Eti Wurssettaabaa Yayyiyoogaa Aggidosona

GEERINNE Kaarena 1978 heeran alamiyaa wurssettay matattidabadan qoppidosona. Yaatiyo gishshau, deˈanau katamaappe gaxariyaa biidosona; qassi banttau koshshiyaabaa banttarkka kunttanau qofaa qachidosona. Eti bashshaappe attanau koyidosona.

Koshshiya hiillaa demmanau, maxaafata shammidosona; timirttiyaa tamaaridosonanne korssiyaa kaallidosona; qassi hegaa xeelliyaagan banttau danddayettida keenan daro asaa oychidosona. Ataakilttiyaanne ayfiyaa ayfiya 50 qommo qantta mittata tokkidosona. Kattaanne dumma dumma miishshaa shiishshidosona. Kattaa zeriyoogaanne tokkiyoogaa, qassi gakkida kattay daro wodiyau takkanaadan oottiyo ogiyaa tamaaridosona. Issi laggiyaa mehiyaa shukkiyoogaanne ashuwaa melissiyoogaa eta tamaarissaasu. Eti shiishshido qumay wurikko maanau, Kaarena daran deˈiya miyo mittaanne unkkuwaa shaakkada eraasu. Geeri eettiyo zaytiyaa badalaappe medhiyoogaa, tamaa eettanau goˈettiyoobaa birataappe medhiyoogaanne koshshiya ubbabay deˈiyo keettaa keexxiyoogaa tamaariis.

Kaarena: “He wode alamiyan hanettiya yashshiyaabaappe denddidaagan, asay eran demmidobay sohuwaara xayiyaabadan qoppaas” yaagaasu. Geeri: “Zariyan ceeqettiyoogaanne mooro oosuwaa xayssanau, qassi Veetinaame olaa esissanau hara yelagatuugaadan baaxetaas. SHin sohuwaara hidootaa qanxxaas. Hanotay ubbatoo hagaadaana gidikko, asaa naati banttana banttarkka xayssana gaada qoppaas” yaagiis.

 Geeri hagaadan giis: “Issi qammi wode demmada, Geeshsha Maxaafaa Maatiyoosappe Ajjuutaa gakkanaashin nabbabaas. Hegaappe simmin deˈiya oyddu qamman naaˈˈanttuwaa nabbaba wurssaas. Ichashantto gallassi maallado Kaareniyyo: ‘Nuuni deˈiyoy wurssetta gallassaana. Matan Xoossay saˈaa geeshshanau deˈees. Bashshaappe attiyaageeta nuuni demmana koshshees’ yaagaas.” Geerinne Kaarena bashshaappe attanaayyo giigettanau koyiyaageeta demmanau, dumma dumma haymaanootiyaa biyoogaa doommidosona.

Takkennan, Yihoowa Markkatuppe issoy eta soo yiis; yaatin, Geeshsha Maxaafaa xinaatee doomettiis. Kaarena hagaadan gaasu: “Geeshsha Maxaafaa tau loyttidi qonccissido gishshau, hegan keehippe ufayttaas. Taani eranau koyaydda takkido, wodiyaa wurssettaabaa tumaa wurssettan eraas. Sintta wodiyaa xeelliyaagan ammanttiya hidootay deˈees. Hegaappekka aaruwan, ubbabaa Medhidaagaa, saluwan deˈiya Xoossaa ta Aawaara dabbotaa medhiyoogaa doommaas.”

Geeri hagaadan giis: “Ta deˈoy ufayssiyaagaa gidiis. Geeshsha Maxaafaa xannaˈiyoogaa doommikko essana danddayikke. Geeshsha Maxaafaa hiraagaa nabbabaas; hegee polettidoogaa bessiyaabaa pilggaas; qassi Xoossay mata wode tangguwaa ekkanaagaa ammanaas. ‘Asay bashshau gidennan, nuuni demmanaadan Xoossay koyiyo deˈuwau giigettana koshshees’ gaada qoppaas.” Geerinne Kaarena sinttappe loˈˈobay yaanaagaa eridosona. Eti alamiyaa xayuwaabaa hirggiyoogaa aggidi, Xoossay asaa naata gakkiya metuwaa xayssanaagaanne biittaa gannate kessanaagaa ammanettoosona.

Haˈˈi 25⁠ppe dariya layttay aadhi simmin, Geerinne Kaarena ay oottiiddi deˈiyoonaa? Kaarena: “Xoossaa Yihoowa siiqiyoogaanne a ammaniyoogaa ubbatoo minttays, qassi haratikka hegaadan oottanaadan maaddays. Nu soo asay Xoossaa Yihoowayyo issippetettan minnidi goynnanaadan maaddiyoogan Geerinne taani issoy issuwaa kaafoos. Nuuni haratuuninne etau koshshiyaaban xeelaa wottanau, giigettidaageeta gidanaunne sima deˈuwaa deˈanau baaxetoos” yaagaasu.

Geeri hagaadan giis: “Xoossaa Kawotettay yaanaadaaninne miilooniyan qoodettiyaageetussi woppaa ehaanaadan ubbatoo woossays. Xoossaa Kawotettaa mishiraachuwaa haratussi yootiyo wode ubban, guuxxiis giishin issi urau Geeshsha Maxaafaappe hidootaa yootanaadan woossays. Yihooway kehatettan 25⁠ppe dariya layttau he woosaa zaariis. Yihooway mata wode saˈaa bolli gita laamiyaa ehaanaagaa taaninne Kaarena ammanoos; wurssettaabaa yayyiyoogaa aggida.”—Maa. 6:9, 10; 2 PHe. 3:11, 12.

[Sinttaa 9n deʼiya misiliyaa]

Haˈˈi Geerinne Kaarena harati Geeshsha Maxaafaappe hidootaa demmanaadan maaddiyoogan ufayttoosona