“Tamaarissiyoogan Minna”

“INTTE tana tamaarissiyaagoonne Godau geeta; taani he intte giyoogaa gidiyo gishshau, loittideta.” (Yoh. 13:13) Yesuusi ba erissiyo ashkkaratuyyo hegaadan giyoogan, i tamaarissiyooban oottiyoobaa qonccissiis. Hegaappe simmin, saluwaa baanaappe guuttaa kasetidi, Yesuusi ba erissiyo ashkkarata: “Hegaa gishshau, intte biidi, asa ubbaa tana kaalliyaageeta oottite; . . . taani inttena azazidobaa ubbaa eti naagana mala, eta tamaarissite” yaagidi azaziis. (Maa. 28:19, 20) Guyyeppe, kiitettida PHauloosikka Xoossaa Qaalaa tamaarissiyoogee keehippe koshshiyoogaa qonccissiis. Gubaaˈe cima gidida Ximootiyoosa i: “Asassi Xoossaa maxaafaa nabbabiyoogan, Xoossaa qaalaa yootiyoogaaninne tamaarissiyoogan minna. . . . Ne dichchai asa ubbau qonccana mala, hegaa mintta qoppa. Hagaa ubba wode ootta” yaagidi zoriis.—1 Xim. 4:13-15.

He wodeegaadan hachikka, tamaarissiyoogee haggaazuwaaninne Kiristtaane shiiquwan xoqqa sohoy imettiyooba. Tamaarissiyoogan waanidi minnana danddayiyoo, qassi Xoossaa Qaalaa tamaarissiyoogan dichaa bessanaadan hegee nuna ayba ogetun maaddii?

Gita Asttamaariyaa Leemisuwaa Kaalla

Yesuusi tamaarissiyo ogee ezggiyaageetuppe darota ufayssiis. Naazireeten Ayhuda woosa keettan shiiqidaageetuyyo i tamaarissidobay asau aybi siyettanaadan oottidaakko akeeka. Wonggeliyaa xaafiyaa Luqaasi: “Ubbai ayyo markkattidosona. A doonaappe kiyiya aaro kehatettaa qaalaa [garamettidosona]” yaagidi xaafiis. (Luq. 4:22) Yesuusi erissiyo ashkkarati tamaarissiyoogan bantta Godaa leemisuwaa kaallidosona. Kiitettida PHauloosi ba mala Kiristtaaneta: “Taani Kiristtoosadan haniyoogaadan, inttekka tanadan hanite” yaagidi minttettiis. (1 Qor. 11:1) PHauloosi Yesuusi tamaarissido ogiyaa kaallido gishshau, ‘yaaˈaaninne sooppe soo biidi’ keehippe muruta ogiyan tamaarissiis.—Oos. 20:20.

“Giyan” Tamaarissiyoogaa

PHauloosi yaaˈan tamaarissiyoogan qara gidiyoogaa bessiya keehi loˈˈo leemisoy Oosuwaa shemppo 17n deˈees. I Giriike biittan Ateena giyoosaa biidoogaa he xiqisee yootees. PHauloosi he kataman biidosaa ubban, giishin ogiyan, yaaˈa sohuwan—eeqay deˈees. PHauloosi keehippe yiillotidoogee garamissenna! Gidikkokka, ba yiilluwaa mittiis. Ubba, “Aihuda woosa keettan . . . qassi ubba gallassi giyan banaara gaittiya asaarakka” ammanttiya ogiyan haasayees. (Oos. 17:16, 17) Hegee nuuyyo ayba loˈˈo leemisoo! Ubba qommo asaa, eta bolli pirddiyoogaappe bonchiyoogaa bessiya hanotan haasayissiyoogan issoti issoti siyidi, guyyeppe worddo haymaanootiyaa aylletettaappe kiyanaadan maaddana danddayoos.—Oos. 10:34, 35; Ajj. 18:4.

PHauloosi giyan haasayissido daroti i yootiyoobaa siyanau koyennaageeta. I haasayissido asatu giddon, i yootiyo tumaara moggenna qofay deˈiyo paalasppati deˈoosona. Ezggiyaageeti aara palamettiyo wode, PHauloosi eti giyoobaa akeekan ezggees. Issoti issoti a Giriikettuwan “kattaa qoriyaagaa” yaagidosona; hegaa birshshettay “toofiinaa” giyoogaa. Harati qassi: “Ooratta xoossatubaa odiyaabaa milatees” yaagidosona.—Oos. 17:18.

Gidoppe attin, a ezggiyaageeti baceessiyoogan PHauloosi hidootaa qanxxibeenna. Yaatiyoogaappe, i tamaarissiyoobaa qonccissanaadan asay oychido wode, tamaarissiyo hiillaa loyttidi qonccissiya ciimma qofay deˈiyo  haasayaa shiishshanau he injjiyaa goˈettiis. (Oos. 17:19-22; 1 PHe. 3:15) Ane a haasayaa aahuwan zaaretti beˈidi, tamaarissiyo hiillaa kaseegaappe loyttanau maaddiyaabaa tamaaroos.

Ezggiyaageeta Ufayssiyaaban Doomma

PHauloosi: “Ateena asatoo, Xoossatussi ubbaban intte daro yayyiyoogaa taani be7ais. Aissi giikko, taani intte goinniyoogaa xeellaidda, . . . ‘Erettenna Xoossaassi’ geetettidi xaafettida yarshshuwaa sohuwaa qassi demmaas; hegaa gishshau, ha intte erennan goinniyoogaa taani inttessi yootais” yaagiis.—Oos. 17:22, 23.

PHauloosi ba yuushuwan deˈiyaabaa akeekan xeellees. I akeekan xeellidobaappe haasayissiyo asaabaa darobaa erees. Nuunikka akeekan xeelliyaaba gidikko, haasayissiyo uraa xeelliyaagan amaridabaa erana danddayoos. Leemisuwau, keettaa heeran woy keettaa bolli deˈiyaabay darobaa qonccissana danddayees. Haasayissiyo uraabaa nuuni akeekidobi deˈikko, nuuni yootiyoobaa xalla gidennan ayba ogiyan yootana bessiyaakko akeekan qoppana danddayoos.—Qol. 4:6.

PHauloosi ba haasayan asa bolli pirddibeenna. Gidikkokka, Ateena asay suure eri baynnan “goinniyoogaa” i akeekiis. PHauloosi eti tumu Xoossaayyo waatidi goynnana danddayiyaakko loyttidi qonccissiis. (1 Qor. 14:8) Nuuni Kawotettaa mishiraachuwaa awaajjiyo wode, asa bolli pirddennan geeshshidi yootiyoogee keehippe koshshiyaaba!

Hiillanchanne Asa Asappe SHaakkennaagaa Gida

PHauloosi gujjidikka: “Sa7aanne sa7an de7⁠iya ubbabaa medhdhida Xoossai saluwaanne sa7aa Godai, asi keexxido Beeta Maqidasiyan de7⁠enna. Aibakko paccido asadan, asa kushe i xeellenna; aissi giikko, i ba huuphen de7⁠uwaa shemppuwaanne ubbabaa asa ubbaassi immees” yaagiis.—Oos. 17:24, 25.

PHauloosi Yihoowa ‘saluwaanne saˈaa Godaa’ giyoogan, Deˈuwaa Immiyaagaa bolli asay xeelaa wottanaadan hiillaa goˈettiis. Dumma dumma haymaanooteenne wogay deˈiyo, ashkke asay deˈuwaa ubbaa pulttoy Xoossaa Yihoowa gidiyoogaa akeekanaadan maaddiyoogee ayba gita maatee!—Maz. 36:9.

Kaallidi PHauloosi: “Xoossai asa zare ubbaa issi uraappe medhdhidi, . . . i ba huuphen eti de7ana wodiyaanne sohuwaa kase zawayiis. I hegaa oottidoogee eti oiqqi oiqqi xeellidi, bana koyiiddi, geelladan demmanddonaashsha giyoogaana; gidikkonne, Xoossai nuuppe ooyyoonne haaho gidenna” yaagiis.—Oos. 17:26, 27.

Nuuni tamaarissiyo ogee nu goynniyo Xoossaabaa haratussi qonccissana danddayees. Yihooway asa asappe shaakkennan, asa zare ubbay “oiqqi oiqqi xeellidi, bana koyiiddi,” demmanaadan paqqadiis. Nuunikka, hegaadan asa asappe shaakkennan demmiyo ubbaa haasayissoos. Medhidaagan ammaniyaageeti, merinaa anjjuwau kaalettiya, mino dabbotaa aara medhanaadan maaddanau baaxetoos. (Yaaq. 4:8) SHin, Xoossay deˈiyoogaa siriyaageeta waatidi maaddana danddayiyoo? PHauloosa leemisuwaa kaalloos. Ane i woygidaakko akeeka.

“Intteppe issi issi eranchchati, ‘Nuuni a naata’ giidoogaadan, nuuni aani paxa de7⁠oosinne de7⁠idi qaaxettoos. Simmi nuuni Xoossaa naata gidido gishshau, Xoossai . . . worqqappe woi birappe woi shuchchappe oosettidabaa milatees yaagidi, qoppanau bessenna.”—Oos. 17:28, 29.

 PHauloosi haasayissiyo asay ezggana mala, Ateena asay eriyoonne xoqqu oottidi xeelliyo eranchati giidobaappe yootiis. Nuunikka hegaadan, nu haasayissiyoogeeti ufayttidi siyanaagaa eriyoobaa yootiyoogan doommanau koyoos. Leemisuwau, PHauloosi Ibraawetuyyo xaafido dabddaabbiyan: “Keetta ubbaa keexxidaagee issi asa; shin ubbabaa keexxidaagee Xoossaa” yaagido leemisoy, ha wodiyankka asay ammanidi ekkiyooba. (Ibr. 3:4) Nuuni haasayissiyoogeeti akeekanau metenna ha leemisuwaa yuushshi qoppanaadan oottiyoogee, nuuni yootiyoobay tuma gidiyoogaa eti ammananaadan maaddana danddayees. Muruta ogiyan tamaarissanau koshshiya harabaa—denttettiyoogaa PHauloosa haasayan akeeka.

Nu Deˈiyo Wodee Eesoyiyaagaa Gidiyoogaa Akeekissa

PHauloosi: “Xoossai asai eribeenna wodiyaa aattiis; shin ha77⁠i ubbasan asai ubbai nagaraappe simmana mala azazees. Aissi giikko, Xoossai gallassaa keeri wottiis; he gallassan ba doorido uran sa7an de7⁠iya asa ubbaa bolli xillo pirddaa i pirddana” yaagiis.—Oos. 17:30, 31.

Xoossay guutta wodiyau iitatettay deˈanaadan paqqadidoogee, nuuni ubbay nu wozanan deˈiyaabaa qonccissanau injjiyaa medhiis. Nu wodee eesoyiyaagaa gidiyoogaa mintti yootiyoogeenne keehippe matattida Kawotettaa anjjuwaabaa ammanttiya ogiyan yootiyoogee keehippe koshshiyaaba.—2 Xim. 3:1-5.

Dumma Dumma Zaaruwaa

“Etappe issi issi asati haiquwaappe dendduwaabaa PHauloosappe siyidi, a bolli qilliiccidosona; shin harati a, ‘Nuuni hagaa neeppe gujjidi siyana koyoos’ giidosona. Hegaa gishshau, PHauloosi eta giddoppe kiyiis. SHin issi issi attumaasati PHauloosaara gaittidi ammanidosona.”—Oos. 17:32-34.

Nuuni odiyoobaa issoti issoti sohuwaara ekkoosona; harati ammanana mala daro wodiyau qonccissiyoogee koshshana danddayees. SHin nuuni qonccenne metenna ogiyan tumaa qonccissiyoogee, issi uranne gidin Yihoowabaa suure eraa demmanaadan maaddiyo wode, Xoossay nuna goˈettidi asaa ba Naˈaakko ehiyo gishshau a keehippe galatoos!—Yoh. 6:44.

Nuuni Tamaariyoobaa

Nuuni PHauloosi tamaarissidobaa wotti dentti qoppiyoogan, haratuyyo Geeshsha Maxaafaa tumaa waatidi qonccissanaakko darobaa tamaaroos. Gubaaˈiyan dere haasayaa shiishshiyo maatay nuuyyo deˈikko, ammanenna uri Geeshsha Maxaafaa tumaa ekkanaadaaninne akeekanaadan maaddanau, hiillan yootiyoogan PHauloosa leemisuwaa kaallanau baaxetana danddayoos. Hegaa mala tumaa qonccissidi yootanau koyiyaaba gidikkokka, shiiquwan beettida ammanenna uray ammaniyoobaa toochennaadan naagettoos. Hegaadankka, nu haggaazuwan asaa ammanttiyaageetanne hiillancha gidanau baaxetoos. Hegaadan oottiyoogan, ‘tamaarissiyoogan minnanaadan’ PHauloosi yootido zoriyaa wozanappe kaalloos.

[Sinttaa 30n deʼiya misiliyaa]

PHauloosi qoncce, akeekanau metenna ogiyaaninne hiillan tamaarissiis

[Sinttaa 31n deʼiya misiliyaa]

Nuuni haasayissiyoogeetu hanotaa akeekiyoogan PHauloosa leemisuwaa kaalloos