Kiristtaanetu Issippetettay Xoossaa Bonchissees

“Geeshsha Ayyaanai intteyyo immiyo issippetettaa naaganau minnite.”—EFI. 4:3.

1. Koyro xeetu layttan Efisoonan deˈida Kiristtaaneti Xoossaa waati bonchissidonaa?

BENI Efisoona gubaaˈiyan deˈiya issippetettay tumu Xoossaa, Yihoowa bonchissiis. Zalˈˈiyan erettida he dure kataman issi issi ishati aylliyaa haariya dure gidiyo wode, harati ayllenne manqqo gidennan aggokkona. (Efi. 6:5, 9) Issoti issoti kiitettida PHauloosi eta woosa keettan heezzu aginau tamaarissido wode tumaa erida Ayhudata. Harati qassi kase Arxxemiiso giyo eeqa xoosseeyyo goynniyaageetanne bitiyaageeta. (Oos. 19:8, 19, 26) Tumu Kiristtaanetu ammanoy dumma dumma hanotan deˈida asaa giddon issippetettay deˈanaadan oottidoogee qoncce. Gubaaˈiyaa issippetettan Yihooway bonchettidoogaa PHauloosi akeekiis. I: ‘Xoossaayyo gubaaˈiyan bonchoy gido’ yaagidi xaafiis.—Efi. 3:21.

2. Efisoona Kiristtaanetu issippetettaa mooriya aybi merettidee?

 ² Gidikkokka, Efisoona gubaaˈiyaa loˈˈo issippetettaa mooriyaabay merettiis. PHauloosi gubaaˈiyaa cimata: “Kaalliyaageetakka bantta geeduwaa kaalettanau wordduwaa haasayiya asati [eta] giddoppe denddanaagaa” akeekissiis. (Oos. 20:30) Issi issi ishati PHauloosi yootido, ‘azazettenna asaa haariya,’ shaahotetta medhiya qofaa kaalliyoogaa aggibookkona.—Efi. 2:2; 4:22.

Issippetettaa Loytti Qonccissiya Dabddaabbiyaa

3, 4. PHauloosi Efisoona gubaaˈiyau xaafido dabddaabbee issippetettaa waatidi qonccissii?

³ Kiristtaaneti issippetettan moggidi deˈanau koyikko, issippetettau ubbay wozanappe baaxetana bessiyoogaa PHauloosi akeekiis. Waanna qofay issippetettaa gidido dabddaabbiyaa Efisoona gubaaˈiyau xaafanaadan Xoossay PHauloosa denttettiis. Leemisuwau, PHauloosi Xoossaa halchoy “Kiristtoosa waanna oottidi, . . . ubbaa issippe aani shiishshanaagaa” gidiyoogaa xaafiis. (Efi. 1:10) I Kiristtaaneti, issi keettaa keexxiyo dumma dumma shucha mala gidiyoogaakka yootiis. ‘Keettaa ubbay issippe shiiqi oyqettidi, Xoossaa baggaara geeshsha beeta maqidase gidana mala diccees.’ (Efi. 2:20, 21) Qassikka, PHauloosi Ayhudanne Ayhuda gidenna Kiristtaanetu issippetettaa qonccissiis; ubbaakka medhidaagee Xoossaa gidiyoogaakka ishantta akeekissiis. Yihooway “saluwaaninne sa7an de7⁠iya ammaniya keetta asai ubbai aani sunttettido” Aawaa gidiyoogaa PHauloosi yootiis.—Efi. 3:5, 6, 14, 15.

⁴Efisoona shemppo 4 nuuni pilggiyo wode, issippetettau baaxetiyoogaa koshshiyoy aybissakko, issippetettay deˈanaadan Yihooway waati maaddiyaakko, qassi issippetettan deˈanau ay mala xeelaa oyqqiyoogee maaddiyaakko beˈana. Xinaatiyaappe daro goˈˈaa demmanau kumetta shemppuwaa ayssi nabbabekketii?

Issippetettau Wozanappe Baaxetana Koshshiyoy Aybissee?

5. Xoossaa kiitanchati issippetettan oottana danddayiyoy aybissee, shin issippetettaa medhiyoogee nuussi keehippe metana danddayiyoy aybissee?

⁵ PHauloosi Efisoonan deˈiya ba ishati “Geeshsha Ayyaanai [etayyo] immiyo issippetettaa naaganau” minnana mala woossiis. (Efi. 4:3) Hegaa xeelliyaagan baaxetana koshshiyoogaa akeekanau, Xoossaa kiitanchatu hanotaa qoppite. Issi mala gidida naaˈˈu mereti saˈan deˈenna; hegaa gishshau, Yihooway miilooniyan qoodettiya ba kiitanchati dumma dumma gidanaadan oottidi medhiis giyoogee bessiyaaba. (Dane. 7:10) Gidikkokka, eti ubbay Yihooway giyoobaa siyiyo gishshaunne a sheniyaa oottiyo gishshau, ayyo issippetettan oottana danddayoosona. (Mazamure 103:20, 21 nabbaba.) Kiitanchatussi Kiristtaanetuugaadan dumma dumma eeshshay deˈiyaaba gidikkonne, Kiristtaanetussi daro pacay deˈees. Hegee issippetettaa medhiyoogee keehi metanaadan oottees.

6. Nuugaappe dummatiya pacay deˈiyo ishatuura hashetiyoogan ufayttanaadan nuna maaddiya eeshshati awugeetee?

 ⁶ Polo gidenna asay hashetanau maliyo wode, sohuwaara metoy merettana danddayees. Leemisuwau, darotoo keerido saatiyan gakkenna issi ashkke ishay, keerido saatiyan gakkiyaanne eesuwan yiillotiya hara ishaara Yihoowau oottiyaaba gidikko shin? Naaˈˈaykka issoy issuwaa eeshshan pacay deˈiyoogaa qoppana danddayoosona; shin banttaukka bessenna eeshshay deˈiyoogaa dogana danddayoosona. Hegaa mala naaˈˈu ishati waanidi moggotti oottana danddayiyoonaa? PHauloosi kaallidi yootido eeshshati eta waatidi maaddanaakko akeekite. Nuuni he eeshshata dichiyoogan issippetettaa waatidi minttana danddayiyaakko qoppite. PHauloosi: “Bessiya de7⁠uwaa intte de7anaadan, taani inttena woossais. Ubba wode intte intte huuphiyaa kaushshiyaageeta, ashkketanne danddayanchchata gidite; issoi issuwaa maaddiyoogan intte siiquwaa bessite. Inttena issippe gatti qachchiya sarotettan, Geeshsha Ayyaanai intteyyo immiyo issippetettaa naaganau minnite” yaagidi xaafiis.—Efi. 4:1-3.

7. Polo gidenna Kiristtaanetuura issippetettaa medhanau baaxetiyoogee koshshiyaabaa gididoy aybissee?

⁷ Tumuppe goynniyaageeti issi bolla mala gidido gishshau, polo gidenna hara asaara Xoossau issippetettan oottiyoogaa tamaariyoogee keehippe koshshiyaaba. “Xoossai inttena xeesido ufaissai, intte demmana giidi naagi uttidoogee mexi issuwaa giyoogaadan, issi asatettainne issi Geeshsha Ayyaanai de7⁠ees. Issi Godai, issi ammanoinne issi xinqqatee de7⁠ees. . . . Issi Xoossai, ubbaa Aawai de7⁠ees.” (Efi. 4:4-6) Yihoowa ayyaanaynne a anjjoti, Xoossay goˈettiyo issi ishanttu maabaraara gayttidaba. Gubaaˈiyan issi uri nuna yiilloyiyaaba gidikkokka, awu baana danddayiyoo? Merinaa deˈuwaa qaalaa siyiyo hara sohoy baawa.—Yoh. 6:68.

“Imota” Gidida Attuma Asati Issippetettaa Minttettoosona

8. SHaahotettaa medhiyaabaa eqettanaadan nuna minttettanau Kiristtoosi ay goˈettii?

⁸ Gubaaˈiyaa issippetettaa kaafana mala attuma asaa Yesuusi “imota” oottidi immido ogiyaa qonccissanau, beni wode wotaaddaratuura gayttidaagan meeze gididabaa PHauloosi goˈettiis. Olan xoonida issi wotaaddaray, ba machiyo oosuwan maaddana mala, aylle gidanaadan omooddido uraa soo ekkidi yees. (Maz. 68:1, 12, 18) Hegaara issi mala hanotan, eeno giidi azazettiya daro aylleta Yesuusi alamiyaa xooniyoogan demmiis. (Efisoona 4:7, 8 nabbaba.) He omooddidoogeeta i waati goˈettidee? “Asaayyo imo immidaagee a; i issoota issoota Yesuusi kiittidoogeeta, harata hananabaa yootiyaageeta, qassi harata wonggeliyaa mishiraachchuwaa yootiyaageeta, qassikka harata woosa keettaa kaalettiyaageetanne tamaarissiyaageeta ootti sunttiis. I hegaa geeshshati ubbai ammaniya asa ooso oottanaadaaninne Kiristtoosa  bollaa keexxanaadan giigissanau oottiis. Qassi nuuni ubbai Xoossaa Na7aa ammaniininne erin beettiya issippetettaakko gakkana.”—Efi. 4:11-13.

9. (a) “Imota” gidida attuma asati nuuni issippetettaa naagidi deˈanaadan waati maaddiyoonaa? (b) Gubaaˈiyan deˈiya ubbay issippetettau maaddiyaabaa oottana koshshiyoy aybissee?

⁹ Ha “imota” gidida attuma asati siiqiya henttancha gidiyoogaadan, nuuni issippetettaa naagidi deˈanaadan maaddoosona. Leemisuwau, naaˈˈu ishantti “issoi issuwaa yiilloyiyoogaa” gubaaˈiyaa cimay akeekikko, ‘ashkketetta ayyaanan eta suurissanau’ zoriyoogan gubaaˈiyaa issippetettau gitabaa oottana danddayees. (Gal. 5:26–6:1) Ha “imota” gidida attuma asati tamaarissiyaageeta gidiyoogaadan, Geeshsha Maxaafaa timirttiyan nu ammanuwaa minttanaadan maaddoosona. Yaatiyoogan, eti issippetettaa minttettoosonanne nuuni wozannaama Kiristtaane gidanaadan maaddoosona. “Nuuni beetan yaanne haanne shocettidi, bantta cimo hanotan asaa bala ogiyaa kaalettiya gene asaa timirtte carkko ubban sugettidi, hagaappe sinttau na7a” gidennaadan hegee maaddiyoogaa PHauloosi yootiis. (Efi. 4:13, 14) Nu bollaa qommoti koshshiyaabaa kunttanau ubbay issoy issuwaara maadettiyoogaadan, ubba Kiristtaanetikka ishanttu maabaraa issippetettau maaddiyaabaa oottana koshshees.—Efisoona 4:15, 16 nabbaba.

Ooratta Ogiyan Qoppiyoogaa Meezetite

10. Yeelli baynnabaa oottiyoogee nu issippetettaa waatidi moorana danddayii?

¹⁰ Wozannaama Kiristtaane gididi issippetettan deˈanau siiqiyaageeta gidiyoogee keehippe koshshiyoogaa PHauloosi Efisoona gubaaˈiyau xaafido dabddaabbiyan oyddantta shemppoy qonccissiyoogaa akeekidetii? Qassi, siiqoy ay gujjiyaakkokka he dabddaabbee qonccissees. Leemisuwau, siiqiyaageeta gidiyoogee bessenna asho gaytotettaanne yeelli baynnabaa polanaadan oottenna. PHauloosi ba ishata ‘Ayhuda gidenna asatudan deˈenna mala’ zoriis. He asati “yeella giyoobi” baynnaageeta; qassi eti shori baynnabaa haniyaageeta. (Efi. 4:17-19) Yeella giyoobi baynna, nuuni deˈiyo alamee nu issippetettaa moorana danddayees. Bessenna asho gaytotettaabaa asay qirees, yexxees, wodiyaa aattiyoosan beˈees; qassi geeman woy qoncciyan hegaa polees. SHin machanau woy gelanau koyennan issi uraa lambbeechiyoogeekka, Yihoowappenne gubaaˈiyaappe haassana danddayees. Aybissi? Bessenna asho gaytotettaa polanaadan oottiyo gishshataassa. Lambbeechiyoogee aqo oyqqidi deˈiya uray wodiraa laammanaadan oottees; hegee yelidaageetuppe eta naata, qassi mooribeenna aqo laggiyaa a aqo laggiyaappe shaakkana danddayees. Tumukka shaahotetta medhiyaaba! PHauloosi: “Intte Kiristtoosabaa hegaadan tamaaribeekketa” gaanau bessiya gaasoy deˈees!—Efi. 4:20, 21.

11. Kiristtaaneti ayba laamiyaa oottanaadan Geeshsha Maxaafay minttettii?

¹¹ Nuuni iita qofaa aggidi haratuura moggidi deˈanaadan maaddiya qofaa dichanaadan PHauloosi minttettiis. I: “Intte kase de7⁠iyo de7⁠uwaa aggite; qassi ba cimmiya amuwan xayiya intte ceega asatettaa xaissite. Intte wozanainne qofai muleera ooraxxanau bessees. Tumu xillotettaaninne geeshshatettan Xoossaa leemisuwan merettida ooratta asatettaa maayite” yaagiis. (Efi. 4:22-24) Nu ‘wozanaynne qofay muleera ooraxxanaadan’ waatana danddayiyoo? Xoossaa Qaalaappenne wozannaama Kiristtaanetu loˈˈo leemisuwaappe nuuni tamaaridobaa nashshiyoogan wotti denttidi qoppikkonne baaxetikko, “Xoossaa leemisuwan merettida ooratta asatettaa” maayana danddayoos.

Ooratta Ogiyan Haasayiyoogaa Meezetite

12. Tumaa haasayiyoogee issippetettay deˈanaadan waati maaddii, issi issi asay tumaa haasayanau metootiyoy aybissee?

¹² Son woy gubaaˈiyan issippe deˈiyaageeti  tumaa haasayiyoogee keehippe koshshees. Tumabaa, qonccenne keha haasayaa haasayiyoogee asaa giddon issippetettay deˈanaadan oottees. (Yoh. 15:15) Issi uri ba ishau wordduwaa yootikko shin? Hegaa a ishay eriyo wode, a siriyoogaa doommees. PHauloosi: “Nuuni ubbai Kiristtoosa asatettan issi asa gidiyo gishshau, asai ubbai ba ishau tumaa haasayanau bessees” giidoy aybissakko akeekana danddayeeta. (Efi. 4:25) Geella naatettaappe doommidi gidana danddayees, worddotiyoogaa meezetida issi uri, tumaa haasayanau metootana danddayees. SHin i hegaa agganau baaxetiyoogaa Yihooway nashsheesinne a maaddees.

13. Cashshaa aggiyoogee ay ay gujjii?

¹³ Haasayiyo wode naagettiyoogan gubaaˈiyaaninne son bonchuwaaninne issippetettan nuuni deˈanaadan Yihooway tamaarissees. Intte doonaappe “iita qaalai mulekka kiyoppo. Ixo hanotettaa, yiilluwaa, hanqquwaa, waasuwaanne cashshaa ubbaa iitatetta ubbaara intteppe xaissite.” (Efi. 4:29, 31) Yiilloyiya haasayaa aggana danddayiyo issi ogee, kaseegaappe aaruwan harata bonchanau qoppiyoogaa. Leemisuwau, ba keettaayyiyo cayiya uri o xeelliyo hanotaa laammanau baaxetana koshshees; ubba qassi Yihooway macca asaa bonchiyoogaa eriyo wode, hegaadan oottanau baaxetana koshshees. Xoossay ubba issi issi macca asaa Kiristtoosaara kawo gididi haaranaadan geeshsha ayyaanan tiyiis. (Gal. 3:28; 1 PHe. 3:7) Hegaadankka, ba keettaawaa bolli darotoo waassiya maccaasiyaa, asay a baceessido wode Yesuusi danddayidoogaa eriyo wode, laamettanau qoppana bessees.—1 PHe. 2:21-23.

14. Hanqqettiyoogee metuwaa kaalettiyoy aybissee?

¹⁴ Cashshau matattiya hara eeshshay hanqquwan suulliyoogaa. Hegeekka issippetettan deˈiya asaa shaakkana danddayees. Hanqqoy tama mala. Hanqqoy teqettennan ixxidi, metuwaa kaalettana danddayees. (Lee. 29:22) Bessiya gaasuwan, issiban ufayttibeennaagaa yootiya urikka hanqqettidi haratuura deˈiya alˈˈo issippetettaa moorennaadan naagettana bessees. Kiristtaaneti lancciyoogaappe, qassi he allaalliyaa zaari zaaridi yootiyoogaappe, atto giyaageeta gidanau baaxetana koshshees. (Maz. 37:8; 103:8, 9; Lee. 17:9) PHauloosi Efisoona Kiristtaaneta: “Hanqqettite; shin intte hanqquwan nagaraa oottoppite. Intte hanqqetti uttidaashin, awai wulloppo. Xalahe halaqaayyo soho immoppite” yaagidi zoriis. (Efi. 4:26, 27) Issi uri yiilluwaa teqqennaagee Dabloosi gubaaˈiyan shaahotettaa medhanaadan, ubba qassi ooshshaa denttanaadan oottees.

15. Nubaa gidennabaa ekkiyoogee ay kaalettana danddayii?

¹⁵ Haratubaa wuuqqennaagee, gubaaˈiyau issippetettay deˈanaadan maaddees. Geeshsha Maxaafay: “Wuuqqiya urai hagaappe sinttau wuuqqoppo” yaagees. (Efi. 4:28) Xaaxi waaxi xeelliyo wode, Yihoowa asay issoy issuwaa ammanees. He ammanettiyo hanotaa bessenna ogiyan goˈettidi, issi Kiristtaanee babaa gidennabaa ekkikko, he ufayssiya issippetettaa moorees.

Xoossaa Siiqiyoogee Nuussi Issippetettay Deˈanaadan Oottees

16. Nu issippetettaa minttanau minttettiya loˈˈo haasayaa waatidi goˈettana danddayiyoo?

¹⁶ Kiristtaane gubaaˈiyaa issippetettay, ubbay Xoossaa siiqiyoogaappe denddidaagan harata siiqiyoogan beettiyaaba. Yihoowa kehatettaa nashshiyoogee nuuni kaallidi deˈiya zoriyaa oosuwan peeshshanau wozanappe baaxetanaadan denttettees: “Siyiyaageeta go77ana mala, koshshiyoogaadan minttettiya lo77⁠o qaalai intte doonaappe [kiyo]. . . . Issoi issuwaayyo kehitenne qarettite; qassi Xoossai Kiristtoosa baggaara intteyyo atto giidoogaadan, inttekka issoi issuwaayyo atto giite.” (Efi. 4:29, 32) Yihooway nu mala polo gidenna asaa kehatettan atto gees. Nuunikka haratu pacaa akeekiyo wode atto gaana koshshennee?

17. Issippetettau maaddiyaabaa oottanau nuuni wozanappe baaxetana koshshiyoy aybissee?

¹⁷ Xoossaa asaa giddon deˈiya issippetettay Yihoowa bonchissees. Issippetettau maaddiyaabaa oottana mala a ayyaanay nuna dumma dumma ogiyan denttettees. Ayyaanaa kaaletuwaa nuuni eqettanau koyennaagee qoncce. PHauloosi: “Xoossaa Geeshsha Ayyaanaa azzanissoppite” yaagidi xaafiis. (Efi. 4:30) Issippetettay naagana koshshiyo alˈˈoba. Issippetettan deˈiya ubbata hegee ufayssees; qassi Yihoowakka bonchissees. “Simmi Xoossai siiqiyo naatudan, a milatite. Qassi . . . inttekka siiquwan de7anau bessees.”—Efi. 5:1, 2.

Woygada Zaaruutii?

• Kiristtaanetu giddon issippetettay deˈanaadan oottiya eeshshati awugeetee?

• Nu deˈuwaa hanotay gubaaˈe giddon issippetettay deˈanaadan waatidi maaddii?

• Haratuura hashetanau nu haasayay waatidi maaddana danddayii?

[Oyshata]

[Sinttaa 19n deʼiya misiliyaa]

Kase dumma dumma hanotan deˈidaageeti issuwaa gididosona

[Sinttaa 20n deʼiya misiliyaa]

Lambbeechiyoogee kaalettiyo daafaa akeekay?