Nabbabiyaageetu Oyshaa . . .

Yihoowa Markkati haymaanootiyaa walakkiyoogaa waatidi xeelliyoonaa?

▪ World Kiristtiyan Insaykiloppiidee qonccissidoogaadan “alame yuushuwan 10,000 gidiya dumma dumma haymaanootee” deˈees. Haymaanootetu giddon merettiya kobay daro qohuwaa kaalettido gishshau, haymaanootiyaa walakkiyoogee goynniya daroti loˈˈobaa hidootanaadan oottiis. Eti ha shaahettida alamiyan hegee sarotettaanne issippetettaa ehaana giidi qoppoosona.

Geeshsha Maxaafay issippetettaa minttettees. Kiitettida PHauloosi Kiristtaane gubaaˈiyaa “issoi issuwaara gaittidi, issippe” ohettidi moggotti oottiya asa bollan leemissiis. (Efi. 4:16) Hegaadankka, kiitettida PHeexiroosi ba mala Kiristtaaneta: “Ubbai issi qofan de7⁠ite” yaagidi zoriis.—1 PHe. 3:8.

Beni Kiristtaanetu wodiyan daro qommo haymaanooteenne wogay dees. SHin dumma dumma haymaanootiyaa walakkiyoogaa xeelliyaagan PHauloosi: “Ammaniyaageenne ammanennaagee koxxiyoobi aibi de7⁠ii?” yaagi simmidi, “eta giddoppe kiyite” giidi Kiristtaaneta akeekissiis. (2 Qor. 6:15, 17) Haymaanootiyaa walakkana koshshennaagaa PHauloosi yootidoogee qoncce. I hegaadan giidoy aybissee?

Tumu Kiristtaane gidida uraynne gidenna uray goynuwau issippe shiiqiyoogee, bessenna ogiyan waaxettiyoogaa woykko giigennaba gidiyoogaa PHauloosi qonccissiis. (2 Qor. 6:14) Hegee Kiristtaane ammanuwaa mooriyaaba. PHauloosa qofissidabay, shooron deˈiya naatu eeshshay iita gidiyoogaa eriya aawa qofissiyaabaara issi mala. He uri ba naatussi qoppiya aawa gidiyoogaadan, ba naati oonaara kaaˈana koshshiyaakko, eratettan azazees. A azazoy ufayssennan aggana danddayees. SHin, issi issi hanotan haratuppe shaahettiyoogee a naati qohettennaadan oottana danddayees. Hegaara issi mala ogiyan, Kiristtaaneti hara haymaanootetuppe shaahettiyoogee eta iita oosuwaappe naagettanau maaddiyoogaa PHauloosi eriis.

PHauloosi hegaadan giyoogan, Yesuusa leemisuwaa kaalliis. Yesuusi asaa giddon sarotettay deˈanaadan leemiso gidiya gitabaa oottidaba gidikkonne, haymaanoote walakkibeenna. Yesuusi saˈan haggaaziyo wode Parisaawetanne Saaduqaaweta mala daro haymaanoote citay deˈees. He haymaanoote citati Yesuusa woranau maqettana gakkanaassi, issippe gididi aara eqettidosona. Hara baggaara, Yesuusi bana kaalliyaageeti “Parisaawetu timirttiyaappenne Saaduqaawetu timirttiyaappe” naagettanaadan azaziis.—Maa. 16:12.

Ha wodiyan shin? Haymaanoote walakkennaadan Geeshsha Maxaafay yootiyoobay haˈˈikka oottii? Ee, oottees. Hegee haattaanne zaytiyaa xaaramusiyan tigidi walakkin issi mala gidennaagaadan, dumma dumma haymaanooteti walahettiyoogan issippetettaa medhana danddayenna gishshataassa. Leemisuwau, dumma dumma haymaanootiyaa kaalliya asay sarotettaa demmanau issippe woossiyo wode, eti woossiyo xoossay awugee? Kiristtaane giyo ammanuwaa Sillaaseeyye, Hinduyizeme Brahaameyye, Budahayiyye woy hara xoossee?

Hananabaa yootiya Mikiyaasi “wurssetta gallassatun” ubba dere asay yiidi: “Haayite; GODAA deriyaa, Yaaqooba Xoossaa Beeta Maqidasiyaa ane pude kiyoos. I koyiyoogaadan nuuni baana mala, i nuna ba ogiyaa tamaarissana” yaaganaagaa kasetidi yootiis. (Mik. 4:1-4) Hegaappe denddidaagan, ubba haymaanooteti amarida ogiyan issippetettaa medhido gishshau gidennan, ubba asay tumu haymaanootiyaa kaalliyo gishshau, alame yuushuwan sarotettaynne issippetettay deˈana.

[Sinttaa 32n deʼiya misiliyaa]

Alamiyan deˈiya waannatiya haymaanooteta kaalettiyaageeti haymaanootiyaa walakkanau 2008n shiiqidosona

[Misilee Ekettidosaa]

REUTERS/Andreas Manolis