“Aggenna Siiquwaa Higgee” Intte Inxxarssaa Naago

“Aadhida eran a haasayausu; aggenna siiquwaa higgee i inxxarssan deˈees.”—LEE. 31:26, NW.

1, 2. (a) Yihoowayyo goynniyaageeti ayba eeshshay deˈiyoogeeta gidanaadan minttettoy imettii? (b) Ha huuphe yohuwan ay tobbanee?

BENI wode deˈida Kawuwaa Limuˈeela a aayyiyaa zorido keehi maaddiya zoree, loˈˈo macheessi deˈana bessiya gidaa gujjees. “Aadhida eran a haasayausu; aggenna siiquwaa higgee i inxxarssan deˈees” yaagada zoraasu. (Lee. 31:1, 10, 26, NW) Aadhida erancha maccaasee inxxarssaaninne Xoossaa Yihoowa ufayssana koyiya ubbaa inxxarssan aggenna siiqoy deˈiyo wode ufayssees. (Leemiso 19:22 nabbaba.) Tumuppe goynniya ubbaa haasayan aggenna siiqoy qonccana koshshees.

² Aggenna siiqoy aybee? Hegaa ooyyo bessana koshshii? Nu inxxarssan ‘aggenna siiquwaa higgee’ deˈanaadan aybi maaddii? Hegaadan oottiyoogee so asaaranne nu mala Kiristtaanetuura haasayiyo wode waati maaddii?

Aggenna Siiqoy Aybee?

3, 4. (a) Aggenna siiqoy aybee? (b) Ubba asaa eeshsha gidida kehatettaappenne loˈˈotettaappe aggenna siiqoy dummatiyoy ayba ogiyaanee?

³ “Aggenna siiquwaa” giya qaalay chesed giya Ibraysxxe qaalaappe birshshettiis. Hegau aaho birshshettay deˈiyo gishshau, issi qaalan birshshanau metees. Yaatiyo gishshau, Wolayttattuwan “siiquwaa, kehatettaa, ammanttiyaagaa, maarotettaa, loˈˈotettaa, nashuwaa” geetettidinne hegaa mala hara qaalankka birshshettiis. He eeshshay issi uraara gayttidaagan issibaa halchidi, maaddiyaabaa oottiyoogaaninne ayyo qoppiyoogaa bessiyaabaa haasayiyoogan a siiqiyoogaa bessiyoogaa qonccissees.

⁴ Aggenna siiquwaa bessiyoogee coo loˈˈo asa gidiyoogaa woykko ubba asaa eeshsha gidida kehatettaa bessiyoogaa gidenna. Erenna uraukka hegaa mala eeshshaa bessanau danddayettees. Leemisuwau, PHauloosinne aara deˈiya 275 asati biyo markkabee meˈˈido wode, kase etaara erettenna Maltta haruuruwaa asati hegaa mala kehatettaa etau bessidosona. (Oos. 27:37–28:2) He haruuruwan deˈiya asati keha gidikkokka, eti aggenna siiquwaa bessibookkona; ayssi giikko, he eeshshay kase eriyo asau bessiyo eeshsha. * Aggenna siiquwaa bessiyoogee harata siiqanaadaaninne etaara duuxxenna dabbotay deˈanaadan oottees. He eeshshaappe denddidaagan, Yihoowanne a asaa giddon duuxxenna dabbotay dees.—Zaa. 7:9.

Wotti Dentti Qoppiyoogeenne Woosay Keehippe Koshshees

5. Nu inxxarssaa teqqanaadan aybi maaddii?

⁵ Haasayan aggenna siiquwaa qonccissiyoogee nuna metana danddayees. “Ooninne inxxarssaa aadissanau danddayibeenna; inxxarssi woriya marzzee kumido woppu geenna iita mereta” yaagidi, erissiyo ashkkaraa Yaaqoobi xaafiis. (Yaaq. 3:8) Naaganau keehi metiya inxxarssaa teqqanau nuna maaddana danddayiyaabay aybee? Yesuusi ba wodiyan deˈiya, haymaanootiyaa kaalettiyaageetussi yootidobay nuuni hegaa akeekanaadan maaddees. I, “Doonai wozana giddon kumidabaa haasayees” yaagiis. (Maa. 12:34) Aggenna siiqoy nu inxxarssaa naagana mala, nu wozanan  woykko nu garssa asatettan he eeshshay deˈanaadan oottana koshshees. Wotti dentti qoppiyoogeenne woosay hegaadan oottanau nuna waati maaddiyaakko ane beˈoos.

6. Yihooway aggenna siiquwaa bessido oosuwaa nuuni galatan kumidi wotti dentti qoppana koshshiyoy aybissee?

⁶ Geeshsha Maxaafay Yihooway “maarotai kumido Xoossaa” yaagees. (Kes. 34:6) Mazamuraawee, “Abeet GODAU, sa7ai aggenna ne siiquwan kumiis” yaagidi yexxiis. (Maz. 119:64) Yihooway baayyo goynniyaageetussi aggenna siiquwaa bessidoogaa qonccissiya daro qofay Geeshsha Maxaafan deˈees. Galatan kumidi, ‘Yihooway oottidobaa’ wodiyaa immidi wotti dentti qoppiyoogee, nuuni Xoossaa ufayssiya he eeshshaa dichanaadan denttettana danddayees.—Mazamure 77:12 nabbaba.

7, 8. (a) Yihooway Looxessinne a soo asau aggenna siiquwaa waatidi bessidee? (b) Xoossay aggenna siiquwaa bessidoogan Daawitassi aybi siyettidee?

⁷ Leemisuwau, Abrahaama ishaa naˈaa Looxeenne a soo asay deˈiyo Sadooma katamaa xayssiyo wode, Yihooway eta waatidi ashshidaakko qoppa. He bashshaa wodee matattin, Looxekko yiida kiitanchati i ba soo asaa ekkidi sohuwaara katamaappe kiyanaadan mintti yootidosona. Geeshsha Maxaafay hagaadan gees: “Looxee yooqu gin, he asati a kushiyaa, a keettaayee kushiyaanne a macca naatu naa77aa kushiyaa oiqqidi, he katamaappe eta kessidosona; aissi giikko, GODAI etayyo qarettiis.” Yihooway ashshido ha hanotaa wotti dentti qoppiyoogee nu wozanaa denttettennee, qassi hegee Xoossay aggenna siiquwaa qonccissido hanota gidiyoogaa ammananaadan nuna denttettennee?—Doo. 19:16, 19.

⁸ Yihooway “ta nagaraa ubbaa atto gees; i ta harggiyaa ubbaappe tana pattees” yaagidi yexxida, beni Israaˈeela Kawuwaa Daawita leemisuwaakka qoppite. Daawiti Berssaabiira oottido nagaraa atto giido gishshau, Yihoowa keehippe galatidoogee qoncce! I hagaadan giidi Yihoowa xoqqu xoqqu oottiis: “Saloi sa7aappe xoqqiyoogaadan, GODAAYYO yayyiyaageetuyyo aggenna a siiqoi gita.” (Maz. 103:3, 11) Hageetanne Geeshsha Maxaafan deˈiya hara taariketa wotti dentti qoppiyoogee Yihooway bessido aggenna siiquwau a wozanappe galatanaadaaninne a sabbanaadan denttettees. Nuuni kaseegaappe aaruwan wozanappe galatiyo payduwan, kaseegaappe aaruwan tumu Xoossaa milatanau koyoos.—Efi. 5:1.

9. Yihoowayyo goynniyaageeti galla galla deˈuwan aggenna siiquwaa bessanaadan oottiya gita gaasoy aybee?

⁹ Yihooway banaara dabbotaa medhidaageetuyyo aggenna siiquwaa bessidoogaa Geeshsha Maxaafaa leemisoti qonccissoosona. Deˈo Xoossaara hegaa mala mata dabbotaa medhibeennaageetubaa shin woygana danddayettii? Yihooway etayyo kehenna giyoogee? Mule hegaadaana gidenna. Luqaasa 6:35y, “Xoossai bana galatennaageetussikka iitatussikka keha” yaagees. “Iita asaukka lo77⁠o asaukka Xoossai ba awaa awaxxissees; qassi xillotuyyookka nagaranchchatuyyookka ba iraa bukissees.” (Maa. 5:45) Nuuni tumaa tamaaridi hegaa oosuwan peeshshanaappe kase, Xoossay asa naatu ubbau bessiyo kehatettaa nuussikka bessiis. Gidoppe attin, assi goynniyaageeta gidiyoogan, i aggenna siiquwaa bessiyoogeeta gidida. (Isiyaasa 54:10 nabbaba.) Nuuni hegau a keehippe galatoos! Hegee nuuni haasayaaninne galla galla oottiyo haraban aggenna siiquwaa bessanaadan oottiya gita gaaso!

10. Aggenna siiqoy nu eeshsha gidanaadan woosay keehippe maaddiyoy aybissee?

¹⁰ Aggenna siiquwaa dichanau nuna keehippe maaddiyaabay woossiyo maataa. Yihoowa geeshsha ayyaanau haarettiyoogan aggenna siiqoy nu wozanaa denttettanaadan oottana danddayoos. Yihoowa geeshsha ayyaanaa demmana danddayiyo waanna  ogee hegau woossiyoogaa. (Luq. 11:13) Nuuni Xoossaa ayyaanaa demmanau zaari zaari woossiyoogeenne a kaaletuwaa kaalliyoogee bessiyaaba. Ee, aggenna siiquwaa higgee nu doonan deˈanaadan wotti dentti qoppiyoogeenne woosay keehippe koshshoosona.

Aqo Laggeti Bantta Haasayan Aggenna Siiquwaa Bessiyo Ogiyaa

11. (a) Azinati bantta machotuyyo aggenna siiquwaa bessanaadan Yihooway koyiyoogaa aybin eriyoo? (b) Azinay ba inxxarssaa naaganaadan aggenna siiqoy ayba ogiyan maaddana danddayii?

¹¹ Kiitettida PHauloosi azinata hagaadan zoriis: “Kiristtoosi woosa keettaa siiqidi, ba huuphiyaa ayyo immidoogaadan, inttekka intte maccaasata siiqite.” (Efi. 5:25) PHauloosi Yihooway Addaamessinne Hewaanissi yootidobaakka eta akeekissiis. PHauloosi, “Attumaagee ba aawaanne ba aayyiyo aggi bayidi, ba machcheera issippe de7ana; eti naa77aikka issi asho gidana” yaagiis. (Efi. 5:31) Yihooway azinati ubbatoo aggenna siiquwaa bessiyoogan bantta machotuyyo ammanettidi deˈanaadan koyiyoogee qoncce. Ubbatoo inxxarssaappe aggenna siiqoy kiyiyo azinay, ba maccaasee balaa asa sinttan haasayenna woykko o kariyoogaa bessiyaabaa haasayenna. O ufayssan galatees. (Lee. 31:28) Eta giddon issi metoy merettikko, azinay ba machiyo kawushshiyaabaa haasayenna mala ba inxxarssaa naaganaadan aggenna siiqoy a denttettees.

12. Aggenna siiquwaa higgee ba doonan deˈiyoogaa issi machiyaa waatada bessana danddayay?

¹² Aggenna siiquwaa higgee machee inxxarssankka deˈana koshshees. A alamiyaa ayyaanan sugettada haasayana koshshenna. Machiyaa ba azinaa wozanappe ‘bonchiyo’ gishshau, asaa sinttan abaa loˈˈobaa haasayausu, qassi harati kaseegaappe aaruwan a bonchanaadan oottausu. (Efi. 5:33) Naati bantta aawaa karanaadan koyenna gishshau, machiyaa a qofaa mayennaagaa woykko siriyoogaa bessiyaabaa eta sinttan haasayukku. Hegaa malabaa a xallaara haasayausu. Geeshsha Maxaafay, “Aadhdhida eranchcha maccaasiyaa ba keettaa keexxausu” yaagees. (Lee. 14:1) I keettay kumetta so asay ufayssaa demmiyoonne etau injjetiya soho.

13. Aggenna siiquwaa higgee qonccana danddayiyoy awaanee, waanidi qonccana danddayii?

¹³ Azinaynne machiyaa bantta son banttarkka deˈiiddikka, issoy issuwaa bonchiyoogaa bessiyaabaa ubbatoo haasayana bessees. PHauloosi, “Intte qassi hanqquwaa, yiilluwaa, ixuwaa, intte doonaappe kiyiya cashshaanne yeellayiya haasayaa hageeta ubbaa intteppe xaissite” yaagidi xaafiis. Gujjidikka, “Maarotettaa, qaretaa, kehatettaa, intte huuphiyaa kaushshiyoogaa, ashkketettaanne danddayaa maayite. . . . Ubbabaa issippe shiishshi qachchiya siiquwaa maayite” yaagiis. (Qol. 3:8, 12-14) So giddon siiquwaaninne kehatettan haasayiyoogaa naati ubbatoo siyiyo wode, loˈˈo hanotan dicciyoogaa xalla gidennan bantta haasayan banttana yelidaageetu leemisuwaa kaallana danddayoosona.

14. So asau huuphe gididaageeti bantta soo asaa minttettanau bantta inxxarssaa ayba ogiyan goˈettana danddayiyoonaa?

 ¹⁴ Mazamuraawee Yihoowa xeelliyaagan hagaadan giis: “Aggenna ne siiqoi tana minttetto.” (Maz. 119:76) Yihooway ba asaa minttettiyo issi loˈˈo ogee etau zoriyaanne kaaletuwaa immiyoogaa. (Maz. 119:105) So asau huuphe gidida uri Saluwan deˈiya nu Aawaa leemisuwaappe goˈettanaunne ba ayssiyoogeeta ba inxxarssan minttettana danddayiyoy ayba ogiyaanee? I koshshiya ogiyan kaalettiyoogaaninne minttettiyoogan hegaadan oottana danddayees. So Asaa Goynuwaa omarssay ayyaanaaban alˈˈo gididabaa demmanau keehi loˈˈo wode!—Lee. 24:4.

Intte Mala Kiristtaanetuyyo Aggenna Siiquwaa Bessite

15. Cimatinne ayyaanaaban kaymidaageeti gubaaˈiyan deˈiya harata naaganau bantta inxxarssaa waatidi goˈettana danddayiyoonaa?

¹⁵ Kawuwaa Daawiti, “Aggenna ne siiqoinne ne tumatettai tana ubba wode naago” yaagidi woossiis. (Maz. 40:11) Hegaara gayttidaagan gubaaˈiyaa cimatinne ayyaanaaban kaymida harati Yihoowa leemisuwaa waati kaallana danddayiyoonaa? Geeshsha Maxaafaa qofaa akeekanaadan maaddiya ogiyan nu inxxarssaa goˈettiyoogee aggenna siiquwaa bessiyaabaa gidiyoogee tuma.—Lee. 17:17.

16, 17. Nu haasayan aggenna siiquwaa higgiyaa kaalliyoogaa bessana danddayiyo issi issi ogeti awugeetee?

¹⁶ Issi Kiristtaanee Geeshsha Maxaafaa baaso siraataara moggennabaa oottiyoogaa nuuni akeekidaba gidikko waatana koshshii? A suurissanau nu inxxarssaa goˈettanaadan aggenna siiqoy nuna denttettennee? (Maz. 141:5) Nu mala Kiristtaanee gita nagaraa oottidoogaa nuuni akeekikko, “Godaa sunttan zaitiyaa a tiyidi, ayyo Xoossaa” woossana mala “woosa keettaa cimata baakko” xeesanaadan a minttettanau aggenna siiqoy nuna denttettees. (Yaaq. 5:14) Nagaraa oottida uri cimatuyyo yootennaba gidikko, nuuni hegaa etau yootennan aggiyoogee siiqo woy kehatetta bessiyaaba gidenna. Nu giddon issoti issoti unˈˈettidaageeta, baddo woy goˈˈi baynna ura gididabadan siyettiyoogeeta woykko hidootaa qanxxidaageeta gidana danddayoosona. Nu inxxarssan aggenna siiquwaa higgee deˈiyoogaa bessana danddayiyo loˈˈo ogee ‘unˈˈettidaageeta minttettiyaabaa haasayiyoogaa.’—1 Tas. 5:14, NW.

¹⁷ Xoossaa morkketi nu mala Kiristtaanetubaa odiyoobaa nuuni siyiyo wode ayba zaaro immana koshshii? Nu ishantti ammanettidaageeta gidiyoogaa siriyoogaappe, aynne zaarennan coˈˈu gaanau, woykko mootiya uray giyoobay bessiyaabakkonne, qassi i yootiyoobau  naqaashi deˈiyaakkonne oychana koshshees. Xoossaa asaa morkketi nu Kiristtaane ishata qohanau eti deˈiyoosaa eranau koyiyaaba gidikko, nu ishatussi bessiyo aggenna siiqoy hegaa yootennaadan oottees.—Lee. 18:24.

“Aggenna Siiquwaa Koyiya Uraa Baree Aduqqees”

18, 19. Nu mala Kiristtaanetuura nuuni gayttiyo hanotan nu inxxarssaappe aggenna siiqoy shaahettana koshshennay aybissee?

¹⁸ Nu mala Kiristtaanetuura nuuni gayttiyo hanota ubban aggenna siiqoy qonccana koshshees. Metiya hanotankka gidin, aggenna siiquwaa higgee nu inxxarssaappe shaahettana koshshenna. Israaˈeelatu siiqoy “sohuwaara xayiya guuraa xaazaa mala” gidido wode, Yihooway ufayttibeenna. (Hoo. 6:4, 6) Hara baggaara, aggenna siiquwaa ubbatoo bessiyoogee Yihoowa ufayssees. Hegaadan oottiyaageeta i waati anjjiyaakko akeekite.

¹⁹Leemiso 21:21 hagaadan gees: “Xillotettaanne aggenna siiquwaa koyiya uraa baree aduqqees; qassi he urai xillotettaanne bonchchuwaa demmees.” Hegaa mala uri demmiyo anjjuwaappe issoy deˈuwaa; giishin, guutta wodiyau deˈiyoogaa gidennan merinaa deˈuwaa. “Tumu de7⁠uwaa” mintti oyqqanaadan Yihooway he ura maaddees. (1 Xim. 6:12, 19) Yaatiyo gishshau, aybiininne gidin ‘issoi issuwaassi kehatettaa’ bessiyaageeta gidoos.—Zak. 7:9.

[Tohossa qofata]

Qonccissana Danddayay?

• Aggenna siiquwaa waatada qonccissana danddayay?

• Nu inxxarssan aggenna siiquwaa higgee deˈanaadan aybi maaddana danddayii?

• Aqo laggeti aggenna siiquwaa bantta haasayan waati bessana danddayiyoonaa?

• Nu mala Kiristtaanetuura nuuni gayttiyo hanotan aggenna siiquwaa higgee nu inxxarssan deˈiyoogaa bessiyay aybee?

[Oyshata]

[Sinttaa 23n deʼiya misiliyaa]

Daawiti Yihoowa aggenna siiquwaa xoqqu xoqqu oottiis

[Sinttaa 24n deʼiya misiliyaa]

So Asaa Goynuwaa omarssan aggennan xannaˈeetii?