Yihoowa Gallassay Qonccissanabaa

“Yihoowa gallassay kaysodan yaana; . . . saˈaynne a bolli oosettidabaykka qonccana.”—2 PHE. 3:10, NW.

1, 2. (a) Ha iita siraatay waanidi xayanee? (b) Ay oyshata beˈanee?

HA WODIYAN deˈiya iita siraatay, asay Yihoowa maadoy baynnan saˈaa suure haarana danddayees giyo wordduwan baasettiis. (Maz. 2:2, 3) Wordduwan baasettidabi merinau deˈana danddayii? Mulekka danddayenna! Gidikkokka, Seexaanay haariyo alamee ba huuphe barkka xayana giidi qoppana koshshenna. Hegaappe dumma hanotan, Xoossay ba keerido wodiyan, ba xayssiyo ogiyan a xayssana. Xoossay ha iita alamiyaa xayssiyoogee a suure pirddaanne a siiquwaa loyttidi qonccissana.—Maz. 92:7; Lee. 2:21, 22.

² Kiitettida PHeexiroosi: “Yihoowa gallassay kaysodan yaana; he gallassi saloti wolqqaama gunttan sohuwaara xayana; salotinne saˈay merettidobati wolqqaama mishuwan seerana; saˈaynne a bolli oosettidabaykka qonccana” yaagidi xaafiis. (2 PHe. 3:10, NW) Hagan qonccida “saloti” nne “saˈay” aybee? “Merettidobati” geetettida, seeriyaabay aybee? PHeexiroosi woyganau koyidi, “saˈaynne a bolli oosettidabaykka qonccana” giidee? Ha oyshatu zaaruwaa eriyoogee, mata wode gakkana yashshiya hanotau nuuni giigettanaadan maaddees.

Xayana Salotanne Saˈaa

3. Naaˈˈantto PHeexiroosa 3:10n ‘salota’ geetettidabati aybee, eti waanidi xayanee?

³ ‘Salota’ giya qaalaa Geeshsha Maxaafay leemisuwan goˈettiyo wode darotoo malaatiyoy, bantta haariyo asaappe xoqqa gidida, haariya asata. (Isi. 14:13, 14; Ajj. 21:1, 2) ‘Xayana saloti’ Xoossaappe haakkida asaa haariya asa aysuwaa malaatoosona. Ha saloti “wolqqaama gunttan sohuwaara” xayiyoogee, eti eesuwan muleera xayiyoogaa malaatana danddayees.

4. “Saˈay” aybee, i waanidi xayanee?

⁴ “Saˈay” Xoossaappe haakkida asaa alamiyaa malaatees. Hegaa mala alamee Nohe wode Xoossaa azazuwan Bashsha Haattan xayiis. “Ha77⁠i de7⁠iya saloinne sa7ai, Xoossau goinnenna asati pirddettiyo gallassainne xayiyo gallassai gakkanaassi takkidi, he qaalan tamaa naagoosona.” (2 PHe. 3:7) Xoossaappe haakkida asaa ubbaa Bashsha Haattay issi kutti xayssiis; shin sinttappe gakkana bashshay “daro waayiyaa” wode hegaa mala asata kayan kayan xayssana. (Ajj. 7:14) He daro waayiyau koyro xekkan, polotikan alamiyaa haariyaageeti “Gita Baabiloono” xayssanaadan Xoossay eta denttettana; i yaatiyoogan, he shaaramuxa haymaanootiyo ixxiyoogaa bessees. (Ajj. 17:5, 16; 18:8) Hegaappe simmin, Armmageedoona olan, daro waayiyau wurssetta xekkan, attida Seexaanaa alamiyaa Yihooway ba huuphe xayssana.—Ajj. 16:14, 16; 19:19-21.

“Salotinne Saˈay Merettidobati . . . Seerana”

5. Merettidobata geetettidabay ay ay gujjii?

⁵ “Merettidobati” geetettida, ‘seeriyaabay’ aybee? Geeshsha Maxaafaa qaalata birshshiya issi dikshineeree, “merettidobati” giya qaalaa “doometta gididabati” woykko “baaso gididabati” yaagidi birshshees. “Haasayau baaso gidida pitaleta” malaatanau he qaalaa goˈettidoogaa he dikshineeree yootees. Yaatiyo gishshau, PHeexiroosi “merettidobati” giidobay Xoossaappe haakkida, alamiyan deˈiya asaa  eeshshaa, xeelaa, ogiyaanne halchuwaa malaatees. “Merettidobati” giidobay “azazettenna asaa ha77⁠i haariya,” “sa7aa ayyaanaa” gujjees. (1 Qor. 2:12; Efisoona 2:1-3 nabbaba.) He ayyaanay woykko ‘carkkoy’ Seexaanaa alamiyan kumiis. He ayyaanay, ‘carkkuwaa giddon deˈiya wolqqaama ayyaanata haariya,’ Seexaanaa qofaa qonccissiya ogiyan asay qoppanaadan, halchanaadan, haasayanaadaaninne oottanaadan denttettees.

6. Alamiyaa ayyaanay ayba ogiyan qonccii?

⁶ Yaatiyo gishshau, eridi gidin erennan gidin, alamiyaa ayyaanaa kaaletuwaa kaalliyaageeti, Seexaanaa qofaanne eeshshaa kaallidi, i bantta wozanaanne bantta qofaa molanaadan paqqadoosona. Hegaappe denddidaagan eti Xoossaa sheniyaa aggidi, bantta koyiyoobaa oottoosona. Eti issi issibaa otoruwan woy bantta huuphiyaa siiqiyoogan oottoosona; maatay deˈiyoogeetu bolli makkaliyoogaa qonccissoosona; qassi ‘asatetta amuwaanne ayfiyan xeellidi qaaqqatiyoogaa’ poloosona.—1 Yohaannisa 2:15-17 nabbaba. *

7. Nuuni nu ‘wozanaa minttidi naagana’ koshshiyoy aybissee?

⁷ Hegaa gishshau, laggeta dooriyoogaa, nabbabiyoobaa, wodiyaa aattiyoobaanne Intternneetiyan beˈiyoobaa xeelliyaagan, Xoossaa aadhida eratettaa oosuwan peeshshiyoogan nu ‘wozanaa minttidi naagiyoogee’ keehippe koshshees! (Lee. 4:23) Kiitettida PHauloosi: “Kiristtoosappe gidenna timirttiyan ha sa7aa haariya ayyaanatu timirttiyaaninne asappe yiida eratettan, qassi mela cimuwan inttena ooninne omooddenna mala naagettite” yaagidi xaafiis. (Qol. 2:8) Yihoowa gallassay matattiiddi biyo wodiyan ha azazoy keehippe eesoyiyaaba; aybissi giikko, Seexaanaa siraatay “merettidobati” Xoossaa hanqquwaa eqettana danddayennaagaa bessiya hanotan wolqqaama “mishuwan” seerana. Hegee Milkkiyaasa 4:1n: “Be7⁠ite, coociyaa tamaadan eexxiya gallassai matattiis; otorettiyaageetinne iitaa oottiyaageeti ubbai utula mala gidana. He yiya gallassai eta xuuggana” yaagiyaagaa nuuni hassayanaadan oottees.

“Saˈaynne A Bolli Oosettidabaykka Qonccana”

8. Saˈaynne a bolli oosettidabay waanidi ‘qonccanee’?

⁸ PHeexiroosi woyganau koyidi, “saˈaynne a bolli oosettidabaykka qonccana” giidee? “Qonccana” giya qaalay “erettana” woykko “qaarettana” geetettanaukka danddayees. Seexaanaa siraatay Yihoowanne A Kawotettaa eqettiyo gishshau xayana bessiyoogaa, Xoossay daro waayiyaa wode qoncciyaa kessanaagaa PHeexiroosi yootana koyiis. He wodiyan hananabaa Isiyaasa 26:21 kasetidi: “Biittaa bollan de7⁠iya asaa, eta nagaraa gishshau qaxxayanau, GODAI ba de7⁠iyoosaappe kiyidi yees. Biittaikka ba bollan gukkida suuttaa qonccissana; woridoogeetakka naa77antto genttenna” yaagees.

9. (a) Nuuni aybippe haakkana koshshii, aybissi? (b) Nuuni ay dichana koshshii, aybissi?

⁹ Alameenne a iita ayyaanay banttana molanaadan oottidaageeti, issoy issuwaa ubba woriyoogan, bantta tumu oonatettaa Yihoowa gallassan qonccissana. Ha wodiyan, wodiyaa aattanau aahuwan goˈettiyo daro qommo makkala oosoti, asay “issoi issuwaa kushiyaa oiqqidi, issoi issuwaara” olettanau daroti meezetanaadan oottiyaaba gidennan aggokkona. (Zak. 14:13) Yaatiyo gishshau, Xoossay ixxiyo, otoruwaanne makkalabaa siiqiyoogaa mala eeshshata nuuni bessanaadan oottiya aybippenne, giishin pilimeta, maxaafata, biiduwaa kaassaanne hegaa malabatuppe haakkiyoogee keehippe koshshees! (2 Sam. 22:28; Maz. 11:5) Hegaappe dumma ogiyan, Xoossaa geeshsha ayyaanaa ayfiyaa ayfiyaageeta gidoos; aybissi giikko, hegaa mala eeshshati Yihoowa gallassaa mishuwan xayokkona.—Gal. 5:22, 23.

 “Ooratta Saluwaanne Ooratta Sa7aa”

10, 11. “Ooratta saluwaanne ooratta sa7aa” geetettiday aybee?

¹⁰Naaˈˈantto PHeexiroosa 3:13 nabbaba. ‘Ooratta saloy,’ ‘Ayhuda gidenna asaa wodee polettido,’ 1914n saluwan eqqida Xoossaa Kawotettaa. (Luq. 21:24) He kawotettan haariyaageeti Kiristtoos Yesuusanne aara issippe haariya, 144,000⁠ta; hegeetuppe daroti saluwan bantta woytuwaa demmidosona. Ajjuutaa maxaafay ha doorettidaageeta, “geeshsha katamiyaa ooratta Yerusalaama, ba azinaayyo gixxa giigida bullashettiya maccaaseedan, giiga uttidaara saluwaappe Xoossaa matappe duge” wodhiyaarin leemissiis. (Ajj. 21:1, 2, 22-24) Beni Yerusalaama Israaˈeela kawotu garo gidiyoogaadan, Ooratta Yerusalaaminne o Bullachiyaagaa haaroy ooratta siraataa ayso gidees. Saluwan deˈiya ha katamiyaa, ‘Xoossaa matappe duge wodhiyoogee,’ saˈaa bolli a ba xeelaa wottiyoogaa malaatees.

¹¹ ‘Ooratta saˈay’ Xoossaa Kawotettau eeno giidi haarettida, saˈan deˈiya ooratta asaa maabaraa malaatees. Xoossaa asay ha wodiyankka deˈiyo ayyaana gannatee, ufayssiya “sinttappe yaana” saˈan eti deˈanau giigetti uttidoogaa bessiyaaba. (Ibr. 2:5) Nuuni he asatuppe issuwaa gidana danddadayiyoy ayba ogiyaanee?

Yihoowa Gita Gallassau Giigettite

12. Yihoowa gallassay yiyo wode alamiyaa asay dagammanay aybissee?

¹² PHauloosinne PHeexiroosi Yihoowa gallassay akeekennan, ‘kaysodan’ yaanaagaa kasetidi yootidosona. (1 Tasalonqqe 5:1, 2 nabbaba.) He gallassaa beegottidi naagiya, tumu Kiristtaanetikka he gallassay eti akeekennan yiyoogan dagammana. (Maa. 24:44) SHin alamiyaa asay dagammiyoogaappe aadhiyaabaa hanana. PHauloosi: “Asai [Yihoowappe haakkida asay], ‘Ubbabai saro; aibikka hanenna’ giishin, maccaasaa maaretai oiqqiyoogaadan, bashshai eti qoppennan eta bolli yaana. Eti mulekka kessi ekkokkona” yaagidi xaafiis.—1 Tas. 5:3.

13. “Ubbabai saro; aibikka hanenna” giyo awaajjuwan cimettiyoogaappe nuuni waanidi haakkana danddayiyoo?

¹³ “Ubbabai saro; aibikka hanenna” giyo awaajjoy daydanttati denttettin odettiya hara worddo; gidikkokka, Yihoowa ashkkarati hegan cimettokkona. PHauloosi: “He gallassai intteyyo kaisoi yiyoogaadan yaanau intte xuman de7⁠ekketa. Intte ubbai poo7⁠uwaa asanne gallassaa asa” yaagidi xaafiis. (1 Tas. 5:4, 5) Yaatiyo gishshau, Seexaanaa alamiyaa xumaappe haakkidi, pooˈuwan deˈiyaageeta gidoos. PHeexiroosi: “Ta siiqotoo, intte hegaa eriyo gishshau, makkalanchchatu [Kiristtaane gubaaˈiyan deˈiya worddo asttamaaretu] balan cimettidi, wora beenna malanne, qassi minnidi de7⁠iyo sohuwaappe kunddenna mala naagettite” yaagidi xaafiis.—2 PHe. 3:17.

14, 15. (a) Yihooway nuna waatidi bonchidee? (b) Nuuni wozanappe qoppana koshshiyo, ayyaanaa kaaletuwan xaafettida qaalay awugee?

¹⁴ Yihooway “naagettite” xalla giidi aggibeennaagaa hassayite. Hegaappe dumma ogiyan, sinttappe hananabaa nuuni kasetidi ‘eranaadan’ kehatettan qonccissiyoogan nuna bonchiis.

¹⁵ SHin naagettidi deˈanaadan odettiya hassayissuwaa issoti issoti sheneho giyoogee  woy ubba ammanennaagee azzanttiyaaba. Eti, ‘Nuuni daro wodiyau ha hassayissuwaa siyiiddi takkida’ gaana danddayoosona. SHin eti hegaadan giyoogan, ammanettida wozannaama ashkkaraa xallan gidenna, Yihoowaaninne a Naˈan ammanettennaagaa bessiyoogaakka akeekana koshshees. Yihooway ubbatoo ‘naagi’ uttanaadan yootiis. (Imb. 2:3) Hegaadan Yesuusikka: “Intte Godai ai gallassi yaanaakkonne intte erenna gishshau, naagi uttite” yaagiis. (Maa. 24:42) Hegaa bollan PHeexiroosi: “Intte ai mala asa gidanau bessii? Intte de7⁠oi geeshshanne Xoossaa milatiyaagaa gidanau koshshees. Intte Xoossaa gallassaa naagishin, he gallassai eesuwan gakkanaadan, intteyyo danddayettiyaabaa oottite” yaagidi xaafiis. (2 PHe. 3:11, 12) Ammanettida wozannaama ashkkaraynne a kalˈˈatiya Bollaara Heemmiyaagee he akeekissuwaa mule xaasayidi xeellokkona!

16. Nuuni ay mala qofaappe haakkana koshshii, aybissi?

¹⁶ Goday gamˈˈidi yaana giidi qoppiyaagee ‘iita ashkkaraa.’ (Maa. 24:48) He iita ashkkaray 2 PHeexiroosa 3:3, 4n qonccidaageetu bagga. Yihoowa gallassaa bantta qofan matayidi xeelliya, azazettiyaageeta “bantta amuwaadan” toochiyaageeti, “wodiyaa wurssettan” “toochchiiddi denddanaagaa” PHeexiroosi yootiis. Ee, he toochiya asati bantta xeelaa wottiyoy Kawotettaa oosuwan gidennan, banttana siiqiyo amuwaana. Makkalanaadan oottiya hegaa mala iita qofaappe haakkiyaageeta gidoos! Kawotettaabaa sabbakiyoonne erissiyo ashkkara oottiyo oosoy daridoogeeta gidiyoogan, qassi Xoossaa Yihooway keerido wodiyaa xeelliyaagan keehippe hirggennaagan, “Godaa danddayai atotettaa gidiyoogaa” qoppiyaageeta gidoos.—2 PHe. 3:15; Oosuwaa 1:6, 7 nabbaba.

Ashshiya Xoossan Ammanettite

17. Yerusalaameppe baqatanaadan Yesuusi yootido zoriyau, ammanettida Kiristtaaneti ayba zaaro immidonaa, aybissi?

¹⁷ Rooma wotaaddarati 66 M.Ln Yihudaa biittaa oli simmin, demmido injjiyan Yerusalaameppe baqatanaadan Yesuusi yootido zoriyaa ammanettida Kiristtaaneti siyidosona. (Luq. 21:20-23) Eti sohuwaara hegaadan oottidoy aybissee? Eti Yesuusa akeekissuwaa wozanan wottidoogee sirissenna. Kiristtoosi kasetidi yootidoogaadan, hegaadan oottiyoogan banttana metoy gakkanaagaa eti qoppidoogee qoncce. SHin Yihooway baassi ammanettidaageeta mule yeggennaagaakka eridosona.—Maz. 55:22.

18. Yesuusi Luqaasa 21:25-28n yootidobay sinttaara yiya daro waayiyaara gayttidaagan intte xeelaa waatidi bochii?

¹⁸ Asaa naatu taarikiyan hani erenna daro waayee ha siraataa bolli gakkiyo wode, nuna ashshana danddayiyay Yihoowa xalla gidiyo gishshau, nuunikka polo wozanaappe an ammanettana  bessees. Daro waayee doommi simmin, alamiyan deˈiyaabata Yihooway xayssanaappe kase, “asai sa7aa bolli yaanabaa ubbaa naagiiddi, yashshan daafurana.” SHin Xoossaa morkketi yashshan kokkoriyo wode, Yihoowayyo ammanettidi oottiyaageeti yayyokkona. Hegaappe dumma ogiyan, eti bantta atotettay matattidoogaa eriyo gishshau ufayttana.— Luqaasa 21:25-28 nabbaba.

19. Kaalliya huuphe yohuwan ay beˈanee?

¹⁹ Ee, alamiyaappenne i ‘merettidobatuppe’ haakkidi deˈiyaageeta ay mala ufayssiya wodee naagii! SHin kaalliya huuphe yohoy qonccissiyoogaadan, nuuni deˈuwaa demmana koyiyaaba gidikko, iitabaappe haakkiyoogaappe aadhiyaabaa oottana bessees. Nuuni Yihoowa ufayssiya eeshshaa dichanaunne i nashshiyo oosuwaa oottanau koshshees.—2 PHe. 3:11.

[Tohossa qofata]

Qonccissana Danddayay?

• Kaallidi deˈiyaabati ay malaatiyoonaa . . .

ha wodiyan deˈiya ‘saloynne saˈay’?

“merettidobati”?

‘ooratta saloynne ooratta saˈay’?

• Polo wozanan nuuni Xoossan ammanettiyoy aybissee?

[Oyshata]

[Sinttaa 13n deʼiya misiliyaa]

‘Ne wozanaa minttada naaganaunne’ alamiyaappe haakkada deˈanau danddayiyoy ayba ogiyaanee?

[Sinttaa 14n deʼiya misiliyaa]

‘Godaa danddayay atotetta gidiyoogaa nu wozanan qoppiyoogaa’ waatidi bessiyoo?