Kehabaa Haasayiyoogee Loˈˈo Dabbotay Deˈanaadan Oottees

‘Intte haasayay ubba wode, siyanau kehiyaagaa gidanau bessees.’—QOLASIYAASA 4:6.

1, 2. Issi ishay kehabaa haasayidoogee demissido loˈˈobay aybee?

ISSI ishay hagaadan giis: “Taani sooppe soo haggaazaydda, menttershshay attennan kumetta bollay kokkoriyo, keehippe yiillotida issi bitaniyaara gayttaas. Taani yiillotennan Geeshsha Maxaafaappe ayyo yootanau malaas; shin i hanqquwan yaa suulliis. A maccaasiyaanne naatikka tana boridosona; he wode taani aggada baana koshshiyoogaa akeekaas. Taani saruwan yiidoogaanne saruwan baana koyiyoogaa etassi yootaas. Siiqoy, ashkketettay, ba huuphiyaa naagiyoogeenne sarotettay odettido, Galaatiyaa 5:22⁠nne 23 kessada eta bessaas. Hegaappe simmin aggada baas.

² “Guyyeppe, he ogiyaa doonan deˈiya keettaa asaa haasayissaydda, he soo asay bantta penggen uttidaageeta beˈaas. Eti tana xeegidosona. ‘Eti waatanau koyidonaashsha?’ yaagada qoppaas. Bitanee joogiyan oyqqido irxxa haattaa taani uyanaadan shoobbiis. Taani a mooruwaa atto gaanaadan oychidi, ta mino ammanuwau tana galatiis. Nuuni saruwan shaahettida.”

3. Haratu hanotan nuuni yiillotana koshshennay aybissee?

³ Unˈˈoy kumido ha alamiyan, haggaazuwaaninne harasan darotoo yiillotida asaara gayttiyoogee attenna. Nuuni etaara gayttiyo wode, ‘ashkketettaanne yashshatettaa woykko bonchuwaa’ bessiyoogee keehippe koshshees. (1 PHeexiroosa 3:15) Qommoora beˈido ishay keettaaway hanqqettidoogaaninne a iitatettan yiillotidaba gidiyaakko, bitaniyaa xeelay hegaadan laamettennan aggana danddayees; ubba yaa yiillotana danddayees. Ishay ba huuphiyaa naagidi, kehatettan haasayidoogee loˈˈobaa demissiis.

Kehabaa Haasayanaadan Aybi Maaddii?

4. Kehabaa haasayiyoogee keehippe koshshiyoy aybissee?

⁴ Gubaaˈiyan deˈiyaageetuura gidin haratuura gidin, ubba so asaarakka gidin haasayiyo wode, kiitettida PHauloosi: “Intte haasayai ubba wode, siyanau kehiyaagaanne ufaissiyaagaa gidanau bessees” yaagido zoriyaa kaalliyoogee keehippe koshshees. (Qolasiyaasa 4:6) Hegaa mala ufayssiyaanne bessiya haasayay, loˈˈo gaytotettaynne sarotettay deˈanaadan keehippe koshshees.

5. Issoy issuwaara loˈˈo hanotan haasayiyoogee woygiyoogaa gidennee? Leemisuwan yoota.

⁵ Issoy issuwaara loˈˈo hanotan haasayiyoogee, qoppidobaa woy siyettiyaabaa ubbaa yootana koshshees giyoogaa gidenna; ubba qassi yiillotido wode hegaadan oottana bessenna. Hanqquwaa mittennaagee minotettaa gidennan, laafatettaa bessiyaaba gidiyoogaa Geeshsha Maxaafay yootees. (Leemiso 25:28; 29:11 nabbaba.) He wode deˈiya asa “ubbaappe aadhdhiya ashkke asa” gidida Muusee, issi wode Israaˈeeleti makkalidoogaappe denddidaagan hanqqettidi, Xoossaa bonchennan aggiis. Muusee bau siyettidabaa ubbaa aybanne ashshennan yootiis; shin Yihooway ufayttibeenna. Muusee Israaˈeeleta 40 layttau kaaletti simmin, eta ekkidi Hidootaa Biittaa gelanaadan Yihooway paqqadibeenna. —Qoodaabaa 12:3; 20:10, 12; Mazamure 106:32.

6. Nu haasayan akeekancha gidiyoogee woygiyoogee?

⁶ Nuuni haasayiyo wode, nu huuphiyaa naaganaadaaninne akeekan haasayanaadan Geeshsha Maxaafay minttettees. “Daro haasayaa giddon nagari xayenna; shin ba doonaa shiishshi ekkiya uri aadhdhida eranchcha. Amarida qaala haasayiya asi eranchcha; woppa ayyaani de7⁠iyo asikka akeekanchcha.” (Leemiso 10:19; 17:27) SHin, akeekancha gidiyoogee ba qofaa mule yootana koshshenna giyoogaa gidenna. Hegaa giyoogee, inxxarssaa qohanau gidennan pattanau goˈettyoogan, ‘siyanau kehiyaaba’ haasayiyoogaa giyoogaa.—Leemiso 12:18; 18:21 nabbaba.

‘Coˈˈu Gaanaukka Haasayanaukka Wodee Deˈees’

7. Ay mala haasayaa haasayana koshshennee, aybissi?

⁷ Nunaara issippe oottiyaageetuura woykko haggaazuwan demmiyoogeetuura nu huuphiyaa naagidi, kehabaa haasayana koshshiyoogaadan, gubaaˈiyaaninne sonkka hegaadan oottana koshshees. Kaalettiyoobaa qoppennan hanqqettidi haasayiyoogee woy issibaa oottiyoogee, ayyaanaaban, qofaaninne asatettan nunakka haratakka keehippe qohana danddayees. (Leemiso 18:6, 7) Nu polotettaa pacay qoncciyo iita qofaa teqqana bessees. Cayiyoogee, boriyoogee, kariyoogeenne ixxiyoogaa bessiya hanotan hanqqettiyoogee ubbay bessennaba. (Qolasiyaasa 3:8; Yaaqooba 1:20) Hegaa mala haasayay, Yihoowaaranne asaara deˈiya loˈˈo dabbotaa moorana danddayees. Yesuusi: “Ba ishaa hanqqettiya ubbai pirddettana; ba ishaa cayiya ubbai yaa7aa pirddau shiiqana; qassi ba ishaa, ‘Eeyyai’ giya ubbai Gaannabiyaa tamaa pirddau shiiqana” yaagiis.—Maatiyoosa 5:22.

8. Nuuyyo siyettiyaabaa awude yootana koshshii, shin ayba ogiyan?

⁸ Gidikkokka, yootiyoogee loˈˈo giidi nuuni kuuyana danddayiyo issi issibati deˈoosona. Issi ishay giidobay woykko oottidobay  inttena azzanissidabanne atto gaanau deexxidaba gidikko, intte wozanan a ixxiyoogaa doommoppite. (Leemiso 19:11) Issi uri inttena yiilloyidaba gidikko, intte yiilluwaa mittidi, he hanotaa giigissanau koshshiya tangguwaa ekkite. PHauloosi: “Intte hanqqetti uttidaashin, awai wulloppo” yaagidi xaafiis. He hanotay ubbatoo inttena qofissiyo gishshau, injjetiya wodiyan kehatettan haasayite. (Efisoona 4:26, 27, 31, 32 nabbaba.) Intte ishaara zaarettidi loˈˈo dabbotaa medhanau he allaalliyaa xeelliyaagan qoncciyan haasayite; shin kehatettan gido.—Wogaabaa 19:17; Maatiyoosa 18:15.

9. Harata haasayissanaappe kase yiilluwaa mittana koshshiyoy aybissee?

⁹ Intte haasayana bessiya wodiyaa doorana koshshiyoogee qoncce. “Co77⁠u gaanau wodee de7⁠ees; qassi haasayanaukka wodee de7⁠ees.” (Eranchchaa 3:1, 7) Hegaa bollikka, “xillo asi haasayanaappe kasetidi qoppees.” (Leemiso 15:28) Hegee merettidabaa haasayanau takkiyoogaa gujjana danddayees. Yiilloti uttidi haasayiyoogee, hanotay yaa iitanaadan oottana danddayees; shin daro wodiyaa takkiyoogeekka loˈˈo gidenna.

Kehabaa Oottiyoogee Loˈˈo Dabbotay Deˈanaadan Oottees

10. Kehabaa oottiyoogee dabbotaa waatidi zaarettidi giigissanau danddayii?

¹⁰ Kehabaa haasayiyoogeenne loˈˈo hanotan haasayiyoogee loˈˈo dabbotaa medhidi, hegaa naagidi deˈanaadan maaddees. Hara baggaara, haratuura deˈiya dabbotaa zaarettidi giigissanau nuuyyo danddayettidabaa oottiyoogee etaara loˈˈo hanotan haasayanaadan oottana danddayees. Wozanappe haratuyyo kehabaa oottiyoogee, giishin maaddanau injjiyaa koyiyoogee, wozanappe imotaa immiyoogeenne imatuwaa mokkiyoogee qoncce gidida hanotan haasayanaadan maaddana danddayees. Yaatiyoogee, he uri loˈˈo eeshshaa bessanaadan, a bolli “tamaa bonqquwaa shiishshana” danddayees; hegee qoncciyan haasayanaadan maaddees.—Roome 12:20, 21.

11. Yaaqoobi Eesawaara deˈiya dabbotaa giigissanau kasetidi ay oottidee, hegee ay demissidee?

¹¹ Israaˈeeletu aaway, Yaaqoobi hegaa akeekiis. A mentte ishay Eesawi, a bolli keehi yiillotido gishshau, Yaaqoobi Eesawi bana worees giidi yayyidi baqatiis. Daro layttappe guyyiyan, Yaaqoobi bantta dere simmiyo wode, Eesawi 400 asaara Yaaqoobakko yiis. Yaaqoobi Yihooway maaddanaadan woossiis. Yaatidi, daro mehiyaa imotaa Eesawassi sinttayidi kiittiis. He imotay i qoppidobaa poliis. Eti gayttiyo wode Eesawa qofay laamettiis; i woxxidi Yaaqooba qoommiis.—Doomettaabaa 27:41-44; 32:6, 11, 13-15; 33:4, 10.

Kehabaa Haasayiyoogan Harata Minttettite

12. Nu ishatuura kehabaa haasayana koshshiyoy aybissee?

¹² Kiristtaaneti asassi gidennan Xoossaassi oottoosona. Gidikkokka, harati nuna nashshanaadan koyiyoogee wottin deˈiyaaba. Nuuni kehabaa haasayiyoogee nu michotunne ishatu toohuwaa kawushshana danddayees. SHin, kallennaagaa bessiyaabaa haasayiyoogee he metoy yaa deexxanaadaaninne ubba qassi issoti issoti Yihoowa ufayssennabadan qoppanaadan oottana danddayees. Hegaa gishshau, ‘nu haasayay siyiyaageeta goˈˈana mala, koshshiyoogaadan minttettiya loˈˈo qaalaa’ wozanappe haasayiyaageeta gidoos.—Efisoona 4:29.

13. Cimati (a) zoriyo wode, (b) dabddaabbiyaa xaafiyo wode ay hassayana koshshii?

¹³ Cimati “ashkke” gidananne wudiyaa kehatettan oyqqana koshshees. (1 Tasalonqqe 2:7, 8) Cimati zorana koshshiyo wode, ‘banttana ixxiyaageetuura’ haasayiyo wodekka, “ashkketettan” haasayana koshshees. (2 Ximootiyoosa 2:24, 25) Hara gubaaˈiyaa cimatussi woykko macara biiruwaassi dabddaabbiyaa xaafiyo wodekka cimati shonggaara deˈiya qofaa xaafana koshshees. Maatiyoosa  7:12⁠ra moggiya hanotan, eti kehanne hiillancha gidana koshshees.

So Giddon Kehabaa Haasayiyoogaa

14. PHauloosi azinata woygidi zoridee, aybissi?

¹⁴ Nu haasayay, qassi nu somˈˈuwaappenne nu hanotaappe asay akeekiyoobay nuuni qoppiyoogaappe aaruwan asaa bochana danddayees. Leemisuwau, eti haasayiyoobay macca asaa ay keena qohiyaakko issi issi attuma asati loytti akeekennan aggana danddayoosona. Issi michiyaa, “Ta azinay hanqqettidi qaalaa xoqqissidi ta bolli haasayiyo wode tana yashshees” yaagaasu. SHonggi baynna haasayay attuma asaappe aaruwan macca asaa qohana danddayees; issi maccaasiyaa hegaa daro wodiyau dogennan aggana danddayawusu. (Luqaasa 2:19) Issi maccaasiyaa siiqiyoonne bonchanau koyiyo uri hegaa malabaa haasayiyo wode dogukku. PHauloosi: “Intte maccaasaa siiqite; etaara woppu giidi de7⁠ite” yaagidi azinata zoriis.—Qolasiyaasa 3:19.

15. Issi azinay ba machiyo ashkketettan oyqqana koshshiyoy aybissakko leemisuwan yoota.

¹⁵ Hegaara gayttidaagan, aqo oyqqidi daro wodiyau deˈida issi ishay, azinay ba machiyo ashkketettan, ‘daafurancha meretadan’ woykko baappe eesuwan meqqiya miishshadan oyqqana bessiyoy aybissakko yootiis. I: “Eesuwaara meqqiya alˈˈobaa oyqqiyo wode intte mintti oyqqana koshshenna; yaatikko meqqana danddayees. SHida malaban oyttiyaaba gidikkonne, zaˈˈasay beettees. Issi azinay ba macheessi keehi iita haasayaa haasayiyaaba gidikko, o qohana danddayees. Hegee eta dabbotay muleera moorettanaadan oottana danddayees” yaagiis.—1 PHeexiroosa 3:7 nabbaba.

16. Maccaasiyaa ba keettaa keexxana danddayiyoy ayba ogiyaanee?

¹⁶ Eta machota gujjin, hara uri haasayiyoobay attuma asaakka minttettana woy hidootaa qanxxanaadan oottana danddayees. Azinay tumuppe ‘ammanana’ danddayiyo ‘akeekancha machiyaa,’ ba azinay oottanaadan a koyiyoogaadan ayyo siyettiyaabaa qoppausu. (Leemiso 19:14; 31:11) Machiyaa loˈˈobau woy iitabau  so asaa keehippe denttettana danddayausu. “Aadhdhida eranchcha maccaasiyaa ba keettaa keexxausu; shin eeyyiyaa ba keettaa ba kushiyan qolausu.”—Leemiso 14:1.

17. (a) Yelagati banttana yelidaageeta waatidi haasayissana koshshii? (b) Gasttati yelagata waatidi haasayissana koshshii, aybissi?

¹⁷ Yelidaageetinne naatikka hegaadan issoy issuwaara kehabaa haasayana koshshees. (Maatiyoosa 15:4) Yelagatuura haasayiyo wode eta ‘yiilloyiyoogaappe’ woy ‘hanqqetissiyoogaappe’ haakkanau akeekancha gidiyoogee nuna maaddees. (Qolasiyaasa 3:21; Efisoona 6:4) Naatussi seeri koshshiyaaba gidikkokka, yelidaageetinne cimati eta bonchuwan haasayissana koshshees. Hegaadan oottiyoogan, yelagati bantta ogiyaa suurissanaadaaninne Xoossau dabbo gididi deˈanaadan cimati maaddoosona. Nuuni eta maaddana danddayennabadan qoppiyoogee etikka hegaadan qoppanaadan oottana danddayiyo gishshau, etau hegaadan siyettanaadan oottiyoogaappe bonchuwan haasayissiyoogee loˈˈo. Zoridobaa ubbaa yelagati hassayennan aggana danddayoosona; shin harati eta waati haasayissidaakko dogokkona.

Wozanappe Loˈˈobaa Haasayiyoogaa

18. Qohiya qofaa waatidi xayssana danddayiyoo?

¹⁸ Hanqquwaa teqqiyoogee dosho asa malatiyoogaa xalla gidenna. Nu halchoy yiilluwaa mittiyoogaappe aadhiyaaba gidana koshshees. Gomppan hanqquwan suulliiddi, bollaara dosho asa malatiyoogee nuuni unˈˈettanaadan oottees. Hegee kaamiyaa preeniyaanne nadaajjiyaa immiyoosaa issi kutti yedhiyoogaa mala. Hegee kaamee unˈˈettanaadaaninne qohettanaadan oottana danddayees. Yaatiyo gishshau, hanqquwaa mittidi, guyyeppe eexxi kiyoppite. Intte intte wozanaappe qohiya qofaa xayssanaadan maaddana mala Yihoowakko woossite. Yihoowa ayyaanay intte qofaynne intte wozanay a sheniyaara mogganaadan laammo.—Roome 12:2; Efisoona 4:23, 24 nabbaba.

19. Hanqqettidi ooyettiyoogaappe haakkanau ay oottiyoogee nuna maaddana danddayii?

¹⁹ Inttiyo siyettiyaabaa teqqanaadan maaddiya tangguwaa ekkite. Metiya hanotan gelidi intte hanqquwan suulliyoogaa akeekikko, he sohuwaappe aggidi biyoogee loˈˈo; hegee intte hanqqoy wodhanaadan maaddees. (Leemiso 17:14) Inttenaara haasayiya uri hanqqettiyoogaa doommikko, kehabaa haasayanau keehippe baaxetite. “Liiqo haasayai hanqquwaa zarbbissees; shin porddolla qaalai hanqquwaa denttettees” yaagiyaagaa hassayite. (Leemiso 15:1) Qohiya woy ixxiyoogaa bessiya hanotan haasayiyoogee, liiqo qaalan haasayikkokka, mittay tamaa darissiyoogaadan ooshshay daranaadan oottees. (Leemiso 26:21) Yaatiyo gishshau, intte huuphiyaa naagiyo hanotay paacettanaadan oottiyaabi merettikkokka, “haasayanaunne hanqqettanau” eesotoppite. Iitabaa gidennan, loˈˈobaa haasayanaadan maaddana mala Yihoowa ayyaanaa demmanau woossite.—Yaaqooba 1:19.

Wozanappe Atto Giite

20, 21. Haratu naaquwaa atto gaanaadan nuna aybi maaddana danddayii, nuuni hegaadan oottana bessiyoy aybissee?

²⁰ Nuuppe ooninne ba inxxarssaa kumetta hanotan naagana danddayennaagee azzanttiyaaba. (Yaaqooba 3:2) Nu soo asay, nu siiqo ishanne micho gidida Kiristtaanetikka keehi  baaxetiyaaba gidikkokka, issi issitoo nuna qohiyaabaa qoppennan haasayana danddayoosona. Sohuwaara yiillotiyoogaappe eti ayssi hegaadan giidaakko danddayan akeekite. (Eranchchaa 7:8, 9 nabbaba.) Eti unˈˈettidonaa, yayyidonaa, sahettidonaa woy intte akeekibeenna hara metoy eta gakkidee?

²¹ Hegaa malabay hanqquwan suullanau gaaso gidenna. SHin hegaa malabaa nuuni akeekiyoogee, issi issitoo asay koyennabaa haasayiyoynne oottiyoy aybissakko akeekanau maaddana danddayees; qassi etau atto gaanaadan denttettana danddayees. Nuuni hara asaa qohiyaabaa haasayoosinne oottoos; shin eti kehatettan nuuyyo atto gaanaagaa ammanettoos. (Eranchchaa 7:21, 22) Xoossay nu nagaraa atto gaanaadan nuunikka haratu naaquwaa atto gaana bessiyoogaa Yesuusi yootiis. (Maatiyoosa 6:14, 15; 18:21, 22, 35) Yaatiyo gishshau, harati nuuyyo atto gaanaadan oychanaunne haratussi atto gaanau eesotana koshshees; yaatiyoogan, “issippe shiishshi qachchiya” siiqoy sooninne gubaaˈiyan deˈanaadan oottoos.—Qolasiyaasa 3:14.

22. Kehabaa haasayanau nuuni baaxetana koshshiyoy aybissee?

²² Hanqqettiyoogan erettiya ha alamiyaa wurssettay matattiyo wode, nu ufayttennaadan oottiyaabinne issippetettaa paacciyaabi dari dari baana danddayees. Xoossaa Qaalan deˈiya goˈˈiya baaso siraataa oosuwan peeshshiyoogee nu inxxarssaa iitabau gidennan, loˈˈobau goˈettanaadan maaddees. Yaatiyoogan, gubaaˈiyaaninne so giddon ufayssiya dabbotan deˈana danddayoos; qassi nuuni oottiyoobay “ufayttiya Xoossaa” Yihoowabaa haratussi loytti qonccissana danddayees.—1 Ximootiyoosa 1:11, NW.

Qonccissana Danddayay?

• Merettida metuwaabaa haasayanau bessiya wodiyaa doorana koshshiyoy aybissee?

• So asay issoy issuwaara ubbatoo ‘kehiyaabaa haasayana’ koshshiyoy aybissee?

• Qohiyaabaa haasayiyoogaappe waanidi haakkana danddayiyoo?

• Haratu naaquwaa atto gaanaadan nuna aybi maaddana danddayii?

[Oyshata]

[Sinttaa 23n deʼiya misiliyaa]

Ne hanqqoy zarbbanaadan oottada, haasayanau injjetiya wodiyaa naaga

[Sinttaa 25n deʼiya misiliyaa]

Issi uri ba machiyo ubbatoo ashkketettan haasayissana koshshees