Ayyaanaaban Woppaa Demma

“Ta qambbaran waaxettite; . . . intte shemppuwaukka intte shemppo demmana.”—MAATIYOOSA 11:29.

1. Siinaa Deriyaa bolli Xoossay giigissidoy aybee, aybissi?

SIINAA DERIYAN imettida Higgiyaa maachay saaminttan saaminttan Sambbataa bonchiyoogaakka gujjees. Yihooway Muuse baggaara Israaˈeela deriyaa: “Usuppun gallassaa ne oosuwaa ootta; ne boorainne ne haree shemppana malanne ne son yelettida ailleenne betee, gazddana mala, laappuntta gallassi ooso oottoppa” yaagidi azaziis. (Kessaabaa 23:12) Ee, Muuse Higgiyaa azazettiyaageetussi Yihooway siiquwan qoppidi, eti “gazddana” woykko shemppana mala shemppo gallassaa giigissiis.

2. Israaˈeelati Sambbataa bonchiyoogan waanidi goˈettidonaa?

² Sambbata gallassay coo shemppiyo gallassee? CHii, he gallassay Israaˈeelati Yihoowayyo goynniyoogaara gayttidaagan xoqqu oottidi xeelliyo gallassa. Sambbataa bonchiyoogee so asau huuphe gididaageeti bantta soo asay xillotettaa oottidi, “GODAA ogiyaa naaganaadan” tamaarissiyo wodee deˈanaadan oottees. (Doomettaabaa 18:19) So asaynne laggeti issippe shiiqidi Yihooway oottidobaa wotti denttidi qoppanaadaaninne issippe ufayssiya wodiyaa aattanaadankka Sambbatay maaddiis. (Isiyaasa 58:13, 14) He ubbaappekka aaruwan,  Sambbatay Kiristtoosa SHaˈu Layttaa Haaruwaa wode tumuppe shemppana sintta wodiyaa malaatees. (Roome 8:21) Nu wodiyaabaa shin woygana danddayettii? Yihoowa ogiyan ufayttiya tumu Kiristtaaneti hegaa mala woppaa awan, qassi waatidi demmana danddayiyoonaa?

Kiristtaane Issippetettan Woppaa Demma

3. Koyro xeetu laytta Kiristtaaneti issoy issuwaa maaddidoy ayba ogiyaanee, hegee ay demissidee?

³ Kiitettida PHauloosi Kiristtaane gubaaˈee “tumatettau tuussanne tuuqe” gidiyoogaa yootiis. (1 Ximootiyoosa 3:15) Beni Kiristtaaneti issoy issuwaa siiquwan minttettiyoogan daro maadettidosona. (Efisoona 4:11, 12, 16) PHauloosi Efisoonan deˈiyo wode, Qoronttoosa gubaaˈiyaappe yiidaageeti a minttettidosona. Hegee kaalettidobaa qoppa. PHauloosi: ‘Eti tana ayyaanan minttettido gishshau, Isxxifaanoosa, Parddonaaxisanne Akayqoosa yuussaa taani ufayttays’ yaagiis. (1 Qoronttoosa 16:17, 18) Hegaadankka, Tiitu Qoronttoosan deˈiya ishata maaddanau biido wode, PHauloosi: “Intte ubbai a hirggaappe shemppissideta” yaagidi, he gubaaˈiyau zaarettidi xaafiis. (2 Qoronttoosa 7:13) Ha wodiyankka hegaadan, Yihoowa Markkati minttettiya Kiristtaane laggetettan tumu woppaa demmoosona.

4. Gubaaˈiyaa shiiqoti nuna waatidi minttettiyoonaa?

⁴ Gubaaˈiyaa shiiqoti daro ufayssaa demissiyoogaa intte beˈidobaappe ereeta. Yan ‘issoy issuwaa ammanuwan’ issoy issuwaa minttettoos. (Roome 1:12) Ayyaanaaban nu ishanttanne michontta gididaageetuura nuuyyo deˈiya laggetettay qooreppe qommo gidenna. Eti nuuni siiqiyoonne bonchiyo tumu laggeta. Ubbatoo etaara shiiquwan beettiyoogan keehi ufayttoosinne minettoos.—Pilimoona 7.

5. Gita shiiqotun issoy issuwaa waatidi minttettana danddayiyoo?

⁵ Woppaa demissiya harabati nuuni layttan layttan shiiqiyo gita shiiqota. Ha shiiqoti  Xoossaa Qaalaa, Geeshsha Maxaafaappe deˈuwaa immiya haattaa demmanaadan maaddiyoogaa bolli, nu laggetettaa ‘aassanau’ injje hanotay deˈanaadan oottoosona. (2 Qoronttoosa 6:12, 13) Nuuni dungguuxanne asaara gayttanau metootiyaageeta gidikko shin? Nu ishanttuuranne michonttuura erettiyo issi ogee gita shiiquwan oosuwan maaddiyoogaa. Issi michiyaa daro biittaappe yiidaageeti shiiqiyo awuraajjaa shiiquwan imattata maadda simmada hagaadan gaasu: “Ta soo asaappenne amarida laggetuppe attin, he sohuwan deˈiya darota erikke. SHin geeshshatettaa naagiyo oosuwan maaddiyo wode, daro ishatuuranne michotuura gayttaas! Hegee keehi ufayssiyaaba!”

6. Wodiyaa aattanau harasaa biyo wode ufayttana danddayiyo issi ogee aybee?

⁶ Israaˈeelati goynuwaara gayttidaagan heezzu baalata bonchanau layttan layttan Yerusalaame boosona. (Kessaabaa 34:23) Hegaa oottanau, darotoo goshshaanne zalˈˈiyaa aggibayidi, buhettiya ogiyan daro gallassaa hemettidi baana koshshees. Gidikkokka, yaa biidaageeti ‘Yihoowa galatiyo’ wode, beeta maqidasiyaa biyoogan ‘gita ufaissaa’ demmoosona. (2 Odiya 30:21) Ha wodiyan Yihoowayyo oottiyaageeti bantta soo asaara, bantta biittan deˈiya Yihoowa Markkatu macara biiruwaa, Beeteele beˈiyoogee eti keehippe ufayttanaadan oottees. Mata wode ne soo asaara wodiyaa aattanau harasaa biyo wode, hegaa mala sohuwaa beˈanau prograamiyaa kessana danddayay?

7. (a) Issippe shiiqidi wodiyaa aattiyoogee goˈˈana danddayiyoy ayba ogiyaanee? (b) Issippe shiiqiyo wodee loˈˈoban hassayiyoogaanne minttettiyaagaa gidanaadan maaddiyay aybee?

⁷ So asaaranne laggetuura shiiqidi issippe wodiyaa aattiyoogeekka minttettana danddayees. Erancha Kawuwaa Solomoni: “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa” yaagiis. (Eranchchaa 2:24) Issippe shiiqidi wodiyaa aattiyoogee nuna minttettiyoogaa xalla gidennan, nu mala Kiristtaaneta loytti eriyo wode, nuna issippe shiishshi qachiya siiquwaa minttees. Loˈˈoban hassayanaadaaninne minettanaadan maaddiya wodiyaa aattanau, shiiqiya asaa qooday guutta gidin, bessiyaagaadan hanotaa aawatettan kaalliyoogee loˈˈo; ubba qassi ushshi deˈikko hegaadan oottiyoogee bessiyaaba.

Haggaazoy Woppaa Demissees

8, 9. (a) Yesuusi tamaarissidobaa higgiyaa tamaarissiyaageetuugaaranne Parisaawetuugaara geeddarssa. (b) Geeshsha Maxaafaa tumaa yootiyoogan waanidi goˈettiyoo?

⁸ Yesuusi mishettidi haggaaziis; ba erissiyo ashkkaratikka hegaadan oottanaadan minttettiis. I: “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite” giidoogee hegaa qonccissees. (Maatiyoosa 9:37, 38) Yesuusi tamaarissidobay tumuppe keehi woppissiyaagaa; hegee ‘mishiraacho.’ (Maatiyoosa 4:23; 24:14) Parisaaweti asay polanaadan kessido deexo wogaappe hegee keehi dummatees.—Maatiyoosa 23:4, 23, 24 nabbaba.

⁹ Nuuni Kawotettaa kiitaa haratussi yootiyo wode, ayyaanaaban eta woppissoos; hegaadankka, Geeshsha Maxaafaa tumaa loytti akeekoosinne wozanappe nashshoos. Mazamuraawee: ‘Yihoowa galatite! Nu Xoossaa sabbiyoogee loˈˈottennee; a sabbiyoogee ufayssiyaaba’ giidoogee bessiyaaba. (Mazamure 147:1) Ne shoorotuyyo abaa yootada, Yihoowa sabbiyoogan keehippe ufayttana danddayay?

10. Nuuni haggaazuwan murutiyoogee nu yootiyoobaa asay siyiyoogan baasettidabee? Qonccissa.

¹⁰ Issi issi moottan asay hara moottaagaappe aaruwan tumaa siyiyoogee erettidaagaa. (Oosuwaa 18:1, 5-8 nabbaba.) Neeni deˈiyo heeran asay tumaa keehi koyennaba gidikko, neeni haggaazuwan oottiyo loˈˈoban xeelaa wottanau baaxeta. Neeni Yihoowa sunttaa ubbatoo yootanau baaxetiyoogee hada gidennaagaa hassaya. (1 Qoronttoosa 15:58) Hegaa bollikka, nuuni haggaazuwan murutiyoogee  asay mishiraachuwau immiyo zaaruwan baasettidaba gidenna. Suure wozanaa koshshay deˈiyoogeeti Kawotettaa kiitaa siyanaadan Yihooway oottanaagaa ammanettana danddayoos.—Yohaannisa 6:44.

So Asaa Goynuwan Woppaa Demmana Danddayoos

11. Yihooway yelidaageetuyyo ayba aawatettaa immidee, eti he aawatettaa waatidi kiyana danddayiyoonaa?

¹¹ Xoossau oottiya yelidaageeti Yihoowabaanne a ogiyaabaa bantta naatussi tamaarissiyo aawatettay deˈees. (Zaarettido Wogaa 11:18, 19) Neeni yelidaagaa gidikko, saluwan deˈiya ne Aawaabaa ne naatussi tamaarissanau prograamiyaa kessadii? Neeni ha gita aawatettaa kiyanaadaaninne ne so asau ayyaanaaban koshshiyaabaa kunttanaadan maaddanau, ayyaanaaban woppu gaanaadan oottiya daro qumay maxaafatun, maxeetetun, viiduwaaninne kaaseetiyan giiganaadan Yihooway oottiis.

12, 13. (a) So Asaa Goynuwaa omarssan so asay waanidi goˈettana danddayii? (b) Yelidaageeti bantta so asaa goynuwaa waatidi ufayssiyaagaa oottana danddayiyoonaa?

¹² Hegaa bollikka, ammanettida wozannaama ashkkaray So Asau Goynuwaa omarssaa giigissiis. Hegee so asay saaminttan saaminttan Geeshsha Maxaafaa xannaˈanaadan bazzido omarssaa. Ha giigissoy issoy issuwaara siiqettanaadaaninne matattanaadan, qassi Yihoowaara deˈiya dabbotaa minttanaadan maaddidoogaa daroti akeekidosona. SHin yelidaageeti bantta so asaa goynuwaa waatidi ayyaanaaban ufayssiyaagaa oottana danddayiyoonaa?

¹³ So Asaa Goynuwaa omarssay salettiyaagaanne laˈatetta diggiyaaba gidana koshshenna. Nuuni ‘ufayttiya Xoossau’ goynnoos; qassi i nuuni goynuwan ufayttanaadan koyees. (1 Ximootiyoosa 1:11, NW; Piliphphisiyuusa 4:4) Issi omarssaa Geeshsha Maxaafaappe ayyaanaaban alˈˈo gididabaa tobbanau goˈettiyoogee tumuppe anjjo. Ubba wode hassayanaadan maaddiyaanne oorattabaa akeekanaadan oottiya hara ogiyan, yelidaageeti laammi laammidi naata tamaarissana danddayoosona. Leemisuwau, issi keettaa asay layttay tamma gidido eta naˈay, Brandeni, “Seexaanaa Malaatanau Yihooway SHooshshaa Aybissi Goˈettidee?” giya huuphe yohuwan giigettidi qofaa yootanaadan oottidosona. Brandeni shooshshaa dosiyo gishshau, he allaallee a keehippe qofissiis; qassi Seexaanaa shooshshan leemisidoogan i azzaniis. Issi issi keettaa asay issi issitoo, keettaa asay huuphiyan huuphiyan diraaman qonccida uraa milatidi oottiyoogan, Geeshsha Maxaafaappe banttau imettida kifiliyaa nabbabiyoogan Geeshsha Maxaafaa diraamaa oottoosona; woykko so asay hanettidabaa milatissidi oottana danddayees. Ha tamaarissiyo ogeti ufayssiyoogaa xalla gidennan, intte naati kumetta prograamiyan shaahettanaadan maaddana danddayoosona; hegee Geeshsha Maxaafaa baaso siraatay eta wozanaa denttettanaadan maaddees. *

Nena Unˈˈissana Danddayiyaabaappe Haakka

14, 15. (a) Wurssetta gallassatun unˈˈoynne woppaa xayiyoogee gujji gujji biidoy ayba ogiyaanee? (b) Nuna ayba hara metoy gakkana danddayii?

¹⁴ Unˈˈoynne woppaa xayiyoogee ha iita alamiyau  wurssetta gallassatun gujji gujji biis. Oosuwaa xayoynne ikkonoomiyaara gayttida hara metoy miilooniyan qoodettiya asaa qohees. Oosoy deˈiyoogeetikka, eti ootti demmiyo miishshaa darotoo daassa kiisiyan yeggiyoobadan qoppoosona; hegaappe denddidaagan bantta soo asau koshshiyaabaa kunttokkona. (Hagga 1:4-6) Polotikaa asatinne haariyaageeti shabbirssaanne iitabau gaaso gidida harabaa xayssanau baaxetikkokka, eta wolqqaappe aadhidaba milatees. Daro asay ba mooruwaappe denddidaagan unˈˈettees.—Mazamure 38:4.

¹⁵ Seexaanaa alamiyaappe metoynne sugettay tumu Kiristtaanetu bollikka gakkees. (1 Yohaannisa 5:19) Issi issi hanotatun, Kiristtoosi erissiyo ashkkarati Yihoowayyo ammanettidi deˈanau baaxetiyo wode, eta hara metoy gakkana danddayees. Yesuusi: “Eti tana yedettidabaa gidikko, inttenakka yedettana” yaagiis. (Yohaannisa 15:20) ‘Nuuni yedetettikkokka, Xoossay nuna olenna.’ (2 Qoronttoosa 4:9) Hegaadan hanidoy aybissee?

16. Nuuni ufayttidi deˈanaadan aybi maaddana danddayii?

¹⁶ Yesuusi: “Daafuranchchatoo, deexuwaa tookkiyaageetoo, ubbati taakko haa yiite; taani inttena shemppissana” yaagiis. (Maatiyoosa 11:28) Kiristtoosa wozuwaa giigissuwan kumetta hanotan ammaniyoogan, nuna Yihoowa kushiyan wottidoogaa malabaa oottoos. Yaatiyoogan, ‘ubbaappe aadhiya wolqqaa’ demmoos. (2 Qoronttoosa 4:7) Nu bolli gakkiya paaciyaanne metuwaa xooni kiyana xallaassa gidennan, ufayttidi deˈanaadan Xoossaa geeshsha ayyaanay, “minttettiyaagee” nu ammanuwaa keehippe minttees.—Yohaannisa 14:26; Yaaqooba 1:2-4.

17, 18. (a) Nuuni ayba ayyaanaappe naagettana koshshii? (b) Nu huuphiyaa ufayssiyoogan xeelaa wottiyoogee ay kaalettana danddayii?

¹⁷ Tumu Kiristtaaneti ha wodiyan asay ufayssa xalla demmanau bichaaranaadan oottiya, ha alamiyaa ayyaanaa sugettaappe naagettana koshshees. (Efisoona 2:2-5 nabbaba.) Yaatana xayikko, “asatettaa amoi, aifen xeellidi qaaqqatiyoogeenne miishshan ceeqettiyoogee” nuna piriyan yeggana danddayees. (1 Yohaannisa 2:16) Woykko asatettaa amuwaa poliyoogee ufayssaa demissees giidi balan ammanana danddayoos. (Roome 8:6) Leemisuwau, issi issi asay ufayssa demmanau jallissiya xaliyaanne ushshaa bessenna ogiyan goˈettees; pornograafiyaa beˈees; hanttaara ispporttiyan shaahettees; woykko hara iita oosuwaa oottees. Seexaanay ‘iita cimuwan’ issi uri bessenna ogiyan ufayssa demmanaadan balettanau halchiis.—Efisoona 6:11.

¹⁸ Likkiyaappe aattennan miyoogee, uyiyoogeenne loˈˈoban wodiyaa aattiyoogee bala gidennaagee qoncce. Gidikkokka, hegaa malabaa nu deˈuwan kaseyanau koyokko. SHin bessiyaagaadan haniyoogeenne nu huuphiyaa naagiyoogee keehippe koshshees; ubba qassi ha nuuni deˈiyo wodiyaa qoppiyo wode, hegaadan oottiyoogee keehippe koshshees. Nu huuphiyaa ufayssanau oottiyoobay, “Godaa Yesuus Kiristtoosa eratettan tishshanne aifeera de7⁠iyaageeta” gidennaadaaninne unˈˈettanaadan oottana danddayees.—2 PHeexiroosa 1:8.

19, 20. Tumu woppay beettiyoy ayba ogiyaanee?

¹⁹ Nu qofay Yihoowa higgiyaara moggiyaagaa gidiyo wode, ha alamiyaappe demmiyo ayba ufayssaykka guutta wode xallau gidiyoogaa akeekoos. Muusee hegaa akeekiis; nuunikka akeekoos. (Ibraawe 11:25) Xayenna daro ufayssaa demissiya tumu woppay beettiyoy, saluwan deˈiya nu Aawaa sheniyaa poliyoogaana.—Maatiyoosa 5:6.

²⁰ Ayyaanaaban ubbatoo woppaa demmiyaageeta gidoos. Hegaadan oottiyoogan, “nagara oosuwaanne ha sa7aa amuwaa nuuni [aggoos.] . . . Nuuni nu gita Xoossai, nuna ashshiya Yesuus Kiristtoosi beettana giido anjjettida bonchcho gallassaa naagoos.” (Tiitu 2:12, 13) Yaatiyo gishshau, Yesuusa aawatettaunne kaaletuwau haarettiyoogan ubbatoo a qambbaran waaxettidi deˈanau murttoos. Hegaadan oottiyoogan, tumu ufayssaanne woppaa demmoos!

[Footnotes]

Woygada Zaaruutii?

• Ha wodiyan Yihoowa asay woppaa demmiyoy ayba ogiyaanee?

• Haggaazoy nunanne nuuni haasayissiyo asaa woppissiyoy ayba ogiyaanee?

• So asau huuphe gidiyaageeti eta so asaa goynoy ufayssiyaagaa gidanaadan waatana danddayiyoonaa?

• Nuuni ayyaanaaban unˈˈettanaadan oottiyaabati aybee?

[Oyshata]

[Sinttaa 28n deʼiya misiliyaa]

Yesuusa qambbaran waaxettiyoogan tumu ufayssau gaaso gidiya darobaa demmoos