Maccaasatoo, Intte Haarettana Koshshidoy Aybissee?

“Attumaasi maccaasassi huuphe.”—1 QORONTTOOSA 11:3.

1, 2. (a) Haariyoogaanne haarettiyoogaa xeelliyaagan Yihoowa giigissuwaa kiitettida PHauloosi woygidi xaafidee? (b) Ha huuphe yohuwan tobbana oyshati awugeetee?

HAARIYOOGAANNE haarettiyoogaa xeelliyaagan Yihooway kessido maaraa, kiitettida PHauloosi: “Kiristtoosi attumaasa ubbaayyo huuphe,” qassi “Xoossai Kiristtoosassi huuphe” yaagidi xaafiis. (1 Qoronttoosa 11:3) Yesuusi baassi Huuphe gidida Xoossaa Yihoowau haarettiyoogan ufayttiyoogaanne hegaa maatadan xeelliyoogaa, qassi Kiristtaane attuma asau Kiristtoosi huuphe gidiyoogaa aadhida huuphe yohuwan akeekida. Kiristtoosi asaa kehatettan, siiquwaaninne qaretan oyqqiis. Gubaaˈiyan deˈiya attuma asay harata, ubba qassi bantta machota hegaadan oyqqana koshshees.

² Maccaasay shin? Etau huuphe gidiyay oonee? PHauloosi: “Attumaasi maccaasassi huuphe” yaagidi xaafiis. Ayyaanaa kaaletuwan xaafettida ha qofaa maccaasay waatidi xeellana koshshii? Azinay ammanennaagaa gidiyo wodekka ha baaso siraatay oottii? Machoti banttau huuphe gidiya azinatuyyo haarettiyoogee, i issibaa kuuyiyo wode banttau siyettiyaabaa qonccissana koshshenna giyoogee? Issi maccaasiyaa galatettana danddayiyoy ayba ogiyaanee?

‘Taani Ayyo Maaddiyaabaa Kessana’

3, 4. Aqo deˈuwan huuphe gidiya uri deˈanaadan giigissido giigissoy goˈˈiyoy aybissee?

³ Huuphe gidana bessiyay oonakko maaraa kessiday Xoossaa. Addaamee meretti simmin Xoossaa Yihooway: “Bitanee barkka de7⁠iyoogee lo77⁠o gidenna; taani ayyo injjetiyaabaanne maaddiyaabaa kessana” yaagiis. Hewaana merettin, laggenne maaddiyaabaa demmido gishshau Addaamee ufayttidi: “Hayyashsho! Ha  meqettiyaa ta meqettaappe, ha ashiyaakka ta ashuwaappe ekettidaaro” yaagiis. (Doomettaabaa 2:18-24) Gannate saˈan merinau ufayssan deˈana asaa naatu ubbau aawanne aayo gidiyo gita maatay Addaameyyoonne Hewaaniyyo deˈees shin.

⁴ Nu koyro aawaynne aayyiyaa makkalidoogaa gaasuwan, Edene gannatiyan deˈiya polo hanotay attiis. (Roome 5:12 nabbaba.) SHin azinay macheeyyo huuphe gidiyoogee attibeenna. He giigissuwaa bessiyaagaadan kaalliyoogee aqo deˈuwan daro goˈˈaanne ufayssaa demissees. Hegee, Yesuusi baassi Huuphe gidiya Yihoowayyo haarettiyoogan au siyettidoogaadan siyettanaadan oottees. Yesuusi asa gidanaappe kase ‘ubba gallassi [Yihoowa] sinttan ufayttiis.’ (Leemiso 8:30) Polo gidennaagaappe denddidaagan, attuma asay ba maataa polo ogiyan goˈettana danddayenna; maccaasaykka polo ogiyan haarettanau danddayenna. Gidikkokka, azinatinne machoti wozanappe baaxetikko, he giigissoy eti ha wodiyan bantta aqo deˈuwan keehi ufayttanaadan oottees.

5. Roome 12:10n deˈiya zoriyaa aqo laggeti akeekana koshshiyoy aybissee?

⁵ Ubba Kiristtaanetuyyo odettida: “Issoi issuwaara ishanttudan siiqettite; issoi issuwaa bonchchiyoogan ufaittite” yaagiya Geeshsha Maxaafaa zoriyaa aqo laggeti oosuwan peeshshiyoogee, aqo deˈoy ufayssiyaagaa gidanaadan keehippe koshshees. (Roome 12:10) Hegaadankka, azinaynne machiyaa ‘issoi issuwaayyo kehanaunne qarettanau, qassi issoy issuwaayyo atto gaanau’ baaxetana koshshees.—Efisoona 4:32.

Aqo Laggee Ammanennaagaa Gidiyo Wode

6, 7. Kiristtaane machiyaa ammanenna azinau haarettiyoogee ay kaalettana danddayii?

⁶ Ne aqo laggee Yihoowayyo goynniyaagaa gidana xayikko shin? Darotoo, Yihoowa Markka gidennaagee azinaa. Hegaadaana gidiyo wode, maccaasiyaa a waata oyqqana koshshii? Geeshsha Maxaafay: “Maccaasatoo, intte azinatuppe Xoossaa qaalau azazettenna issooti issooti de7⁠ikkokka, intte palamettennan, eti intte yashshatettaanne intte geeshsha de7⁠uwaa be7⁠idi ammanana mala, etau haarettite” yaagees.—1 PHeexiroosa 3:1, 2.

⁷ Ammanenna azinaayyo machiyaa ubbatoo haarettanaadan Xoossaa Qaalay yootees. A loˈˈo eeshshaa bessanaadan denttettiday aybakko azinay qoppanaadan i eeshshay maaddana danddayees. Hegee, azinay Kiristtaane gidida ba machee ammanuwaa pilgganaadaaninne guyyeppe tumaa ekkanaadan oottana danddayees.

8, 9. Kiristtaane machiyaa loˈˈo eeshshaa bessiyaaba gidikkokka, ammanenna azinay tumaa koyennaba gidikko, ay oottana danddayay?

⁸ Machiyaa loˈˈo eeshshaa bessiyaaba gidikkokka, ammanenna azinay tumaa koyennaba gidikkoshin? Keehippe deexxiyaaba gidikkokka, ammaniya machiyaa ubba wode Kiristtaane eeshshaa bessana mala Geeshsha Maxaafay minttettees. Leemisuwau, 1 Qoronttoosa 13:4y: “Siiqoi danddayanchcha” yaagees. Kiristtaane machiyaa ‘ubba wode ba huuphiyaa kawushshiyaaro, ashkkenne danddayancha gidada,’ he hanotaa siiquwan danddayana koshshees. (Efisoona 4:2) Deexxiya hanotay deˈishinkka, Xoossaa wolqqaa, geeshsha ayyaanaa maaduwan ubbatoo Kiristtaane eeshshaa bessiyoogee danddayettiyaaba.

⁹ PHauloosi: “Tau wolqqaa immiya a baggaara ubbabaa oottanau danddayays” yaagidi  xaafiis. (Piliphphisiyuusa 4:13, NW) Kiristtaane aqo laggee hara ogiyan oottana danddayenna darobaa oottanaadan Xoossaa ayyaanay maaddees. Leemisuwau, aqo laggiyaa iita hanotan oyqqiyoogee, hinkkoy kushe zaaranau paacettanaadan oottana danddayees. SHin Geeshsha Maxaafay ubba Kiristtaanetuyyo: “Ooninne intteyyo iitabaa oottikko, he urau iitabaa ootti zaaroppite; . . . aissi giikko, Xoossaa maxaafai, ‘Godai, “Taani haluwaa kessana; taani kushiyaa zaarana” yaagees’” yaagees. (Roome 12:17-19) Hegaadankka, 1 Tasalonqqe 5:15y: “Ooninne iitaa gishshaa iitaa zaarenna mala naagettite; shin issoi issuwaayyoonne qassi asa ubbaayyo lo77⁠obaa oottanau minnite” yaagi zorees. Nu wolqqan oottana danddayennabaa, Yihoowa geeshsha ayyaanaa maaduwan oottana danddayoos. Nuuyyo paccidabaa kunttanaadan Xoossaa geeshsha ayyaanaa demmanau woossiyoogee bessiyaaba.

10. Harati iitabaa haasayiyoonne oottiyo wode Yesuusi he hanotaa waatidi oyqqidee?

¹⁰ Yesuusi ba bolli bessennabaa haasayidanne oottida asata oyqqido ogiyan loˈˈo leemiso gidees. Koyro PHeexiroosa 2:23y: “Asi bana cayiyo wode, zaaridi cayibeenna; waayettiyo wodekka manddibeenna. SHin xillo pirddiya Xoossaayyo bana aattidi immiis” yaagees. Nuuni a loˈˈo leemisuwaa kaallanaadan zoree imettiis. Haratu iita eeshshan yiillotoppite. Ubba Kiristtaanetuyyo imettida zoriyaadan, “issoi issuwau kehiyaageetanne intte huuphiyaa kaushshiyaageeta gidite. Iitaa gishshaa iitaa woi cashshaa gishshaa cashshaa zaaroppite.”—1 PHeexiroosa 3:8, 9.

Bau Siyettiyaabaa Qonccissekkee?

11. Issi issi Kiristtaane maccaasay ayba gita maataa demmii?

¹¹ Machiyaa baayyo huuphe gidiya azinaayyo haarettausu giyoogee, aqo deˈuwan bau siyettiyaabaa qonccissukku, so asaara gayttidaban woykko hara allaalliyan ba qofaa yootukku giyoogee? CHii. Maccaasaukka attuma asaukka Yihooway daro maataa immiis. Kiristtoosi ha saˈaa haariyo wode, 144,000⁠ti saluwan appe garssaara kawonne qeese gidiyoogee ayba gita maatakko ane qoppite! Hegeetu giddon maccaasaykka deˈees. (Galaatiyaa 3:26-29) Yihoowa giigissuwan maccaasay oottiyoobay deˈiyoogee qoncce.

12, 13. Maccaasay hananabaa yootidoogaa bessiya leemisuwaa yoota.

¹² Leemisuwau, beni wode maccaasay hananabaa yootiis. Yuu7⁠eela 2:28, 29n: “Taani asa ubbaa bolli ta Ayyaanaa gussana. Intte attuma naatinne intte macca naati hananabaa yootana; . . . he gallassatun ta attuma ashkkaratu bollinne ta macca ashkkaratu bolli taani ta Ayyaanaa gussana” geetettidi kaseti odettiis.

¹³ PHenxxaqosxxe gallassi 33 M.Ln, Yerusalaamen issi pooqiyan shiiqida 120 gidiya, Yesuusi erissiyo ashkkarati attumaageetanne maccaageeta. Eta ubbaa bolli Xoossaa ayyaanay gukkiis. Yaatiyo gishshau, Yuu7⁠eeli kasetidi yootidobaa PHeexiroosi odiis; qassi hegee attuma asaanne maccaasaa bolli polettidoogaa yootiis. PHeexiroosi hagaadan giis: “Hagee hananabaa yootiya Yuu7⁠eeli haasayidoogaa. I haasayiiddi, ‘Xoossai hagaadan yaagees; wodiyaa wurssettan hagaadan hanana. Taani asa ubbaa bolli ta Ayyaanaa gussana. Intte attuma naatinne intte macca naati hananabaa yootana. . . . He gallassatun ta attuma ashkkaratu bollinne ta macca ashkkaratu bolli taani ta Ayyaanaa gussana. Gussin eti hananabaa yootana’ [yaagiis.]”—Oosuwaa 2:16-18.

14. Beni wode Kiristtaane ammanuwaa aassiyoogan maccaasay ay oottidee?

¹⁴ Koyro xeetu layttan Kiristtaane ammanuwaa aassiyoogan maccaasay darobaa oottiis. Eti Xoossaa Kawotettaabaa haraatussi sabbakidosona; qassi sabbakiyo oosuwaara gayttidabaa oottidosona. (Luqaasa 8:1-3) Leemisuwau, kiitettida PHauloosi Peebo, “Kinkkiriyaa giyo kataman de7⁠iya woosa keettan oottiya” michchiyo yaagiis. PHauloosi banaara oottiyaageetussi sarotaa kiittido wode, “Godaa oosuwan daafuriya Tirufain[o]nne Tirufoos[o]” gujjin ammanettida maccaasaabaa yootiis. I “Godau daro daafurada oottiya siiqiyo Perssiiso” saro gaanaadankka yootiis.—Roome 16:1, 12.

15. Ha wodiyan Kiristtaane ammanuwaa aassiyoogan maccaasay ay oottii?

¹⁵ Ha wodiyan alame yuushuwan Xoossaa  Kawotettaa mishiraachuwaa sabbakiya laappun miilooneppe dariya asaa giddon daro baggay maccaasaa. (Maatiyoosa 24:14) Hegeetuppe daroti kumetta wodiyaa haggaaziyaageeta, miisoonaweta, Beeteelen oottiyaageeta. Mazamuraawee Daawiti: “Godai kiitaa kiittiis; he kiitaa efiida maccaasati daro” yaagiis. (Mazamure 68:11) Ha qaalay keehippe tumattiis. Mishiraachuwaa yootiyoogaaninne a halchoy polettiyoogaara gayttidaagan maccaasay oottiyoobaa Yihooway xoqqu oottidi xeellees. Kiristtaane maccaasay haarettanaadan Yihooway koyiyoogee bantta qofaa qonccissokkona giyoogaa gidennaagee qoncce.

Banttau Siyettidabaa Qonccissida Naaˈˈu Maccaasata

16, 17. Maccaasay bau siyettiyaabaa yootana bessiyoogaa Saari leemisoy waatidi qonccissii?

¹⁶ Yihooway maccaasaassi daro maataa immidaba gidikko, wolqqaama kuushsha kuuyanaappe kase azinati bantta maccaasata zoreta bessana koshshennee? Eti hegaadan oottiyoogee eratetta. Azinati oychennan deˈishin maccaasati banttau siyettidabaa yootido woykko oottido amarida hanotaabaa Geeshsha Maxaafay yootees. Naaˈˈu hanotaa ane beˈoos.

¹⁷ Abrahaama kaalo maccaasiyaanne i naˈay boncho bessibeenna gishshau, eta sooppe kessi yeddana mala Saara ayyo zaaretta zaaretta yootaasu. He yohuwan “Abrahaami keehippe metootiis.” SHin Yihooway Saari qofaa kaafidi Abrahaama: “Na7aayyoonne ne ailleeyyo keehi metootoppa; Saara neeyyo yootiyoobaa ubbaa siya” yaagiis. (Doomettaabaa 21:8-12) Abrahaami Yihoowayyo azazettiis; Saara giyoobaa siyidi, a oychidobaa oottiis.

18. Abigaala bau qoppada ay oottadee?

¹⁸ Naabaala machee Abigaali hanotaakka qoppa. Daawiti qanaatiya Kawuwaa Saaˈoolappe baqatido wode, Naabaala wudee deˈiyo heeran guutta wodiyau deˈiis. Ha dure bitaniyau deˈiya daro aquwaappe aybanne ekkennan, Daawitinne a asay he bitaniyaa aquwaa naagidosona. SHin Naabaali “meqetti bainna iita asa”; qassi Daawitanne a asaa “cayiis.” I “eey[y]a” asa. Banttau koshshiyaabaa immanaadan Daawita asay bonchuwan oychido wode, Naabaali ixxis giis. Hanettidabaa siyido wode Abigaala ay oottadee? A Naabaalayyo yootennan, “sohuwaarakka naa77⁠u xeetu komppo oittaanne naa77⁠u ogoro woine eessaa, xiixettida dorssata ichchashata, tammanne laappun kilo giraame tiyaa xiixaa, issi xeetu wurcco woiniyaa teeraanne balasiyaa lichchakuwaa melaappe naa77⁠u xeetaa ekkada,” hegaa Daawitayyoonne a asaayyo immaasu. Abigaala oottidobay likkee? Ee, guyyeppe hanidabay a oottidobay likke gidiyoogaa bessees. Geeshsha Maxaafay: “GODAI Naabaala shocin, i haiqqiis” yaagees. Guyyeppe Daawiti Abigaalo machiis.—1 Sameela 25:3, 14-19, 23-25, 38-42.

‘Galatettiya Machiyo’

19, 20. Issi maccaasiyaa tumuppe galatettanaadan oottiyay aybee?

¹⁹ Yihoowa ufayssiyaabaa oottiya maccaasiyaa Geeshsha Maxaafan nashettawusu. Geeshsha Maxaafan Leemiso maxaafay, “wozannaama machcho”: “Inqquwaa giyo al77⁠o shuchchaappekka a al77ausu. I keettaawai o ubbabankka ammanees; ayyo de7anau bessiyaabaappe aibinne paccenna. A ba de7⁠o laitta ubban ayyo lo77⁠obaappe attin, iitabaa  oottukku” yaagidi nashshees. Gujjidikka, “Aadhdhida eran a haasayausu; ammanttiya zoree i inxxarssaappe kiyees. A ba so asaa de7⁠uwaa injjeyanau ubbaton ooso oottaidda de7ausu; azalla hanoi i bollan beetti erenna. I naati denddi eqqidi, o nashshoosona; i keettaawaikka o [galatees]” yaagees.—Leemiso 31:10-12, 26-28.

²⁰ Issi maccaasiyaa tumuppe galatettanaadan oottiyaabi aybee? Leemiso 31:30y: “Mera lo77⁠otetti allaalle kessenna; puulikka xayana; shin GODAASSI yayyiya maccaasiyaa, a galatettanau bessausu” yaagees. Yihoowayyo yayyiyoogee, huuphe gidanaadan i sunttidoogeetuyyo eeno giidi haarettiyoogaa gujjees. “Kiristtoosi attumaasa ubbaayyo huuphe,” qassi “Xoossai Kiristtoosassi huuphe” gidiyoogaadan “attumaasi maccaasassi huuphe.”—1 Qoronttoosa 11:3.

A Imotau Xoossaa Galatite

21, 22. (a) Ekkidanne gelida Kiristtaaneti Xoossaa imota gidida aqo deˈuwaa gishshau galatiyo gaasoti awugeetee? (b) Yihooway giigissido aawatettaanne huuphe gidiyo maataa bonchana koshshiyoy aybissee? (Sinttaa 20n deˈiya saaxiniyaa xeella.)

²¹ Ekkidanne gelida Kiristtaaneti Xoossaa galatiyo daro gaasoy deˈees! Eti ufayttiya aqo lagge gididi, hashetidi deˈana danddayoosona. Eti issoy issuwaara maayettidi deˈanaadaaninne Yihoowaara hemettanaadan oottida, aqo deˈuwaa imotaa gishshau, Xoossaa galatana danddayoosona. (Uruto 1:9; Mikiyaasa 6:8) Aqo deˈuwaa Giigissidaagee ufayssiya aqo deˈuwau koshshiyaabaa loyttidi erees. Ubbabaa i koyiyo ogiyan ubbatoo oottikko, ha iita wodiyankka “GODAA ufaissai intteyyo wolqqa” gidana.—Nahimiyaa 8:10.

²² Ba machiyo ba huuphedan siiqiya Kiristtaane azinay, huuphe gidiyo maataa siiquwaaninne iyyo qoppiyoogan goˈettees. Xoossau yayyiya machiyaa ba azinaa kaafiyoonne wozanappe bonchiyo gishshau, i azinay o wozanappe siiqees. He ubbaappe aadhiyaagee, eta loˈˈo aqo deˈoy galatay bessiyo Xoossaa Yihoowa bonchissees.

Hassayay?

• Haariyoogaanne haarettiyoogaa xeelliyaagan Yihoowa giigissoy aybee?

• Aqo laggeti issoy issuwaa bonchana koshshiyoy aybissee?

• Ammaniya machiyaa ammanenna azinaa waata oyqqana koshshii?

• Azinay wolqqaama kuushshaa kuuyanaappe kase ba machiyo zoreta bessana koshshiyoy aybissee?

[Oyshata]

[Sinttaa 20n deʼiya saaxiniyaa]

Aawatetta Maataa Bonchiyoy Aybissee?

Qoppi danddayiya meretatu giddon aawatiyaageetinne huuphe gidiyaageeti deˈanaadan Yihooway giigissiis. I hegaa oottidoy ayyaana meretatunne asaa naatu goˈˈaassa. He giigissoy eti bantta koyidobaa dooriyo maataa goˈettanaadaaninne maayettidi Xoossaayyo oottiyoogan a bonchanaadan injjiyaa medhees.—Mazamure 133:1.

Tiyettida Kiristtaanetu gubaaˈee Yesuus Kiristtoosa aawatettaanne i huuphe gidiyoogaa ammanees. (Efisoona 1:22, 23) Yihoowa aawatettaa ammanidi ekkiyoogan, wurssettan “Kiristtoosi qassi ba huuphen ubbabaa bana haarissida Xoossaassi haarettana. Xoossai qassi ubbabaa wurssidi haarana.” (1 Qoronttoosa 15:27, 28) Hegaa gishshau, ba huuphiyaa Xoossau geppida asay gubbaaˈiyaaninne so giddon huuphe gidiyaageetuura hashetiyoogee ay keena koshshiyaabee! (1 Qoronttoosa 11:3; Ibraawe 13:17) Hegaadan oottiyoogan, Yihoowan nashettiyoogaaninne a anjjuwaa demmiyoogan goˈetttoos.—Isiyaasa 48:17.

[Sinttaa 17n deʼiya misiliyaa]

Kiristtaane machiyaa Xoossaa ufayssiya eeshshaa bessanaadan woosay maaddana danddayees

[Sinttaa 19n deʼiya misiliyaa]

Xoossaa Kawotettaara gayttidabaa aassiyoogan maccaasay oottiyoobaa Yihooway xoqqu oottidi xeellees