Ha Wodiyan Nuna Kaalettiya Minuwaa

“Olaa i xooniiddinne qassikka xoonanau kiyiis.”— AJJ. 6:2.

1, 2. (a) Kiristtoosi 1914⁠ppe doommidi kawo gididi oottiyoobaa Geeshsha Maxaafay waati qonccissii? (b) Kiristtoosi kawoti simmidi ay oottidee?

KIRISTTOOSI 1914n Yihoowa Kawotettau Mase Kawo gidiis. Nuuni haˈˈi a aybidan qoppiyoo? Gubaaˈe giddon hanettiyaabaa beˈanau wodiyaappe wodiyan saˈaa xeelliiddi ba araatan uttidi qoppiya kawoo? Nuuni hegaadan qoppiyaaba gidikko, nu qofaa laammana koshshees. Mazamurenne Ajjuutaa maxaafan i, paraa toggidi, “xooniiddinne qassikka xoonanau” kiyidi, olaa wurssi “xoonanau” paraa piriixissiya wolqqaama kawodan qoncciis.—Ajj. 6:2; Maz. 2:6-9; 45:1-4.

² Kiristtoosi kawoti simmidi koyro oottidobay, ‘miimminttiyaanne a kiitanchata’ xoonidoogaa. Ba kiitanchata azaziya halaqaa Mikaaˈeela gidiyoogaadan, Kiristtoosi Seexaanaanne daydanttata geeshsha saluwaappe olidi, saˈaa heeran deˈanaadan oottiis. (Ajj. 12:7-9) Hegaappe simmidi, “maachchaa kiitaa ekkidi yiya” Yihoowa kiitanchaa gididi, Yesuusi ba Aawaara ayyaana beeta maqidasiyaa xomoosanau yiis. (Mil. 3:1) ‘Gita Baabilooni’ shaaho gidida, bana Kiristtaane giya tuna haymaanootiyaa suuttaa gussidoogaa gishshaunne ha alamiyaa polotikaa haaruwaara ayyaanaaban shaaramuxido gishshau o pirddiis.—Ajj. 18:2, 3, 24.

 Saˈan Deˈiya Ba Ashkkarata Geeshshiyoogaa

3, 4. (a) Yihoowa ‘kiitancha’ gidiyoogaadan, Kiristtoosi ayba ooso oottidee? (b) Beeta maqidasiyaa xomoosiyoogee ay qonccissidee, gubaaˈiyau Huuphe gidiyoogaadan, Yesuusi oona sunttidee?

³ Yihoowaynne a ‘kiitanchay’ xomoosido wode, banttana Kiristtaane giya woosa keettatu shaaho gidenna, ayyaana beeta maqidasiyau saˈaa dabaaban tumu Kiristtaanetu citay deˈiyoogee qoncciis. Gidikkokka, ayyaanan tiyettida Kiristtaanetikka, woy ‘Leewa zaretikka’ geeyana koshshiis. Hegee hananabaa yootiya Milkkiyaasi: “I [Yihooway] biraanne worqqaa geeshshiyaagaadaaninne tigiyaagaadan uttidi, Leewa zareta geeshshana; eti GODAASSI likke yarshshuwaa yarshshana gakkanaashin, i eta geeshshana” yaagidi kaseti yootidoogaara moggiyaaba. (Mil. 3:3) Yihooway he ayyaana Israaˈeelata geeshshanau ba “maachchaa kiitaa ekkidi yiya,” Kiristtoos Yesuusa goˈettiis.

⁴ Ayyaanan tiyettida, ha ammanettida Kiristtaaneti ammaniya asau koshshiya wodiyan ayyaanaa qumaa immanau banttau danddayettida ubbaa oottiyoogaa Kiristtoosi akeekiis. Injjetin injjetana xayin, eti 1879⁠ppe doommidi, Xoossaa Kawotettaabaa yootiya Geeshsha Maxaafaa tumaa, ha maxeetiyan qonccissiiddi takkidosona. Yesuusi ba keettaa asaa xomoosanau ‘wodiyaa wurssettan’ ‘yiyo’ wode, issi ashkkaray “qumaa koshshiyo wodiyan” etau immishin demmanaagaa kasetidi yootiis. He ashkkaraa i anjjettidaagaa gaana; qassi saˈan deˈiya, “babaa ubbaa bolli sunttana.” (Maa. 24:3, 45-47) Kiristtaane gubaaˈiyau Huuphe gidiyoogaadan, Kiristtoosi ha ‘ammanettida wozannaama ashkkaray’ saˈan deˈiya, Ba Kawotettaa oosuwaara gayttidabaa ayssanaadan oottiis. I Bollaara Heemmiyaagaa baggaara ayyaanan tiyettida “ba so asau,” qassi eta lagge gidida ‘hara dorssatuyyo’ kaaletuwaa immees.—Yoh. 10:16.

Saˈaa Kattaa Cakkiyoogaa

5. Kiitettida Yohaannisi Mase kawoy ay oottiyoogaa ajjuutan beˈidee?

⁵ Mase Kawoy 1914n kawoti simmidi, “Godaa gallassan” oottiyo harabaakka kiitettida Yohaannisi ajjuutan beˈiis. Yohaannisi: “Qassikka taani be7aas. Be7⁠ite. Bootta shaarai de7⁠ees. SHaaraa bollan Asa Na7aa milatiyaagee uttiis; a huuphiyan worqqa akiliilee, qassi a kushiyan qara baacai de7⁠ees” yaagiis. (Ajj. 1:10; 14:14) ‘Saˈaa kattay melido’ gishshau, he Cakkiyaagee ba baacaa yeddanaadan Yihooway kiittido issi kiitanchay yootishin Yohaannisi siyiis.—Ajj. 14:15, 16.

6. Yesuusi aybi hananaagaa yootidee?

⁶ Ha ‘saˈaa kattaa cahay’ Yesuusi yootido, gisttiyaanne zardduwaa leemisuwaa hassayissees. Loˈˈo gisttiyaa cakkanau gisttiyaa ba goshshan zeriya uran Yesuusi bana leemissiis; he gisttee ‘kawotettaa naata’ woykko aara a Kawotettan haaranau ayyaanan tiyettida tumu Kiristtaaneta malaatees. SHin morkkee, ‘xalahe halaqay,’ qammi ‘xalahe halaqaa naata,’  zardduwaa goshshan zeriis. Cakkiyo wodee, ‘wodiyaa wurssettay’ gakkanaashin gistteenne zarddoy issippe diccanaadan bochenna mala zerettaa zeridaagee ba ashkkarata azaziis. He wode, gisttiyaa zardduwaappe shaakkanaadan i ba kiitanchata kiittana.—Maa. 13:24-30, 36-41.

7. Kiristtoosi ‘saˈaa kattaa cahaa’ waatidi poliiddi deˈii?

⁷ Yohaannisi beˈido ajjuutaa poluwaa maaraadan, Yesuusi alame yuushuwan cakkiyo oosuwaa kaalettiiddi deˈees. ‘Saˈaa kattaa cahay,’ Yesuusi ‘gisttiyan’ leemisido, ‘kawotettaa naatuppe,’ 144, 000⁠ppe attidaageeta shiishshiyoogan doommiis. Tumu Kiristtaanetu giddooninne worddo Kiristtaanetu giddon deˈiya dummatettay Koyro Alamiyaa Olaappe simmin awudeegaappenne aaruwan qoncciis; saˈaa kattaa cahau naaˈˈantto shaahuwaa, giishin hara dorssata shiishshiyoogau hegee keehippe maaddiis. Hageeti ‘kawotettaa naata’ gidennan, eeno giidi Kawotettau haarettiya, “zawai bainna daro asaa” malaatoosona. Eti “zare ubbaappe, qommo ubbaappe, yara ubbaappenne dumma dumma biitta qaala ubbaappe” shiiqidosona. Eti Kiristtoos Yesuusinne aara saluwaa kawotettan haariya, 144,000 “geeshshati” ayssiyo Mase Kawotettau haarettoosona.—Ajj. 7:9, 10; Dane. 7:13, 14, 18.

Gubaaˈeta Kalettiyoogaa

8, 9. (a) Kiristtoosi gubaaˈetu ubbaa hanotaa xallaa gidennan, gubaaˈiyaa yametu ubbaa eeshshaakka xeelliyoogaa aybi qonccissii? (b) Sinttaa 28n qonccidaagaadan nuuni haakkana koshshiyo ‘Seexaanaa ciimma yohoy’ aybee?

⁸ Koyro xeetu layttaa M.L. gubaaˈetu ubban deˈiya ayyaanaabaa hanotaa Kiristtoosi ay keena akeekan xeelliyaakko aadhida huuphe yohuwan beˈida. Ha wodiyan, “maata ubbai saluwaaninne sa7an” imettido Kawo gididi, nuna Kaalettiyaagee Kiristtoosi alame yuushuwan deˈiya gubaaˈetanne eta cimata minnidi kaalettees. (Maa. 28:18; Qol. 1:18) Yihooway ayyaanan tiyettidaageetu gubaaˈiyan i “ubbaban huuphe gidanaadan” oottiis. (Efi. 1:22, NW) I gubaaˈiyau huuphe gidiyoogaadan, 100,000⁠ppe dariya Yihoowa Markkatu gubaaˈetun hanettiyaabi aybinne appe geemmenna.

⁹ Beni wode Tiyaaxiroona gubaaˈiyau Yesuusi: “Xoossaa Na7ai, tamaa lacuwaa milatiya aifee de7⁠iyoogee, . . . hagaadan yaagees. ‘Taani ne oosuwaa, . . . erais’” yaagidi kiittiis. (Ajjuutaa 2:18, 19) I he gubaaˈiyaa yameta shori baynna eta deˈuwaanne yaare duussaa gishshau: “Taani asa qofanne amo eriyaagaa gidiyoogaa erana; taani intteyyo intte oosuwaa malaa immana” yaagidi seeriis. (Ajj. 2:23) Kiristtoosi gubaaˈetu hanotaa xeelliyoogaa xalla gidennan, gubaaˈiyaa yametu ubbaa eeshshaakka xeelliyoogaa hegee bessees. Yesuusi Tiyaaxiroona gubaaˈiyan deˈiya “Seexaanaa ciimma yohuwaa” tamaaribeenna Kiristtaaneta galatiis. (Ajj. 2:24) Ha wodiyankka, Intternneetiyaa, makkalabaa bessiya biiduwaa kaassaa woy shori baynna asa qofaa baggaara gakkiya, “Seexaanaa ciimma” yohuwaappe haakkiya yelagata woy cimata i galatees. Bantta deˈo macara ubban a kaaletuwaa kaallanau banttau danddayettida ubbabaa oottiya, ha wodiyan deˈiya daro Kiristtaaneti baaxetiyoobaanne yarshshiyoobaa i beˈiyo wode ay keena ufayttii!

10. Kiristtoosi gubaaˈiya cimata kaalettiyoogee aybin leemisettidee, shin eti ay akeekana koshshii?

¹⁰ Kiristtoosi saˈan deˈiya ba gubaaˈeta sunttettida cimatu bagaara siiquwan kaalettees. (Efi. 4:8, 11, 12) Koyro xeetu layttan deˈiya gubaaˈe cimati ubbay ayyaanan tiyettidaageeta. Ajjuutaa maxaafan, eti Kiristtoosa ushacha kushiyan deˈiya xoolinttetudan qonccidosona. (Ajj. 1:16, 20) Ha wodiyan gubaaˈe cimatuppe daroti hara dorssata. Eti woosaaninne geeshsha ayyaanaa kaaletuwan sunttettidosona; yaatiyo gishshau, etikka Kiristtoosa kaaletuwaa kaalliyoogaadan qoppana danddayoos. (Oos. 20:28) Gidoppe attin, Kiristtoosi saˈan deˈiya ba erissiyo ashkkarata kaalettanau ayyaanan tiyettida Kiristtaane attuma asatuppe  amaridaageeta, Bollaara Heemmiyaagaa oottidi goˈettiyoogaa eti akeekoosona.—Oosuwaa 15:6, 28-30 nabbaba.

“Godaa Yesuusaa, Neeni Haaya”

11. Nuna Kaalettiyaagee eesuwan yaanaadan nuuni amottiyoy aybissee?

¹¹ Kiitettida Yohaannisi beˈido ajjuutan, Yesuusi eesuwan yaanaagaa darotoo yootiis. (Ajj. 2:16; 3:11; 22:7, 20) I ba yuussay Gita Baabilooni bollinne attida Seexaanaa iita siraataa bolli pirddanaassa gidiyoogaa yootidoogee qoncce. (2 Tas. 1:7, 8) Kasetidi odettida maalaalissiyaabay ubbay polettiyoogaa beˈanau amottido gishshau, cimida kiitettida Yohaannisi: “Amin77⁠i. Godaa Yesuusaa, neeni haaya” yaagiis. Ha iita siraataa wurssettan deˈiya nuunikka, nuna Kaalettiyaageenne nu Kawoy ba Aawaa sunttaa bonchissanaunne I ubbabaa haariyaagaa gidiyoogaa boxooxissanau Kawotettaa maatan yiyo wode beˈanau amottoos.

12. Kiitanchati bashshaa carkkuwaa yeddanaappe kase, Kiristtoosi ayba oosuwaa polanee?

¹² Yesuusi Seexaanaa siraataa xayssanau yaanaappe kase, 144,000 ayyaana Israaˈeela yametuppe attidaageetun wurssetta maatafay wodhees. Ha 144,000⁠tun maatafay wodhidi wuranaappe kase, Seexaanaa siraataa xayssiya carkkuwaa kiitanchati yeddennaagaa Geeshsha Maxaafay qoncciyan yootees.—Ajj. 7:1-4.

13. ‘Iita waayiyaa’ doomettaa wode Kiristtoosi ba yuussaa waatidi qonccissanee?

¹³ Kiristtoosi 1914n ‘yiidoogaa’ saˈan deˈiya daroti akeekibookkona. (2 PHe. 3:3, 4) Gidikkokka, matan i Seexaanaa siraataa dumma dumma kifiletu bolli Yihoowa pirddaa poliyo wode, ba yuussay qonccanaadan oottana. “Makkalanchchai,” giishin Kiristtaane giyo haymaanootiyaa kaalettiyaageeti xayiyoogee a ‘yuussaa’ qonccissiyaaba gidana. (2 Tasalonqqe 2:3, 8 nabbaba.) Kiristtoosi Yihooway sunttido, Pirddiyaagaa gididi oottiyoogaa doommidoogau hegee mino naqaasha gidana. (2 Ximootiyoosa 4:1 nabbaba.) Gita Baabilooni shaaho gidida, bana Kiristtaane giya tuna haymaanootiyaa muleera xayiyoogee alamiyan deˈiya worddo haymaanootee ubbay xayiyoogau doometta gidana. Ha shaaramuxiyo xayssana mala polotikan haariyaageetu wozanan Yihooway amuwaa wottana. (Ajj. 17:15-18) Hegee ‘iita waayiyau’ koyro shaaho gidana.—Maa. 24:21.

14. (a) Iita waayiyaa koyro shaahuwaa gallassay guuxxiyoy aybissee? (b) “Asa Na7aa malaatai” Yihoowa asay waananaadan oottanee?

¹⁴ He waayiyaa gallassatu qooday “ba doorido asatu gishshau,” saˈan attida ayyaanan tiyettida Kiristtaanetu gishshau guuxxanaagaa Yesuusi yootiis. (Maa. 24:22) Worddo haymaanootiyaa xayssiyo wode, ayyaanan tiyettida Kiristtaanetinne eta lagge gidida hara dorssati xayanaadan Yihooway paqqadenna. Yesuusi gujjidi, “he wode waayiyaappe guyyiyan” awa ayfiyaaninne aginan, xoolinttiyan malaatay beettanaagaa, qassi “Asa Na7aa malaatai, saluwan” beettanaagaa yootiis. Hegee “sa7an he wode de7⁠iya asa zare ubbai” yeekkanaadan oottana. SHin saluwaa hidootay deˈiyo, ayyaanan tiyettidaageetinne saˈaa hidootay deˈiyo, eta laggeti yeekkokkona. He wode ‘eti wozettiyo wodee matiyo gishshau, xoqqu giidi pude xeellana.’—Maa. 24:29, 30; Luq. 21:25-28.

15. Kiristtoosi yiyo wode ay oottanee?

¹⁵ Asa Naˈay ba xoonuwaa polanaappe kase, hara ogiyankka yaana. I hagaadan giidi hananabaa yootiis: “Taani, Asa Na7ai, kiitanchcha  ubbatuura bonchchuwan yiyo wode, ta bonchcho kawotaa araatan uttana. Sa7an de7⁠iya asai ubbai ta sintti shiiqana; heemmiyaagee dorssata deeshshatuppe shaakkiyoogaadan, taani he asaa naa77⁠u kessada shaakkana. Qassi dorssata taappe ushachcha baggaara essada, deeshshata taappe haddirssa baggaara essana.” (Maa. 25:31-33) Hegee Kiristtoosi ‘asa ubbaa’ naaˈˈu citan shaakkidi pirddanau yaanaagaa malaatees: ‘dorssati,’ ayyaanaaban a ishata (saˈan deˈiya ayyaanan tiyettida Kiristtaaneta) kaafiyaageeta, qassi ‘deeshshati,’ “nu Godaa Yesuus Kiristtoosa wonggeliyaa mishiraachchuwaayyo azazettennaageeta” malaatoosona. (2 Tas. 1:7, 8) ‘Xillo’ geetettida dorssati saˈan ‘merinaa deˈuwaa’ demmana; qassi deeshshati ‘merinau qaxxayettana’ woykko xayana.—Maa. 25:34, 40, 41, 45, 46.

Yesuusi Ba Xoonuwaa Polees

16. Nuna Kaalettiyaagee, Kiristtoosi ba xoonuwaa waatidi polanee?

¹⁶ Banaara kawotiyaageeti ubbay attamettoogaappenne dorssati shaahettidi, bashshaappe attanau ayyo ushacha baggan eqqoogaappe guyyiyan, Kiristtoosi wurssi “xoonanau” kiyana danddayees. (Ajj. 5:9, 10; 6:2) I wolqqaama kiitanchatanne hayquwaappe denddida ba ishata kaalettiiddi, Seexaanay essido polotika, wotaaddaranne zalˈˈe dirijjitiyaa ubbaa xayssana. (Ajj. 2:26, 27; 19:11-21) Kiristtoosi Seexaanaa iita siraataa xayssiyo wode, a xoonoy polettana. Hegaappe simmin, i Seexaanaanne daydanttata issi shaˈu layttau ciimma ollan yeggana.—Ajj. 20:1-3.

17. Kiristtoosi ba SHaˈu Layttaa Haaruwaa wode, ba hara dorssata aybaayyo kaalettanee, nu murttee ayba gidana koshshii?

¹⁷ Iita waayiyaappe attiya, hara dorssata woykko “zawai bainna daro asaa” xeelliyaagan kiitettida Yohaannisi: “Kawotaa araataayyo gidduwan uttida Dorssai eta heemmana. De7⁠o haattaa pulttuwaakkokka eta kaalettana” yaagidi kaseti yootiis. (Ajj. 7:9, 17) Ee, Kiristtoosi ba SHaˈu Layttaa Haaruwaa wode ubban, i giyoobaa wozanappe siyiya, hara dorssata kaalettiyoogaa aggenna; qassi merinaa deˈuwau eta kaalettana. (Yohaannisa 10:16, 26-28 nabbaba.) Haˈˈi gidin Yihooway qaalaa gelido ooratta alamiyan gidin, kawo gididi nuna Kaalettiyaagaa ammanettidi kaalliyaageeta gidoos!

Zaarettanau

• Kiristtoosi kawoti simmidi ay oottidee?

• Saˈan deˈiya gubaaˈiyaa kaalettanau Kiristtoosi oona goˈettii?

• Kiristtoosi, nuna Kaalettiyaagee yaana hara ogeti awugeetee?

• Kiristtoosi nuna ooratta alamiyan kaalettanay ayba ogiyaanee?

[Oyshata]

[Sinttaa 31n deʼiya misiliyaa]

Seexaanaa iita siraataa xayoy Kiristtoosa yuussaa qonccissana