Nagaraa Xeelliyaagan Tumaa

ISSI sahettida uri bollaa mishuwaa likkiyo miishshaa menttiyoogee, a bollay michennaagaa bessii? Bessenna! Hegaadankka, daro asay Xoossay nagaraa xeelliyo ogiyaa koyennaagee nagaray baynnaagaa bessenna. Hegaa xeelliyaagan, A Qaalay Geeshsha Maxaafay darobaa yootees. Geeshsha Maxaafay nagaraa xeelliyaagan tumuppe woygii?

Ubbay Nagaraa Oottiis

Naaˈˈu shaˈa gidiya layttappe kase, kiitettida PHauloosi ‘i dosiyo loˈˈobaa gidennan, i ixxiyo iitabaa oottiyoogan’ hidootaa qanxxidoogaa yootiis. (Roo. 7:19) Nuuni suure gidikko, nu hanotay aagaa mala gidiyoogaa maayana koshshees. Nuuni Tammu Azazota woy hara kandduwaa maaraa naaganau koyana danddayoos; shin dosin ixxinkka nuuni ubbay nagaraa oottoos. Nuuni hegaadan oottiyoy higge kanttanau koyidi gidennan daafurancha gidiyo gishshataassa. Hegau gaasoy aybee? PHauloosi: “Hegaa tanan de7⁠iya nagarai oottiyoogaappe attin, ha77⁠i hegaa oottiyaagee tana gidikke” yaagidi he oyshaa zaaruwaa yootiis.—Roo. 7:20.

PHauloosaagaadan, asaa naati ubbay daafurancha gidi yelettiis—hegee nagaraanne polotettaa pacaa laattidoogaa bessees. PHauloosi: “Asai ubbai nagaraa oottiis; ashshiya Xoossaappe haakkidosona” yaagiis. Hegaadan hananaadan oottiday aybee? PHauloosi: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagiis.—Roo. 3:23; 5:12.

Koyro aawaynne aayyiyaa oottido nagaray nuna Xoossaappe haassidoogaanne nuuni polo asa gidennaadan oottidoogaa daroti ammanennaba gidikkokka, hegee tumuppe Geeshsha Maxaafay tamaarissiyooba. Yesuusi Doomettaabaa maxaafaa koyro heeran deˈiya shemppotuppe yootidi, Addaamenne Hewaanibaa yootiya taarikiyaa ammaniyoogaa bessiis.—Doo. 1:27; 2:24; 5:2; Maa. 19:1-5.

Geeshsha Maxaafay yootiyo waannatiyaabaappe issoy, Yesuusi banan ammaniyoogaa oosuwan bessiyaageeta nagaraappe wozanau saˈaa yiidoogaa. (Yoh. 3:16) Nu sinttanaa deˈuwaa hidootay, nashshiya asaa naata eti giigissana danddayenna iita hanotaappe kessanau Yihooway giigissido ogiyaa ammanidi ekkiyoogaara gayttidaba. SHin nagaraa Xoossay waatidi xeelliyaakko nuuni loytti erennaba gidikko, i nuna nagaraappe ashshanau giigissido ogiyaa akeekanaunne galatanau danddayokko.

Yesuusa Yarshshuwaanne I Koshshido Gaasuwaa

Yihooway koyro bitaniyau merinaa deˈuwaa hidootay deˈiyoogaa yootiis. Addaameppe he hidootay halanay, i Xoossaa bolli makkaliyoogaa xallaana. Addaamee makkaliis; he wode, nagarancha gidiis. (Doo. 2:15-17; 3:6) Addaamee Xoossaa sheniyaappe dummatiyaabaa oottiis, polotettay paccido asa gidiis, qassi Xoossaara deˈiya dabbotaa mooriis. I Xoossaa higgiyaa menttidi nagaraa oottido wode, ceeggiyoogaa doommidi wurssettan hayqqiis. Azzanttiyaabay, nuna gujjin, Addaame zerettay ubbay nagaraa laattidi yelettidoogaanne hegaappe denddidaagan hayqqiyoogaa. Hegaadan hanidoy aybissee?

Hegaa gaasuwaa akeekanau metenna. Polo gidenna asay polo gidida naata yelana danddayenna. Addaame zerettay ubbay nagarancha gididi yelettiis; qassi kiitettida PHauloosi yootidoogaadan “nagarai qanxxiyo miishshai haiquwaa.” (Roo. 6:23) Gidikkokka, he xiqisee kaallidi nuussi hidootay deˈiyoogaa: “SHin Xoossai nu Godaa Kiristtoos Yesuusa baggaara immiyo imoi merinaa de7⁠uwaa” yaagidi yootees. Hegaa giyoogee, azazettiyaanne nashshiya asaa naati Addaame nagaray gattidobaappe Yesuusa  yarshshuwaa baggaara geeyiyoogee danddayettees giyoogaa. * (Maa. 20:28; 1 PHe. 1:18, 19) Hegan neeyyo aybi siyettana koshshii?

“Kiristtoosa Siiqoi Nuna Godatees”

Qommoora denddida oyshau Xoossay immiyo zaaruwaa kiitettida PHauloosi ayyaanaa kaaletuwan qonccissiis. I: “Kiristtoosa siiqoi nuna godatees; aissi giikko, issi asi asa ubbaayyo haiqqidoogaa nuuni akeekida. . . . Paxa de7⁠iyaageeti bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo de7⁠enna mala, i asa ubbaa gishshau haiqqiis” yaagidi xaafiis. (2 Qor. 5:14, 15) Yesuusa yarshshoy nagaray kaalettidobaappe bana geeshshana danddayiyoogaa issi uri akeekikkonne, hegaa nashshiyoogaa bessanau koyikko, Xoossaa sheniyaadan deˈanau i baaxetana koshshees. Hegee Xoossay koyiyoobaa akeekiyoogaa, ba zoriya wozanaa Geeshsha Maxaafaa maaraadan loohissiyoogaanne hegaara moggidi deˈiyoogaa gujjees.—Yoh. 17:3, 17.

Nagaraa oottiyoogee Xoossaa Yihoowaara nuussi deˈiya dabbotaa moorees. Kawuwaa Daawiti Berssaabiira wodiraa laammidoogeenne i azinaa woridoogee deexo nagara gidiyoogaa akeekido wode, daroppe yeellatidoogee qoncce. SHin i oottidobay Xoossaa azzanttidoogee a keehippe qofissiis; hegee qassi bessiyaaba. I keehippe azzanidi Yihoowayyo: “Taani nena, ne xalaalaa naaqqaas; ne aifiyaa sinttan iitabaa oottaas” yaagidi paaxiis. (Maz. 51:4) Hegaadankka, wodiraa laammanaadan Yooseefa paacee gakkido wode, a zoriya wozanay i: “Taani waatada hagaa mala daro iitabaa hanada Xoossaa bolli nagaraa oottoo?” giidi oychanaadan oottiis.—Doo. 39:9.

Yaatiyo gishshau, nagara giyoobi nuuni iitabaa oottin hara asi beˈido gishshau yeellatiyoogaara gayttidaba xalla gidenna. Qassi issi higgiyaa kanttido gishshau, asau woykko deretettau woyganee giyoogaara gayttidabakka gidenna. Asho gaytotettaa, ammanettiyoogaa, bonchiyoogaa, goynuwaanne hegaa malabaa xeelliyaagan Xoossay kessido higgiyaa kanttiyoogee aara nuussi deˈiya dabbotaa moorees. Nuuni eriiddi nagaraa oottiyaaba gidikko, Xoossaa  morkke gidoos. Hagee keehippe qoppana bessiyaaba.—1 Yoh. 3:4, 8.

Yaatin, nagara xeelliyaagan laamettidabi deˈii? Asay nagaraa laafaba milatissanau hara ogiyan qonccissiyoogaa doommiisippe attin, laamettidabi aybinne baawa. Daroti bantta zoriya wozanay donjjillianaadan oottidosona woykko i yootiyoobaa siyanau koyibookkona. Xoossan nashettana koyiya ubbay hegaa mala hanotaappe naagettana bessees. Nuuni kaseti beˈidoogaadan, nagaray qanxxiyo miishshay zilˈˈettiyoogaa woykko yeellatiyoogaa xalla gidennan, hayquwaa. Ee, nagaray hayqo kaalettiyaaba.

Nuuni nu nagaraappe wozanappe simmiyaabanne a aggiyaaba gidikko, Yesuusa wozuwaa yarshshuwaa baggaara maarotettaa demmana danddayiyoogee ufayssiyaaba. PHauloosi: “Xoossai eta mooruwaa atto giidoogeetinne eta nagaraa kammidoogeeti anjjettidaageeta. Godai a nagaraa qoodenna asi anjjettidaagaa” yaagidi xaafiis.—Roo. 4:7, 8.

[Tohossa qofata]

[Sinttaa 10n diya misiliyaa]

Haymaanoote Timirtte Issoy Muleera Laamettiis

Kaatolike woosa keettaa biyaageetuppe darotuyyo Limbbo giyo timirttee ubbatoo akeekanau metiyaaba. Mata wodetun katekiizim giyo timirttiyaappe kiyana gakkanaashin, hegee loddan loddan atti attidi biis. Kaatolike woosa keettay 2007n, “xammaqettennan hayqqida gacino naati atotettaanne merinaa deˈuwaa demmanau danddayiyoogaa hidootiyo gaasoy haymaanoote timirttiyaaninne woosa keettaa oosuwan deˈiyoogaa” xuufiyan qonccissidi, Limbbo timirttee “attidoogaa” erissiis.—Intternaashinal Tiˈolojikal Koomishin.

Ha haymaanoote timirttee hegaadan muleera laamettidoy aybissee? Paransaayen gaazeexan xaafiya, Oneri Tenkki “Woosa Keettay 5⁠tta xeetu layttaa heeraappe biidi 20⁠tta xeetu layttaa gakkanaashin mootettiiddi takkido, yelidaageeti bantta naata sohuwaara xammaqissanaadan yashissanau goˈettido, deexo laata gidida Limbbo timirttiyaa” giidoogaappe woosa keettay naxa kiyanaadan hegee maaddiis. SHin Limbbo timirttee attidoogee hara oyshaakka denttiis.

Kaallana Bessiyoy Wogeeyye Geeshsha Maxaafee? Limbbo timirttee, shemppoy saluwaa baanaappe kase geeyiyo sohuwaa xeelliyaagan 12⁠tta xeetu layttaappe doommidi denddida palamaa gaasuwan medhidoba. Kaatolike Woosa Keettay asay hayqqiyo wode shemppoy hayqqennaagaa tamaarissees; yaatiyo gishshau siˈooliyau baana koshshenna, saluwaa baana danddayenna, xammaqettibeenna naatu shemppoy deˈiyo sohuwaa qonccissana koshshiis. Limbbo timirttee hegaa gaasuwan merettiis.

SHin Geeshsha Maxaafay shemppoy hayqqennaagaa tamaarissenna. Hara ogiyan, asaa shemppoy hayqqennaagaa gidennan, ‘xayiyoogaa’ qassi ‘hayqqiyoogaa’ tamaarissees. (Oos. 3:23, NW; Hiz. 18:4) SHemppoy hayqqiyo gishshau, Limbbo giyo sohuwaa mali deˈenna. Hegaa bollankka, hayqoy aybanne eriyoobi baynna, xiskko mala gidiyoogaa Geeshsha Maxaafay yootees.—Era. 9:5, 10; Yoh. 11:11-14.

Geeshsha Maxaafay Kiristtaanetu naata Xoossay geeshsha oottidi xeelliyoogaa yootees. (1 Qor. 7:14) Gacino naati atotettaa demmanau xammaqettana koshshikko, hegaadan giyoogee maaddiyoobi baawa.

Xoossay siiqiya Aawa gidishin, saro asaa meqetti baynna hanotan qaxxayiya Xoossadan qonccissiyo gishshau, Limbbo timirttee tumuppe a cayiyooba. (Zaa. 32:4; Maa. 5:45; 1 Yoh. 4:8) Geeshsha Maxaafan baynna ha timirttee wozanappe ammaniya Kiristtaanetuyyo mitettennay hegaassa!

[Sinttaa 9n deʼiya misiliyaa]

Xoossaa Qaalaa maaraadan deˈiyoogee Xoossaaranne asaara loˈˈo dabbotay deˈanaadan oottees