Yihoowa Geeshsha Ayyaanaa Azzanissoppite

“Intte parametti uttido Xoossaa Geeshsha Ayyaanaa azzanissoppite.” —EFISOONA 4:30.

1. Miilooniyan qoodettiya asau Yihooway ay oottidee, qassi eti ay oottana bessii?

WAYSSIYA ha alamiyan deˈiya miilooniyan qoodettiya asau Yihooway issi dummabaa oottiis. I ba mexi issi Naˈaa, Yesuus Kiristtoosa baggaara eti baakko shiiqanaadan oottiis. (Yohaannisa 6: 44) Ne huuphiyaa Xoossaayyo geppidaagaanne hegaara moggada deˈiyaagaa gidikko, neeni hegeetuppe issuwaa. Geeshsha ayyaanaa sunttan xammaqettidaagaa gidiyoogaadan, neeni he ayyaanaara moggiya ogiyan deˈana bessees.—Maatiyoosa 28:19.

2. Woygiya oyshata beˈanee?

² ‘Ayyaanan zeriya’ nuuni ooratta asatettaa maayoos. (Galaatiyaa 6:8; Efisoona 4:17-24) SHin kiitettida PHauloosi nuuni Xoossaa geeshsha ayyaanaa azzanissenna mala zoriisinne akeekissiis. (Efisoona 4:25-32 nabbaba.) Ane haˈˈi PHauloosa zoriyaa akeekan pilggoos. Xoossaa ayyaanaa azzanissiyoogaa yootido wode, PHauloosi woyganau koyidee? Bana Yihoowayyo geppida uri waatidi hegaadan oottana danddayii? Yihoowa ayyaanaa azzanissiyoogaappe waani haakkana danddayiyoo?

 PHauloosi Gaanau Koyidobaa

3. Efisoona 4:30n deˈiya qaalaa birshshettaa woygada qonccissuutee?

³ Koyruwan, Efisoona 4:30n deˈiya PHauloosa qaalata akeeka. I: “Xoossai inttena woziyo gallassau intte parametti uttido Xoossaa Geeshsha Ayyaanaa azzanissoppite” yaagidi xaafiis. PHauloosi i siiqiyo Kiristtaaneti ayyaanaaban qohettanaadan koyibeenna. ‘Woziyo gallassau eti paramettidoy’ Yihoowa ayyaanaana. Ayyaanan tiyettida ammanettidaageeta kase wode gidin, haˈˈikka paramiyay woykko sinttanaabau ‘waase’ mala gidiyay Xoossaa geeshsha ayyaanaa. (2 Qoronttoosa 1:22) He paramay eti Xoossaabaa gidiyoogaanne saluwaa deˈuwaa demmanaagaa malaatees. Paramettiyaageetu qooday wurssettan 144,000.—Ajjuutaa 7:2-4.

4. Xoossaa ayyaanaa azzanissiyoogaappe haakkana koshshiyoy aybissee?

⁴ Ayyaanaa azzanissiyoogee, issi Kiristtaanee ba deˈuwan Xoossaa ayyaanaa maaduwaa demmennaadan oottiya koyro tanggo. Daawiti Berssaabiira nagaraa ootti simmidi giidobay hegaadan hanana danddayiyoogaa bessees. Daawiti ba nagaraappe simmidoogaa bessiya hanotan: “Tana ne sinttaappe oloppa; ne Geeshsha Ayyaanaa taappe ekkoppa” yaagidi Yihoowakko woossiis. (Mazamure 51:11) Ayyaanan tiyettida, ‘hayqqana gakkanaassi ammanettiyaageetu’ xallay hayqqenna deˈuwaa “akiliiliyaa” saluwan ekkana. (ajjuutaa 2:10; 1 Qoronttoosa 15:53) Saˈaa deˈuwaa hidootay deˈiyo Kiristtaanetikka, Xoossaayyo ammanettidaageeta gidanaunne Kiristtoosa wozuwaa yarshshuwan ammaniyoogan Xoossay immiyo deˈuwaa imotaa demmanau geeshsha ayyaanay koshshees. (Yohaannisa 3:36; Roome 5:8; 6:23) Yaatiyo gishshau, nuuni ubbay Yihoowa geeshsha ayyaanaa azzanissennaadan naagettana bessees.

Issi Kiristtaanee Ayyaanaa Waatidi Azzanissana Danddayii?

5, 6. Issi Kiristtaanee Yihoowa ayyaanaa waatidi azzanissana danddayii?

⁵ Nu huuphiyaa geppida Kiristtaane gidiyoogaadan, ayyaanaa azzanissiyoogaappe haakkana danddayoos. Nuuni ubbatoo ‘ayyaanaa kaaletuwaa kaallikko,’ hegee danddayettiyaaba; yaatikko, bala gidida ashuwaa amuwan xoonettokko; qassi iita eeshshaa bessokko. (Galaatiyaa 5:16, 25, 26) SHin he hanotay laamettana danddayees. Geella akeekennan, Xoossaa ayyaanaa kaaletuwan xaafettida Qaalan digettida eeshshaa loddan loddan bessiyaaba gidikko, Xoossaa ayyaanaa amarida hanotan azzanissana danddayoos.

⁶ Geeshsha ayyaanaa kaaletuwaappe dummatiyaabaa ubbatoo oottiyaaba gidikko, ayyaanaanne au Pultto gidida Yihoowa azzanissoos. Efisoona 4:25-32 pilggiyoogee nuuni waani deˈana koshshiyaakko bessees; qassi Xoossaa ayyaanaa azzanissennaadan maaddana danddayees.

Ayyaanaa Azzanissiyoogaappe Haakkiyo Ogiyaa

7, 8. Nuuni tumancha gidana bessiyoy aybissakko qonccissa.

⁷Nuuni tumancha gidana bessees. PHauloosi Efisoona 4:25n: “Worddotoppite. Nuuni ubbai Kiristtoosa asatettan issi asa gidiyo gishshau, asai ubbai ba ishau tumaa haasayanau bessees” yaagidi xaafiis. Nuuni “Kiristtoosa asatettan issi asa gidiyo gishshau,” iitabaa maqqiyaageeta woykko nu mala Kiristtaaniyaa eriiddi balettiyaageeta gidana koshshennaagee qoncce; hegee etau worddotiyoogaara issi mala. Hegaa malabaa oottiyoogaa aggenna uri Xoossaara deˈiya dabbotay duuxxanaadan oottees.—Leemiso 6:16-19 nabbaba.

⁸ Cimo haasayaynne oosoy gubaaˈiyaa issippetettaa moorana danddayees. Yaatiyo gishshau, nuuni harati a bolli ayba balanne demmibeenna, hananabaa yootiya ammanettida Daaneela mala gidanau koshshees. (Daaneela 6:4) Saluwaa hidootay deˈiyo, ‘Kiristtoosa bolla’ gidida Kiristtaaneti ubbay, issi asatettaa shaaho gidiyoogaanne Yesuusa kaalliya tumuppe tiyettidaageetuura issippetettan  deˈana koshshiyoogaa PHauloosi zoridoogaa nuuni hassayana koshshees. (Efisoona 4:11, 12) Gannate saˈan merinau deˈanau hidootiyaaba gidikko, nuunikka tumaa haasayana bessees; yaatiyoogan, alame yuusho ishanttu maabaraa giddon issippetettay deˈanaadan oottoos.

9. Efisoona 4:26, 27⁠ra moggidi deˈiyoogee keehippe koshshiyoy aybissee?

⁹Ayyaanaaban Dabloosi nuna qohennaadan, a teqqana bessees. (Yaaqooba 4:7) Nuuni Seexaanaara eqettanaadan geeshsha ayyaanay maaddees. Leemisuwau, hanqquwan suullennaadan naagettiyoogan hegaadan oottana danddayoos. PHauloosi: “Hanqqettite; shin intte hanqquwan nagaraa oottoppite. Intte hanqqetti uttidaashin, awai wulloppo. Xalahe halaqaayyo soho immoppite” yaagidi xaafiis. (Efisoona 4:26, 27) Nuuni hanqqettanaadan oottiya gaasoy deˈiyaaba gidikko, sohuwaara nu wozanan woossiyoogee, Xoossaa ayyaanaa azzanissiyaabaa oottiyoogaappe nu huuphiyaa naagidi, “woppa ayyaani” deˈiyoogeeta gidanaadan maaddana danddayees. (Leemiso 17:27) Yaatiyo gishshau, iitabaa oottanaadan nuna sugiyo injjiyaa Seexaanay demmennaadan, hanqqettidi takkennaageeta gidoos. (Mazamure 37:8, 9) A eqettiyo issi ogee, Yesuusa zoriyaara moggidi eesuwan sigettiyoogaa.—Maatiyoosa 5:23, 24; 18:15-17.

10, 11. Nuuni wuuqqana woykko ammanettennaagaa bessiyaaba oottana koshshennay aybissee?

¹⁰Nuuni wuuqqanaadan woy ammanettennaadan oottiya ayba pacciyaaninne xoonettana bessenna. Wuuqqiyoogaa xeelliyaagan PHauloosi: “Wuuqqiya urai hagaappe sinttau wuuqqoppo; shin hegaa aggidi, hiyyeesata maaddanau, ba kushiyan lo77⁠obaa oottiiddi daafuro” yaagidi xaafiis. (Efisoona 4:28) Ba huuphiyaa geppida issi Kiristtaanee wuuqqikko, ‘Xoossaa sunttaa cayissees.’ (Leemiso 30:7-9) Hiyyeesatettaykka wuuqqanau gaaso gidenna. Xoossaanne bantta shooruwaa siiqiyaageeti wuuqqanau ayba gaasoynne baynnaagaa eroosona.—Marqqoosa 12:28-31.

¹¹ PHauloosi nuuni oottana koshshennabaa xallaa gidennan, oottana koshshiyaabaakka yootiis. Nuuni geeshsha ayyaanaa kaaletuwaadan simerettiyaabanne deˈiyaaba gidikko, nu soo asau koshshiyaabaa kunttanaunne “hiyyeesata maaddanau” minnidi oottoos. (1 Ximootiyoosa 5:8) Yesuusinne kiitettidaageeti hiyyeesata maaddanau miishshaa dagayoosona; shin guyyeppe Yesuusa kaddida Yihudaa Asqqorootu he miishshaappe baayyo ekkees. (Yohaannisa 12:4-6) I geeshsha ayyaanaa kaaletuwaa kaallibeennaagee qoncce. Xoossaa ayyaanaa kaaletuwaa kaalliya nuuni, PHauloosaagaadan ‘ubbaban ammanettidi deˈoos.’ (Ibraawe 13:18, NW) Yaatiyoogan, Yihoowa geeshsha ayyaanaa azzanissiyoogaappe haakkoos.

 Ayyaanaa Azzanissiyoogaappe Haakkiyo Hara Ogeta

12, 13. (a) Efisoona 4:29y qonccissiyoogaadan, ay mala haasayaappe nuuni haakkana koshshii? (b) Nu haasayay ay mala gidana koshshii?

¹²Nuuni haasayiyooban naagettana bessees. PHauloosi: “Intte haasayai siyiyaageeta go77ana mala, koshshiyoogaadan minttettiya lo77⁠o qaalai intte doonaappe kiyoppe attin, iita qaalai mulekka kiyoppo” yaagiis. (Efisoona 4:29) Ha xiqisiyankka, PHauloosi nuuni oottana koshshennabaa xallaa gidennan, oottana koshshiyaabaakka yootiis. Xoossaa ayyaanaa maaduwan, nuuni ‘siyiyaageeta goˈˈana mala minttettiya loˈˈo qaalaa’ haasayanau koyoos. Hegaa bollankka, nu doonaappe “iita qaalai” kiyana koshshenna. “Iita” geetettida Giriiketto qaalay mittaa ayfee wooqqidaagaa, shalqqida moliyaa woy ashuwaa qonccissanau goˈettiyoogaa. Hegaa mala qumaa nuuni shenetiyoogaadan, Yihooway iita giyo haasayaa ixxoos.

¹³ Nu haasayay “siyanau kehiyaagaanne ufaissiyaagaa gidanau bessees.” (Qolasiyaasa 3:8-10; 4:6) Nuuni dumma gidiyoogaa asay nu haasayaappe akeekana koshshees. Yaatiyo gishshau, “minttettiya lo77⁠o” haasayan harata minttettiyaageeta gidoos. “Abeet GODAU, ta wogga zaallau, tana wozidaagoo, ta doonaappe kiyiya qaalainne ta wozanaa qofai nena ufaissiyaabaa gido” yaagida mazamuraawiyaagaa mala qofay deˈiyoogeeta gidoos.—Mazamure 19:14.

14. Efisoona 4:30, 31 yootiyoogaadan, nuuni aybippe haakkana koshshii?

¹⁴Nuuni yiilluwaappe, hanqquwaappe, cashshaappenne iitatetta ubbaappe haakkana bessees. Xoossaa ayyaanaa azzanissiyoogaa xeelliyaagan akeekissi simmidi, PHauloosi: “Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite” yaagidi xaafiis. (Efisoona 4:30, 31) Polo asa gidenna gishshau, haasayiyoobaaninne oottiyooban naagettanau nu ubbay baaxetana koshshees. Nuuni “ixo hanotettaa, yiilluwaa, hanqquwaa” teqqana xayikko, Xoossaa ayyaanaa azzanissoos. Asi naaqqin lancciyaa uluwan oyqqiyo wode, yiillotiyo wodenne sigettanau koyenna wodekka, Xoossaa ayyaanaa azzanissoos. Geeshsha Maxaafaa zoriyaa siyennan ixxiyoogaa doommiyo wodekka, geeshshaa ayyaanaa bolli nagaraa oottanaadan sugiya eeshshay deˈiyoogeeta gididi, daafan gelana danddayoos.

15. Asi nuna naaqqikko, nuuni ay oottana koshshii?

¹⁵Nuuni keha, qarettiyaageetanne atto giyaageeta gidana koshshees. PHauloosi: “Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite” yaagidi xaafiis. (Efisoona 4:32) Asi naaqqin nuuni keehippe azzanidaba gidikkokka, Xoossay atto giidoogaadan atto giyaageeta gidoos. (Luqaasa 11:4) Leemisuwau, nu mala Kiristtaanee nuna qohiyaabaa haasayiis giidi qoppoos. He hanotaa giigissanau, a oychoos. Yaatin, i tumuppe azzanidoogaa qonccissees; qassi atto gaanaadan oychees. He wode, nuuni atto goos; shin hegaappekka aadhiyaabaa oottana koshshees. Wogaabaa 19:18y, “Haluwaa kiyoppa; qassi ne asaappe issuwaayyoonne uluwan lancce oiqqoppa. SHin ne shooruwaa ne huuphedan siiqa. Taani GODAA” yaagees.

 Akeekancha Gidiyoogaa Koshshees

16. Yihoowa ayyaanaa azzanissennaadan nuuni giigissana koshshiyoobaa bessiya leemisuwaa yoota.

¹⁶ Nuuni nurkka deˈiyo wodekka, Xoossaa ufayssennabaa oottanaadan paacettana danddayoos. Leemisuwau, issi ishay Kiristtaanetuyyo bessenna muuziqaa siyiyaagaa gidana danddayees. ‘Ammanettida wozannaama ashkkaray’ giigissido xuufiyan deˈiya Geeshsha Maxaafaa zoriyaa sheneho giido gishshau, a zoriyaa wozanay guyyeppe a qumˈˈees. (Maatiyoosa 24:45) He hanotaa xeelliyaagan i woossana danddayees; qassi PHauloosi Efisoona 4:30n yootidobaa hassayana danddayees. Xoossaa ayyaanaa azzanissana danddayiya aybanne oottennaadan murttiyoogan, Kiristtaanetuyyo bessenna muuziqaa siyiyoogaa agganau qofaa qachees. Ishaayyo deˈiya hegaa mala xeelaa Yihooway anjjees. Yaatiyo gishshau, Xoossaa ayyaanaa azzanissennaadan ubbatoo naagettoos.

17. Nuuni akeekanchanne woosan gencciyaageeta gidana xayikko, aybi hanana danddayii?

¹⁷ Nuuni akeekanchanne woosan gencciyaageeta gidana xayikko, ayyaanaa azzanissanaadan oottiya tunabaa woy moorobaa oottana danddayoos. Geeshsha ayyaanay saluwan deˈiya nu Aawaa eeshshaara moggiyaabaa poliyo gishshau, a azzanissiyoogee Yihoowa azzanissiyoogaa; nuuni hegaa malabaa mule oottana koyokko. (Efisoona 4:30) Koyro xeetu layttan deˈida, higgiyaa tamaarissiyaageeti Yesuusi maalaalissiyaabaa oottiyoy Seexaanaa wolqqaana giidi nagaran gelidosona. (Marqqoosa 3:22-30 nabbaba.) Kiristtoosa morkke gidida he asati “Geeshsha Ayyaanaa bolli iitabaa” haasayidi, atto geetettenna nagaraa oottidosona. Nuuni mule hegaa malabaa oottanau koyokko!

18. Nuuni atto geetettenna nagaraa oottibeennaagaa waatidi erana danddayiyoo?

¹⁸ Nuuni atto geetettenna nagaraa oottiyoogee attoshin, qoppanaukka koyenna gishshau, ayyaanaa azzanissennaadan PHauloosi yootidobaa hassayana koshshees. Nuuni gita nagaraa oottidaba gidikko shin? Nu nagaraappe simmidi gubaaˈiyaa cimatu maaduwaa demmidaba gidikko, Xoossay nuuyyo atto giidoogaanne geeshsha ayyaanaa bolli nagaraa oottibeennaagaa erana danddayoos. Xoossay maaddin, aybiininne gidin zaarettidi ayyaanaa azzanissiyoogaappe haakkana danddayoos.

19, 20. (a) Nuuni haakkana koshshiyo issi issibati aybee? (b) Nuuni ay oottanau murttana koshshii?

¹⁹ Xoossay ba geeshsha ayyaanaa baggaara ba asay keehippe siiqettanaadaaninne ufayttanaadan, qassi eta issippetettay aakkanaadan oottees. (Mazamure 133:1-3) Hegaa gishshau, qohiya zigirssan woykko ayyaanan sunttettida heemmiyaageeta bonchennaagaa bessiyaabaa haasayiyoogan geeshsha ayyaanaa azzanissiyoogaappe haakkana koshshees. (Oosuwaa 20:28; Yihudaa 8) Hegaadan oottiyoogaappe, issoy issuwaa bonchiyoogan gubaaˈiyan issippetettay deˈanaadan oottana koshshees. Gubaaˈe giddon citaa medhidi, harata allagadan xeellana koshshennaagee qoncce. PHauloosi: “Ta ishatoo, issi wozanaaninne issi qofan issippe gidanaappe attin, shaahotettai intte giddon de7⁠enna mala, intte ubbai issi haasayaa haasayanaadan, nu Godaa Yesuus Kiristtoosa sunttan taani inttena woossais” yaagidi xaafiis.—1 Qoronttoosa 1:10.

²⁰ Nuuni geeshsha ayyaanaa azzanissiyoogaappe haakkanaadan Yihooway maaddanau koyees; qassi maaddanau danddayees. Geeshsha ayyaanaa demmanau ubbatoo woossiyaageetanne a azzanissenna mala murttidaageeta gidoos. Ubbatoo ‘ayyaanan zeriyaageetanne’ haˈˈikka merinaukka wozanappe a kaaletuwaa kaalliyaageeta gidoos.

Woygada Zaaruutii?

• Xoossaa ayyaanaa azzanissiyoogaa giyoogee woygiyoogee?

• Ba huuphiyaa Yihoowayyo geppida uri waatidi geeshsha ayyaanaa azzanissana danddayii?

• Geeshsha ayyaanaa azzanissiyoogaappe haakkana danddayiyoy ayba ogiyaanee?

[Oyshata]

[Sinttaa 28n deʼiya misiliyaa]

Ooyettikko, sohuwaara sigettaycha

[Sinttaa 29n deʼiya misiliyaa]

Ha ayfetuppe ne haasayay awugaa malee?