Nabbabiyaageetu Oyshaa

Yihooway eeqaa goynuwaa diggees; yaatin, Aarooni worqqaappe maraa medhido wode ayssi qaxxayibeennee?

Kessaabaa shemppo 32y yootiyoogaadan, Aarooni worqqaappe maraa medhido wode, eeqaa goynuwaa xeelliyaagan Xoossay kessido higgiyaa kanttiis. (Kessaabaa 20:3-5) Hegaappe denddidaagan, “GODAI Aaroonakka xaissanau keehi hanqqettiis; yaatin, he wode [Muusee] Aaroonayyookka” woossiis. (Zaarettido Wogaa 9:19, 20) Xillo asa gidiya Muuse woosay Aaroonaara gayttidaagan “wolqqaama oosuwaa” oottidee? (Yaaqooba 5:16) Ee oottiis. He woosaappenne naaˈˈa gidiya hara gaasotuppe denddidaagan, Yihooway Muuse woosaa siyidi Aaroona qaxxayennan aggidaba malatees.

Issi gaasoy Aarooni ammanettidi deˈida asa gidiyoogaara gayttidaba malatees. Paaroonakko biidi Israaˈeeleta Gibxxeppe kessanaadan Muusee kiitettido wode, Yihooway Aarooni aara baanaadaaninne ayyo doona gididi haasayanaadan sunttiis. (Kessaabaa 4:10-16) Gibxxe kawoy wozanaa muume gidikkonne ha naaˈˈu asati hegaa danddayidi, Yihoowayyo azazettiyoogan darotoo Paaroonakko biidosona. Hegaa gishshau, Gibxxen deˈiyo wodekka, Aarooni ammanettiyaagaanne minnidi Yihoowayyo oottiyaagaa gidiyoogaa bessiis.—Kessaabaa 4:21.

Aarooni worqqaappe maraa medhanaadan oottidabaakka qoppa. Muusee Siinaa Deriyan 40 gallassaa takkiis. “Muusee deriyaappe wodhdhennan keehi gam77⁠idoogaa be7⁠ido wode,” asay Aarooni eeqaa medhanaadan oottiis. Aarooni eta qofaa maayidi, worqqaappe maraa medhiis. (Kessaabaa 32:1-6) SHin Aarooni hegaappe guyyiyan oottidobay, i he eeqan ufayttibeennaagaa bessees. I asay denttettin oottidaba malatees. Leemisuwau, eeqaa goynuwaara gayttida metuwaa Muusee giigissido wode, Aaroona gujjin Leewaa naati ubbay Yihoowa bagga gididosona. He eeqaa goynuwau waannatiya heezzu shaˈu asati bisuwan hayqqidosona.—Kessaabaa 32:25-29.

Hegaappe simmin Muusee asaayyo: “Intte gita nagaraa oottideta” yaagiis. (Kessaabaa 32:30) Yaatiyo gishshau, he nagaran oyshettiyay Aaroona xalla gidenna. Ikka asaykka Yihoowa gita maarotettan goˈettidosona.

He hanotaappe simmin, Yihooway Aarooni qeesetu waanna halaqa gidanaadan azaziis. Xoossay Muusa: “Hegaappe guyyiyan, a qeesetettaa maayuwaa Aaroona maizzada, taayyo qeesetettan oottanaadan, a tiyada dummaya” yaagiis. (Kessaabaa 40:12, 13) Yihooway Aaroona nagaraa atto giidoogee qoncce. Aarooni tumu goynuwaa ammanettidi wozanappe kaafiisippe attin, makkalidi eeqau goynnibeenna.