Sinttaa 14n deʼiya misiliyaa]

Qantta woosay neeni haggaazuwan xalanaadan maaddana danddayees