Yesuusappe Tamaariyoobaa

Tumu Goynuwaa Xeelliyaagan

Ubbaa goynoy Xoossaa ufayssii?

▪ Worddo haymaanootiyan cimettida asau Yesuusi qarettiis. ‘Bolla baggaara dorssa milatidi, garssa baggaara wanggireellotu mala gidida, wordduwaa hananabaa yootiyaageetuppe naagettanaadan’ yootiis. (Maatiyoosa 7:15) Haymaanoote sunttan iitabaa oottiya asaa beˈa eray?

Yesuusi: “Ne qaalaikka tumatettaa” yaagidi Xoossaakko woossiis. (Yohaannisa 17:17) Hegaa gishshau, Geeshsha Maxaafaa tumaara moggenna goynoy Xoossaa ufayssenna. Yaatiyo gishshau, haymaanootiyaa asa gidida, loˈˈo milatiya iitatussi Yesuusi Xoossaa qaalaappe: “Asai tau mela goinnees; aissi giikko, asi oottido azazuwaa Xoossaa higgiyaa milatissidi tamaarissees” yaagiyaagaa yootiis.—Maatiyoosa 15:9.

Tumu haymaanootee deˈii?

▪ Worddo haymaanootiyan cimettida maccaaseera Samaariyan gayttido wode, Yesuusi iyyo: “Intte Samaariyaa asai intte erennabau goinneeta; . . . Aawau tumaappe goinniyaageeti ayyaanaaninne tumatettan goinniyo wodee matattiis. . . . Aissi giikko, asi baayyo goinnana mala, Aawai koyiyoogeeti hageetu malaa” yaagiis. (Yohaannisa 4:22, 23) Tumu goynuwaa shaakki erana danddayiyoogee qoncce.

Yesuusi: “Taani ta Aawai tana tamaarissidoogaadan haasayiyoogaappe attin, ta shenen ainne oottennaagaa intte erana” yaagiis. Hegaa gishshau, Yesuusi i tamaarissido haymaanoote xallay tuma gidiyoogaa erees. (Yohaannisa 8:28) Yaatiyo gishshau, i: “Ogee, tumainne de7⁠oi tana; ta baggaarappe attin, ooninne ta Aawaakko baanau danddayenna” yaagiis. (Yohaannisa 14:6) Tumaappe goynniyaageeti Aawaakko issi ogiyan shiiqido gishshau, eti issi tumu haymaanootiyan issippetettaa medhana bessees.

 Tumaappe goynniyaageeta waatada shaakka erana danddayay?

▪ Kiristtaane giyo uri Yesuus Kiristtoosa kaalliyaagaa. Yesuusa leemisuwaa kaalliyoogee a kaalliyaageeta dummayidi erissiyo oyddu ogeta ane beˈoos.

1. Yesuus Kiristtoosi: “Taani ne sunttaa eta erissaas” yaagidi Yihoowakko woossiis. (Yohaannisa 17:26) Tumu Kiristtaaneti hachikka hegaadan oottoosona.

2. Yesuusi Yihoowa Kawotettaabaa sabbakiis; qassi ba erissiyo ashkkaratikka sooppe soo biidi hegaadan oottanaadan kiittiis. I: “Intte geliyo kataman woi qeeri kataman ubban inttena mokkanau ufaittiyai oonakkonne akeekan xomoosite” yaagiis. Takkidi, ba erissiyo ashkkarata: “Hegaa gishshau, intte biidi, asa ubbaa tana kaalliyaageeta oottite” yaagiis. (Maatiyoosa 10:7, 11; 28:19) Tumu Kiristtaaneti ha wodiyan hegaa mala oosuwaa oottiyo gishshau, eta shaakki eriyoogee metenna.

3. Yesuusi polotikan shaahettibeenna. Hegaa gishshau, bana kaalliyaageeta xeelliyaagan: “Taani sa7aassa gidennaagaadan, etikka sa7aassa [gidokkona]” yaagiis. (Yohaannisa 17:14) Tumaappe goynniyaageeti polotikan shaahettennaagee qoncce gidana koshshees.

4. Yesuusi ba goˈˈaa yarshshiyoogan harata siiqiis. I: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Tumu Kiristtaaneti issoy issuwau qoppoosonanne olan shaahettokkona.

Tumu goynoy nena waatidi goˈˈana danddayii?

▪ Neeni tumu goynuwaa kaallanau kasetada Yihoowa loyttada erana koshshees. Xoossaa eriyoogee aybippenne aadhiya deˈo ogiyaa neeni kaallanaadaaninne Xoossaa wozanappe siiqanaadan maaddees. Yihooway bana siiqiyaageetuyyo merinaa deˈuwaa immanau qaalaa geliis. Yaatiyo gishshau, Yesuusi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagiis.—Yohaannisa 17:3.

Aaho qofaa demmanau ha maxaafaa, shemppo 15 xeella. Tumuppe GEESHSHA MAXAAFAY TAMAARISSIYOY AYBEE? Yihoowa Markkati attamissidoogaa.

[Sinttaa 8n deʼiya misiliyaa]

“Bolla baggaara dorssa milatidi, inttekko yiya wordduwaa hananabaa yootiyaageetuppe naagettite; shin tumaappe eti garssa baggaara wanggireellotu mala.”—Maatiyoosa 7:15